CATEGORY
ព័ត៌មានជាតិ
ក្រុមមន្ត្រីនិយាយកាលពីថ្ងៃសុក្រថា គណៈកម្មការសិទ្ធិមនុស្សនៃរដ្ឋសភា បានជួបជាមួយលោក សាយ សំអាល់ រដ្ឋមន្ត្រីក្រសួងបរិស្ថាន ដើម្បីផ្តល់អនុសាសន៍ឲ្យរដ្ឋាភិបាលពិនិត្យមើលឡើងវិញនូវដីសម្បទានឯកជនរបស់ក្រុមហ៊ុនចំនួនបួន ដែលមានវិវាទជាមួយអ្នកភូមិនៅក្នុងខេត្តកោះកុង។
កាលពីខែមុន គណៈកម្មការនេះបានចុះទៅពិនិត្យមើលស្ថានភាពនៅសហគមន៍ចំនួនបួនក្នុងស្រុកស្រែអំបិល ស្រុកបទុមសាគរ និងស្រុកគិរីសាគរ ដែលមានវិវាទជាមួយក្រុមហុ៊ន Heng Huy Agricultural Group ក្រុមហ៊ុន Union Development Group និងក្រុមហ៊ុនពីរទៀត គឺក្រុមហ៊ុន Koh...
រដ្ឋមន្ត្រីក្រសួងមហាផ្ទៃបន្ទោសអភិបាលខេត្តតាកែវខ្លាំងៗ
កាលពីថ្ងៃសុក្រ លោក ស ខេង រដ្ឋមន្ត្រីក្រសួងមហាផ្ទៃបានបន្ទោសលោក ឡាយ វណ្ណៈ អភិបាលខេត្តតាកែវខ្លាំងៗចំពោះការរារាំងការហែក្បួនមួយដើម្បីទៅចូលរួមក្នុងទិវាសិទ្ធិមនុស្សអន្តរជាតិកាលពីសប្ដាហ៍មុន ហើយនេះជាការបន្ទោសមួយដ៏កម្រពីរដ្ឋមន្ត្រីក្រសួងមហាផ្ទៃរូបនេះ...
កាលពីថ្ងៃសុក្រ សាលាឧទ្ធរណ៍បានច្រានចោលសំណើសុំនៅក្រៅឃុំសម្រាប់លោក មាជ សុវណ្ណារ៉ា មន្ត្រីគណបក្សសង្គ្រោះជាតិដែលត្រូវបានឃាត់ខ្លួនកាលពីខែមុនពាក់ព័ន្ធហេតុការណ៍ប៉ះទង្គិចហិង្សាមួយនៅទីលានប្រជាធិបតេយ្យកាលពីថ្ងៃទី១៥ ខែកក្កដា និងលោក អ៊ុក ពេជ្រសំណាង ជាសកម្មជននយោបាយដែលត្រូវបានចាប់ខ្លួនពីបទបើករ៉ឺម៉កមូ៉តូកង់បីទម្លុះរបាំងសន្តិសុខអំឡុងការតវ៉ាមួយកាលពីខែតុលា។
លោក មាជ សុវណ្ណារ៉ា ដែលត្រូវបានចាប់ខ្លួននៅក្នុងរាជធានីភ្នំពេញកាលពីខែមុន បន្ទាប់ពីតុលាការចេញដីកាឃាត់ខ្លួនតាមការចោទប្រកាន់ពីបទ "ចូលរួមកុបកម្ម" បានមានប្រសាសន៍ថា លោកជឿថា សេចក្តីសម្រេចច្រានចោលសំណើសុំនៅក្រៅឃុំរបស់លោក គឺមានហេតុផលនយោបាយ។
បន្ទាប់ពីសវនាការជំនុំជម្រះ លោក មាជ សុវណ្ណារ៉ា ដែលនិយាយសំដៅដល់តំណាងរាស្ត្រជាប់ឆ្នោតប្រាំពីររូបរបស់គណបក្សប្រឆាំង និងមន្ត្រីគណបក្សសង្គ្រោះជាតិមួយរូបទៀតដែលត្រូវបានចាប់ខ្លួនបញ្ជូនទៅពន្ធនាគារព្រៃសកាលពីខែកក្កដា បានចោទសួរថា "អ្នកផ្សេងៗទៀតត្រូវបានចាប់ខ្លួននៅពេលនោះ ហេតុអ្វីបានជាដោះលេងពួកគេ ហើយនៅបន្តឃុំខ្លួនខ្ញុំ? នេះជាការសងសឹករបស់លោក ហ៊ុន សែន ប៉ុន្តែ ពួកគេអនុញ្ញាតឲ្យយើងប្តឹងទាស់ ដូច្នេះខ្ញុំ និងមេធាវីនឹងប្តឹងបន្តទៀត"។
ចៅក្រមជំនុំជម្រះ ឃុន លាងម៉េង បានមានប្រសាសន៍ថា សាលាឧទ្ធរណ៍បានសម្រេចមិនដោះលេងលោក មាជ សុវណ្ណារ៉ា ឲ្យនៅក្រៅឃុំទេ "ពីព្រោះ បានបិទការសើុបអង្កេតរបស់ខ្លួន ហើយបញ្ជូនសំណុំរឿងដើម្បីជំនុំជម្រះទៅហើយ"។
នៅក្នុងករណីដាច់ដោយឡែកមួយ សាលាឧទ្ធរណ៍ក៏បានច្រានចោលសំណើនៅក្រៅឃុំដែរសម្រាប់លោក អ៊ុក ពេជ្រសំណាង ដែលត្រូវបានចោទប្រកាន់ពីបទបំផ្លិចបំផ្លាញទ្រព្យសម្បត្តិសាធារណៈ និងបទរារាំងកិច្ចការរបស់អាជ្ញាធរ បន្ទាប់ពីគាត់បានបើករ៉ឺម៉កម៉ូតូកង់បីទម្លុះរបាំងដែករាំងផ្លូវនៅជិតភូមិគ្រឹះរបស់លោក ហ៊ុន សែន អំឡុងការតវ៉ាមួយជាមួយអ្នកភូមិពាក់ព័ន្ធនឹងវិវាទដីធ្លី។
បន្ទាប់ពីដើរចេញពីសវនាការជំនុំជម្រះបិទទ្វារ លោក អ៊ុក ពេជ្រសំណាង បាននិយាយថា "ខ្ញុំមិនខ្លាចទេ សកម្មភាពរបស់ខ្ញុំមិនមែនជាសកម្មភាពឧក្រិដ្ឋទេ"។
លោក លី សុចិត្រា មេធាវីរបស់លោក អ៊ុក ពេជ្រសំណាង បានបញ្ជាក់ថា លោកនឹងប្តឹងជំទាស់សេចក្តីសម្រេចេនះ ហើយថា តុលាការបានច្រានចោលសំណើសុំនៅក្រៅឃុំរបស់កូនក្តីលោកដោយសារបារម្ភខ្លាចកូនក្តីលោកប្រព្រឹត្តបទល្មើសជាថ្មីទៀត។
លោកបានមានប្រសាសន៍ទៀតថា "សាលាឧទ្ធរណ៍មិនបានសម្រេចដោះលែងគាត់ឲ្យនៅក្រៅឃុំទេ ពីព្រោះពួកគេអះអាងថា នៅពេលគាត់ចេញទៅខាងក្រៅ គាត់ប្រហែលជាប្រព្រឹត្តបទល្មើសមួយផ្សេងទៀត"៕សុខុម
យោងតាមនគរបាលបានឲ្យដឹងថា ការឆែកឆេររយៈពេល៥ម៉ោងកាលពីថ្ងៃសុក្រ នៅវីឡាចំនួនបីកន្លែងរបស់ឧកញ៉ា ថោង សារ៉ាត់ ជាមន្ត្រីក្រសួងការពារជាតិកំពុងរត់គេចខ្លួនដែលជាប់ចោទពីបទរៀបចំផែនការធ្វើឃាតឧកញ៉ាមួយរូបនៅក្នុងរាជធានីភ្នំពេញ កាលពីខែមុននោះ បានរកឃើញភ័ស្តុតាងដែលបង្ហាញថា គាត់ពិតជាជាប់ពាក់ព័ន្ធក្នុងអំពើឃាតកម្មនេះមែន។
កាលពីថ្ងៃទី៥ ខែធ្នូ សាលាដំបូងរាជធានីភ្នំពេញបានចោទប្រកាន់ឧត្តមសេនីយ៍ ថោង សារ៉ាត់ អនុប្រធានខុទ្ទកាល័យនៅក្រសួងការពារជាតិដោយកំបាំងមុខពីបទបញ្ជាឲ្យអង្គរក្សបួននាក់របស់ខ្លួនធ្វើឃាតឧកញ៉ា អឹុង ម៉េងជឺ ប្រធានក្រុមហ៊ុន Shimmex Group ដែលត្រូវខ្មាន់កាំភ្លើងបាញ់សម្លាប់នៅខាងក្រៅហាងលក់ផ្លែឈើមួយកន្លែងក្នុងខណ្ឌចំការមន រាជធានីភ្នំពេញកាលពីថ្ងៃទី២២ ខែវិច្ឆិកា។ អង្គរក្សទាំងបួននាក់នោះត្រូវបានចោទប្រកាន់ពីបទមនុស្សឃាត ហើយបច្ចុប្បន្នកំពុងជាប់ពន្ធនាគារ។
ពេលនេះគេមិនទាន់ដឹងច្បាស់ពីកន្លែងលាក់ខ្លួនរបស់លោក ថោង សារ៉ាត់ នៅឡើយទេ ទោះបីជានគរបាលសង្ស័យថា គាត់បានភៀសខ្លួនចេញពីប្រទេសកម្ពុជាហើយក្តី។
លោក ជួន សុវណ្ណ ស្នងការរាជធានីភ្នំពេញបានមានប្រសាសន៍កាលពីថ្ងៃសុក្រថា នៅវេលាម៉ោងប្រហែល១០នាពេលព្រឹកនោះ លោក អាំង មាលតី ប្រធានសាលាដំបូងរាជធានីភ្នំពេញ និងលោក ជួន ណារិន ស្នងការរងរាជធានី បានដឹកនាំការចុះឆែកឆេរវីឡារបស់លោក ថោង សារ៉ាត់ ដែលមានទីតំាងស្ថិតនៅក្នុងបុរី៩៩៩ចំនួនពីរដាច់ដោយឡែកពីគ្នា ដើម្បីស្វែងរកភ័ស្តុតាងដាក់បន្ទុកនៅក្នុងសំណុំរឿងនេះ។
ឧត្តមសេនីយ៍ឯក ជួន សុវណ្ណ បានបង្វែរសំណួរបន្ថែមទៀតទៅមន្ត្រីតុលាការដែលមិនអាចទាក់ទងបាន។ តែទោះជាយ៉ាងណា សេចក្តីថ្លែងការណ៍មួួយដែលបង្ហោះលើគេហទំព័ររបស់នគរបាលជាតិកាលពីថ្ងៃសុក្រ បញ្ជាក់ថា ប្រតិបត្តិការចុះឆែកឆេរនេះទទួលបានជោគជ័យ។
សេចក្តីថ្លែងការណ៍នោះមានខ្លឹមសារដូច្នេះថា "នគរបាលបានស្រាវជ្រាវតាមរកលោក ថោង សារ៉ាត់ ជាយូរមកហើយ ប៉ុន្តែ ចាប់ខ្លួនគាត់មិនបាន។ ប៉ុន្តែ នៅពេលនេះនគរបាលប្រមូលបានភ័ស្តុតាងជាច្រើនដែលដាក់បន្ទុកលើជនសង្ស័យ"។សេចក្តីថ្លែងការណ៍នេះមិនបានបញ្ជាក់ថា ភ័ស្តុតាងទាំងនោះមានអ្វីខ្លះនោះឡើយ។
មន្ត្រីនគរបាលមួយរូប ដែលបានចូលរួមក្នុងប្រតិបត្តិការឆែកឆេរកាលពីម្សិលមិញនេះដែរ បានប្រាប់ក្រុមអ្នកយកព័ត៌មាននៅខាងក្រៅបុរី៩៩៩ក្នុងសង្កាត់ចាក់អង្រែក្រោមថា ក្នុងចំណោមភ័ស្តុតាងដកហូតបានមានម៉ូតូចំនួនបីគ្រឿង។
សេចក្តីថ្លែងការណ៍របស់នគរបាលជាតិកាលពីថ្ងៃសុក្រ ក៏បានលើកឡើងពីឃ្លីបសំឡេងចំនួនពីរដែលត្រូវបានចុះផ្សាយព្រោងព្រាតតាមហ្វេសប៊ុកនៅសប្តាហ៍នេះ ដែលក្នុងនោះបុរសម្នាក់បន្លំធ្វើជាលោក ថោង សារ៉ាត់ យំអង្វរសំុឲ្យលោកនាយករដ្ឋមន្ត្រី ហ៊ុន សែន ព្រមទាំងលោក សម រង្ស៊ី និងលោក កឹម សុខា មេដឹកនាំគណបក្សប្រឆាំង ជួយបញ្ជាក់ភាពស្អាតស្អំរបស់ខ្លួន។
សេចក្តីថ្លែងការណ៍នោះមានខ្លឹមសារដូច្នេះថា "វាគ្រាន់តែជាសំឡេងបង្ហោះតាមហ្វេសប៊ុកប៉ុណ្ណោះ។ វាមិនច្បាស់ថានោះជាសំឡេងរបស់លោក ថោង សារ៉ាត់ ឬក៏អត់ទេ។ រង់ចាំដល់នគរបាលចាប់ខ្លួន ថោង សារ៉ាត់ បានសិន ពេលនោះយើងនឹងដឹង"៕សុខុម
អ្នកនាំពាក្យសភាចង់បានចម្លើយអំពីការផ្សាយពាណិជ្ជកម្មគ្រឿងស្រវឹង
លោក ឈាង វុន អ្នកនាំពាក្យសភាបានមានប្រសាសន៍កាលពីថ្ងៃព្រហស្បតិ៍ថា លោកនឹងកោះហៅរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មកសភាដើម្បីសាកសួរទាក់ទិននឹងការផ្សាយពាណិជ្ជកម្មគ្រឿងស្រវឹងគគ្រឹកគគ្រេងតាមវិទ្យុនិងទូរទស្សន៍...
អង្គការ WWF ធ្វើពហិការមិនចូលរួមការពិគ្រោះយោបល់ទាក់ទិនទំនប់វារីអគ្គិសនីដនសាហុង
កាលពីម្សិលមិញ អង្គការ World Wildlife Fund (WWF) បានលើកឡើងថា ខ្លួននឹងធ្វើពហិការមិនចូលរួមនៅក្នុងការពិគ្រោះយោបល់ជាសាធារណៈក្នុងតំបន់ដែលគ្រោងធ្វើឡើងនៅថ្ងៃនេះពាក់ព័ន្ធនឹងទំនប់វារីអគ្គិសនីដនសាហុង ដ៏ចម្រូងចម្រាសរបស់ប្រទេសឡាវ...
ការស្ទង់មតិរកឃើញថា មានការផ្តល់យោបល់ខុសៗគ្នាជុំវិញអនាគតប្រទេសកម្ពុជា
យោងតាមរបាយការណ៍ដែលចេញផ្សាយកាលពីថ្ងៃពុធ ដោយមូលនិធិអាស៊ី ដែលមានមូលដ្ឋាននៅសហរដ្ឋអាមេរិកបានឲ្យដឹងថា ប្រជាជនកម្ពុជាតែ៣២ភាគរយប៉ុណ្ណោះជឿថា ប្រទេសកម្ពុជាកំពុងដើរក្នុងទិសដៅត្រូវ គឺធ្លាក់ចុះយ៉ាងខ្លាំងពីចំនួន៨០ភាគរយកាលពីមួយទសវត្សរ៍កន្លងមក។
របាយការណ៍នេះផ្អែកលើកការស្ទង់មតិប្រជាជនចំនួន១.០០០នាក់ ដែលបានធ្វើចាប់ពីថ្ងៃទី១៩ ខែឧសភា ដល់ថ្ងៃទី៩ ខែមិថុនា មុនដំណោះស្រាយថ្ងៃ២២ កក្កដា ចំពោះវិបត្តិក្រោយការបោះឆ្នោត ដែលរស់នៅក្នុងខេត្តនីមួយៗលើកលែងតែខេត្តកែប។
ការស្ទង់មតិនេះគឺជាលើកទី១ហើយដែលធ្វើឡើងដោយអង្គការមិនមែនរដ្ឋាភិបាលចាប់តាំងពីឆ្នាំ២០០៣ មុនភាពចលាចលនៃការបោះឆ្នោតនៅឆ្នាំនោះបន្តិច។
ទន្ទឹមនឹងអ្នកផ្តល់បទសម្ភាស៣២ភាគរយ ដែលបាននិយាយថា ពួកគាត់ជឿថា ប្រទេសកម្ពុជាកំពុងដើរក្នុងទិសដៅត្រូវនោះ ប្រជាជន៥៩ភាគរយលើកឡើងថា ពួកគាត់គិតថា ប្រទេសកម្ពុជាកំពុងដើរក្នុងទិសដៅខុស កើនឡើង៩ភាគរយកាលពីឆ្នាំ២០០៣ ចំណែក១០ភាគរយទៀតលើកឡើងថា ពួកគាត់មិនច្បាស់ទេ។
របាយការណ៍ដដែលនេះលើកឡើងទៀតថា "ដោយមានភាពមិនច្បាស់លាស់ជុំវិញទិសដៅប្រទេសកម្ពុជាកំពុងដើរមុនពេលមានភាពជាប់គាំងនយោបាយនោះ ទំនងជាជះឥទ្ធិពលដល់មតិសាធារណ ហើយវាសំខាន់ណាស់ក្នុងការគិតពីលទ្ធផលនៃការបោះឆ្នោតជ្រើសរើសតំណាងរាស្ត្រឆ្នាំ២០១៣ ដែលកត់សម្គាល់ពីការផ្លាស់ប្តូរយ៉ាងខ្លាំងទាក់ទិននឹងអ្នកគាំទ្រការបោះឆ្នោត ខុសពីគណបក្សកាន់អំណាចនៅក្នុងរយៈពេលពីរទសវត្សរ៍"។
របាយការណ៍នេះបន្តថា "យ៉ាងហោចណាស់ហេតុផលមួយផ្នែកចំពោះការផ្លាស់ប្តូរយ៉ាងខ្លាំងនេះ...អាចសន្មតទៅនឹងកំណើនសេដ្ឋកិច្ចដ៏ឆាប់រហ័សនៅក្នុងសង្គម។ មួយវិញទៀត ក្នុងនាមប្រជាជន និងអ្នកបើប្រាស់ ប្រជាជនកម្ពុជាកំពុងទាមទារឲ្យមានការអនុវត្តឲ្យបានល្អប្រសើរជាងនេះទាក់ទងការផ្តល់សេវាកម្មរបស់វិស័យរដ្ឋនិងឯកជន"។
ក្នុងចំណោមប្រជាជន៥៩ភាគរយ ដែលបានលើកឡើងថា ពួកគាត់ជឿថា ប្រទេសកម្ពុជាកំពុងដើរក្នុងទិសដៅខុសនោះ ១៩ភាគរយលើកឡើងថា អំពើពុករលួយជាមូលហេតុចំពោះការឆ្លើយតបរបស់ពួកគាត់ ហើយ១៥ភាគរយលើកឡើងពីការកាប់បំផ្លាញព្រៃឈើ និង១២ភាគរយលើកឡើងអំពីបញ្ហាភាពក្រីក្រ។
ប្រជាជន៣២ភាគរយដែលលើកឡើងថា ប្រទេសកម្ពុជាកំពុងដើរក្នុងទិសដៅត្រូវនោះមានដូចជា ហេដ្ឋារចនាសម្ព័ន្ធមានការប្រសើរឡើង កំណើនសេដ្ឋកិច្ច និងសន្តិភាពថា ជាមូលហេតុដ៏ចម្បងចំពោះការឆ្លើយតបរបស់ពួកគាត់។
ក្នុងចំណោមអ្នកឆ្លើយតបទាំងអស់ "អំពើពុករលួយ" ត្រូវបានកំណត់ដោយប្រជាជន២៩ភាគរយ ត្រូវបានចាត់ថា ជាបញ្ហាដ៏សំខាន់បំផុតដែលប្រទេសកម្ពុជាកំពុងប្រឈម ហើយ "ភាពក្រីក្រ"...
អាជ្ញាធរបញ្ជាឲ្យផ្អាកការដ្ឋានសាងសង់ដោយសារមានគ្រោះថ្នាក់ស្លាប់កម្មករ
យោងតាមមន្ត្រីម្នាក់មកពីក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា កាលពីម្សិលមិញ អាជ្ញាធរបានបញ្ជាឲ្យផ្អាកការសាងសង់អគារដែលមានកម្ពស់ខ្ពស់មួយនៅក្នុងខណ្ឌ៧មករា រាជធានីភ្នំពេញ បន្ទាប់ពីមានការស្លាប់កម្មករអាយុ២១ឆ្នាំម្នាក់នៅការដ្ឋាននេះកាលពីថ្ងៃពុធ។
កាំង ស៊ីនឿន មានដើមកំណើតមកពីខេត្តព្រៃវែងបានជិះជណ្តើរយន្តនៅការដ្ឋានសាងសង់ឡើងទៅជាន់ទី១៥នៃអគារអាផាតមិន ដែលសាងសង់បានពាក់កណ្តាលស្រាប់តែជណ្តើរយន្តនោះដំណើរការខុសប្រក្រតី។
ដោយភ័យស្លន់ស្លោនឹងការញ័រជណ្តើរយន្តយ៉ាងខ្លាំង កម្មកររូបនេះបានព្យាយាមលោតចេញ ហើយបានស្លាប់បន្ទាប់ពីបុកក្បាលនឹងរបារដែក។
លោក ឡៅ ទិព្វសីហា អគ្គនាយករងនៃអគ្គនាយកដ្ឋានសំណង់នៅក្រសួងរៀបចំដែនដី បានមានប្រសាសន៍ថា អាជ្ញាធរបានបញ្ជាឲ្យផ្អាកដំណើរការសាងសង់នៅការដ្ឋាននេះរហូតដល់ពួកគេគិតថាមានសុវត្ថិភាពទើបឲ្យបន្តសាងសង់វិញ។ លោកបានមានប្រសាសន៍ថា "យើងបានសុំឲ្យពួកគេពន្យារពេលសាងសង់ ហើយពួកគេមិនអាចបន្តការសាងសង់បានទេ លុះណាតែពួកគេបានដោះស្រាយបញ្ហារួចរាល់។ យើងនឹងពិនិត្យមើលថា តើការដ្ឋានសាងសង់នេះមានសុវត្ថិភាពហើយ ឬនៅ"។
លោក ទិព្វសីហា បានមានប្រសាសន៍ថា ពាណិជ្ជករឈ្មោះ លី ហួត នៅពីក្រោយការអភិវឌ្ឍនេះ។ លោកបានបន្ថែមថា "វាជាការធ្វេសប្រហែលរបស់ម្ចាស់អគារ និងកម្មករខ្លួនឯង។ ឥឡូវនេះក្រសួងបានណែនាំលោក លី ហួត ឲ្យពង្រឹងសុវត្ថិភាព"។
នៅការដ្ឋានសាងសង់កាលពីម្សិលមិញ កម្មករជាច្រើននាក់បានដេកលេងលើគ្រែ ចំណែកឯកម្មករពីរនាក់ទៀតធ្វើទ្វារថ្មីសម្រាប់ជណ្តើរយន្តនេះ។
កម្មករឈ្មោះ សិដ្ឋ អាយុ២៦ឆ្នាំ ដែលបដិសេធមិនប្រាប់ឈ្មោះពេញបាននិយាយថា "យើងកំពុងធ្វើជណ្តើរយន្តនេះឲ្យមានសុវត្ថិភាពជាងមុន ដើម្បីផ្ទុករបស់នៅខាងក្នុងកុំឲ្យធ្លាក់មកដី។ ថៅកែរបស់យើងបានសុំឲ្យយើងធ្វើវាឲ្យមានសុវត្ថិភាពសម្រាប់កម្មករ"។
កម្មករម្នាក់ទៀតឈ្មោះ េហង សារ៉ាត់ អាយុ២៨ឆ្នាំ បាននិយាយថាកម្មករនៅការដ្ឋាននេះតាមធម្មតាពាក់ឧបករណ៍ការពារសុវត្ថិភាពត្រឹមត្រូវ ហើយបានលើកឡើងពីគ្រោះថ្នាក់បណ្តាលឲ្យស្លាប់កាលពីថ្ងៃពុធ ថា ជាលើកទី១ហើយដែលមានគ្រោះថ្នាក់ប្រភេទនេះនៅក្នុងការដ្ឋាន។ គាត់បាននិយាយថា "យើងមានមួកសុវត្ថិភាព ខ្សែក្រវាត់ និងស្បែកជើងកវែង។ កាំង ស៊ីនឿន ធ្វេសប្រហែសនៅពេលគាត់កំពុងធ្វើការ ហេតុដូច្នេះហើយគាត់ក៏ជួបគ្រោះថ្នាក់តែម្តង"។
អ្នកស្រី ថុង ផល្លា អាយុ៤៥ឆ្នាំ ជាម្តាយមីងរបស់ កាំង ស៊ីនឿន បាននិយាយថា ក្រុមគ្រួសារបានទទួលយកប្រាក់សំណងចំនួន១០លានរៀល ពីម្ចាស់អគារកាលពីម្សិលមិញ បន្ទាប់ពីលោកបានមកសួរសុខទុក្ខក្រុមគ្រួសារនេះនៅក្នុងខេត្តព្រៃវែង។ អ្នកស្រីបាននិយាយថា "វាមិនមែនជាសំណងសមហេតុផលទេ ប៉ុន្តែ យើងត្រូវតែទទួលយក។ យើងគ្មានប្រាក់ដើម្បីតតាំងជាមួយម្ចាស់អគារនៅតុលាការទេ"៕សារុន
មេដឹកនាំគណបក្សប្រឆាំងទៅចូលរួមពិធីកាន់ទុក្ខសពលោក ចាន់ សុវ៉េត
លោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិកាលពីម្សិលមិញបានចូលរួមពិធីកាន់ទុក្ខដើម្បីសម្ដែងការគោរពដល់លោក ចាន់ សុវ៉េត...
សាលាក្រុងកែបគ្រោងដោះដូរដីជាមួយឧកញ៉ា ទ្រី ភាព
លោក ងិន វណ្ណដា អភិបាលក្រុងកែបបានមានប្រសាសន៍កាលពីម្សិលមិញថា ឧកញ៉ា ទ្រី ភាព នឹងទទួលបានដីរដ្ឋមួយក្បាលដ៏សំខាន់នៅកណ្តាលក្រុងកែបជាថ្នូរនឹងការសាងសង់ការិយាល័យរដ្ឋាភិបាលថ្មីចំនួនប្រាំស្ថិតនៅចម្ងាយ២គីឡូម៉ែត្រ។
យោងតាមលោក វណ្ណដា បានឲ្យដឹងថា សាលាក្រុងកែប ការិយាល័យនគរបាលក្រុង កងរាជអាវុធហត្ថ និងមន្ទីរអប់រំ និងមន្ទីររៀបចំដែនដីនឹងត្រូវផ្លាស់ពីទីតាំងបច្ចុប្បន្នដែលស្ថិតនៅលើផ្ទៃដីទ ំហំ៦.០០០មែ៉ត្រក្រឡា នៅក្នុងសង្កាត់ព្រៃធំទៅកាន់អគារថ្មីនៅក្នុងសង្កាត់ដដែលនេះលើផ្ទៃដីទំហំ៩.០០០មែ៉ត្រក្រឡាវិញ។ លោកបានមានប្រសាសន៍ថា "ទីតាំងបច្ចុប្បន្ននេះមានអគារតែមួយប៉ុណ្ណោះ ហើយតូចស្ថិតនៅតាមផ្លូវដ៏ចង្អៀត"។
លោកបានបន្ថែមថា ទីតាំងថ្មីនឹងមានអគារដាច់ដោយឡែកពីគ្នាសម្រាប់ការិយាល័យនីមួយៗ ។ លោក វណ្ណដា បានមានប្រសាសន៍ថា "ឥឡូវនេះយើងកំពុងរង់ចាំការអនុម័តពីលោកនាយករដ្ឋមន្ត្រី ហ៊ុន សែន ដើម្បីបញ្ជូនក្រុមមន្ត្រីមកពីក្រសួងចម្រុះទៅវាយតម្លៃថា តើដីថ្មី និងអគារដែលសាងសង់លើទីតាំងថ្មីមានតម្លៃដូចគ្នានឹងអចលនទ្រព្យរបស់រដ្ឋ ឬថោកជាងនេះ ឬយ៉ាងណានោះ"។ លោកបានបន្ថែមថា ប្រសិនបើអ្នកទៅពិនិត្យរកឃើញថា ដីមួយក្បាលថ្មីនេះមានតម្លៃតិចជាងទីតាំងបច្ចុប្បន្ននោះ នឹងតម្រូវឲ្យលោក ទ្រី ភាព ធ្វើការទូទាត់ផ្សេង៕សារុន