កម្មករនិងតំណាងសហជីពបាននិយាយថា រោងចក្រកាត់ដេរ ហ្គ្រែន ធ្វិន អិុនធើណាស្យូណល ក្នុងក្រុងភ្នំពេញកាលពីថ្ងៃអង្គារបានអនុញ្ញាតឲ្យកម្មករជាង៦០០នាក់ត្រឡប់ចូលធ្វើការវិញ បន្ទាប់ពីការបណ្តេញពួកគេមួយថ្ងៃមុននោះ ពីព្រោះពួកគេមិនមានវត្តមាននៅកន្លែងធ្វើការកាលពីថ្ងៃសៅរ៍។
បញ្ជីកម្មករត្រូវគេបិទតាមខ្លោងទ្វាររោងចក្រក្នុងខណ្ឌពោធិ៍សែនជ័យកាលពីថ្ងៃច័ន្ទដោយមានឈ្មោះកម្មករប្រហែល៦៥០នាក់ ដែលមិនបានមកធ្វើការកាលពីថ្ងៃសៅរ៍ ត្រូវបានគេឆូតចោល អមដោយការជូនដំណឹងថា ពួកគេត្រូវបានបណ្តេញចោលហើយ។
កញ្ញា ឡោ ឡាយហៀង អាយុ២៩ឆ្នាំ ជាមេក្រុមនិងជាតំណាងសហជីពក្នុងរោងចក្រនេះបាននិយាយថា កម្មករដែលបានត្រឡប់មកវិញនៅព្រឹកថ្ងៃអង្គារដឹងថា ពួកគេត្រូវបណ្តេញចេញ បានអះអាងថា ពួកគេគិតថា ពួកគេសម្រាករហូតដល់ថ្ងៃអង្គារ បន្ទាប់ពីការឈប់សម្រាករយៈពេល៦ថ្ងៃ ដែលក្នុងរយៈពេលនោះមានតែថ្ងៃសៅរ៍ប៉ុណ្ណោះមិនមែនជាថ្ងៃបុណ្យជាតិ។ កញ្ញាបាននិយាយថា បន្ទាប់ពីការចរចាជាមួយគណៈគ្រប់គ្រង គេបានអនុញ្ញាតឲ្យកម្មករត្រឡប់ចូលធ្វើការវិញ។
កញ្ញា ឡាយហៀង បាននិយាយថា “កម្មករទាំងអស់បានត្រឡប់ទៅធ្វើការវិញនៅព្រឹកនេះ មានទាំងកម្មករជាង៦០០នាក់ដែលមានឈ្មោះក្នុងបញ្ជីបណ្តេញចេញកាលពីថ្ងៃអង្គារផងដែរ”។ កញ្ញាបានបន្ថែមថា ក្រុមហ៊ុនស្នើឲ្យអ្នកដែលត្រូវបណ្តេញចេញទាំងនោះចុះហត្ថលេខាលើពាក្យសុំធ្វើការជាថ្មី។
យោងតាម លោក ង៉ែត សុខហាក់ អគ្គលេខាសហព័ន្ធសហជីពកម្មករ ដែលតំណាងឲ្យកម្មករមួយចំនួននៅរោងចក្រ ហ្គ្រែន ធ្វិន បានឲ្យដឹងថា កម្មករជាច្រើននាក់បានប្រកែកមិនព្រមចុះហត្ថលេខាលើពាក្យនោះទេ ពីព្រោះ ពួកគេបារម្ភថា វាជាល្បិចមួយរបស់ក្រុមហ៊ុនជួលពួកគេធ្វើការជាថ្មី ជាកម្មករថ្មី ដែលមានន័យថា ពួកកម្មករទាំងនោះនឹងបាត់បង់អត្ថប្រយោជន៍បង្គរ។
លោកបានមានប្រសាសន៍ថា “ក្រុមហ៊ុនបានស្នើឲ្យកម្មករដែលមិនបានមកធ្វើការកាលពីថ្ងៃសៅរ៍ បំពេញពាក្យលាឈប់ពីការងារ ហើយប្រសិនបើពួកគេចង់ត្រឡប់មកធ្វើការវិញ ពួកគេត្រូវបំពេញពាក្យថ្មី”។
លោក សុខហាក់ បាននិយាយថា តំណាងសហជីពបានប្រជុំជាមួយគណៈគ្រប់គ្រងរោងចក្រ និង លោក ប្រាក់ ចាន់ធឿន អគ្គនាយកនៃអគ្គនាយកដ្ឋានដោះស្រាយវិវាទក្រសួងការងារ ដែលបានឈានដល់ឲ្យកម្មករទាំងអស់ត្រឡប់មកធ្វើការវិញ មិនថាពួកគេបានចុះហត្ថលេខាឯកសារនោះ ឬអត់នោះទេ។
លោក ចាន់ធឿន បាននិយាយថា លោកបានជួបជាមួយគណៈគ្រប់គ្រង ហ្គ្រែន ធ្វិន កាលពីរសៀលថ្ងៃអង្គារ និងបានបញ្ចុះបញ្ចូលក្រុមហ៊ុនឲ្យអនុញ្ញាតកម្មករដែលត្រូវបណ្តេញត្រឡប់មកធ្វើការវិញ ប៉ុន្តែបាននិយាយថា នឹងមានកិច្ចប្រជុំមួយទៀតដើម្បីជម្រះបញ្ចប់បញ្ហានេះ។
លោកបាននិយាយថា “យើងបានស្នើក្រុមហ៊ុនឲ្យទទួលយកពួកគេមកវិញ ហើយពួកគេត្រឡប់មកធ្វើការវិញហើយ…ប៉ុន្តែនឹងមានកិច្ចប្រជុំមួយទៀតរវាងតំណាងក្រុមហ៊ុន តំណាងកម្មករ និងអគ្គនាយកដ្ឋានដោះស្រាយវិវាទ ដើម្បីស្វែងរកដំណោះស្រាយសមស្រប”៕មានិត