CATEGORY
ព័ត៌មានជាតិ
វិនិយោគិនតៃវ៉ាន់មិនបារម្ភនឹងរឿងនយោបាយ
ក្រុមហ៊ុនពាណិជ្ជកម្មតៃវ៉ាន់ជាច្រើនដែលសម្លឹងមើលឱកាសបោះទុនវិនិយោគក្នុងប្រទេសកម្ពុជា ហាក់ដូចជាមិនបារម្ភនឹងការសន្យារបស់លោកនាយករដ្ឋមន្ត្រី ហ៊ុន សែន កាលពីខែមុន ថានឹងរារាំងផែនការរបស់ការិយាល័យពាណិជ្ជកម្មតៃវ៉ាន់ក្នុងក្រុងភ្នំពេញ ជាការបង្ហាញសាមគ្គីភាពជាមួយរដ្ឋាភិបាលក្រុងប៉េកាំងទេ។
អំឡុងទស្សនកិច្ច បេសកកម្មពាណិជ្ចកម្មតៃវ៉ាន់ប្រចាំឆ្នាំលើកទី៤នៅកម្ពុជា នៅសណ្ឋាគារអិនធើខុនធីណិនថលក្នុងក្រុងភ្នំពេញកាលពីម្សិលមិញ...
គ្រូបង្រៀនម្នាក់និងក្មេងប្រុសម្នាក់ត្រូវរន្ទះបាញ់ស្លាប់ក្នុងខេត្តផ្សេងគ្នា
ក្រុមមន្ត្រីបាននិយាយថា គ្រូបឋមសិក្សាម្នាក់ និង ក្មេងជំទង់ម្នាក់ត្រូវរន្ទះបាញ់ស្លាប់ក្នុងខេត្ត ផ្សេងគ្នាកាលពីថ្ងៃច័ន្ទ។ យោងតាមលោក សៅ ប៊ុន អធិការនគរបាលស្រុកម៉ាឡៃ បានឲ្យដឹងថា នៅក្នុងខេត្តបន្ទាយមានជ័យ កយ កុយ អាយុ១៦ឆ្នាំត្រូវរន្ទះបាញ់ស្លាប់ខណៈដែលកំពុងងូតទឹកស្រះចម្ងាយប្រហែល១០០ម៉ែត្រពីផ្ទះរបស់ខ្លួន ស្ថិតក្នុងស្រុកម៉ាឡៃ នៅម៉ោងប្រហែល៣ និង៤៥នាទីរសៀល។
លោក សៅ ប៊ុន បានមានប្រសាសន៍កាលពីម្សិលមិញថា "ក្មេងប្រុសរូបនេះកំពុងងូតទឹកស្រះអំឡុងភ្លៀងខ្លាំង ហើយបានស្លាប់ភ្លាមៗ បន្ទាប់ពីត្រូវរន្ទះបាញ់"។
លោក ប្រាក់ សារឹម មេឃុំសាមគ្គី បានមានប្រសាសន៍ថា នៅក្នុងករណីដាច់ដោយឡែកមួយទៀត អ្នកស្រី មាស សារ៉ាន់ អាយុ៤២ឆ្នាំជាគ្រូបង្រៀនបឋមសិក្សាម្នាក់មកពីស្រុកព្រៃនប់ ខេត្តព្រះសីហនុ ត្រូវរន្ទះបាញ់ស្លាប់អំឡុងពេលភ្លៀង។
លោក សារឹម បានមានប្រសាសន៍ថា "គាត់ខ្លាច ហើយបានរត់ទៅជ្រកផ្ទះអ្នកជិតខាង ហើយគាត់មិនបានកាន់អ្វីទេ ប៉ុន្តែ ត្រូវរន្ទះបាញ់ស្លាប់"។
លោក កែវ វី ប្រធានខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍ថា រដ្ឋាភិបាលព្យាយាមបង្រៀនប្រជាពលរដ្ឋឲ្យចេះប្រុងប្រយ័ត្នអំឡុងពេលភ្លៀងផ្គរ។ លោកបានមានប្រសាសន៍ថា "យើងបានអប់រំប្រជាពលរដ្ឋឲ្យរកកន្លែងសុវត្ថិភាពដើម្បីជ្រក ហើយថា នៅពេលមានផ្លេកបន្ទោរកុំកាន់វត្ថុដែលមានជាតិដែក ទូរស័ព្ទ ឬទៅវាលស្រែជាដើម"៕សារុន
វិវាទដីធ្លីក្នុងខេត្តក្រចេះនៅតែគ្មានដំណោះស្រាយបន្ទាប់ពីការពិភាក្សា
តំណាងអ្នកភូមិខេត្តក្រចេះ ដែលបានជាប់ពាក់ព័ន្ធក្នុងវិវាទដីធ្លី ជាមួយក្រុមហ៊ុនកសិពាណិជ្ជកម្មមួយបាននិយាយថា ការពិភាក្សាជាមួយមន្ត្រីរៀបចំដែនដី និងមន្ត្រីខេត្តនៅសាលាស្រុកស្នួលកាលពីម្សិលមិញ បានបញ្ចប់ដោយគ្មានដំណោះស្រាយអ្វីឡើយ។
តាមព័ត៌មានថា អាជ្ញាធរបានប្រមូលឯកសារ និងគ្រោងធ្វើការពិភាក្សាបន្តនៅថ្ងៃទី១៨ ខែកញ្ញាហើយនៅពេលមួយពួកបានអះអាងប្រាប់ក្រុមអ្នកភូមិថា ពួកគេនឹងសម្រេចថា តើនរណាមានសិទ្ធិកាន់កាប់ដី របស់ខ្លួន។
លោក សួន វិច្ឆិកា តំណាងអ្នកភូមិ៣២៩គ្រួសាររស់នៅក្នុងឃុំស្នួលបាននិយាយថា "យើងស្នើឲ្យអាជ្ញាធររកដំណោះស្រាយឲ្យបានឆាប់សម្រាប់អ្នកភូមិ ហើយបានលើកឡើងថា ពួក គេត្រូវតែប្រគល់ដី ឲ្យពួកយើងវិញ"។
សមាជិកសហគមន៍ប្រហែល១០០នាក់បានធ្វើការតវ៉ានៅខាងក្រៅសាលាស្រុក ពីព្រោះក្រុមអ្នកភូមិ និងអ្នកយកព័ត៌មានត្រូវបានរារាំងមិនឲ្យចូលទៅក្នុងអគារនោះអំឡុងការពិភាក្សា ប៉ុន្តែ ទីបំផុតអ្នកយកព័ត៌មានពីរបីនាក់ត្រូវបានអនុញ្ញាតឲ្យចូល។
អ្នកភូមិដែលរដ្ឋាភិបាលបានសន្យាផ្តល់ប័ណ្ណកម្មសិទ្ធិដីត្រូវអាជ្ញាធរចាប់ខ្លួន បន្ទាប់ពីក្រុមហ៊ុន Horizon Agricultural Development ដែលលើកឡើងថា ក្រុមហ៊ុនទទួលបានដីសម្បទានសេដ្ឋកិច្ចកាលពីឆ្នាំ២០០៨ដើម្បីដាំដំឡូងមី និងម្រេចនៅលើដីនេះ បានដាក់ពាក្យបណ្តឹង។
កាលពីថ្ងៃទី១៨ ខែសីហា ក្រុមអ្នកភូមិបានប៉ះទង្គិចជាមួយនគរបាលនៅក្នុងរាជធានីភ្នំពេញ ខណៈដែលព្យាយាមដាក់ញត្តិនៅភូមិគ្រឹះលោកនាយករដ្ឋមន្ត្រី ហ៊ុន សែន ដើម្បីសុំជំនួយ។ នៅព្រឹកថ្ងៃដដែលនោះលោក ហ៊ុន សែន បានរិះគន់លោក អឹុម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោក ស ចំរុង អភិបាលខេត្តក្រចេះនៅក្នុងសុន្ទរកថាមួយ ចំពោះការមិនរកដំណោះស្រាយចំពោះវិវាទដីធ្លី។
លោក កៅ ម៉ាលីឡែន ប្រធានមន្ទីររៀបចំដែនដីខេត្តបានមានប្រសាសន៍កាលពីម្សិលមិញថា គណៈកម្មាធិការសុរិយោដីថ្នាក់ជាតិបានមកស្រង់ទិន្នន័យអំពីករណីនេះ ហើយបាននិយាយថា លោកនឹងរាយការណ៍ទៅលោក អឹុម ឈុនលឹម ឲ្យបានទាន់ពេលវេលាសម្រាប់ការប្រជុំនៅខែកញ្ញា។
លោក ម៉ាលីឡែន បានមានប្រសាសន៍ថា "អ្នកភូមិទាំងនោះបានស្នើសុំឲ្យមានដំណោះស្រាយឲ្យបានឆាប់ ប៉ុន្តែ សំណើនេះមិនអាចទទួលយកបានទេ ពីព្រោះពួកគាត់គ្រាន់តែជាភាគីម្ខាងប៉ុណ្ណោះ"។ លោកបានបន្ថែមថា លោកសង្ឃឹមថា តំណាងក្រុមហ៊ុននឹងចូលរួមកិច្ចប្រជុំលើកក្រោយ។
លោក វិច្ឆិកា បាននិយាយថា ក្រុមអ្នកភូមិនឹងមិនទទួលយកអ្វីឡើយក្រៅតែពីការទទួលបានដី ដែលមានវិវាទនៅថ្ងៃទី១៨ ខែកញ្ញាមកវិញ។ លោកបាននិយាយថា "យើងនឹងបន្តធ្វើការតវ៉ាទៀត ប្រសិនបើពួកគេសម្រេចឲ្យក្រុមហ៊ុនឈ្នះនោះ"៕សារុន
តុលាការសាកសួរអ្នកភូមិពាក់ព័ន្ធវិវាទដីធ្លីជាមួយលោក លី យ៉ុងផាត់
កាលពីម្សិលមិញ សាលាដំបូងខេត្តកោះកុងបានសាកសួរតំណាងអ្នកភូមិបួននាក់ពាក់ព័ន្ធការប្រើអំពើហិង្សា និងការបំផ្លាញទ្រព្យសម្បត្តិនៅក្នុងវិវាទដីធ្លីដ៏អូសបន្លាយមួយជាមួយក្រុមហ៊ុនរបស់លោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា ដែលគ្រប់គ្រងតំបន់សេដ្ឋកិច្ចពិសេសកោះកុង។
កាលពីខែមករា លោក លី យ៉ុងផាត់ បានចាប់ផ្តើមសង់របងបេតុងជុំវិញដីដែលមានវិវាទក្នុងស្រុកគិរីសាគរ។ នៅពេលក្រុមអ្នកភូមិព្យាយាមរារាំងការសាងសង់ដោយដកយកសម្ភារនោះ លោក លី យ៉ុងផាត់ បានដាក់ពាក្យបណ្តឹងទៅសាលាដំបូងខេត្តដោយចោទប្រកាន់ពួកគាត់ពីបទប្រើអំពើហិង្សាលើកម្មកររបស់លោក និងបំផ្លាញញញួរ ប៉ែល និងរទេះរុញ។
លោក រួត សុផល តំណាងអ្នកភូមិម្នាក់ក្នុងចំណោមតំណាងទាំងបួននាក់ដែលត្រូវបានសាកសួរកាលពីម្សិលមិញ បាននិយាយថា "យើងបានប្រាប់តុលាការថា យើងមិនបានប្រើអំពើហិង្សាទេ ហើយថា សម្ភារទាំងនោះត្រូវបានរក្សាទុកដោយសុវត្ថិភាពនៅផ្ទះអនុប្រធានភូមិ"។
លោក សុផល បាននិយាយថា "ខ្ញុំតូចចិត្តណាស់ដែលក្រុមហ៊ុន និងអាជ្ញាធរ បានប្លន់យកដីរបស់អ្នកភូមិ។ យើងស្នើឲ្យរកដំណោះស្រាយឲ្យបានសមរម្យ ប៉ុន្តែ គ្មានដំណោះស្រាយឡើយ។ យើងនឹងតវ៉ាប្រឆាំងក្រុមហ៊ុននេះរហូតដល់យើងរកដំណោះស្រាយបាន"។
លោក សុផល បាននិយាយថា អ្នកភូមិ១៣៥គ្រួសារបានបាត់បង់ដីស្រែចម្ការរបស់ខ្លួនបន្ទាប់ពីលោក លី យ៉ុងផាត់ បានបណ្តេញពួកគាត់ចេញដើម្បីចាប់ផ្តើមសាងសង់របង។
លោក លី យ៉ុងផាត់ ដែលមិនអាចទាក់ ទងសុំអត្ថាធិប្បាយបាន បាននិយាយក្នុងពេលកន្លងមកថា លោកគ្មានអ្វីពាក់ព័ន្ធនឹងគ្រួសារអ្នកភូមិទេ ព្រោះលោកបានទិញដីទំហំប្រហែល២.០០០ហិកតាដោយស្របច្បាប់ពីម្ចាស់ស្របច្បាប់។
លោក ស្រី ម៉ាក់នី ព្រះរាជអាជ្ញារងដែលបានសាកសួរតំណាងអ្នកភូមិទាំងនោះមិនអាចទាក់ទងសុំអត្ថាធិប្បាយបានទេ។
លោក ផាត ប៊ុនហួ តំណាងក្រុមហ៊ុនគ្រប់គ្រងតំបន់សេដ្ឋកិច្ចកោះកុងបាននិយាយកាលពីម្សិលមិញថា "ក្រុមហ៊ុនមិនបានប្លន់ដីរបស់អ្នកភូមិទេ ប៉ុន្តែ ក្រុមអ្នកភូមិទេបានប្លន់ដីរបស់ក្រុមហ៊ុននោះ"។
លោកបានបន្ថែមថា "យើងលំបាកនិយាយជាមួយ អ្នកភូមិណាស់ ពីព្រោះពួកគាត់មិនដែលស្តាប់យើងឡើយ"។
លោក អិុន គង់ចិត្រ អ្នកសម្របសម្រួលអង្គការសិទ្ធិមនុស្សលីកាដូប្រចាំខេត្តកោះកុងបានមានប្រសាសន៍ថា អ្នកភូមិជាង១០០នាក់បានធ្វើការតវ៉ានៅខាងក្រៅតុលាការកាលពីម្សិលមិញ ដើម្បីគាំទ្រតំណាងទាំងនោះ។
លោក គង់ចិត្រ បានមានប្រសាសន៍ថា "ខ្ញុំគិតថា ក្រុមហ៊ុន ចង់គំរាមកំហែងដល់ស្មារតី របស់អ្នកភូមិដូច្នេះពួកគេបានដាក់ពាក្យបណ្តឹងប្តឹងក្រុមអ្នកភូមិ"។ លោកបានបន្ថែមថា ក្រុមអ្នកភូមិបានជួបប្រជុំជាមួយលោក សុន តារា អភិបាលរងខេត្ត បន្ទាប់ពីមានការតវ៉ា។
លោក សុផល ដែលជាតំណាងអ្នកភូមិបាននិយាយថា លោកអភិបាលរងបានសន្យាបញ្ជូនបន្តករណីរបស់ពួកគាត់ទៅមន្ត្រីថ្នាក់ជាតិ។ប៉ុន្តែ លោក សុផល បានបន្ថែមថា "ខ្ញុំឈប់ជឿមន្ត្រីខេត្តទៀតហើយ ពីព្រោះពួកគេបាននិយាយដូចពីមុនអ៊ីចឹង"៕សារុន
រដ្ឋសភាបោះឆ្នោតគាំទ្រ លោក កឹម សុខា ជាអនុប្រធានទី១រដ្ឋសភា
នៅក្នុងការចាប់ផ្ដើមបែបលេងឆាកល្ខោនមួយចំពោះការកាន់តំណែងរបស់លោក កឹម សុខា អនុប្រធានគណបក្សសង្គ្រោះជាតិជាអនុប្រធានទី១រដ្ឋសភានោះ កាលពីម្សិលមិញលោកនាយករដ្ឋមន្ត្រី ហ៊ុន សែន បានក្រោកឈរនៅក្នុងរដ្ឋសភាដើម្បីប្រាប់ឲ្យលោក ងួន...
កាលពីម្សិលមិញបុគ្គលិកសព្វថ្ងៃរបស់ក្រុមហ៊ុន ភ្នំពេញ-សូរិយា ដឹកជញ្ជូនអ្នកដំណើរ ប្រហែល៥០នាក់ បាននាំគ្នាធ្វើការតវ៉ាតបតមួយនៅខាងក្រៅការិយាល័យរបស់ខ្លួន ដើម្បីទប់ទល់នឹងការតវ៉ាកំពុងបន្តរបស់អ្នកបើកបររថយន្តចំនួន១៧នាក់ដែលត្រូវបានបណ្ដេញចេញ និងសមាជិកសហជីពរាប់សិបនាក់ផ្សេងទៀត។
កាលពីថ្ងៃអាទិត្យ សមាជិកសហជីពជាង១០០នាក់ ដែលបានចូលរួមនៅក្នុងការតវ៉ារបស់អតីតអ្នកបើកបរទាំងនេះបាននាំគ្នាបិទផ្លូវនៅខាងមុខចំណតរថយន្តក្រុងសូរិយា...
កម្មវិធីក្នុងទូរស័ព្ទស្មាតហ្វូនជួយកសិករដាំស្រូវបានទិន្នផលខ្ពស់
អង្គការមិនមែនរដ្ឋាភិបាលផ្នែកកសិកម្មអន្តរជាតិមួយ កំពុងរៀបចំបញ្ចេញគម្រោងមួយទូទាំងប្រទេស ក្នុងភាពជាដៃគូជាមួយក្រុមហ៊ុនផលិតឈិបកំព្យូទ័រ Intel ដែលធ្វើឲ្យកសិករជាង២៥.០០០នាក់នឹងអាចទទួលការណែនាំតាមកាលៈទេសៈផ្ទាល់អំពីវិធីធ្វើស្រែតាមរយៈកម្មវិធីស្មាតហ្វូន (Smartphone App)។
មូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) បានធ្វើគម្រោងសាកល្បងនេះកាលពីសប្តាស៍មុននៅខេត្តកណ្តាល...
រដ្ឋសភានឹងបោះឆ្នោតជ្រើសរើសប្រធានគណៈកម្មការសភានៅថ្ងៃនេះ
រដ្ឋសភានឹងកោះប្រជុំនៅព្រឹកនេះដើម្បីបោះឆ្នោតជ្រើសរើសសមាជិក និងប្រធានគណៈកម្មការសភាចំនួន១០ ដែលត្រូវបានបែងចែកស្មើគ្នារវាងគណបក្សប្រជាជនកម្ពុជា និងគណបក្សសង្គ្រោះជាតិ តាមកិច្ចព្រមព្រៀងដែលគណបក្សទាំងពីរបានសម្រេចកាលពីខែមុន។
កាលពីថ្ងៃទី២២ ខែកក្កដាលោក សម រង្ស៊ី ប្រធានគណបក្សសង្គ្រោះជាតិបានទទួលយកកិច្ចព្រមព្រៀងមួយដើម្បីបញ្ចប់ការធ្វើពហិការមិនចូលសភារបស់គណបក្សប្រឆាំងជាថ្នូរនឹងសម្បទានមួយចំនួនពីលោកនាយករដ្ឋមន្ត្រី ហ៊ុន សែន រួមទាំងការគ្រប់គ្រងគណៈកម្មការចំនួនប្រាំផងដែរ។
ក្រោមកិច្ចព្រមព្រៀងនេះគណបក្សប្រជាជនកម្ពុជាដែលគ្រប់គ្រងគណៈកម្មការទាំងអស់អំឡុងអាណត្តិមុន ឥឡូវនេះនឹងគ្រប់គ្រងតែប្រាំប៉ុណ្ណោះ។ គណបក្សនីមួយៗនឹងមានសមាជិកប្រាំរូបនៅក្នុងគណៈកម្មការដែលខ្លួនគ្រប់គ្រង និងសមាជិកបួនរូបក្នុងគណៈកម្មការដែលខ្លួនមិនគ្រប់គ្រង។
លោក យែ៉ម បុញ្ញប្ញទ្ធិ អ្នកនាំពាក្យគណបក្សសង្គ្រោះជាតិដែលឈរឈ្មោះឲ្យ គេបោះឆ្នោតជាប្រធានគណៈកម្មការអប់រំ កិច្ចការសាសនា វប្បធម៌ និងទេសចរណ៍បានមានប្រសាសន៍ថា សេនារីយោនេះនឹងបង្ហាញឲ្យឃើញថា សមាជិកសភាស្ទើរទាំង១០រូបរបស់គណបក្សនេះត្រូវបានជ្រើសរើសឲ្យកាន់តួនាទី។
លោកបានមានប្រសាសន៍ថា "សម្រាប់គណបក្សសង្គ្រោះជាតិ យើងមានសមាជិកសភាចំនួន៤៥រូបដែលត្រូវតែងតាំងសម្រាប់តួនាទីជាប្រធាន អនុប្រធាន លេខាធិការ និងសមាជិកគណៈកម្មការ"។ លោក បុញ្ញប្ញទ្ធិ បានបន្ថែមថា "ការបោះឆ្នោតនៅថ្ងៃស្អែកនេះ នឹងជាការបោះឆ្នោតសម្ងាត់ដែលតម្រូវឲ្យមានសំឡេងឆ្នោតភាគច្រើនដាច់ខាតតាមរយៈរូបមន្ត៥០បូក១"។
លោក បុញ្ញប្ញទ្ធិ បានមានប្រសាសន៍ថា គណបក្សសង្គ្រោះជាតិក៏នឹងតែងតាំងលោក អេង ឆៃអ៊ាង ជាប្រធានគណៈកម្មការសិទ្ធិមនុស្ស លោក ប៉ុល ហំម ជាប្រធានគណៈកម្មការផែនការ វិនិយោគ និងកសិកម្ម លោកស្រី មូរ សុខហួរ ជាប្រធានគណៈកម្មការកិច្ចការសាធារណៈ សង្គមកិច្ច និងកិច្ចការនារី ហើយលោក យឹម សុវណ្ណ ជាប្រធានគណៈកម្មការប្រឆាំងអំពើពុករលួយ និងសើុបអង្កេតផងដែរ។
លោក ហ៊ុន សែន បានធានាជាសាធារណៈចំពោះគណបក្សសង្គ្រោះជាតិថា សមាជិកសភារបស់គណបក្សលោកទាំង៦៨រូបនឹងបោះឆ្នោតគាំទ្រការតែងតាំងសមាជិកគណបក្សប្រឆាំងដូចដែលបានព្រមព្រៀងតាមកិច្ចព្រមព្រៀងនយោបាយ ដែលបានសម្រេចកាលពីថ្ងៃទី២២ ខែកក្កដា។
គេមិនអាចទាក់ទងលោក ជាម យៀប អ្នកនាំពាក្យគណបក្សប្រជាជនកម្ពុជាបានទេ ប៉ុន្តែ គេរំពឹងថា ប្រធានគណៈកម្មការប្រាំរូបរបស់គណបក្សនេះពីអាណត្តិមុន នឹងទទួលបានតួនាទីរបស់ខ្លួនដដែលនៅក្នុងការបោះឆ្នោតនៅថ្ងៃេនះ។
បើគ្មានការផ្លាស់ប្តូរណាមួយចំពោះប្រធានគណៈកម្មការទាំងប្រាំដែលគណបក្សប្រជាជនកម្ពុជាធ្លាប់គ្រប់គ្រងទេនោះ លោក ជាម យៀប នឹងជាប្រធានគណៈកម្មការសេដ្ឋកិច្ច និងហិរញ្ញវត្ថុ លោក ហ៊ុន ណេង នឹងជាប្រធានគណៈកម្មការមហាផ្ទៃ និងការពារជាតិ លោក ឈាង វុន នឹងជាប្រធានគណៈ កម្មការកិច្ចការបរទេស និងប្រព័ន្ធផ្សព្វផ្សាយ លោក បែ៉ន បញ្ញា នឹងជាប្រធានគណៈកម្មការច្បាប់ និងយុត្តិធម៌ និងលោក និន សាផុន នឹងជាប្រធានគណៈកម្មការសាធារណការ ដឹកជញ្ជូន ទូរគមនាគមន៍ និងរ៉ែ។
លោក ឈាង វុន ដែលក៏ជាអ្នកនាំពាក្យរដ្ឋសភាដែរនោះបានបដិសេធមិនធ្វើអត្ថាធិប្បាយអំពីបញ្ហានេះ។
ប្រធានគណៈកម្មការទាំង១០ នឹងបង្កើតគណៈកម្មាធិការអចិន្ត្រៃយ៍សភា ដែលគ្រប់គ្រងរបៀបវារៈច្បាប់ និងកំណត់បទបញ្ជាផ្ទៃក្នុងរបស់រដ្ឋសភាជាមួយលោក ហេង សំរិន ប្រធានរដ្ឋសភា និងអនុប្រធានពីររូប ដែលមួយរូបក្នុងចំណោមនោះនឹងជាលោក កឹម សុខា អនុប្រធានគណបក្សសង្គ្រោះជាតិ៕សារុន
នគរបាលចាប់ខ្លួនមនុស្ស១៦នាក់នៅក្នុងការឆ្មក់ចាប់គ្រឿងញៀនក្នុងក្រុងស្ទឹងត្រែង
កងរាជអាវុធហត្ថបានចាប់ខ្លួនមនុស្ស១៦នាក់ និងដកហូតថ្នាំមេតំហ្វេតាមីនជាង៣.០០០គ្រាប់ អំឡុងការឆ្មក់ចាប់គ្រឿងញៀននៅក្នុងក្រុងស្ទឹងត្រែងកាលពីថ្ងៃអាទិត្យ និងថ្ងៃម្សិលមិញ។
លោក អៀង វណ្ឌី មេបញ្ជាការកងរាជអាវុធហត្ថខេត្តស្ទឹងត្រែងបានមានប្រសាសន៍កាលពីម្សិលមិញថា ការឆ្មក់ចាប់រយៈពេលពីរថ្ងៃនៅក្នុងសង្កាត់ស្ទឹងត្រែង ក្រុងស្ទឹងត្រែង...
យោងតាមប្រព័ន្ធផ្សព្វផ្សាយបានរាយការណ៍ថា នគរបាលអន្តរជាតិអាំងទែប៉ូល កំពុងតែស៊ើបអង្កេតលើករណីបុរសជនជាតិជប៉ុនម្នាក់ដែលត្រូវបានសង្ស័យថា ជាមេខ្លោងជួញដូរក្មេងៗ ដោយបានបើកការស៊ើបអង្កេតនៅក្នុងប្រទេសចំនួនបួន រួមមានប្រទេសកម្ពុជាផងដែរ។
កាលពីសប្ដាហ៍មុន នាយកដ្ឋាននគរបាលប្រឆាំងការជួញដូរមនុស្សរាជធានីភុ្នំពេញបានបញ្ជាក់ថា ខ្លួនកំពុងស៊ើបអង្កេតលើករណីរបស់លោក Mitsutoki...