រដ្ឋមន្ដ្រីក្រសួងមហាផ្ទៃ លោកស ខេង កាលពីថ្ងៃទី១២ ខែធ្នូ អះអាងថា សមត្ថកិច្ចពាក់ព័ន្ធកំពុងធ្វើការស្រាវជ្រាវករណីខ្សែវីដេអូមួយ ដែលមានចំណងជើងថា«ម្តាយខ្ញុំលក់ខ្ញុំ»ដើម្បីដឹងថា រឿងនេះជារឿងពិត ឬប្រតិដ្ឋ។
លោកអះអាងថា រហូតមកទល់ពេលនេះសមត្ថកិច្ចបានទទួលព័ត៌មានខ្លះពីតួអង្គដែលសម្តែងនៅក្នុងរឿងនេះ ប៉ុន្តែសមត្ថកិច្ចនៅត្រូវការព័ត៌មានផ្សេងៗទៀតដើម្បីអាចធ្វើការសន្និដ្ឋានឲ្យបានជាក់លាក់ថា តើខ្សែភាពយន្តនោះពិតឬមិនពិត។
សារព័ត៌មានក្នុងស្រុកបានដកស្រង់សម្តីរបស់លោកឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ ចុះផ្សាយថា ការស្រាវជ្រាវរបស់សមត្ថកិច្ចឲ្យដឹងថា តួអង្គសម្ដែង២នាក់ ក្នុងចំណោមតួអង្គ៣នាក់មានឈ្មោះ កែវ ម៉ាឡៃ អាយុ៤៨ឆ្នាំ និងយុវតីឈ្មោះ ឃៀង ស្រីម៉ិចអាយុ១៨ឆ្នាំ ដែលត្រូវជាកូនរបស់ឈ្មោះកែវ ម៉ាឡៃ បានប្រាប់សមត្ថកិច្ចថា ខ្សែភាពយន្តឯកសារ«ម្តាយខ្ញុំលក់ខ្ញុំ»មិនមែនជារឿងពិតនោះទេ។ លោកឧត្តមសេនីយ៍ឯកឆាយ គឹមខឿនបន្តថា ក្រុមតួអង្គក្នុងខ្សែភាពយន្តនេះអះអាងថា ពួកគេទទួលបាននូវការលួងលោមពីឈ្មោះរ៉ាត់ រ័ត្នមុនីពីព្រោះពេលកំពុងថតរឿងនេះមានចំណងជើងថា ប្រទេសខ្មែរក្រោយរបបប៉ុល ពតប៉ុន្ដែពេលសម្ដែងចប់បែរជាចេញចំណងជើងថា«ម្ដាយខ្ញុំលក់ខ្ញុំ»ទៅវិញ។
អង្គការឃ្លាំមើលសិទ្ធិមនុស្សអន្តរជាតិHuman Rights Watchអះអាងថា ភាគីថៃបានរំលោភធ្ងន់ធ្ងរដល់ច្បាប់អន្តរជាតិ ដែល ខ្លួនជាប្រទេសម្ចាស់ហត្ថលេខី ហើយត្រូវគោរពនូវកាតព្វកិច្ចរបស់ខ្លួនមិនបញ្ជូនជនណាម្នាក់ដោយបង្ខំទៅកាន់ទីកន្លែងណាមួយដែលស្ថិតក្នុងភាពប្រថុយប្រថាន និងការទទួលរងការធ្វើទុក្ខបុកម្នេញអំពើទារុណកម្ម ឬការរំលោភសិទ្ធិមនុស្សធ្ងន់ធ្ងរណាមួយនោះឡើយ៕