គណបក្សប្រជាជនកម្ពុជាបានបញ្ចេញលទ្ធផលបណ្ដោះអាសន្នរបស់ខ្លួនសម្រាប់ការបោះឆ្នោតជ្រើសរើសសមាជិកក្រុមប្រឹក្សារាជធានី ខេត្ត-ក្រុង ស្រុក-ខណ្ឌ ដែលបង្ហាញថា គណបក្សនេះទទួលបាន២.៥៤៣អាសនៈ ឬប្រហែល៧៧ភាគរយនៃអាសនៈសរុបចំនួន៣.៣២៤។
កាលពីថ្ងៃអាទិត្យ សមាជិកក្រុមប្រឹក្សាឃុំសង្កាត់ទូទាំងប្រទេស ដែលបានជាប់ឆ្នោតនៅក្នុងការបោះឆ្នោតកាលពីខែមិថុនា ឆ្នាំ២០១២ បានបោះឆ្នោតជ្រើសរើសក្រុមប្រឹក្សារាជធានី ខេត្ត-ក្រុង ស្រុក-ខណ្ឌ នៅតាមតំបន់របស់ខ្លួន។
លទ្ធផលបណ្ដោះអាសន្ន ដែល គ.ជ.ប. បានចេញកាលពីថ្ងៃអាទិត្យ បានបង្ហាញថា គណបក្សប្រជាជនកម្ពុជាទទួលបាន៨.៣៧៩សំឡេង គណបក្សសង្គ្រោះជាតិទទួលបាន២.៩៥៩សំឡេង ប៉ុន្តែ គ.ជ.ប. មិនទាន់បានគណនាលទ្ធផលបោះឆ្នោតនេះជាផ្លូវការតាមរូបមន្ត ដើម្បីកំណត់អាសនៈដែលគណបក្សនីមួយៗទទួលបានទេ។
លទ្ធផលបណ្ដោះអាសន្នដែលគណបក្សប្រជាជនកម្ពុជាដាក់តាមគេហទំព័ររបស់ខ្លួនកាលពីម្សិលមិញ បង្ហាញថា គណបក្សនេះទទួលបានអាសនៈក្រុមប្រឹក្សាស្រុក-ខណ្ឌ ចំនួន២.២៣៧អាសនៈ ហើយគណបក្សសង្គ្រោះជាតិទទួលបាន៦៨៣អាសនៈ។
លោក សម រង្ស៊ី ប្រធានគណបក្សប្រឆាំងបានមានប្រសាសន៍នៅឯសន្និសីទកាសែតកាលពីល្ងាចថ្ងៃអាទិត្យថា ការគណនារបស់គណបក្សលោកបង្ហាញថា គណបក្សលោកទទួលបានអាសនៈក្រុមប្រឹក្សាស្រុក-ខណ្ឌ ចំនួន៦៧៧។ លោក សម រង្ស៊ី ក៏បានមានប្រសាសន៍ដែរថា គណបក្សប្រឆាំងទទួលយកលទ្ធផលនេះ។
ក្រៅពីគណបក្សធំៗទាំងពីរ គណបក្សហ៊្វុនស៊ិនបិុច បានទទួលអាសនៈក្រុមប្រឹក្សាស្រុក-ខណ្ឌ ចំនួន១៩នៅទូទាំងប្រទេស រីឯគណបក្សសម្ព័ន្ធដើម្បីប្រជាធិបតេយ្យ បានទទួលអាសនៈតែមួយគត់នៅក្រុមប្រឹក្សាស្រុកមួយនៅខេត្តសៀមរាប។
យោងតាមការគណនាបណ្ដោះអាសន្នរបស់គណបក្សកាន់អំណាចបង្ហាញថា ក្នុងចំណោមអាសនៈក្រុមប្រឹក្សា៣៩៣ទូទាំង២៤ខេត្ត-ក្រុង និងរាជធានីភ្នំពេញ គណបក្សប្រជាជនកម្ពុជា ទទួលបាន៣០៦អាសនៈ និងគណបក្សសង្គ្រោះជាតិទទួលបាន៨៦អាសនៈ។
គណបក្សហ៊្វុនស៊ិនបិុច ទទួលបានអាសនៈដែលនៅសល់ ហើយនឹងមានតំណាងម្នាក់នៅក្នុងក្រុមប្រឹក្សាខេត្តបន្ទាយមានជ័យ ដែលមានចំនួន១៧អាសនៈ។
នៅក្រុមប្រឹក្សារាជធានីភ្នំពេញ គណបក្សប្រជាជនកម្ពុជាមានសមាជិកក្រុមប្រឹក្សាចំនួន១៥ ហើយគណបក្សសង្គ្រោះជាតិមានចំនួន៦។ នៅក្នុងខណ្ឌទាំង១២នៅទីក្រុងភ្នំពេញ គណបក្សប្រជាជនកម្ពុជា ទទួលបាន១៥៥អាសនៈ និងគណបក្សសង្គ្រោះជាតិទទួលបាន៦១អាសនៈ។
យោងតាមលទ្ធផលរបស់គណបក្សកាន់អំណាចបង្ហាញថា នៅក្រុមប្រឹក្សាខេត្ត គណបក្សប្រឆាំងទទួលបានអាសនៈច្រើននៅក្នុងខេត្តកំពង់ចាម គឺចំនួន៩អាសនៈ និងគណបក្សប្រជាជនកម្ពុជាទទួលបាន១២អាសនៈ។ នៅក្នុងខេត្តព្រៃវែងគណបក្សប្រជាជនទទួលបាន១២ និងគណបក្សសង្គ្រោះជាតិទទួលបាន៧អាសនៈ៕ គឹមហឿន