កញ្ញា ឯក សុជាតា អតីតពិធីការិនីទូរទស្សន៍ ហៅសាសាដែលបានក្លាយជាប្រធានបទនៃការពិភាក្សាដេញដោលអំពីយេនឌ័រ និងវណ្ណៈនៅកម្ពុជា បន្ទាប់ពីវីដេអូឃ្លីបមួយស្តីពីនាងត្រូវលោក សុខ ប៊ុន ឧកញ៉ាផ្នែកអចលនទ្រព្យវាយដំបានបែកធ្លាយកាលពីខែកក្កដា បានដកពាក្យបណ្តឹងដែលប្តឹងឧកញ៉ារូបេនះពីបទប៉ុនប៉ងមនុស្សឃាតកាលពីម្សិលមិញ។
អំឡុងពេលបើកសវនាការជំនុំជម្រះរឿងក្តីរបស់លោក សុខ ប៊ុន កាលពីម្សិលមិញ លោក ពុធ ធាវី មេធាវីរបស់កញ្ញា ឯក សុជាតា ដែលមានអាយុខ្ទង់២០ឆ្នាំក្រាស់បានប្រាប់សាលាដំបូងរាជធានីភ្នំពេញថា ភាគីទាំងពីរបានឈានដល់ការព្រម”សម្របសម្រួលគ្នា”នៅក្រៅតុលាការ ជាលទ្ធផលដែលអតីតពិធីការិនីរូបនេះ និងឪពុករបស់នាងដំបូងឡើយបានប្ដេជ្ញាច្រានចោលដើម្បីឲ្យលោក សុខ ប៊ុន ប្រឈមនឹងវិធានការផ្លូវច្បាប់ពេញលេញ។
ក្រោយមក មេធាវីរូបនេះបានប្រាប់អ្នកយកព័ត៌មានថា លោក សុខ ប៊ុន បានបង់ប្រាក់មកឲ្យកូនក្តីរបស់លោកដើម្បីឲ្យមានការដកពាក្យបណ្តឹងវិញ ប៉ុន្តែ លោកបានបដិសេធមិនបញ្ជាក់ពីចំនួនទឹកប្រាក់នោះឡើយ។
កញ្ញា ឯក សុជាតា ដែលមិនបានចូលរួមសវនាការ និងដែលបានអះអាងអំឡុងពេលព្រឹកថា មេធាវីរបស់នាងមានភាពមិនស្មោះត្រង់ក្នុងការបញ្ចប់ពាក្យបណ្តឹងរបស់នាងនោះ បានទទួលស្គាល់អំឡុងពេលល្ងាចថា ខ្លួនមិនបានរក្សាពាក្យសន្យាដែលថាចង់ឃើញឧកញ៉ារូបេនះត្រូវបានផ្តន្ទាទោសប៉ុន្តែ ថា កញ្ញាធ្វើដូច្នេះគឺមានការព្រួយបារម្ភអំពីគ្រួសាររបស់ជនដែលវាយដំមកលើរូបនាង។
កញ្ញា ឯក សុជាតា បាននិយាយថា “ខ្ញុំច្រាន ចោលព័ត៌មានទាំងអស់ដែលថា ខ្ញុំទទួលប្រាក់ពីលោក សុខ ប៊ុន ។ ខ្ញុំឈប់ប្តឹងមិនមែនដោយសារតែរឿងប្រាក់នោះទេ គឺដោយសារតែរឿងគ្រួសារ។ សុខ ប៊ុន មានប្រពន្ធកំពុងមានផ្ទៃពោះ ដែលនឹងសម្រាលក្នុងពេល ឆាប់ៗ។គាត់ត្រូវបានបញ្ជូនទៅពន្ធនាគារហើយបានទទួលកំហុសរបស់ខ្លួន។ មនុស្សគ្រប់រូបត្រូវការឱកាស តើមែនទេ?”។
លោក សុខ ប៊ុន ដែលត្រូវបានបញ្ជូនទៅឃុំឃាំងជាបណ្តោះអាសន្ននៅពន្ធនាគារព្រៃសក្រោយពេលត្រូវបានចាប់ខ្លួន បានទៅពិនិត្យសុខភាពនៅមន្ទីរពេទ្យមិត្តភាពខ្មែរ-សូវៀត នេះបើយោងតាមគណៈគ្រប់គ្រងមន្ទីរពេទ្យនេះ។ លោកក៏បានអវត្តមានដែរអំឡុងពេលបើកសវនាការកាលពីម្សិលមិញ។
ចៅក្រមប្រធានក្រុមប្រឹក្សាជំនុំជម្រះ សូ លីណា បានបញ្ជាក់ថា ពាក្យបណ្តឹងរបស់កញ្ញា ឯក សុជាតា ត្រូវបានដកវិញហើយ ខណៈព្រះរាជអាជ្ញា ហីុង ប៊ុនថន លើកឡើងថា លោក សុខ ប៊ុន នឹងនៅតែប្រឈមការចោទប្រកាន់ពីបទប្រើអំពើហិង្សាដោយចេតនាដែលមានស្ថានទម្ងន់ទោស និងដែលត្រូវជាប់ពន្ធនាគារចន្លោះពី២ឆ្នាំទៅ៥ឆ្នាំ។
អង្គរក្សរបស់អ្នកជំនួញមានទ្រព្យសម្បត្តិស្ដុកស្ដម្ភរូបនេះ ដែលគេឃើញកាន់កាំភ្លើងខ្លីភ្ជុង់ក្បាលកញ្ញា ឯក សុជាតា អំឡុងការវាយដំដ៏ឃោរឃៅក្នុងភោជនីយដ្ឋានមួយកន្លែងនៅកោះពេជ្រកាលពីថ្ងៃទី២ ខែកក្កដា ដែល នាងត្រូវគេបោចសក់អូសកាត់តុ ដាល់ទាត់ធាក់ និងជាន់យ៉ាងរន្ថើននោះ កំពុងប្រឈមពីបទប៉ុនប៉ងមនុស្សឃាត ដោយសារបានកេះកៃកាំភ្លើងបាញ់ ប៉ុន្តែ បាញ់មិនចេញ។
នៅក្នុងតុលាការកាលពីម្សិលមិញ លោក សេង សុវីណា មេធាវីរបស់លោក សុខ ប៊ុន បានលើកឡើងថា កូនក្តីរបស់លោកវាយដំលើកញ្ញា ឯក សុជាតា ដោយសារគាត់ស្រវឹងស្រា ហើយមិនអាចទប់កំហឹងបាន ពេលកញ្ញា សាសា ជេរប្រទេចមកលើរូបគាត់ជុំវិញការតាមទាក់ទងសុំស្រឡាញ់មិត្តស្រីរបស់នាង ដែលក៏ស្រវឹងជោកជាំដែរនោះ។
មេធាវីរូបនេះបានស្នើសុំឲ្យតុលាការពិចារណាចំពោះគ្រួសារដ៏ក្មេងខ្ចីរបស់ចុងចោទ និងសុខភាពមិនល្អរបស់គាត់នៅក្នុងការផ្តន្ទាទោសរបស់ខ្លួន។ លោក សេង សុវីណា បានលើកឡើងទៀតថា លោក សុខ ប៊ុន មានដំុគិសនៅត្រង់ក និងដុំក្រួសក្នុងតម្រងនោមហើយថា ប្រពន្ធរបស់គាត់កំពុងតែតស៊ូយ៉ាងលំបាកក្នុងការមើលថែទាំកូនៗ៣នាក់ រួមទាំង កូនម្នាក់ដែលទើបតែសម្រាលផងដែរ។
លោកបានថ្លែងថា “កូនក្តីរបស់ខ្ញុំបានជាប់ពន្ធនាគារអស់រយៈពេលជាង៦ខែមកហើយ ហេតុដូច្នេះសូមពិចារណាអំពីភាពលំបាកទាំងនេះ”។ លោកបានលើកឡើងទៀតថា ការជាប់ពន្ធនាគាររបស់លោក សុខ ប៊ុន គឺមាន តែប៉ះពាល់ដល់សេដ្ឋកិច្ចទៅវិញទេ ព្រោះគាត់មិនអាចជួលបុគ្គលិកថ្មីទៀតបាន។
លោកបានមានប្រសាសន៍បន្តថា “ខ្ញុំក៏ចង់បញ្ជាក់ផងដែរថា ដើមចោទមិនគ្រាន់តែបានដកពាក្យបណ្តឹងនោះទេ ប៉ុន្តែ ថែមទាំងបានទទួលសំណងរដ្ឋប្បវេណីពីកូនក្តីរបស់ខ្ញុំទៀតផង។ លោកក៏បានបដិសេធមិនបញ្ជាក់ពីចំនួនទឹកប្រាក់ដែរ។
កញ្ញា ឯក សុជាតា ដំបូងឡើយបានច្រានចោលការផ្តល់ប្រាក់សំណងចំនួន៤០.០០០ដុល្លារ និង១០០.០០០ដុល្លារពីលោក សុខ ប៊ុន ដោយលើកឡើង១០ថ្ងៃបន្ទាប់ពីការវាយដំថា “ខ្ញុំនឹងមិនធ្វើការសម្របសម្រួលណាមួយនៅក្រៅតុលាការឡើយ”។
វីដេអូឃ្លីបដែលស្តីពីការវាយដំនេះបានធ្វើឲ្យផ្ទុះឡើងនូវការពិភាក្សាដេញដោលជាសាធារណៈអំពីអត្តចរិតរបស់អ្នកមានប្រាក់ និងមានអំណាចនៅកម្ពុជា និងការយល់ឃើញ ដែលថា ពួកគេមានសិទ្ធិធ្វើដាក់អ្នកដទៃ ជាពិសេសស្ត្រីដូចមនុស្សមិនសូវសំខាន់។
អ្នកនយោបាយក៏បានប្រកាសថ្កោលទោសចំពោះការវាយដំនេះផងដែរ។ លោក ស ខេង រដ្ឋមន្ត្រីក្រសួងមហាផ្ទៃ បានទិតៀនមន្ត្រីនគរបាលដែលលោកបានចោទប្រកាន់ថា បានជួយលោក សុខ ប៊ុន ឲ្យគេចខ្លួនប៉ុន្មានថ្ងៃបន្ទាប់ពីវីដេអូឃ្លីបបែកធ្លាយជាសាធារណៈ ចំណែកឯលោកនាយករដ្ឋមន្ត្រីហ៊ុន សែន បានអំពាវនាវឲ្យនាំឧកញ៉ានេះមកផ្តន្ទាឲ្យបាន។
លោកបានថ្លែងថា “បើយើងមើលតាមឃ្លីបវីដេអូគឺវាហួសហេតុពេកហើយ ហិង្សា បែបនេះគឺវាហួសហេតុពេកហើយចំពោះស្ត្រីទន់ខ្សោយ។ កុំគិតថា ដោយសារអ្នកឯងមានលុយអាចដោះស្រាយបញ្ហាបាននោះ”។
ភ្លាមៗបន្ទាប់ពីរូបភាពវីដេអូនេះបានបែកធ្លាយតាមប្រព័ន្ធអុីនធឺណិត លោក សុខ ប៊ុន បានភៀសខ្លួនទៅប្រទេសសិង្ហបុរី ដែលគាត់អះអាងថាទៅដើម្បីទទួលការព្យាបាលជំងឺស្ត្រេសក្នុងចំណោមជំងឺផ្សេងៗទៀត។ គាត់បានត្រឡប់មកកាន់ប្រទេសកម្ពុជាវិញក្រោយពីលោក ហ៊ុន សែន បានកោះហៅប៉ុណ្ណោះ ហើយត្រូវចាប់ខ្លួននៅអាកាសយានដ្ឋានអន្តរជាតិភ្នំពេញ។
អំឡុងពេលស្ថិតនៅក្រៅប្រទេស គាត់បានប្រកាសបោះបង់គោរមងារជាឧកញ៉ានិងចុះចេញពីតំណែងប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងនាយកក្រុមហ៊ុន TEHO-SBG Development របស់ខ្លួន។
បន្ទាប់ពីការសាកសួរនៅក្នុងតុលាការជុំវិញសំណុំរឿងនេះកាលពីខែកក្កដា លោក អ៊ុត ធី ឪពុករបស់កញ្ញា ឯក សុជាតា ដែលមានគោរមងារជាឧកញា៉ដែរ បានឲ្យដឹងថា មានពាណិជ្ជករមានឥទ្ធិពលជាច្រើនបានទាក់ទងទៅលោកជួសមុខឲ្យលោក សុខ ប៊ុន ដូចជា “[ឧត្ដមសេនីយ៍] ផ្កាយបី ផ្កាយបួនបានសុំឲ្យខ្ញុំបញ្ចប់សំណុំរឿងនេះ ហើយសុំឲ្យខ្ញុំលុបវីដេអូឃ្លីបនោះ”។
ពេលទទូចសួរកាលពីម្សិលមិញថា ហេតុអ្វីបានជានាងដកពាក្យបណ្ដឹងរបស់ខ្លួនក្រោយ ពីប្រកាន់ជំហររឹងមាំក្នុងយុទ្ធនាការដ៏ធំមួយដើម្បីទប់ស្កាត់អំពើហិង្សាលើស្ត្រីនោះ កញ្ញា ឯក សុជាតា និយាយថា ការចូលរួមរបស់នាងមិនពាក់ព័ន្ធការផ្ដន្ទាទោសទេ។ នាងនិយាយថា “វាមិនពាក់ព័ន្ធរឿងខ្ញុំដកពាក្យបណ្ដឹងទេ។ វាជារឿងដែល សុខ ប៊ុន ត្រូវជាប់គុក។ សម្ដេច ហ៊ុន សែន បានមានប្រសាសន៍ហើយថា ទោះ ខ្ញុំដកពាក្យបណ្ដឹង ក៏គាត់នៅតែត្រូវប្រឈមមុខនឹងតុលាការតាមផ្លូវច្បាប់ដែរ”។
លោកស្រី ធីតា ឃឹះ អ្នកតស៊ូមតិដើម្បីសិទ្ធិស្ត្រីដ៏ល្បីល្បាញមួយរូប និងជានាយិកាអង្គការមិនមែនរដ្ឋាភិបាលដែលធ្លាប់រិះគន់ទង្វើរបស់លោក សុខ ប៊ុន និងទង្វើរបស់បុរសមានអំណាចផ្សេងៗទៀត បានមានប្រសាសន៍ ថា ការសម្រេចចិត្តរបស់កញ្ញា ឯក សុជាតា ដកពាក្យបណ្ដឹងរបស់ខ្លួន គឺជាការវាយសំពងចំពោះការជំរុញឲ្យមានសមភាពយេនឌ័រ។
លោកស្រីលើកឡើងថា “ខ្ញុំមិនដឹងរឿងរ៉ាវទាំងមូលថាវាជារឿងលុយ ឬជារឿងអ្វីផ្សេងទេ ប៉ុន្តែវាគួរឲ្យខកចិត្តណាស់។ វាធ្វើឲ្យចុះខ្សោយដល់ការអំពាវនាវឲ្យមានការចាប់អារម្មណ៍លើករណីដែលចាំបាច់ខ្លាំងត្រូវដោះស្រាយ”៕ ស៊ុយឈាង និង សុខុម