CATEGORY
ព័ត៌មានជាតិ
ជនជាតិវៀតណាមជាង១៦០នាក់ត្រូវនិរទេសទៅស្រុកកំណើតវិញ
យោងតាមមន្ត្រីម្នាក់នៅនាយកដ្ឋានអន្តោប្រវេសន៍បានឲ្យដឹងថា ជនជាតិវៀតណាមជាង១៦០នាក់ ដែលរស់នៅខុសច្បាប់ក្នុងប្រទេសកម្ពុជា ត្រូវបាននិរទេសត្រឡប់ទៅប្រទេសកំណើតរបស់ខ្លួនវិញចាប់តាំងពីជំរឿនលើជនបរទេសបានចាប់ផ្តើមកាលពីដើមឆ្នាំនេះមក។
លោក ម៉ម ស្រីុមវណ្ណា អគ្គនាយករងនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃបានមានប្រសាសន៍កាលពីម្សិលមិញថា ជនជាតិវៀតណាម១៦៤នាក់ ត្រូវបាននិរទេសចេញពីខេត្តស្វាយរៀង ខេត្តព្រៃវែង និងខេត្តតាកែវ តាំងពីថ្ងៃទី៣០ ខែកក្កដាមក។
ជនអន្តោប្រវេសន៍ខុសច្បាប់ដ៏ច្រើន សរុបមាន១៥២នាក់ កំពុងរស់នៅក្នុងខេត្តស្វាយរៀង។ ជនអន្តោប្រវេសន៍ប្រាំមួយនាក់ទៀតត្រូវបានរកឃើញនៅខេត្តតាកែវ និងប្រាំមួយនាក់ផ្សេងទៀតនៅខេត្តព្រៃវែង។
លោក ស្រីុមវណ្ណា បានមានប្រសាសន៍ថា "ក្រៅពីប្រជាជនវៀតណាម ក៏មានជនជាតិបរទេសផ្សេងទៀតដែរ ដែលត្រូវបានរកឃើញកំពុងស្នាក់នៅដោយខុសច្បាប់ក្នុងប្រទេសកម្ពុជា"។ លោកបានមានប្រសាសន៍ថា រហូតដល់ពេលនេះ មនុស្សជាង២០០នាក់ ត្រូវបាននិរទេសចេញពីប្រទេសកម្ពុជា ជាផ្នែកមួយនៃការធ្វើជំរឿននេះ។
លោកបានឲ្យដឹងទៀតថា "ឥឡូវនេះ យើងកំពុងបន្តការធ្វើជំរឿននៅឡើយ ដូច្នេះយើងអាចរកឃើញជនបរទេសខុសច្បាប់ច្រើនទៀត"។
ជំរឿន ដែលក្រុមមន្ត្រីសន្យាថា នឹងមានលក្ខណទូលំទូលាយនិងមានប្រសិទ្ធភាពជាងលើកមុនៗនោះ បានផ្តោតលើជនជាតិមកពីប្រទេសចិន ឥណ្ឌា រុស្សី និងប្រទេសនីហ្សេរីយ៉ា ដែលត្រូវបានបញ្ជូនត្រឡប់ទៅប្រទេសកំណើតរបស់ពួកគេវិញ បន្ទាប់ពីត្រូវបានរកឃើញថា កំពុងស្នាក់នៅដោយខុសច្បាប់ក្នុងប្រទេសកម្ពុជា៕មានិត
ក្រុមមន្ត្រីនគរបាលបាននាំគ្នានិយាយលេងសើច និងជល់កែវផឹកស៊ីយ៉ាងសប្បាយនៅអធិការដ្ឋានខណ្ឌមានជ័យកាលពីរសៀលថ្ងៃសុក្រ ពោលគឺតែប៉ុន្មានម៉ោងប៉ុណ្ណោះក្រោយពីអធិការ ហ៊ី ណារិន ដែលជាមេកើយរបស់ពួកគេ ត្រូវបានចោទប្រកាន់ពីបទកឹបកេងប្រាក់ និងកេងប្រវ័ញ្ច ហើយត្រូវបញ្ជូនខ្លួនទៅពន្ធនាគារព្រៃស។
សម្បកកេសស្រាបៀរចំនួនប្រាំពីរកេសត្រូវបានដាក់គរលើគ្នា ហើយកំប៉ុងស្រាបៀរត្រូវគេបោះចោលរាយប៉ាយនៅលើឥដ្ឋ ខណៈបុរសប្រហែលជាង១០នាក់ ដែលស្លៀកពាក់ឯកសណ្ឋាននគរបាលមកពីអង្គភាពខុសៗគ្នាអង្គុយជុំវិញតុដែកមួយ។
លោក ជឹម ស៊ីថា ដែលត្រូវបានដំឡើងតំណែងជាអធិការស្តីទីកាលពីថ្ងៃព្រហស្បតិ៍ បន្ទាប់ពីលោក ហ៊ី ណារិន ត្រូវបានចោទប្រកាន់ពីបទកឹបកេងលុយជាង ៦០០.០០០ដុល្លារក្នុងរយៈពេលប្រាំបីឆ្នាំមកនេះ បានមានប្រសាសន៍ថា ពិធីផឹកស៊ីនេះ គឺធ្វើឡើងដើម្បីអបអរការសម្ពោធអធិការដ្ឋានថ្មី។
លោកបានមានប្រសាសន៍ថា "យើងធ្វើពិធីប្រោះព្រំ ដើម្បីសែនដល់ម្ចាស់ទឹកម្ចាស់ដីនេះពីព្រោះយើងបានរើមកទីនេះជាងមួយខែមកហើយ។ អ្នកភូមិបានយកស្រាបៀរនេះមកជូនពួកយើង ពីព្រោះពួកគាត់ស្រឡាញ់ចូលចិត្តប៉ូលីស"។
លោក ហ៊ី ណារិន ត្រូវបានអង្គភាពប្រឆាំងអំពើពុករលួយចាប់ខ្លួនកាលពីថ្ងៃអង្គារ ហើយត្រូវបានចោទប្រកាន់ជាច្រើនករណីពាក់ព័ន្ធនឹងផែនការអាក្រក់ និងក្រុមជំរិតទារប្រាក់ ដែលគាត់បានប្រើប្រាស់ដើម្បីធ្វើឲ្យខ្លួនឯងមានបាន អំឡុងពេលលោកកាន់មុខតំណែងជាអធិការអស់រយៈពេលជិតមួយទសវត្សរ៍។
ក្នុងចំណោមការចោទប្រកាន់ទាំងនោះមានការអះអាងថា គាត់បានបញ្ចូលឈ្មោះបុគ្គលិកខ្មោចទៅក្នុងបញ្ជីបើកប្រាក់ខែរបស់ខ្លួន ហើយបើកយកប្រាក់ខែរបស់ពួកគេ កេងយកប្រាក់ឧបត្ថម្ភសម្រាប់កូនចៅរបស់ខ្លួន។ ក៏មានការលើកឡើងដែរថា គាត់បានជំរិតទារប្រាក់ពីជនរងគ្រោះក្នុងហេតុការណ៍គ្រោះថ្នាក់ចរាចរណ៍ អាជីវកម្ម រោងចក្រនិងកន្លែងលេងល្បែងខុសច្បាប់នានា។ យោងតាមពាក្យបណ្ដឹងរបស់អង្គភាពប្រឆាំងអំពើពុករលួយបង្ហាញថា ប្រាក់សរុបដែលគាត់បានប្រមូលបានពីអំពើពុករលួយរបស់ខ្លួន មានចំនួន៦៧៨.០៥៩ដុល្លារ។
យោងតាមក្រឡាបញ្ជី យឹម ជេដ្ឋា បានឲ្យដឹងថា លោក យូ ប៊ុណ្ណា ចៅក្រមសើុបសួរទទួលបន្ទុកសំណុំរឿងនេះនៅសាលាដំបូងរាជធានីភ្នំពេញ បានធ្វើការចោទប្រកាន់លោក ហ៊ី ណារិន កាលពីថ្ងៃសុក្រ បន្ទាប់ពីការសាកសួរអស់រយៈពេលបីថ្ងៃ។
លោកបានមានប្រសាសន៍ទៀតថា "ហ៊ី ណារិន ត្រូវបានចោទប្រកាន់ពីបទកេងប្រវ័ញ្ចប្រព្រឹត្តដោយមន្ត្រីសាធារណៈ និងបទកេងប្រវ័ញ្ចថវិការដ្ឋដោយគ្មានច្បាប់ទម្លាប់។ គាត់ត្រូវបានបញ្ជូនខ្លួនទៅកាន់ពន្ធនាគារហើយ"។
បទចោទប្រកាន់ទាំងនោះអាចនឹងធ្វើឲ្យលោក ហ៊ី ណារិន ជាប់ពន្ធនាគាររហូតដល់ទៅ១៥ឆ្នាំ។ ការចោទប្រកាន់ពីបទកឹបកេងក៏ត្រូវទទួលការពិន័យ "ទ្វេដងនៃចំនួនប្រាក់ ឬតម្លៃអចលនទ្រព្យដែលត្រូវបានកឹបកេង" ផងដែរ។
លោក ជឹម ស៊ីថា អធិការស្តីទីថ្មីនៃខណ្ឌមានជ័យបានមានប្រសាសន៍ថា លោកបានធ្វើការក្រោមលោក ហ៊ី ណារិន អស់រយៈពេលប្រហែល១០ឆ្នាំមកហើយ ប៉ុន្តែ បានអះអាងថា គាត់មិនដឹងច្បាស់ពីមូលហេតុ ដែលអង្គភាពប្រឆាំងអំពើពុករលួយបានចាត់វិធានការលើអតីតចៅហ្វាយនាយរបស់លោកទេ។
លោកបានមានប្រសាសន៍ទៀតថា "ខ្ញុំគិតថា អ្នកដែលស្និទ្ធនឹងលោក ណារិន បានតវ៉ាប្រឆាំងរូបគាត់។ មនុស្សមួយចំនួនតូចដែលស្និទ្ធនឹងលោក ណារិន កំពុងត្រូវអង្គភាពប្រឆាំងអំពើពុករលួយសាកសួរ"។
ខណៈដែលនគរបាលផ្សេងៗទៀតដែលអង្គុយពីក្រោយគាត់កំពុងផឹកស្រាបៀរ លោក ជឹម ស៊ីថា បានមានប្រសាសន៍ថា លោកមានគម្រោងស្តារកេរ្តិ៍ឈ្មោះឡើងវិញធ្វើយ៉ាងណាឲ្យសាធារណជនមានការជឿទុកចិត្តលើអង្គភាពរបស់លោក ក្រោយពីការចាប់ខ្លួនអធិការខណ្ឌនេះ។
លោកមានប្រសាសន៍ថា "ជំហានដំបូងគឺយើងនឹងមិនយកប្រាក់ពីអាជីវករទៀតទេ"។ លោកក៏បានលើកឡើងដែរថា មន្ត្រីនគរបាលនឹងត្រូវបញ្ជូនជាប្រចាំទៅកាន់តំបន់"ស្មុគស្មាញ" នានានៅក្នុងខណ្ឌនេះ ដែលមានរោងចក្ររាប់រយ និងជាកន្លែងកើតមានបាតុកម្មជាច្រើនក្នុងវិស័យកាត់ដេរកាលពីខែធ្នូ និងខែមករា ដោយបាតុកម្មមួយចំនួនក្នុងចំណោមនោះបានបញ្ចប់ដោយអំពើហិង្សា។
លោកបានមានប្រសាសន៍ទៀតថា "យើងមានគម្រោងបញ្ជូនកងកម្លាំងរបស់យើងឲ្យចុះល្បាតតាមកន្លែងស្មុគស្មាញ។ យើងក៏មានខ្សែទូរស័ព្ទពិសេស២៤ម៉ោងមួយដែរសម្រាប់ទទួលយកបញ្ហាផ្សេងៗ"។
លោក ព្រាប កុល នាយកប្រតិបត្តិអង្គការតម្លាភាពកម្ពុជាដែលប្រឆាំងអំពើពុករលួយបានព្យាករថា ការចោទប្រកាន់លើលោក ហ៊ី ណារិន គឺគ្រាន់តែជាឧទាហរណ៍តូចមួយប៉ុណ្ណោះស្តីពីអំពើពុករលួយក្នុងខណ្ឌមានជ័យ។
លោកបានលើកឡើងថា "លោក ណារិន ទំនងជាមិនអាចប្រមូលប្រាក់យ៉ាងច្រើនបែបនោះតែម្នាក់ឯងបានទេ បើគិតពីបណ្ដាញដែលគាត់ធ្វើការ។ ខ្ញុំសង្ស័យថា មានមនុស្សប៉ុន្មាននាក់ទៀតបានជាប់ពាក់ព័ន្ធ"។
លោក ព្រាប កុល ដែលអង្គការរបស់លោកបានដាក់ចំណាត់ថ្នាក់ប្រទេសកម្ពុជាឲ្យជាប់លេខ១៦០ក្នុងចំណោមប្រទេសចំនួន១៧៧នៅក្នុងសន្ទស្សន៍ទស្សនវិស័យអំពើពុករលួយឆ្នាំ២០១៤របស់ខ្លួន ក៏បានលើកឡើងថា ការចោទប្រកាន់លើនគរបាលមួយរូបក្នុងចំណោមនគរបាលដែលមានមុខតំណែងកំពូលនៅក្នុងរាជធានីភ្នំពេញ គឺជាការព្រមានដល់នគរបាលទូទាំងប្រទេស។
លោកបានមានប្រសាសន៍បន្តទៀតថា "ឥរិយាបថនេះគឺធម្មតាណាស់។ នេះគ្រាន់តែជាករណីមួយប៉ុណ្ណោះក្នុងចំណោមករណីជាច្រើន ដែលកើតឡើងទូទាំងប្រទេស។ រដ្ឋាភិបាលមិនអាចចាប់ពួកគេដាក់ពន្ធនាគារទាំងអស់បានទេ ព្រោះគ្មានកន្លែងគ្រប់គ្រាន់ឡើយ។ដូច្នេះការចោទប្រកាន់លើលោក ហ៊ី ណារិន គឺជាសារមួយពីរដ្ឋាភិបាលផ្ញើទៅនគរបាលគ្រប់ជាន់ថ្នាក់ឲ្យបានដឹងថា ពួកគេត្រូវតែកែប្រែ ហើយថា និទណ្ឌភាពដែលពួកគេទទួលបានជាយូរមកហើយនោះ បានបញ្ចប់ហើយ"៕សុខុម
ព្រះសង្ឃរាប់រយអង្គបានហែក្បួននៅក្នុងរាជធានីភ្នំពេញកាលពីថ្ងៃសុក្រ ដើម្បីទាមទារឲ្យបញ្ឈប់ការសាងសង់នៅក្នុង និងជុំវិញវិទ្យាស្ថានពុទ្ធសាសនបណ្ឌិត្យ ដែលកំពុងត្រូវបានហ៊ុមព័ទ្ធយ៉ាងឆាប់រហ័សដោយសំណង់ និងការដ្ឋានសាងសង់របស់ក្រុមហ៊ុន Naga Corp។
កាលពីខែឧសភា ក្លោងទ្វារមុខនៃពុទ្ធសាសនបណ្ឌិត្យត្រូវបានបំផ្លាញចោលដើម្បីបើកផ្លូវសម្រាប់ការស្ថាបនាផ្លូវក្រោមដី ហើយនៅក្នុងពេលថ្មីៗនេះក្រុមហ៊ុនសាងសង់ឯកជនមួយបានចាក់ក្រាលបេតុងលើដីទំហំ៣០ម៉ែត្រគុណ១០០ម៉ែត្រនៅចំកណ្ដាលបរិវេណវិទ្យាស្ថាននេះ បណ្ដាលឲ្យមានការព្រួយបារម្ភកាន់តែខ្លាំងឡើងថា ដីនេះត្រូវបានលក់សម្រាប់ការអភិវឌ្ឍ។
ព្រះសង្ឃប្រហែល២០០អង្គ ដែលនិមន្តមកពីបណ្ដាញព្រះសង្ឃឯករាជ្យដើម្បីយុត្តិធម៌សង្គមបានព្យាយាមដាក់ញត្តិទៅព្រះបរមរាជវាំងកាលពីម្សិលមិញ ដើម្បីស្នើសុំឲ្យព្រះមហាក្សត្រនរោត្តម សីហមុនី ធានារក្សាទុកវិទ្យាស្ថានពុទ្ធសាសនបណ្ឌិត្យឲ្យនៅដដែល ប៉ុន្តែ ត្រូវបានរារាំងដោយនគរបាលប្រឆាំងបាតុកម្មប្រហែល៥០នាក់ ដែលឈរជើងជិតព្រះបរមរាជវាំង។
ព្រះតេជគុណ ប៊ុត ប៊ុនទិញ ប្រធានបណ្តាញព្រះសង្ឃឯករាជ្យដើម្បីយុត្តិធម៌សង្គមបានមានសង្ឃដីកាថា "យើងបានស្នើឲ្យព្រះមហាក្សត្របញ្ជាឲ្យបញ្ឈប់ការជួលដីនៅក្នុងវិទ្យាស្ថានពុទ្ធសាសនបណ្ឌិត្យ។ មន្ត្រីមួយចំនួនបានលក់ទ្រព្យសម្បត្តិរបស់ព្រះមហាក្សត្រ ហើយគ្មាននរណាម្នាក់ចាត់វិធានការទេ។ តើនេះគឺជាការគោរពព្រះមហាក្សត្រឬ?”។
នៅទីបំផុតមន្ត្រីព្រះបរមរាជវាំងមួយរូបបានចេញមកជួបព្រះសង្ឃតវ៉ាទាំងនេះ ហើយបានទទួលយកញត្តិរបស់ព្រះអង្គ ដែលអំពាវនាវឲ្យបញ្ឈប់ការសាងសង់លើបរិវេណដីវិទ្យាស្ថាននេះ និងដកចេញនូវសំណង់បេតុង ដែលពេលនេះកំពុងស្ថិតនៅចំកណ្ដាលនៃបរិវេណវិទ្យាស្ថានពុទ្ធសាសនបណ្ឌិត្យ។
នៅឯរដ្ឋសភា ជាកន្លែងបន្ទាប់ដែលត្រូវឈប់នៅក្នុងហែក្បួននេះ ព្រះសង្ឃទាំងនេះបានជួបជាមួយលោក យ៉ែម បុញ្ញប្ញទ្ធិ តំណាងរាស្ត្រគណបក្សប្រឆាំង ដែលជាប្រធានគណៈកម្មការអប់រំ យុវជន និងកីឡា និងកិច្ចការសាសនា។
លោក យ៉ែម បុញ្ញប្ញទ្ធិ បានប្រាប់ព្រះសង្ឃទាំងនេះថា "យើងនឹងអញ្ជើញឯកឧត្ដម មិន ឃិន រដ្ឋមន្ត្រីក្រសួងធម្មការ និងសាសនា ដើម្បីឆ្លើយសំណួរនៅរសៀលថ្ងៃទី៩ ពាក់ព័ន្ធនឹងវិទ្យាស្ថានពុទ្ធសាសនបណ្ឌិត្យ"។
លោក សេង សុមុនី អ្នកនាំពាក្យក្រសួងធម្មការ និងសាសនាបានបដិសេធមិនធ្វើអត្ថាធិប្បាយអំពីស្ថានភាពនៃវិទ្យាស្ថានពុទ្ធសាសនបណ្ឌិត្យឡើយ។
លោក ស សុខនី ប្រធានស្តីទីនៃវិទ្យាស្ថានពុទ្ធសាសនបណ្ឌិត្យ ក៏បានបដិសេធមិនធ្វើអត្ថាធិប្បាយដែរ ដោយប្រាប់ឲ្យអ្នកយកព័ត៌មានទៅមើលសេចក្តីប្រកាសមួយរបស់ក្រសួងធម្មការ និងសាសនា ដែលបានចេញកាលពីដើមឆ្នាំនេះដែលលើកឡើងថា ការសាងសង់នៅក្នុងបរិវេណវិទ្យាស្ថាននេះគឺគ្រាន់តែធ្វើឡើងជាលក្ខណៈបណ្តោះអាសន្នប៉ុណ្ណោះ ហើយថា ដីនោះមិនត្រូវបានលក់ដូរទេ៕សុខុម
ជនជាតិខ្មែរអាមេរិកបីនាក់ត្រូវគេតាមចាប់ពីបទគំរាមសម្លាប់មេដឹកនាំខ្មែរ
ដីកាចាប់ខ្លួនអន្តរជាតិត្រូវបានចេញដើម្បីចាប់ពលរដ្ឋខ្មែរអាមេរិក៣នាក់ ដែលរដ្ឋាភិបាលចោទថា បានគំរាមសម្លាប់មេដឹកនាំខ្មែរជាច្រើននាក់។
នគរបាលអន្តរជាតិអាំងទែប៉ូលបានបន្ថែមឈ្មោះ បូណា ប៊ុនផាត់ អាយុ៤៤ឆ្នាំ ម៉ៅ ឃឿន អាយុ៥០ឆ្នាំ...
កាលពីម្សិលមិញ អង្គការមិនមែនរដ្ឋាភិបាលមួយចំនួនបានលើកឡើងថា បទបញ្ជាផ្ទៃក្នុងថ្មីៗដ៏តឹងរ៉ឹងដែលលោក ហេង សំរិន ប្រធានរដ្ឋសភាបានចេញជាបន្តបន្ទាប់កាលពីសប្ដាហ៍មុន បានរំលោភបំពានរដ្ឋធម្មនុញ្ញ និងបទបញ្ជាផ្ទៃក្នុងរបស់រដ្ឋសភា ហើយបានអំពាវនាវឲ្យតំណាងរាស្ត្រដែលមានភក្ដីភាពចំពោះគណបក្សកាន់អំណាចលុបចោលបទបញ្ជានេះ។
នៅក្នុងសារាចរមួយចុះថ្ងៃទី១២...
រដ្ឋាភិបាលប្រាប់ប្រទេសថៃថា សកម្មជនដែលរត់គេចខ្លួនមិនស្ថិត នៅក្នុងប្រទេសកម្ពុជាទេ
កាលពីម្សិលមិញប្រទេសថៃបានអះអាងថា ខ្លួនបានស្នើឲ្យកម្ពុជាធ្វើមាតុភូមិនិវត្តសកម្មជននិស្សិតថៃម្នាក់ ដែលគេចង់ចាប់ខ្លួនតាមចោទពីបទនិយាយប៉ះពាល់ដល់រាជវង្សានុវង្ស ប៉ុន្តែបានលើកឡើងថា គេបានប្រាប់ថា និស្សិតដែលរត់គេចខ្លួនរូបនេះមិនស្ថិតនៅក្នុងប្រទេសកម្ពុជាទេ។
របបយោធាដែលបានកាន់កាប់ប្រទេសថៃចាប់តាំងពីការផ្ដួលរំលំរដ្ឋាភិបាលជាប់ឆ្នោតកាលពីខែឧសភានោះ ចោទប្រកាន់ ឯកភព ឡូរ៉ា...
អាជ្ញាធរចាប់ខ្លួនមន្ត្រីនគរបាលខេត្តសៀមរាបពីបទគំរាមទារប្រាក់ពីអ្នកនេសាទ
អាជ្ញាធរខេត្តសៀមរាបបានចាប់ខ្លួនមន្ត្រីនគរបាលយ៉ាងហោចណាស់បីនាក់នៅនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃកាលពីថ្ងៃពុធ ដោយសង្ស័យថា បានគំរាមទារប្រាក់ពីអ្នកនេសាទនៅក្នុងខេត្តនេះ។
លោក ម៉ម សាម៉ុន មេបញ្ជាការកងរាជអាវុធហត្ថខេត្តបានមានប្រសាសន៍ថា ការចាប់ខ្លួននេះធ្វើឡើងបន្ទាប់ពីក្រុមអ្នកនេសាទបានដាក់ពាក្យបណ្ដឹងទៅកងរាជអាវុធហត្ថខេត្ត ដោយចោទប្រកាន់នគរបាលសេដ្ឋកិច្ចថា បានទាមទារប្រាក់ពីរូបគាត់...
នគរបាលចុះទៅបំផ្លាញដំណាំកញ្ឆាចំនួន៤៥០ដើមនៅខេត្តពោធិ៍សាត់
កាលពីថ្ងៃពុធ នគរបាលខេត្តពោធិ៍សាត់បានចាប់ខ្លួនអ្នកដាំកញ្ឆាវ័យ៣៥ម្នាក់ ហើយបានបំផ្លាញដើមកញ្ឆាចោលចំនួន៤៥០ដើម អំឡុងប្រតិបត្តិការឆ្មក់ចូលចម្ការមួយកន្លែងក្នុងស្រុកវាលវែង។
លោក ថេង ឡេង អធិការស្រុកវាលវែងបានមានប្រសាសន៍ថា ការឆ្មក់បង្ក្រាបនេះធ្វើឡើងក្រោយពីការស៊ើបអង្កេតរយៈពេលពីរសប្ដាហ៍លើប្រតិបត្តិការខុសច្បាប់របស់កសិកររូបនោះ ហើយកញ្ឆាស្ងួតដែលមានតម្លៃ១២ដុល្លារក៏ត្រូវបានបំផ្លាញចោលដែរ។
លោកបានមានប្រសាសន៍ថា...
នៅក្នុងវិស័យស្រូវ ការខ្វះជំនាញធ្វើឲ្យកសិករទទួលបានទិន្នផលទាប
យោងតាមរបាយការណ៍សិក្សាស្រាវជ្រាវមួយដែលធនាគារអភិវឌ្ឍន៍អាស៊ី បានចេញផ្សាយកាលពីម្សិលមិញបានឲ្យដឹងថា កង្វះជំនាញ និងចំណេះដឹងក្នុងចំណោមកសិករ គឺជាកត្តាដែល
នាំឲ្យវិស័យស្រូវក្នុងប្រទេសកម្ពុជា មិនសូវមានការអភិវឌ្ឍ ដោយសារតែកសិករមិនយល់ដឹងពីវិធីធ្វើកសិកម្មបែបពាណិជ្ជកម្មដែលផ្តល់ទិន្នផលខ្ពស់។
នៅក្នុងការស្ទង់មតិកសិដ្ឋានចំនួន៧៥០កន្លែងនៅក្នុងខេត្តបង្កបង្កើនផលស្រូវធំៗចំនួនបីក្នុងប្រទេសកម្ពុជា ដូចជាបាត់ដំបង កំពង់ធំ...
កម្មករនៅទីសត្តឃាតមួយកន្លែងក្នុងខណ្ឌជ្រោយចង្វារាជធានីភ្នំពេញបានដាក់ពាក្យប្តឹងទៅកាន់អង្គការសិទ្ធិមនុស្សកាលពីម្សិលមិញ ដោយអះអាងថា ពួកគេត្រូវសន្តិសុខខណ្ឌវាយដំនិងចាប់ខ្លួន អំឡុងពិធីបុណ្យភ្ជុំបិណ្ឌកាលពីសប្តាហ៍មុន។
ឌី វ៉ាន់ អាយុ១៨ឆ្នាំបានចោទប្រកាន់ថា សន្តិសុខដែលអ្នកភូមិចម្លែកមុខជាច្រើនខែមកនេះបានវាយដំខ្លួននៅពេលរសៀលថ្ងៃទី២៤ ខែកញ្ញា នៅពេលខ្លួនព្យាយាមដើរចូលទៅកាន់ដីឯកជនមួយកន្លែងដើម្បីច្រូតស្មៅយកទៅឲ្យគោនៅទីសត្តឃាតស៊ី។ អ្នកភូមិនៅតំបន់នេះកំពុងតែប្រឆាំងនឹងគម្រោងអភិវឌ្ឍន៍ដ៏ធំមួយ។
ដីទំហំ៣៨៧ហិកតានៅខណ្ឌជ្រោយចង្វានេះត្រូវសាលារាជធានីភ្នំពេញលក់កាលពីឆ្នាំ២០១១ទៅឲ្យក្រុមហ៊ុនវិនិយោគទុនអាណិកជនកម្ពុជា(OCIC) ដែលកំពុងស្ថិតក្នុងដំណើរការប្រែក្លាយតំបន់នេះទៅជា "ក្រុងមួយនៅថ្ងៃអនាគត" ដោយនឹងត្រូវចំណាយប្រាក់ប្រមាណ៣ពាន់លានដុល្លារ។
ឌី វ៉ាន់ បានឲ្យដឹងថា ខ្លួនធ្លាប់ដើរកាត់ខ្ទមមួយរបស់សន្តិសុខខណ្ឌ ដើម្បីទៅច្រូតស្មៅ ប៉ុន្តែ គ្មាននរណាមកហាមឃាត់ទេពីមុនមក។
ឌី វ៉ាន់ បាននិយាយកាលពីម្សិលមិញថា "ប៉ុន្តែ នៅថ្ងៃទី២៤ ខែកញ្ញា ពួកគេបានផឹកស្រវឹងជោក ហើយនៅពេលខ្ញុំឈ្លោះប្រកែកជាមួយពួកគេយ៉ាងយូរ បុរសម្នាក់បានទះកំផ្លៀងខ្ញុំ"។ នៅពេលកម្មកររូបនេះចាប់ផ្តើមរត់ត្រឡប់ទៅកន្លែងរបស់ខ្លួនវិញ សន្តិសុខបានដេញតាម។
ឌី វ៉ាន់ បាននិយាយបន្តថា "ពួកគេបានទាញយកដំបងធំៗ ហើយវាយខ្ញុំពីក្រោយនៅពេលខ្ញុំកំពុងរត់"។
ឌី វ៉ាន់ និងសាក្សីផ្សេងៗទៀតនិយាយថា កងសន្តិសុខជំនួយបានមកដល់ភ្លាមៗ ហើយបានរុញខ្លួន និងបងប្អូនជីដូនមួយរបស់ខ្លួនឈ្មោះ ហម ហឹម អាយុ២១ឆ្នាំ ដែលបានឮការឈ្លោះគ្នាហើយមកជួយ ខ្ទប់ទៅនឹងជ្រុងមួយនៅទីសត្តឃាត។
ហម ហឹម បាននិយាយថា នៅពេលសន្តិសុខព្យាយាមរុញ ឌី វ៉ាន់ ចូលទៅក្នុងរថយន្តរបស់ពួកគេ ប្រពន្ធកំពុងមានផ្ទៃពោះរបស់ ឌី វ៉ាន់ ឈ្មោះ សារី វ៉ាស់ អាយុ១៨ឆ្នាំ បានព្យាយាមមកឃាត់ពួកគេ ប៉ុន្តែ នាងត្រូវពួកគេរុញឲ្យដួលទៅលើដី។ បន្ទាប់មកទៀតសន្តិសុខបានឃាត់ខ្លួន ហម ហឹម និងអ្នកភូមិម្នាក់ទៀត ឈ្មោះ រ៉ាន់ ភ័ក្ត្រ ដែលបានមកជួយដែរនោះ។
ហម ហឹម បានឲ្យដឹងថា ពួកគេទាំងពីរនាក់ត្រូវបាននាំទៅកាន់សាលាខណ្ឌនៅម៉ោងប្រហែល១រសៀល ដែលស្ថិតនៅបរិវេណដីដែលកំពុងយាមដោយសន្តិសុខរបស់ក្រុមហ៊ុន វិនិយោគទុនអាណិកជនកម្ពុជា។ ពួកគេត្រូវបានឃុំខ្លួនរហូតដល់ម៉ោងប្រហែល១១យប់នៅទៅនោះ។
ហម ហឹម និយាយថា "នៅពេលមួយសន្តិសុខបានមកដល់ ហើយទះកំផ្លៀងខ្ញុំ និងកាត់សក់ខ្ញុំ ដើម្បីឲ្យមើលទៅអាក្រក់។ ពួកគេបាននិយាយថា ពួកគេនឹងវាយដំខ្ញុំរហូតដល់ខ្ញុំនិយាយការពិត ប៉ុន្តែ ការពិតដែលពួកគេចង់បាននោះ គឺគ្រាន់តែជាការភូតកុហកប៉ុណ្ណោះ"។
នៅពេលទាក់ទងកាលពីម្សិលមិញ លោក ឃ្លាំង ហួត អភិបាលខណ្ឌជ្រោយចង្វាបាននិយាយផ្សេង ចំពោះហេតុការណ៍ដែលបានកើតឡើងកាលពីសប្តាហ៍មុននោះ។ លោកបានលើកឡើងថា វាគឺជាកម្មករនៅទីសត្តឃាតទេដែលវាយមកលើសន្តិសុខ ហើយថា កងរាជអាវុធហត្ថត្រូវបានហៅឲ្យមកធ្វើការចាប់ខ្លួន។
លោក ឃ្លាំង ហួត ដែលការិយាល័យរបស់លោកស្ថិតក្នុងបរិវេណសំណង់លំនៅដ្ឋានដែលក្រុមហ៊ុនវិនិយោគទុនអាណិកជនកម្ពុជាបានសាងសង់ឡើងដើម្បីបញ្ចុះបញ្ចូលអ្នកភូមិឲ្យចាកចេញពីដីអភិវឌ្ឍន៍បានលើកឡើងថា បុរសបីទៅបួននាក់បានវាយដំលើសន្តិសុខដែលមិនដឹងអី។
លោកបានមានប្រសាសន៍ថា "ក្មេងទំនើងទាំងនេះនៅពេលពួកគេឃើញអ្វីដែលខ្លួនមិនចូលចិត្ត គឺពួកគេចង់វាយតែម្តង។ ពួកគេបានប្រើកាំបិតផ្គាក់ និងដំបងធំៗទៅវាយសន្តិសុខ"។
លោក ឃ្លាំង ហួត បានឲ្យដឹងទៀតថា "សន្តិសុខរបស់លោកបានគេចរួចដោយគ្មានរបួស ពីកណ្តាប់ដៃក្មេងទំនើងទាំងនេះ ហើយថា អ្នករួមការងារនៅក្បែរនោះបានឮការហៅឲ្យជួយ ទើបមានអន្តរាគមន៍ពីកងរាជអាវុធហត្ថ"។
លោកបានមានប្រសាសន៍បន្តថា "យើងចាប់ខ្លួនពួកគេបានតែពីរនាក់ប៉ុណ្ណោះ ហើយពួកគេត្រូវបានឃុំខ្លួនអស់រយៈពេល៣ទៅ៤ម៉ោង។ យើងបានដោះលែងពួកគេវិញ បន្ទាប់ពីពួកគេបានចុះហត្ថលេខាលើលិខិតមួយដោយសន្យាថា នឹងមិនធ្វើរឿងនេះម្តងទៀត"។
នៅពេលត្រូវបានសាកសួរថា តើហេតុអ្វី បានជាសន្តិសុខខណ្ឌការពារដីរបស់ក្រុមហ៊ុនវិនិយោគទុនអាណិកជនកម្ពុជា លោក ឃ្លាំង ហួត បានមានប្រសាសន៍ថា "ពួកគេយាមកន្លែងនេះតាមបញ្ជាពីសាលារាជធានី"។
បន្ទាប់មកអភិបាលខណ្ឌរូបនេះ បានរិះគន់ខ្លាំងៗចំពោះការនិយាយថា សន្តិសុខរបស់លោកស្រវឹងស្រា។
លោកបានមានប្រសាសន៍ថា "កុំព្យាយាមចោទប្រកាន់មន្ត្រីថ្នាក់ក្រោមរបស់ខ្ញុំ មន្ត្រីរបស់ខ្ញុំមានវិន័យល្អណាស់ ខ្ញុំមិនដែលអនុញ្ញាតឲ្យសន្តិសុខរបស់ខ្ញុំផឹកស្រានៅថ្ងៃបុណ្យឡើយព្រោះខ្ញុំគោរពព្រះពុទ្ធសាសនា។ ថ្ងៃនោះគឺឹជាថ្ងៃភ្ជុំបិណ្ឌ ពួកគេត្រូវតែធ្វើការមិនមែនផឹកស្រានោះទេ"៕ស៊ុយឈាង