ក្រុមហ៊ុនខេមបូឌា បាយ័ន អ៊ែរឡាញ (Cambodia Bayon Airlines) ជាក្រុមហ៊ុនអាកាសចរណ៍ដំបូងរបស់ចិន ដែលបង្កើតឡើងនៅបរទេស បានសម្ពោធជាផ្លូវការនៅក្នុងរាជធានីភ្នំពេញកាលពីម្សិលមិញ ដោយមន្ត្រីកោតសរសើរចំពោះសក្ដានុពលរបស់វាក្នុងការជួយពង្រឹងទំនាក់ទំនងរវាងប្រទេសទាំងពីរ។
ក្រុមហ៊ុនអាកាសចរណ៍នេះដែលគ្រប់គ្រងដោយក្រុមហ៊ុនរដ្ឋរបស់ចិនឈ្មោះថា សាជីវកម្មឧស្សាហកម្មអាកាសចរណ៍ចិន (Aviation Industry Corporationof China) ឬហៅកាត់ថាAVIC កំពុងមានគម្រោងដំណើរការជើងហោះហើរក្នុងស្រុកនៅកម្ពុជា ព្រមទាំងជើងហោះហើរទៅកាន់បណ្ដាក្រុងសំខាន់ៗនៅក្នុងប្រទេសវៀតណាម ឡាវ ថៃ និងចិនទៀតផង។ តាមការរំពឹងទុកថា ជើងហោះហើរដំបូងរបស់ក្រុមហ៊ុននេះនឹងមិនដំណើរការរហូតដល់ដំណាច់ឆ្នាំនេះ។
លោក លីន ជ័រមីង (Lin Zuoming) ប្រធានក្រុមហ៊ុន AVIC បានថ្លែងទៅកាន់មន្ត្រីប្រហែល៥០០រូបមកពីប្រទេសទាំងពីរនៅក្នុងពិធីសម្ពោធ ដែលរៀបចំឡើងនៅកោះពេជ្រក្នុងរាជធានីភ្នំពេញថា ” តាមការរំពឹងទុកថា ក្រុមហ៊ុន បាយ័ន អ៊ែរឡាញ នឹងនាំមកនូវបច្ចេកវិទ្យាអាកាសចរណ៍ជឿនលឿនជាងមុន ដែលផលិតដោយសាជីវកម្មឧស្សាហកម្មអាកាសចរណ៍ចិន មកកាន់កម្ពុជា ហេតុដូច្នេះហើយ ការជួយអភិវឌ្ឍឧស្សាហកម្មអាកាសចរណ៍នៅក្នុងប្រទេសនេះរួមចំណែកដល់ការធ្វើឲ្យទំនាក់ទំនងកាន់តែជិតស្និទ្ធរវាងប្រទេសចិន និងប្រទេសកម្ពុជា”។
យោងតាមសេចក្ដីប្រកាសព័ត៌មានមួយចេញផ្សាយកាលពីម្សិលមិញបានឲ្យដឹងថា ក្រុមហ៊ុន ខេមបូឌា បាយ័ន អ៊ែរឡាញ គឺជាក្រុមហ៊ុនកាសចរណ៍ដំបូងរបស់ចិនដែលបង្កើតឡើងនៅបរទេស ហើយមានគម្រោងក្លាយខ្លួនជាក្រុមហ៊ុនអាកាសចរណ៍ធំបំផុតក្នុងប្រទេសកម្ពុជា។
លោកស្រី ឡឺអូន យិន (Leon Ren) ជំនួយការរបស់លោក លីន ជ័រមីង បានមានប្រសាសន៍ថា ក្រុមហ៊ុនអាកាសចរណ៍នេះទំនងជាចាប់ផ្ដើមការហោះហើរដំបូងរបស់ខ្លួនយ៉ាងយូរបំផុតត្រឹមខែមករា។ លោកស្រីបានមានប្រសាសន៍ថា ” វាអាស្រ័យលើល្បឿនប្រតិបត្តិការ។ យ៉ាងលឿនបំផុតនៅខែធ្នូ”។
ជើងហោះហើរដំបូងរបស់ក្រុមហ៊ុន ខេមបូឌា បាយ័ន អ៊ែរឡាញ នឹងចេញដំណើរពីភ្នំពេញឆ្ពោះទៅសៀមរាប និងពីសៀមរាបឆ្ពោះទៅក្រុងព្រះសីហនុ នេះបើយោងតាមសេចក្ដីប្រកាសព័ត៌មានកាលពីម្សិលមិញ។ បន្ទាប់មកក្រុមហ៊ុននេះមានគម្រោងបង្កើនជើងហោះហើរទៅកាន់ក្រុងសំខាន់ៗនៅអាស៊ីអាគ្នេយ៍ និងអាស៊ីបូពា៌។
សេចក្ដីប្រកាសព័ត៌មាននេះលើកឡើងថា ” ក្រុមហ៊ុន បាយ័ន អ៊ែរឡាញ មានការប្ដេជ្ញាចិត្តបង្កើតបណ្ដាញផ្លូវហោះហើរគ្រប់ដណ្ដប់ប្រទេសកម្ពុជា ដោយភ្ជាប់ទៅអាស៊ាន ចិន ជប៉ុន និងកូរ៉េ ចេញពីកម្ពុជាដែលជាចំណុចកណ្ដាល”។
លោកស្រី ពូ ជាំងគ័រ (Bu Jianguo) ឯកអគ្គរដ្ឋទូតចិនប្រចាំកម្ពុជាបានមានប្រសាសន៍នៅក្នុងពិធីកាលពីម្សិលមិញថា ការចាប់ផ្ដើមក្រុមហ៊ុន ខេមបូឌា បាយ័ន អ៊ែរឡាញ នឹងជួយបង្កើនទេសចរចិនមកកាន់កម្ពុជា។
លោកស្រីបានមានប្រសាសន៍ទៀតថា ” ការចាប់ផ្ដើមក្រុមហ៊ុនអាកាសចរណ៍ បាយ័ន អ៊ែរឡាញ នឹងកែលម្អការដឹកជញ្ជូនតាមផ្លូវអាកាសរវាងប្រទេសចិន និងបណ្ដាប្រទេសនៅអាស៊ីអាគ្នេយ៍ រួមទាំងកម្ពុជាផង ដោយរួមចំណែកដល់កិច្ចសហប្រតិបត្តិការផ្នែកសេដ្ឋកិច្ច និងធុរកិច្ចកាន់តែធំជាងមុនរវាងប្រទេសចិន កម្ពុជា និងបណ្ដាប្រទេសនៅអាស៊ីអាគ្នេយ៍ផ្សេងៗទៀត”។
នៅក្នុងពិធីកាលពីម្សិលមិញនោះដែរ មន្ត្រីក្រុមហ៊ុនអាកាសចរណ៍ ខេមបូឌា បាយ័ន អ៊ែរឡាញ បានចុះកិច្ចព្រមព្រៀងជាមួយក្រុមហុ៊នឧស្សាហកម្មអាកាសចរណ៍ស៊ីអាន ( Xi’an Aircraft Industry Company) ដែលគ្រប់គ្រងដោយក្រុមហ៊ុន AVIC ដើម្បីទិញយន្តហោះធុន MA60 ចំនួន២០គ្រឿងនៅរយៈពេលប្រាំឆ្នាំក្រោយ៕ សុខុម