CATEGORY
ព័ត៌មានជាតិ
បុរសពីរនាក់ត្រូវបានចាប់ខ្លួននៅក្នុងខេត្តព្រៃវែងកាលពីថ្ងៃសុក្រ ពីបទធ្វើទារុណកម្មក្មេងប្រុសអាយុ១៤ឆ្នាំម្នាក់ ដោយការចាប់ក្បាលជ្រមុជក្នុងទឹកពាងបន្ទាប់ពីក្មេងនេះបានលួចបេះដូងបួនផ្លែពីដីចម្ការពួកគេនេះបើយោងតាមការឲ្យដឹងពីមន្ត្រីនគរបាលមូលដ្ឋាន។
ហេង វណ្ណី អាយុ២៨ឆ្នាំត្រូវបានចាប់ខ្លួននៅផ្ទះរបស់ខ្លួនក្នុងស្រុកពារាំងរួមជាមួយបងប្រុសឈ្មោះ ហេង ដាណេ អាយុ៣៤ឆ្នាំ បន្ទាប់ពីរូបគេបានបង្ហោះលើគណនីហ្វេសប៊ុករបស់ខ្លួនកាលពីថ្ងៃព្រហស្បតិ៍ នូវរូបថតដែលបង្ហាញពីក្មេងប្រុសនេះត្រូវពួកគេចាប់ចងដៃទៅក្រោយ និងជ្រមុជក្បាលទៅក្នុងទឹកពាង។រូបថតមួយសន្លឹកទៀតបង្ហាញពីបុរសម្នាក់បោចសក់ក្បាលក្មេងប្រុសនេះ បន្ទាប់ពីទាញក្មេងនេះចេញពីពាងទឹកធំមួយ។
រូបភាពទាំងនេះបានសុសសាយយ៉ាងឆាប់រហ័ស ហើយសូម្បីតែលោកស្រី ហ៊ុន ម៉ាណា កូនស្រីរបស់លោកនាយករដ្ឋមន្ត្រី ហ៊ុន សែន ក៏បានចែករំលែករូបថតទាំងនេះលើទំព័រ
ហ្វេសប៊ុករបស់ខ្លួនដែរនិងថែមទាំងបានអំពាវនាវឲ្យនគរបាលចាប់ខ្លួនជនដែលធ្វើទារុណកម្មក្មេងប្រុសនេះជាបន្ទាន់ទៀតផង។
លោក អ៊ុំ វន្ថា អធិការនគរបាលស្រុកបានមានប្រសាសន៍ថា នគរបាលទទួលបានដំណឹងអំពីហេតុការណ៍នេះតាមហ្វេសប៊ុក ហើយក៏បានតាមចាប់ខ្លួនឈ្មោះ ហេង វណ្ណី ដល់ឃុំកំពង់ពពិលនៅហាងជួសជុលទូរស័ព្ទរបស់ពួកគេ។ បច្ចុប្បន្នពួកគេកំពុងជាប់ឃុំនៅឡើយ។
លោកបានមានប្រសាសន៍ទៀតថា "ហេង ដាណេ បានសារភាពថា រូបគេបានទៅដល់ចម្ការរបស់ខ្លួន ហើយក៏ឃើញក្មេងប្រុសនេះកំពុងបេះដូងនៅលើដើម។ រូបគេបានប្រាប់ក្មេងប្រុសនេះឲ្យចុះមកដីហើយបានចាប់ចងដៃរបស់វាទៅក្រោយរួចចាប់ក្បាលជ្រមុជទឹកពាង"។
លោកបានលើកឡើងបន្ថែមទៀតថា ជនសង្ស័យទី២គឺ ហេង វណ្ណី ជាអ្នកឈរពីក្រោយចាំថតរូបទាំងនេះបង្ហោះតាមប្រព័ន្ធទំនាក់ទំនងសង្គម។
អ្នកស្រី ឆន សុខ អាយុ៤៥ឆ្នាំដែលត្រូវជាម្តាយរបស់ក្មេងប្រុសនេះបាននិយាយថា អ្នកស្រីមិនបានដឹងថា បុរសទាំងពីរនាក់នេះធ្វើទារុណកម្មកូនប្រុសរបស់គាត់បែបនេះឡើយរហូតទាល់តែនគរបាលទាក់ទងទៅគាត់ទើបគាត់ដឹង។
អ្នកស្រីនិយាយថា "ខ្ញុំគិតថា វាព្រៃផ្សៃណាស់ដែលពួកគេធ្វើទារុណកម្មវាទោះបីជាវាបានលួចដូងក៏ដោយ។ ពួកគេគួរតែព្រមាន និងណែនាំអប់រំវាទៅបានហើយ"។
លោកស្រី លឹម មុនី ប្រធានកម្មវិធីសិទ្ធិស្ត្រី និងកុមារនៅអង្គការសិទ្ធិមនុស្សអាដហុកបានមានប្រសាសន៍ថា បុរសទាំងនេះគួរតែប្រឈមការដាក់ទោសធ្ងន់ធ្ងរ។
លោកស្រីមានប្រសាសន៍ថា "វាជាការរំលោភសិទ្ធិកុមារ ពីព្រោះពួកគេ គ្មានសិទ្ធិធ្វើទារុណកម្មក្មេងប្រុសនេះឡើយ។ ពួកគេគួរតែប្តឹងទៅនគរបាលដើម្បីឲ្យនគរបាលចាត់ការតាមផ្លូវច្បាប់ ចំពោះអ្វីដែលក្មេងប្រុសនេះបានប្រព្រឹត្ត"។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសក៏បានបង្ហោះរូបថតនេះលើទំព័រហ្វេសប៊ុករបស់លោកដែរ ហើយលោកបានអំពាវនាវឲ្យអាជ្ញាធរចាប់ខ្លួនបុរសពីរនាក់បងប្អូននេះមកផ្តន្ទាទោសចំពោះមុខច្បាប់។
លោកបានមានប្រសាសន៍តាមទូរស័ព្ទថា "មូលហេតុដែលខ្ញុំបង្ហោះវាដោយសារតែបុរសទាំងពីរនាក់នេះសាហាវព្រៃផ្សៃ និងអមនុស្សធម៌ដូច ប៉ុល ពតអ៊ីចឹង ដូច្នេះហើយយើងមិនគាំទ្រពួកគេទេ ហើយក៏មិនពេញចិត្តចំពោះទង្វើនេះដែរ"៕សុខុម
កាលពីម្សិលមិញ អង្គការសហប្រជាជាតិ និងបណ្តាអង្គការសិទ្ធិមនុស្សបានអំពាវនាវឲ្យរដ្ឋាភិបាលគោរពកាតព្វកិច្ចរបស់ខ្លួនក្នុងឋានៈជាភាគីមួយនៃអនុសញ្ញាអន្តរជាតិដើម្បីការពារពលរដ្ឋគ្រប់រូបពីការបាត់ខ្លួនដោយបង្ខំ ហើយសើុបអង្កេតឲ្យបានល្អិតល្អន់ចំពោះការបាត់ខ្លួនរបស់យុវជន ខែម សុផាត អាយុ១៦ឆ្នាំ ដែលគេឃើញជាលើកចុងក្រោយដេកនៅនឹងដីដោយមានរបួសនិងប្រឡាក់ឈាមជោកខ្លួនអំឡុងបាតុកម្មហិង្សាកាលពីខែមករា។
សូមបញ្ជាក់ថា នៅថ្ងៃសៅរ៍នេះ គឺជាទិវាអន្តរជាតិនៃជនរងគ្រោះដោយសារការបាត់ខ្លួនដោយបង្ខំ។ ការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បានលើកឡើងតាមអីុម៉េលមួយថា ក្រុមគ្រួសាររបស់យុវជន ខែម សុផាត "បានរងទុក្ខមិនអាចថ្លែងបាន" ហើយបានជំរុញឲ្យរដ្ឋាភិបាលចាត់ "រាល់វិធានការ" ដើម្បីតាមស្វែងរក បង្ហាញទីតាំង និងដោះលែងអ្នកដែលបាត់ខ្លួន ហើយប្រសិនបើក្នុងករណីស្លាប់ ត្រូវបង្ហាញទីតាំង គោរព និងប្រគល់សាកសពមកវិញ"។ ។
ការិយាល័យនេះបានលើកឡើងបន្តថា "ប្រសិនបើរកឃើញថា ខែម សុផាត គឺជាករណីបាត់ខ្លួនដោយបង្ខំ អនុសញ្ញានេះត្រូវធ្វើឲ្យប្រាកដថា ប្រទេសនេះត្រូវតែនាំខ្លួនជនដែលទទួលខុសត្រូវមកផ្តន្ទាទោស"។
សេចក្ដីថ្លែងការណ៍ដាច់ដោយឡែកមួយដែលទទួលបានការគាំទ្រពីមជ្ឈមណ្ឌលសិទ្ធិមនុស្សកម្ពុជា និងអង្គការអាដហុក បានអំពាវនាវឲ្យបណ្តាប្រទេសជាសមាជិកអាស៊ាន រួមទាំងកម្ពុជាផង "បង្កើនការខិតខំប្រឹងប្រែងរបស់ខ្លួនដើម្បីសើុបអង្កេតករណីទាំងអស់នេះ និងករណីទាំងអស់ផ្សេងទៀតដែលមិនទាន់ដោះស្រាយនៅឡើយ នាំខ្លួនជនទទួលខុសត្រូវមកផ្តន្ទាទោស និងផ្តល់សំណងដល់ជនរងគ្រោះ និងក្រុមគ្រួសាររបស់ពួកគេ"៕សុខុម
ឱកាសលើកទី២កំពុងរង់ចាំសិស្ស៧៥ភាគរយដែលប្រឡងធ្លាក់
សិស្ស ឯក យុទ្ធារៈ បានទៅវិទ្យាល័យបាក់ទូកក្នុងរាជធានីភ្នំពេញកាលពីថ្ងៃសុក្រដោយកាន់ក្រដាសតូចមួយមានសរសេរឈ្មោះមិត្តភក្តិប្រាំពីរនាក់។យុវជនរូបនេះទៅទីនោះដើម្បីស្រង់លទ្ធផលប្រឡងថ្នាក់ជាតិរបស់មិត្តភក្តិ ដែលមិនអាចទ្រាំនឹងការប្រកាសលទ្ធផលដោយផ្ទាល់បាន។
យុទ្ធារៈ អាយុ១៧ឆ្នាំបាននិយាយថា "ខ្ញុំត្រូវតែរឹងមាំក្នុងការស្រង់លទ្ធផលនេះ ពីព្រោះមិត្តភក្តិរបស់ខ្ញុំមិនអាចគ្រប់គ្រងអារម្មណ៍របស់ពួកគេបាន"។
ដោយលទ្ធផលនៃការប្រឡងនៅខែនេះបង្ហាញអ្នកដែលអាចចូលរៀននៅសាកលវិទ្យាល័យ និងអ្នកដែលនៅចាំសាលានោះ សិស្សរាប់រយនាក់ដែលបានមកជុំគ្នាស្តាប់លទ្ធផលរបស់ខ្លួន មានអារម្មណ៍ភ័យផងអរផងយ៉ាងច្បាស់។
ក្រសួងអប់រំបានប្រកាសកាលពីថ្ងៃសុក្រថា បេក្ខជន២៣.១២៦នាក់ក្នុងចំណោម៨៩.៩៣៧នាក់នៅទូទាំងប្រទេសបានប្រឡងជាប់ ក៏ប៉ុន្តែ មានតែសិស្សនៅរាជធានីភ្នំពេញនិងខេត្តកណ្ដាលប៉ុណ្ណោះបានដឹងលទ្ធផលរៀងៗខ្លួន។
អត្រាប្រឡងជាប់សរុប២៥,៧ភាគរយ គឺជាអត្រាទាបបំផុតចាប់តាំងពីឆ្នាំ១៩៩៤មក ដែលពេលនោះមានតែ១២ភាគរយក្នុងចំណោមសិស្ស២០.៨២៩នាក់ប៉ុណ្ណោះបានប្រឡងជាប់ ហើយជាអត្រាទាបបំផុតទី៣ ចាប់តាំងពីឆ្នាំ១៩៧៩មក។
នៅរាជធានីភ្នំពេញ បេក្ខជន៥.៥៧០នាក់ក្នុងចំណោមបេក្ខជន១៧.២៦០នាក់ បានប្រឡងជាប់ពោលគឺស្មើនឹង៤៧ភាគរយ។ នៅខេត្តកណ្តាល បេក្ខជន១.៨៤៨នាក់ក្នុងចំណោមបេក្ខជន៩.៥៤០នាក់បានប្រឡងជាប់។នៅទូទាំងប្រទេសមានសិស្សតែ១១នាក់ប៉ុណ្ណោះ ទទួលបាននិទ្ទេស A។
លោក ហង់ ជួន ណារ៉ុន រដ្ឋមន្ត្រីក្រសួងអប់រំ ដែលទទួលខុសត្រូវទាំងស្រុងចំពោះការកែទម្រង់ប្រឡងថ្នាក់ជាតិ ដែលពោរពេញទៅដោយការលួចចម្លង និងអំពើពុករលួយយូរមកហើយនោះបានមានប្រសាសន៍ថា "ខ្ញុំភ្ញាក់ផ្អើលនឹងលទ្ធផលនេះណាស់"។
“ប៉ុន្តែ ចំណុចវិជ្ជមានគឺថា លទ្ធផលនេះផ្ដល់ឲ្យយើងនូវព័ត៌មានជាច្រើនអំពីថាតើត្រូវធ្វើឲ្យប្រព័ន្ធអប់រំប្រសើរឡើងរបៀបណា។ យើងបានដឹងថា ប្រព័ន្ធនេះចាំបាច់ត្រូវតែកែប្រែពេលដែលយើងវិភាគលទ្ធផលនេះ ហើយយើងអាចដឹងថា ត្រូវកែទម្រង់កន្លែងណាឲ្យពិតប្រាកដ"។
នៅសាលាបាក់ទូកសិស្ស យុទ្ធារៈ បានស្ដាប់លទ្ធផលរបស់មិត្តភក្តិខ្លួនម្ដងមួយៗ ហាក់ដូចជាស្ដាប់លទ្ធផលរបស់ខ្លួនអ៊ីចឹង។ ការហៅឈ្មោះដល់ពាក់កណ្ដាលបញ្ជីយុវសិស្សរូបនេះ គឺស្ថិតក្នុងចំណោមសិស្សបីនាក់ ដែលសុទ្ធតែប្រឡងជាប់ទាំងអស់។
បន្ទាប់ពីនិទ្ទេសប្រឡងជាប់នីមួយៗត្រូវបានគេប្រកាសឲ្យដឹងសិស្សរូបនេះបានហៅទូរស័ព្ទទៅមិត្តរបស់ខ្លួនដើម្បីប្រាប់ដំណឹងល្អនេះ។
យុវសិស្សនេះបានឲ្យដឹងថា "ខ្ញុំនឹងទូរស័ព្ទទៅមិត្តភក្តិខ្ញុំម្នាក់ម្ដងៗ ដើម្បីប្រាប់ពួកគេបន្ទាប់ពីខ្ញុំបានស្ដាប់ឮនិទ្ទេស។ ប៉ុន្តែ មិត្តភក្តិរបស់ខ្ញុំក៏នឹងមកសាលារៀនដែរពេលគេបិទលទ្ធផល ដើម្បីមើលដោយខ្លួនឯង"។
ប៉ុន្តែ នៅពេលស្ដាប់ឮឈ្មោះប្រឡងធ្លាក់ទី១យុទ្ធារៈ ក៏មានការប្រែប្រួលមួយរំពេច។ទន់ជង្គង់ភ្លាម វាហាក់ដូចជាខ្លួនឯងប្រឡងធ្លាក់អ៊ីចឹង យុវសិស្សនេះបាននិយាយថា "ខ្ញុំមិនចង់ទូរស័ព្ទប្រាប់វាថា វាប្រឡងធ្លាក់ទេ។ អ្នកដែលប្រឡងជាប់ខ្ញុំបានទូរស័ព្ទប្រាប់ហើយ លើកលែងតែអ្នកដែលប្រឡងធ្លាក់ ខ្ញុំអត់និយាយអ្វីទាំងអស់ ហើយចាំឲ្យពួកគេមកមើលលទ្ធផលដោយខ្លួនឯងទៅ"។
សិស្សម្នាក់ដែលមានវត្តមាននៅសាលាបានស្ដាប់ឮថា គាត់ប្រឡងធ្លាក់មានឈ្មោះអន ចាន់ភក្ត្រា។ ទោះជាយ៉ាងនេះក្តី ចាន់ភក្ត្រា មិនព្រួយពេកទេ ព្រោះសិស្សរូបនេះមានឱកាសប្រឡងលើកទី២ ដែលលោកនាយករដ្ឋមន្ត្រី ហ៊ុន សែន បានប្រកាសឲ្យដឹង បន្ទាប់ពីដឹងច្បាស់ថា អត្រាប្រឡងជាប់នៅឆ្នាំ២០១៤នេះនឹងធ្វើឲ្យសាកលវិទ្យាល័យនានាគ្មានសិស្សចូលរៀននៅឆ្នាំ២០១៥។
សិស្សរូបនេះបាននិយាយថា "ខ្ញុំប្រឡងធ្លាក់ ប៉ុន្តែ ខ្ញុំមិនដឹងធ្វើយ៉ាងម៉េចទេ ពីព្រោះលទ្ធផលបានចេញទៅហើយ។ ខ្ញុំនឹងខំព្យាយាមរៀន ដើម្បីប្រឡងលើកទី២ទៀត"។
កាលពីម្សិលមិញ រដ្ឋមន្ត្រីក្រសួងអប់រំ ហង់ ជួន ណារ៉ុន បានពន្យល់ថា ការប្រឡងលើកទី២នឹងផ្ដោតលើ "មុខវិជ្ជាសំខាន់បំផុតបួន" ពោលគឺមុខវិជ្ជា រូបវិទ្យា គីមីវិទ្យា គណិតវិទ្យា និងជីវវិទ្យា។
លោកបានមានប្រសាសន៍ថា មេរៀនទាំងនោះនឹងត្រូវបង្ហោះតាមអីុនធើណេត ហើយថា ក្រសួងអប់រំនឹងបើកថ្នាក់រៀនដោយឥតគិតថ្លៃសម្រាប់សិស្សមុនការប្រឡងលើកទី២នៅខែតុលាខាងមុខនេះ។ លោកបានមានប្រសាសន៍ទៀតថា "សិស្សទាំងអស់សុទ្ធតែមានសិទ្ធិចូលប្រឡងលើកទី២ លើកលែងតែសិស្សដែលបានលួចចម្លង ”។
នៅពេលការហៅឈ្មោះជិតចប់នៅសាលាបាក់ទូក យុទ្ធារៈ សប្បាយរីករាយលើកដៃឡើងលើ និងស្រែកហ៊ោ ខណៈដែលដឹងថាខ្លួនទទួលបាននិទ្ទេសC។ ប៉ុន្តែ នៅក្បែរសិស្សរូបនេះ គឺសិស្សអាយុ១៨ឆ្នាំឈ្មោះ ហុង គឹមហាប់ ដែលលទ្ធផលដូចគ្នានេះបានធ្វើឲ្យរូបគេស្រក់ទឹកភ្នែក។ សិស្សរូបនេះនិយាយទាំងទឹកភ្នែកថា “ឪពុកម្ដាយរបស់ខ្ញុំសង្ឃឹមថា ខ្ញុំនឹងទទួលបាននិទ្ទេសB។ ឥឡូវខ្ញុំទទួលបាននិទ្ទេសC ទៅវិញ"។
យ៉ាងនេះក្ដីនិទ្ទេសC អាចឲ្យ គឹមហាប់ ចូលរៀននៅសាកលវិទ្យាល័យវិទ្យាសាស្ត្រសុខាភិបាល ដែលយុវសិស្សរូបនេះមានផែនការរៀនសូត្រដើម្បីក្លាយជាវេជ្ជបណ្ឌិតម្នាក់ប្រសិនបើខ្លួនអាចប្រឡងចូលជាប់នោះ។
សិស្សរូបនេះបាននិយាយថា "មុនពេលខ្ញុំអាចចូលរៀននៅទីនោះ ខ្ញុំត្រូវប្រឡងមួយលើកផ្សេងទៀតជាមុន"។ ប៉ុន្តែ សិស្សរូបនេះបាននិយាយថា ខ្លួនមានការជឿជាក់ថា បញ្ញាពីកំណើតរបស់ខ្លួនអាចនាំឲ្យឈានទៅដល់ការប្រឡងលើកបន្ទាប់ទៀត។ សិស្សរូបនេះបាននិយាយអំពីលទ្ធផលកាលពីថ្ងៃសុក្រថា "ខ្ញុំពិតជាភ្ញាក់ផ្អើលណាស់ដែលខ្ញុំទទួលបាននិទ្ទេសC ពីព្រោះខ្ញុំពិតជាឆ្លាតមែន"៕មានិត
អ្នកភូមិឡពាងត្រូវបានដោះលែងឲ្យនៅក្រៅឃុំជាបណ្ដោះអាសន្ន
កាលពីថ្ងៃសុក្រ សាលាដំបូងខេត្តកំពង់ឆ្នាំងបានដោះលែងអ្នកភូមិប្រាំនាក់ឲ្យនៅក្រៅឃុំជាបណ្ដោះអាសន្ន។ អ្នកភូមិទាំងនោះមានជម្លោះដីធ្លីជាមួយភរិយារបស់លោក ស៊ុយ សែម រដ្ឋមន្ត្រីក្រសួងរ៉ែ និងថាមពល។ ការចាប់ខ្លួនអ្នកភូមិទាំងនោះបានបង្កឲ្យមានការតវ៉ាជាហូរហែនៅពេលថ្មីៗនេះក្នុងរាជធានីភ្នំពេញ។
លោក ពៅ វុទ្ធី ប្រធានពន្ធនាគារខេត្តកំពង់ឆ្នាំង បានមានប្រសាសន៍កាលពីល្ងាចថ្ងៃសុក្រថា "មនុស្សទាំងប្រាំនាក់ឥឡូវនេះត្រូវបានដោះលែងហើយ"។បីនាក់ក្នុងចំណោមបុរសទាំងនោះ ឈ្មោះ ស្ងួន ញឿន ស្រ៊ុន ថា និង គុជ ហុក ត្រូវបានចាប់ខ្លួនកាលពីដើមខែនេះ ខណៈដែលពួកគាត់ព្យាយាមធ្វើដំណើរមករាជធានីភ្នំពេញ ក្នុងកិច្ចប្រឹងប្រែងទាក់ទាញការចាប់អារម្មណ៍ចំពោះជម្លោះដីធ្លីដ៏រុាំរ៉ៃរបស់ខ្លួនជាមួយក្រុមហ៊ុន ខេឌីស៊ី របស់លោកស្រី ជា ខេងភរិយារបស់រដ្ឋមន្ត្រីក្រសួងរ៉ែ និងថាមពល។
បុរសពីរនាក់ផ្សេងទៀត ឈ្មោះ ម៉ាង យ៉ាវ និង សៀង ហេង ត្រូវបានចាប់ខ្លួនកាលពីខែកក្កដា ដោយសារការតវ៉ាមួយប្រឆាំងក្រុមហ៊ុន ខេឌីស៊ី ដែលបានប្រែក្លាយទៅជាអំពើហិង្សា។
ការដោះលែងអ្នកភូមិទាំងនេះបានធ្វើឡើង បន្ទាប់ពីលោកស្រី កែ ច័ន្ទមុនី សមាជិកសភាគណបក្សប្រជាជនកម្ពុជាមណ្ឌលខេត្តកំពង់ឆ្នាំង បានប្រាប់ក្រសួងយុត្តិធម៌ថា លោកស្រីចេញមុខធានាអ្នកភូមិទាំងនោះ ដែលនេះជាលក្ខខណ្ឌមួយក្នុងចំណោមលក្ខខណ្ឌបីដែលត្រូវការចាំបាច់ ដើម្បីធានាឲ្យនៅក្រៅឃុំជាបណ្តោះអាសន្ន។
យោងតាមលោក សំ ប្រជាមានិត ប្រធានខុទ្ទកាល័យលោករដ្ឋមន្ត្រីបានឲ្យដឹងថា ជាលទ្ធផល លោក អង្គវង្ស វឌ្ឍានា រដ្ឋមន្ត្រីក្រសួងយុត្តិធម៌បានស្នើឲ្យសាលាដំបូងខេត្តពិនិត្យនិងដោះលែងបុរសទាំងនោះឲ្យនៅក្រៅឃុំជាបណ្តោះអាសន្ន។
លោកស្រី ច័ន្ទមុនី បានមានប្រសាសន៍ថាលោកស្រីបានធ្វើអន្តរាគមន៍លើករណីនេះដោយសារមានការផ្តល់យោបល់ ដែលលោកស្រីបានទទួលពី "សហការីជាច្រើននាក់" និងបន្ទាប់ពីអ្នកភូមិ៦១នាក់បានប្តឹងទៅលោកស្រីដោយសុំរកជំនួយដើម្បីឲ្យមានការដោះលែងបុរសទាំងនោះ។
លោកស្រីបានមានប្រសាសន៍ថា "ខ្ញុំបានប្រើឈ្មោះរបស់ខ្ញុំក្នុងនាមជាសមាជិកសភាម្នាក់ដើម្បីធានាពួកគេ ដូច្នេះហើយអ្នកភូមិជាប់ពន្ធនាគារអាចត្រូវដោះលែងឲ្យនៅក្រៅឃុំជាបណ្ដោះអាសន្ន ព្រោះខ្ញុំបានសន្យាថា នឹងជួយអ្នកភូមិដោះស្រាយបញ្ហារបស់ពួកគាត់"។
ទោះជាយ៉ាងនេះក្ដី លោកស្រី ច័ន្ទមុនី បានមានប្រសាសន៍ថា លោកស្រីក៏សង្ឃឹមដែរថា ការដោះលែងបុរសទាំងនោះនឹងនាំឲ្យភរិយារបស់បុរសទាំងនោះនិងអ្នកជិតខាងឈប់តវ៉ានៅក្នុងរាជធានីភ្នំពេញ ហើយត្រឡប់មកខេត្តកំពង់ឆ្នាំងវិញ។
អ្នកភូមិមួយក្រុមមានគ្នាប្រហែល៥០នាក់បានបង្កើនការតវ៉ាចេញពីទីតាំងមួយនៅតំបន់បឹងកក់ ព្រោះតែការឃុំឃាំងបុរសទាំងនោះតាំងពីថ្ងៃទី១៤ ខែសីហាមក ដោយធ្វើឲ្យនគរបាលនិងអាជ្ញាធរខឹងជាខ្លាំង។
លោកស្រី ច័ន្ទមុនី បានមានប្រសាសន៍ថា "ឥឡូវនេះប្តីរបស់ពួកគាត់ត្រូវគេដោះលែងដូច្នេះខ្ញុំស្នើឲ្យអ្នកភូមិទាំងនោះនៅរាជធានីភ្នំពេញត្រឡប់មកខេត្តវិញ ដើម្បីដោះស្រាយរឿងក្តីនេះ"។
លោកស្រីបានបន្ថែមថា "ខ្ញុំនឹងធ្វើការជាមួយអាជ្ញាធរគ្រប់ជាន់ថ្នាក់ទាំងអស់ដើម្បីរកដំណោះស្រាយសមរម្យចំពោះរឿងដីធ្លីនេះ"។
ប៉ុន្តែ ក្រុមអ្នកភូមិបាននិយាយកាលពីថ្ងៃសុក្រថា ពួកគាត់នឹងចាកចេញពីរាជធានីភ្នំពេញហើយត្រឡប់មកស្រុកវិញតែពេលណា បន្ទាប់ពីរឿងក្ដីនេះត្រូវបានដោះស្រាយត្រូវចិត្តរបស់ខ្លួនតែប៉ុណ្ណោះ។
អ្នកស្រី អ៊ុំ សុភី ភរិយារបស់បុរសម្នាក់ដែលបាននៅក្រៅឃុំ បានមានប្រសាសន៍ថា "អ្នកភូមិរបស់យើងនឹងត្រឡប់មកវិញក្នុងករណីដែលអាជ្ញាធរ និងសមាជិកសភាគណបក្សប្រជាជនកម្ពុជាដោះស្រាយជម្លោះដីធ្លីនេះទាំងស្រុងឲ្យពួកយើងប៉ុណ្ណោះ"៕មានិត
កម្មករក្រុមហ៊ុន ខេឌីស៊ី ដាក់ញត្តិប្រឆាំងការដោះលែងក្រុមអ្នកភូមិ
កម្មករដែលធ្វើការនៅកន្លែងដែលមានវិវាទដីធ្លីរវាងក្រុមអ្នកភូមិនៅក្នុងខេត្តកំពង់ឆ្នាំង និងក្រុមហ៊ុនដែលកាន់កាប់ដោយភរិយារដ្ឋមន្ត្រីក្រសួងរ៉ែ និងថាមពល កាលពីម្សិលមិញបានធ្វើការតវ៉ាប្រឆាំងការដោះលែងអ្នកភូមិប្រាំនាក់ដែលត្រូវបានជាប់ពន្ធនាគារជុំវិញការប្រើអំពើហិង្សា និងការបំផ្លាញទ្រព្យសម្បត្តិ។
កម្មករ២៨នាក់បានមកដល់រាជធានីភ្នំពេញកាលពីថ្ងៃពុធ ដើម្បីតបតចំពោះការតវ៉ាកាលពីពេលថ្មីៗពីសំណាក់អ្នកភូមិមកពីកន្លែងដែលមានវិវាទដីធ្លីនៅក្នុងស្រុកកំពង់ត្រឡាច ដែលអំពាវនាវឲ្យដោះលែងអ្នកភូមិប្រាំនាក់ដែលត្រូវបានចាប់ខ្លួននៅខែនេះ និងចុងក្រោយជុំវិញការប៉ះទង្គិចគ្នាដ៏ហិង្សា។
ចាប់តាំងពីពេលនោះមក អ្នកភូមិទាំងនោះត្រូវបានឃុំខ្លួនក្នុងពន្ធនាគារខេត្តកំពង់ឆ្នាំងដោយចោទប្រកាន់ពីបទប្រើអំពើហិង្សាមានស្ថានទម្ងន់ទោស និងបំផ្លាញទ្រព្យសម្បត្តិនៅក្នុងការប៉ះទង្គិចគ្នាដោយហិង្សាជាមួយកម្មករមកពីក្រុមហ៊ុន ខេឌីស៊ី កាលពីថ្ងៃទី១៧ខែកក្កដា។
អ្នកភូមិប្រាំនាក់ទៀតដែលមានដីកាចាប់ខ្លួន ដែលត្រូវបានចុះហត្ថលេខាកាលពីថ្ងៃទី១១ ខែសីហា ដោយចៅក្រមសុើបសួរ ញួង ចាន់ឌី ប៉ុន្តែ មិនទាន់ត្រូវបានចាប់ខ្លួននៅឡើយទេ។
កម្មករក្រុមហ៊ុន ខេឌីស៊ី ដែលតំណាងឲ្យកម្មករសំណង់២៥០នាក់ ដែលក្រុមហ៊ុននេះបានជួល កាលពីថ្ងៃពុធ បានដាក់ញត្តិប្រឆាំងការដោះលែងណាមួយទៅក្រសួងយុត្តិធម៌ ការិយាល័យសហភាពអឺរ៉ុប និងភូមិគ្រឹះរបស់លោកនាយករដ្ឋមន្ត្រី ហ៊ុន សែន។
យោងតាម សិុន ឃឹម បុរសម្នាក់ក្នុងចំណោមបុរសប្រាំមួួយនាក់ដែលត្រូវបានជ្រើសរើសដោយកម្មករក្រុមហ៊ុន ខេឌីស៊ី ឲ្យធ្វើជាតំណាងរបស់ពួកគេនោះបាននិយាយថា កាលពីម្សិលមិញ ពួកគេបានធ្វើដំណើរទៅកាន់ការិយាល័យអង្គការសិទ្ធិមនុស្សលីកាដូ និងអាដហុក ព្រមទាំងរដ្ឋសភា និងព្រឹទ្ធសភា។
គាត់បាននិយាយថា "មូលហេតុដែលយើងមកកាន់រាជធានីភ្នំពេញ ហើយដាក់ញត្តិទៅស្ថាប័នទាំងនេះគឺដើម្បីស្នើឲ្យស្ថាប័នទាំងនេះកុំអន្តរាគមន៍ឲ្យមានការដោះលែងអ្នកភូមិទាំងប្រាំនាក់ពីពន្ធនាគារ ពីព្រោះពួកគាត់គឺជាពិរុទ្ធជនពិតប្រាកដ ដែលបានប្រើអំពើហិង្សា និងវាយពួកយើង"។
គាត់បានបន្ថែមថា "សកម្មភាពរបស់យើង គឺដើម្បីស្វែងរកយុត្តិធម៌ជូនកម្មកររបស់យើង ដែលបានរងរបួសដោយសារមនុស្សទាំងនេះ។ ពួកគាត់ត្រូវតែទទួលខុសត្រូវចំពោះសកម្មភាពដ៏ឃោរឃៅមកលើពួកយើង ខណៈដែលយើងកំពុងធ្វើការនៅការដ្ឋាន"។
កម្មករក្រុមហ៊ុន ខេឌីស៊ី ប្រហែល១០នាក់បានរងរបួសក្នុងការប៉ះទង្គិចគ្នាកាលពីថ្ងៃទី១៧ ខែកក្កដា បន្ទាប់ពីក្រុមអ្នកភូមិបានព្យាយាមរារាំងពួកគេមិនឲ្យសង់របងកំណត់ព្រំដី ដែលមានវិវាទចាប់តាំងពីលោកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពលបានមកដល់ដីនេះកាលពីឆ្នាំ២០០២ ហើយតាមព័ត៌មានថា បានចាប់យកដីនេះ។
ដោយមានការតវ៉ាកាលពីពេលថ្មីៗពីសំណាក់ក្រុមអ្នកភូមិ កាលពីម្សិលមិញ កម្មករទាំងនោះបានធ្វើដំណើរនៅក្នុងរាជធានីភ្នំពេញតាមរ៉ឺម៉កម៉ូតូកង់បី ដោយកាន់រូបថតអ្នករងបួសដែលពួកគេលើកឡើងថា ដោយសារស្នាដៃរបស់ក្រុមអ្នកភូមិកាលពីថ្ងៃទី១៧ ខែកក្កដា ។
ពួកគេបានមកដល់រាជធានីភ្នំពេញកាលពីថ្ងៃពុធ តែមួយថ្ងៃប៉ុណ្ណោះ បន្ទាប់ពីអ្នកភូមិប្រហែល៧០នាក់មកពីកន្លែងដីដែលមានវិវាទបានមកដល់រាជធានីភ្នំពេញ ដើម្បីដាក់ញត្តិទៅស្ថាប័នមួយចំនួន ដែលកម្មករក្រុមហ៊ុន ខេឌីស៊ី បានទៅនោះ។
អ្នកភូមិមួយចំនួនបាននិយាយកាលពីម្សិលមិញថា ការមកដល់រាជធានីភ្នំពេញរបស់កម្មករទាំងនោះត្រូវបានរៀបចំដោយក្រុមនោះ។
អ្នកស្រី ខាត់ សារួន ដែលប្តីរបស់គាត់ឈ្មោះ ស៊ាង ហេង ស្ថិតក្នុងចំណោមអ្នកភូមិប្រាំនាក់ដែលជាប់ពន្ធនាគារនោះ បាននិយាយថា "ក្រុមហ៊ុនដែលកាន់កាប់ដោយស្ត្រីមានអំណាចរូបនេះបានចាប់ផ្តើមសម្តែងឆាកល្ខោនគ្រប់ប្រភេទដើម្បីចាប់អ្នកភូមិដាក់ពន្ធនាគារ ហើយឥឡូវនេះពួកគេបានជួលបុរសទាំងនេះឲ្យសម្តែងល្ខោនផ្សេងទៀត"។
លោក អំ សំអាត អ្នកគ្រប់គ្រងផ្នែកបច្ចេកទេសនៅអង្គការលីកាដូបានមានប្រសាសន៍ថា លោកស្វាគមន៍ការដាក់ញត្តិរបស់ប្រជាពលរដ្ឋទាំងអស់ ប៉ុន្តែ បានមានប្រសាសន៍ថា "ការសង្ស័យរបស់អ្នកស្រី សារួន ទៅលើកម្មករក្រុមហ៊ុន ខេឌីស៊ី អាចជាការត្រឹមត្រូវ។
លោកបានមានប្រសាសន៍ថា "ប្រសិនបើញត្តិនេះត្រូវបានបង្កើតឡើងដោយឆន្ទៈរបស់កម្មករមែននោះ វាជាការល្អហើយ ពីព្រោះនេះគឺជាបរិយាកាសប្រជាធិបតេយ្យ។ ប៉ុន្តែ យើងបារម្ភថា ពួកគេត្រូវបានប្រើប្រាស់ជាអាយ៉ងរបស់អ្នកមានអំណាចដើម្បីទទួលបានផលប្រយោជន៍សម្រាប់អ្នកមាននោះ"។
លោក សំអាត បានមានប្រសាសន៍ថា "លើសពីនេះទៅទៀតការប៉ះទង្គិចគ្នាដោយហិង្សាបានបណ្តាលឲ្យភាគីទាំងសងខាងរងរបួស ប៉ុន្តែ យើងមិនច្បាស់ថា តើហេតុអ្វីបានជាអាជ្ញាធរ និងមន្ត្រីតុលាការចាត់វិធានការប្រឆាំងតែភាគីម្ខាងនៅក្នុងជម្លោះនោះ"។
លោក ឃឹម ដែលជាតំណាងកម្មករក្រុមហ៊ុន ខេឌីស៊ី បានច្រានចោលការសង្ស័យដែលថា កម្មករត្រូវបានភ្ជាប់ចំពោះការដាក់ញត្តិនោះដោយក្រុមហ៊ុន ខេឌីស៊ី ។ លោក ឃឹម បាននិយាយថា "ក្រុមហ៊ុនមិនបានគាំទ្រពួកយើងក្នុងការដាក់ញត្តិដើម្បីជំទាស់ទៅនឹងការអំពាវនាវឲ្យដោះលែងអ្នកភូមិឡើយ"៕សារុន
មនុស្សពីរនាក់ត្រូវបានចោទប្រកាន់ពីបទនាំក្មេងស្រីគថ្លង់ម្នាក់ទៅលក់នៅបនស្រី
មនុស្សពីរនាក់ត្រូវបានរកឃើញថា មានទោសពីបទជួញដូរក្មេងស្រីគថ្លង់អាយុ១៣ឆ្នាំម្នាក់យកទៅលក់នៅបនស្រី ហើយពួកគេត្រូវបានផ្ដន្ទាទោសឲ្យជាប់ពន្ធនាគារក្នុងម្នាក់ៗ១៥ឆ្នាំ ដោយសាលាដំបូងរាជធានីភ្នំពេញ។
ឯម សុភា អាយុ៤៤ឆ្នាំ និង ឡុញ ចាន់...
កម្មករកាត់ដេរនៅខេត្តកំពង់ឆ្នាំងធ្វើការតវ៉ាប្រឆាំងរោងចក្រ
តំណាងកម្មកររោងចក្រកាត់ដេរក្នុងខេត្តកំពង់ឆ្នាំងដែលបានជាប់ពាក់ព័ន្ធក្នុងវិវាទការងារបានប្រមូលផ្តុំគ្នានៅខាងក្រៅភូមិគ្រឹះរបស់លោកនាយករដ្ឋមន្ត្រី ហ៊ុន សែន កាលពីម្សិលមិញ ខណៈដែលសហសេវិករបស់ខ្លួនប្រហែល១.០០០នាក់ទៀតបានហែក្បួននៅក្នុងខេត្ត។
កម្មករប្រហែល៦០នាក់មកពីរោងចក្រកាត់ដេរ Jiun Ye ដែលកាន់កាប់ដោយជនជាតិចិនត្រូវបានរារាំងរយៈពេលខ្លីពីសំណាក់នគរបាលនៅក្នុងខណ្ឌព្រែកព្នៅ រាជធានីភ្នំពេញនៅតាមផ្លូវដែលពួកគាត់ធ្វើដំណើរទៅដាក់ញត្តិនៅភូមិគ្រឹះនាយករដ្ឋមន្ត្រី ប៉ុន្តែ ទីបំផុតបានទៅដល់ភូមិគ្រឹះរបស់លោកនៅម៉ោងប្រហែល១០ និង៣០នាទីព្រឹក។
ក្រុមនេះដែលមានចំនួនតិចជាងកម្មករ៥០០នាក់ដែលសមាជិកសហជីពរំពឹងថា នឹងចូលរួមនោះ តំណាងឲ្យកម្មករប្រហែល៣.០០០នាក់ដែលពីដំបូងបានធ្វើកូដកម្មរយៈពេលជាង១០ថ្ងៃមកហើយ បន្ទាប់ពីដឹងថា ប្រាក់ឧបត្ថម្ភប្រចាំខែរបស់ខ្លួនមិនមានក្នុងបញ្ជីបើកប្រាក់ខែកាលពីពេលថ្មីៗនេះ។
បើទោះណាជារោងចក្របានសន្យាទូទាត់ប្រាក់ដែលបាត់នោះនៅខែក្រោយក៏ដោយ ក៏កម្មករទាំងនោះបានទាមទារ១៧ចំណុចរួមទាំងការដំឡើងលុយព្រីម ពី១០ដុល្លារដល់១៥ដុល្លារផងដែរ។
កម្មករដែលធ្វើបានធ្វើការតវ៉ារយៈពេលប្រហែល១ម៉ោងនៅខាងក្រៅភូមិគ្រឹះលោក ហ៊ុន សែន មុនពេលលោក គង់ ចំរើន លេខាម្នាក់នៅខុទ្ទកាល័យរបស់លោកនាយករដ្ឋមន្ត្រីបានមកទទួលញត្តិរបស់ពួកគេ។
លោក ចំរើន បានមានប្រសាសន៍ថា "មានគណៈកម្មាធិការដើម្បីដោះស្រាយ ហើយខ្ញុំនឹងយកញត្តិទៅឲ្យពួកគេ"។
កម្មកររោងចក្រកាត់ដេរ Jiun Ye ១.០០០នាក់ទៀតដែលមិនអាចធ្វើដំណើរមករាជធានីភ្នំពេញ បានហែក្បួនចេញពីរោងចក្រនៅក្នុងស្រុកសាមគ្គីមានជ័យ ខេត្តកំពង់ឆ្នាំងតាមបណ្ដោយផ្លូវជាតិលេខ៥ជាមួយសហសេវិករបស់ខ្លួន។
លោក អេង វណ្ណា តំណាងសម្ព័ន្ធសហជីពស្មារតីកម្មករខ្មែរបានអំពាវឲ្យលោកនាយករដ្ឋមន្ត្រីធ្វើអន្តរាគមន៍នៅក្នុងវិវាទនេះ។ លោក វណ្ណា បានមានប្រសាសន៍ថា "លោកទទួលស្គាល់ថា ថ្មីៗនេះយើងមានសមាគមរោងចក្រកាត់ដេរនៅកម្ពុជា ក្រុមប្រឹក្សាអាជ្ញាកណ្ដាល មន្ទីរការងារខេត្ត និងក្រសួងការងារមកធ្វើការចរចាជាមួយតំណាងនៃភាគីទាំងពីរ ប៉ុន្តែ មិនមានដំណោះស្រាយឡើយ"។
លោក ង៉ែត រស្មី ប្រធានផ្នែកធនធានមនុស្សនៅរោងចក្រកាត់ដេរ Jiun Ye បានមានប្រសាសន៍ថា រោងចក្រនឹងពិនិត្យមើលការទាមទាររបស់កម្មករ ប៉ុន្តែ មិនអាចដំឡើងប្រាក់ខែបានឡើយ។
លោកបានមានប្រសាសន៍ថា "ពួកគេបានទាមទារកន្លែងសម្រាប់បរិភោគអាហារនៅក្នុងរោងចក្រ។ យើងនឹងពិចារណាសាងសង់កន្លែងនេះនៅពេលក្រោយ ពីព្រោះរោងចក្ររបស់យើងទើបតែបានសាងសង់ប៉ុណ្ណោះ"។ លោកបានបន្ថែមថា រោងចក្រក៏នឹងអនុញ្ញាតឲ្យកម្មករមានផ្ទៃពោះឈប់សម្រាកមួយថ្ងៃអំឡុងពេលទៅពិនិត្យផ្ទៃពោះផងដែរ។...
អភិបាលរាជធានីលើកសរសើរកងរាជអាវុធហត្ថ ដោយផ្ដល់អំណោយជាប្រាក់
កាលពីម្សិលមិញ លោក បា៉ា សុជាតិវង្ស អភិបាលរាជធានីភ្នំពេញ បានចែកប្រាក់សរុប៣០.០០០ដុល្លារ ដល់កងរាជអាវុធហត្ថប្រហែល១.០០០នាក់នៅក្នុងពិធីមួយ ដោយលើកសរសើរពីការបំពេញការងារ និងគោរពវិន័យ...
យោងតាមនគរបាលបានឲ្យដឹងថា មន្ត្រីក្រសួងមហាផ្ទៃដែលបានចែកប័ណ្ណរស់នៅស្របច្បាប់សម្រាប់ជនអន្តោប្រវេសន៍ឲ្យជនជាតិវៀតណាម ដែលរស់នៅក្នុងប្រទេសកម្ពុជាក្នុងពិធីមួយកាលពីថ្ងៃពុធ និងម្សិលមិញ បានបន្តធ្វើជំរឿនលើជនបរទេសដែលរស់នៅក្នុងប្រទេសកម្ពុជា។
ការធ្វើជំរឿននេះបានចាប់ផ្ដើមកាលពីថ្ងៃអាទិត្យ ដោយលោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍នៅក្រសួងមហាផ្ទៃ...
ស្ថានទូតសិង្ហបុរីថ្កោលទោសការគប់ពងមាន់ដាក់ខ្លោងទ្វារស្ថានទូត
កាលពីម្សិលមិញស្ថានទូតសិង្ហបុរីប្រចាំរាជធានីភ្នំពេញបានចេញសេចក្ដីថ្លែងការណ៍ថ្កោលទោសការគប់ពងមាន់ដាក់ខ្លោងទ្វារមុខរបស់ស្ថានទូតកាលពីមួយថ្ងៃមុនពីសំណាក់ក្រុមអ្នកតវ៉ាប្រឆាំងការបណ្ដេញចេញពីដីធ្លី ដោយហៅទង្វើនោះថា "មិនអាចទទួលយកបានឡើយ"។
អ្នកភូមិតំបន់បឹងកក់ក្នុងរាជធានីភ្នំពេញទាំងអតីតនិងបច្ចុប្បន្នប្រហែល៥០នាក់បានធ្វើការតវ៉ានៅមុខស្ថានទូតនេះកាលពីថ្ងៃពុធទាមទារកុំឲ្យក្រុមហ៊ុន HLH Group បន្តផែនការរបស់ខ្លួនដើម្បីទិញដីទំហំ១,៣៥ហិកតា ដែលក្នុងនោះអ្នកភូមិប្រហែល៣.០០០គ្រួសារត្រូវបានបណ្ដេញចេញដោយបង្ខំ។
នៅពេលក្រុមអ្នកតវ៉ាត្រូវបានរុញច្រានឲ្យចេញពីស្ថានទូតដោយក្រុមសន្តិសុខខណ្ឌដូនពេញ គេឃើញមានផ្នែកពណ៌លឿងនៃពងមាន់ប្រឡាក់នៅជាប់ខ្លោងទ្វាររបស់ស្ថានទូត។
ស្ថានទូតបានលើកឡើងក្នុងសេចក្ដីថ្លែងការណ៍ថា "ស្ថានទូតចាត់ទុកទង្វើនេះថា ជាការបំផ្លិចបំផ្លាញមិនអាចទទួលយកបានឡើយ។ យើងនឹងយកបញ្ហានេះទៅពិភាក្សាជាមួយអាជ្ញាធរខ្មែរដែលពាក់ព័ន្ធ"។ ស្ថានទូតបានលើកឡើងទៀតថា រដ្ឋាភិបាលសិង្ហបុរីមិនមានយុត្តាធិការធ្វើអន្តរាគមន៍ក្នុងវិវាទពាណិជ្ជកម្មឯកជនឡើយ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានមានប្រសាសន៍កាលពីម្សិលមិញថា លោកមិនបានទទួលព័ត៌មានអំពីការគប់ពងមាន់ដាក់ស្ថានទូត ហើយក៏មិនបានឃើញសេចក្ដីថ្លែងការណ៍នោះដែរ ប៉ុន្តែ ទោះជាយ៉ាងណាលោកបានបន្ទោសក្រុមអ្នកតវ៉ា។
លោក ឡុង ឌីម៉ង់ បានមានប្រសាសន៍ថា "មនុស្សទាំងនោះគ្មានសីលធម៌ និងគ្មានការអប់រំចំពោះការយកពងមាន់ទៅគប់ស្ថានទូតបែបនេះ។ យើងនឹងចាត់វិធានការតាមច្បាប់ប្រឆាំងបុគ្គលណាដែលមិនគោរពអធិបតេយ្យភាពរបស់ស្ថានទូត។
លោក ស ខេង រដ្ឋមន្ត្រីក្រសួងមហាផ្ទៃបានមានប្រសាសន៍ថា អាជ្ញាធរនឹងសើុបអង្កេតហេតុការណ៍នោះ។ លោកបានប្រាប់ក្រុមអ្នកយកព័ត៌មានថា "យើងត្រូវពិនិត្យនិងសិក្សារកមូលហេតុដែលពួកគាត់បានគប់ពងមាន់ដាក់ស្ថានទូត និងថា តើមានបញ្ហាអ្វី"៕សារុន