ប្រទេស​​​ថៃ​​​នឹង​​​ដោះលែង​​​ពលករ​​​ខ្មែរ​​​១៤​​​នាក់​​​ បន្ទាប់ពី​​​ការ​​​លើក​​​លែង​​​ទោស​​​សកម្ម​​​ជន​​​ថៃ​​​

បណ្តាញ​​​ព័ត៌មាន​​​ថៃ​​​បាន​​​ធ្វើ​​​សេចក្តី​​​រាយការណ៍​​​កាល​​​ពីម្សិលមិញ​​​ថា បន្ទាប់​​​ពី​​​ការ​​​ដោះ​​​លែង​​​លោក វីរ៉ា​​​ ស៊ុម​​​ក្វាម​​​ឃីដ សកម្ម​​​ជន​​​អាវ​​​លឿង​​​ថៃ​​​ពី​​​ពន្ធ​​​នា​​​គា​​​រ​​​នៅ​​​​​​កម្ពុជា​​​ឲ្យ​​​មាន​​​សេរីភាព​​​បាន​​​មួយ​​​ថ្ងៃ​​​ របប​​​យោធា​​​ថៃ​​​បាន​​​ប្រកាស​​​ចេតនា​​​របស់​​​ខ្លួន​​​នឹង​​​ដោះ​​​លែង​​​ពល​​​ករ​​​​​​ចំណាក​​​ស្រុក​​​ខ្មែរ​​​១៤​​​នាក់​​​ដែល​​​ជាប់​​​ពន្ធ​​​នាគា​​​រ​​​នៅដើម​​​ខែ​​​នេះ​​​ពី​​​បទ​​​កាន់​​​ទិដ្ឋាការ​​​ក្លែង​​​ក្លាយ​​​។ 

លោក​​​ វីរ៉ា ត្រូវ​​​បាន​​​ដោះ​​​លែង​​​ឲ្យ​​​មាន​​​សេរីភាព​​​​​​កាល​​​ពី ​​​ថ្ងៃ​​​អង្គារ បាន​​​ចាក​​​ចេញ​​​ពី​​​ប្រទេស​​​កម្ពុជា​​​ជា​​​មួយ​​​គណៈ​​​ប្រតិភូថៃ​​​កាល​​​ពី​​​ព្រឹក​​ម្សិលមិញ​​​។ ស៊ីវ​ ចាន់ណា​
លោក​​​ វីរ៉ា ត្រូវ​​​បាន​​​ដោះ​​​លែង​​​ឲ្យ​​​មាន​​​សេរីភាព​​​​​​កាល​​​ពី ​​​ថ្ងៃ​​​អង្គារ បាន​​​ចាក​​​ចេញ​​​ពី​​​ប្រទេស​​​កម្ពុជា​​​ជា​​​មួយ​​​គណៈ​​​ប្រតិភូថៃ​​​កាល​​​ពី​​​ព្រឹក​​ម្សិលមិញ​​​។ ស៊ីវ​ ចាន់ណា​/ខេមបូឌា  ដេលី

លោក​​​ វីរ៉ា ត្រូវ​​​បាន​​​ដោះ​​​លែង​​​ឲ្យ​​​មាន​​​សេរីភាព​​​​​​កាល​​​ពី​​​ថ្ងៃ​​​អង្គារ អំឡុង​​​ទស្សន​​​កិច្ច​​​មួយ​​​របស់​​​រដ្ឋមន្ត្រី​​​ការបរទេស​​​ថៃ​ស្តី​​​ទី​​​ លោក Sihasak Phuangketkeow ជា​​​មន្ត្រី​​​ថៃ​​​ថ្នាក់​​​ខ្ពស់​​​លើក​​​ដំបូង​​​មក​​​កម្ពុជា​​​ ចាប់​​​តាំង​​​ពី​​​ការ​​​​​ផ្តួល​​​រំលំ​​​រដ្ឋាភិបាល​​​ថៃ​​​​​​កាល​​​ពី​​​ខែ​​​មុន​​​មក។ លោក​​​ វីរ៉ា បាន​​​ចាក​​​ចេញ​​​ពី​​​ប្រទេស​​​កម្ពុជា​​​ជា​​​មួយ​​​គណៈ​​​ប្រតិភូថៃ​​​កាល​​​ពី​​​ព្រឹក​​ម្សិលមិញ​​​។

រដ្ឋាភិបាល​​​កម្ពុជា​​​ បាន​​​បញ្ជាក់​​​ថា ការ​​​ដោះ​​​លែង​​​លោក វីរៈ​​​ គឺ​​​ជា​​​កាយ​​​វិការ​​​សុច្ឆន្ទៈ ហើយ​​​បាន​​​​​​បដិសេធ​​​ថា ការ​​​​​​ដោះ​​​លែង​​​អ្នក​​​ជាតិ​​​និយម​​​ជ្រុល​​​ថៃ​​​នេះ​​​ ដែល​​​ត្រូវ​​​បាន​​​ផ្តន្ទា​​​ទោស​​​ឲ្យ​​​ជាប់​​​ពន្ធនាគារ​​​ប្រាំ​​​បី​​​ឆ្នាំ​​​កាល​​​ពី​​​ឆ្នាំ​​​២០១០​​​ ពីបទ​​​​ឆ្លង​​​ព្រំ​​​ដែន​​​ខ្មែរ​-​​​ថៃ​​​ដោយ​​​ខុស​​​ច្បាប់ និង​​​ពីបទ​ធ្វើ​​​ចារកម្ម​​​នោះ​​​ មិន​​​មែន​​​ជា​​​ផ្នែក​​​មួយ​​​នៃ​​​កិច្ច​​​ព្រម​​​ព្រៀង​​​ប្តូរ​​​អ្នក​​​ទោស​​​ឡើយ​​​។

​​​យ៉ាង​​​នេះ​​​ក្តី លោក​​​នាយក​​​រដ្ឋ​​​មន្ត្រី​​​ ហ៊ុន សែន ​​​​​​​​​​​​​​​​​​​​​​​​​​​​​​​​​​​​​​​​​​​​​​​​បាន​​​អំពាវ​​​នាវ​​​ឲ្យ​​​មាន​​​ការ​​​ដោះ​​​លែង​​​ពល​​​រដ្ឋ​​​ខ្មែរ​​​១៤​​​នាក់​​​កាល​​​ពី​​​ថ្ងៃ​​​អង្គារ អំឡុង​​​ជំនួប​​​មួយ​​​ជា​​​មួយ​​​លោក Sihasak ។ ហើយ​​​ក្នុង​​​ពេល​​​តែ​​​ប៉ុន្មាន​​​ម៉ោង​​​ ដែល​​​លោក​​​ វីរ៉ា​​​ បាន​​​ទៅ​​​ដល់​​​ក្រុង​​​បាង​​​កក​​​កាល​​​ពី​​​ព្រឹក​​​ម្សិលមិញនោះ​ លោក​​​ Chanchao Chaiyanukij រដ្ឋ​​​មន្ត្រី​​​ក្រសួង​​​យុត្តិធម៌​​​ថៃ​​​ស្តីទី​​​បាន​​​ប្រកាស​​​ឲ្យ​​​ដឹង​​​ថា កម្មករ​​​ទាំង​​​១៤​​​នាក់​​​នោះ​​​នឹ​​​ងត្រូវ​​​ដោះ​​​លែង​​​ឲ្យ​​​មាន​​​សេរីភាព ” ក្រោម​​​សន្ធិសញ្ញា​​​ផ្ទេ​​​រ​​​អ្នក​​​ទោស​​​អន្តរ​​​ជាតិ​​​​​​ផ្អែក​​​លើ​​​បដិការ​​​”  នេះ​​​បើ​​​តាម​​​​​​សេចក្តី​​​រាយការណ៍​​​របស់​​​កាសែត​​​បាង​​​កក​​​ប៉ុស្តិ៍​​​។

លោក Kobkiat Kasivivat អគ្គនាយក​​​រង​​​នៃ​​​នាយក​​​ដ្ឋាន​​​កែ​​​ប្រែ​​​ ត្រូវ​​​បាន​​​កាសែត​​​បាង​​​កក​​​ប៉ុស្តិ៍​​​ដក​​​ស្រង់​​​សម្តី​​​ថា ” ដោយ​​​ហេតុ​​​ថា ពួកគេ​​​ត្រូ​​​វ​​​បាន​​​​​​កាត់​​​ឲ្យ​​​ជាប់​​​ទោស ហេតុ​​​ដូច្នេះ​​​​​​​​​​​​​​​​​​ហើយ​​​មិន​​​ស្ថិត​​​នៅ​​​ក្រោម​​​លក្ខខណ្ឌ​​​ផ្ទេរ​​​អ្នក​​​ទោស​​​ទេ​​​ ប្រទេស​​​​​​ថៃ​​​អាច​​​ធ្វើ​​​​​​ [​​​តាម​​​សំណើ​​​របស់​​​ប្រទេស​​​កម្ពុជា​​​] ដោយ​​​ឲ្យ​​​​​​នគរបាល​​​​​​ដក​​​បទ​​​ចោទ​​​ប្រកាន់​​​ ហើយ​​​បញ្ជូន​​​ពួក​​​គេ​​​ទៅវិញ​​​ភ្លាម​​​ៗ​​​”។

លោក​​​ កុយ​​​ គួង អ្នក​​​នាំ​​​ពាក្យ​​​​​​ក្រសួង​​​ការបរទេស​​​កម្ពុជា​​​បាន​​​មាន​​​ប្រសាសន៍​​​ថា បាន​​​ឃើញ​​​អត្ថ​​​បទ​​​រាយការណ៍​​​ក្នុង​​​ព័ត៌មាន​​​ ប៉ុន្តែ មិនទាន់​​​​​​ត្រូវ​​​បាន​​​​​​ជូន​​​ដំណឹង​​​ដោយ​​​អាជ្ញាធរ​​​ថៃ​​​អំពី​​​សេចក្តី​​​សម្រេច​​​ដោះ​​​លែង​​​ពលករ​​​ចំណាក​​​ស្រុក​​​ទាំង​​​នេះ​​​ទេ​​​។

លោក​​​បាន​​​មាន​​​ប្រសាសន៍​​​ថា “ខ្ញុំ​​​ដឹង​​​ថា ពល​​​រដ្ឋ​​​ខ្មែរ​​​១៤​​​នាក់​​​នោះ​​​នឹង​​​ត្រូវ​​​ដោះ​​​លែង​​​ប៉ុន្តែ ក្រសួង​​​មិនទាន់​​​បាន​​​ទទួល​​​កា​​​រជូន​​​ដំណឹង​​​ការទូត​​​ ឬ​​​ផ្លូវ​​​ការ​​​ណា​​​មួយ​​​ពី​​​ប្រទេស​​​ថៃ​​​ទេ​​​”។ លោក​​​បាន​​​បន្ថែម​​​ថា លោក​​​ស្វាគមន៍​​​កិច្ច​​​ប្រឹង​​​ប្រែង​​​នេះ​​​ ព្រោះ​​​វា​​​បង្ហាញ​​​ទំនាក់​​​ទំនង​​​មិត្ត​​​ភាព​​​ជា​​​មួ​​​យ​​​រដ្ឋាភិបាល​​​យោ​​​ធា​​​ថ្មី​​​របស់​​​ប្រទេស​​​ថៃ​​​។

លោក​​​ កុយ​​​ គួង បាន​​​មាន​​​ប្រសាសន៍​​​ថា ” យើង​​​មិន​​​ចង់​​​ឲ្យ​​​ពល​​​រដ្ឋ​​​ខ្មែរ​​​ណា​​​ម្នាក់​​​ក្លាយ​​​ជា​​​ជន​​​រងគ្រោះ​​​ទេ​​​ ប៉ុន្តែ​ដូច​​​ដែល​​​​​​លោក​​​នាយក​​​រដ្ឋ​​​មន្ត្រី​​​ ហ៊ុន សែន បាន​​​មាន​​​ប្រសាសន៍​​​ហើយ​​​ថា   ទំនាក់​​​ទំនង​​​រវាង​​​ប្រទេស​​​របស់​​​យើង​​​នៅ​​​តែ​​​ដដែល​​​”។

លោក​​​ ហ្វីល​​​ រ៉ូបឺត​​​សុន នាយក​​​រង​​​របស់​​​អង្គកា​​​រ​​​សិទ្ធិ​​​មនុស្ស​​​ Human Rights Watch ប្រចាំ​​​តំបន់​​​អាស៊ី​​​បាន​​​មាន​​​ប្រសាសន៍​​​ថា អង្គការ​​​របស់​​​លោក​​​មិន​​​បាន​​​ដឹង​​​ថា តើ​​​ការ​​​ប្តូរ​​​អ្នក​​​ទោស​​​ជា​​​ផ្លូវ​​​ការ​​​ណា​​​មួយ​​​បាន​​​ធ្វើ​​​ឡើង​​​នោះ​​​ទេ​​​ ប៉ុន្តែ បាន​​​បន្ថែម​​​ថា ការ​​​ដោះ​​​លែង​​​ទាំង​​​ពីរ​​​ជា​​​ព័ត៌​​​មាន​​​ល្អ​​​។

លោក​​​បាន​​​បន្ថែម​​​ថា “វា​​​មិន​​​ច្បាស់​​​ថា ជន​​​ចំណាកស្រុក​​​ខ្មែរ​​​​​​ត្រូវ​​​បាន​​​គេ​​​ទម្លាក់​​​កំហុស​​​ដាក់​​​នោះ​​​ទេ​​​ ព្រោះ​​​ថា មេ​​​ខ្យល់​​​ [ ជ្រើស​​​រើស​​​ពល​​​ករ​​​]​​​​​ រត់​ការ​​​លឿន ហើយ​​​បាត់​​​ឯកសារ​​​។ វា​​​ជា​​​រឿង​​​ល្អ​​​ ដែល​​​ពួក​​​គេ​​​ត្រូ​​​វ​​​បាន​​​ដោះ​​​លែង ព្រោះ​​​មិន​​​គួរ​​​មាន​​​ទោស​​​ព្រហ្មទណ្ឌ​​​ដោយ​​​សារ​​​តែ​​​ការ​​​ធ្វើ​​​ចំណាក​​​ស្រុក​​​ធម្មតា​​​ដើម្បី​​​រក​​​ការ​​​ងារ​​​ធ្វើ​​​នោះ​​​​​​”។

លោក​​​ រ៉ូបឺតសុន បាន​​​មាន​​​ប្រសាសន៍​​​ថា លោក​​​ វីរ៉ា ជា​​​ចំណុច​​​ចាប់​​​អារម្មណ៍​​​ខ្លាំង​​​មួយ​​​នៃ​​​ទំនាក់​​​ទំនង​​​ខ្មែរ​​​-ថៃ​​​ ព្រោះ​​​រដ្ឋាភិបាល​​​ថៃ​​​ជា​​​បន្ត​​​បន្ទាប់​​​បាន​​​ព្យាយាម​​​​​​មិន​​​បាន​​​សម្រេច​​​ ដើម្បី​​​ឲ្យ​​​មាន​​​ការ​​​ដោះ​​​លែង​​​រូប​​​គាត់​​​ ចាប់​​តាំង​​​ពី​​​គាត់​​​ត្រូវ​​​បាន​​​ជាប់​​​ពន្ធ​​​នាគារ​​​ពី​​​បទ​​​ចោទ​​​ចារកម្ម​​​​​​ហាក់​​​​​​ដូចជា​​​មិន​​​ត្រឹម​​​ត្រូវ​​​ បន្ទាប់​​​ពី​​​ឆ្លង​​​ចូល​​​តំបន់​​​គ្មាន​​​មនុស្ស​​​នៅ​​​ នៅ​​​តាម​​​បណ្តោយ​​​ព្រំ​​​ដែន។ លោក​​​បាន​​​បន្ថែម​​​ថា ” គាត់​​​មិន​​​គួរ​​​ត្រូវ​​​ជាប់​​​ពន្ធ​​​នាគារ​​​តាំង​​​ពី​​​ដំបូង​​​ម្លេ៉ះ​​​”៕មានិត​​​​​​​​​​​​​

 

© 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.