គណបក្ស ហ្វុ៊នសុិនបុិច ដែលជាគណបក្សតូចមួយក្នុងរដ្ឋាភិបាចម្រុះជាមួយគណបក្សប្រជាជនកម្ពុជាដែលកំពុងគ្រប់គ្រងអំណាច កាលពីម្សិលមិញបានគ្រាំទ្រការរិះគន់ចំពោះលោក កឹម សុខា មេដឹកនាំគណបក្សប្រឆាំង ពីសំណាក់លោកនាយករដ្ឋមន្ត្រី ហ៊ុន សែន និងចោទប្រកាន់ទាំងលោក កឹម សុខា និងលោកគង់ គាំ ដែលជាមេដឹកនាំគណបក្សប្រឆាំងដែរថា មានបំណងលុបបំបាត់របបរាជានិយម។
ការចោទប្រកាន់នេះ ក្លាយជាពាក្យសម្តីធម្មតាក្នុងការធ្វើយុទ្ធនាការរបស់រដ្ឋាភិបាលមុនពេលបោះឆ្នោតជ្រើសតាំងតំណាងរាស្ត្រក្នុងខែកក្កដា។
នៅក្នុងសេចក្តីថ្លែងការណ៍មួយបង្ហោះតាមគេហទំព័ររបស់ខ្លួន គណបក្ស ហ្វុ៊នសុិនបុិចបានចោទប្រកាន់លោក កឹម សុខា ប្រធានស្តីទីគណបក្សសង្គ្រោះជាតិថា បានប្រមាថអ្នកដែលរួចផុតពីសេចក្តីស្លាប់ ឬអ្នកស្លាប់អំឡុងរបបខ្មែរក្រហម ចំពោះការធ្វើអត្ថាធិប្បាយចោទវៀតណាមថាប្រឌិតការធ្វើទារុណកម្ម និងការកាប់សម្លាប់ ដែលបានកើតឡើងនៅឯគុកទួលស្លែងដែលមានកេរ្តិ៍អសោចរបស់របបនោះនៅក្រុងភ្នំពេញ។
សេចក្តីថ្លែងការណ៍របស់គណបក្ស ហ្វុ៊នសុិនបុិច លើកឡើងថា “ ការអះអាងរបស់មេដឹកនាំគណបក្សទាំងពីរនាក់នេះ គឺជាការបោកប្រាស់ និងពិតជាធ្វើឲ្យមានការភាន់ច្រឡំក្នុងចំណោមជនរួមជាតិរបស់ខ្លួន ទាំងក្នុងនិងក្រៅប្រទេស”។
សេចក្តីថ្លែងការណ៍នេះបន្ថែមថា “ ការអះអាងដោយលោក កឹម សុខា គឺជាការប្រមាថចំពោះព្រលឹងជនរួមជាតិប្រជាជនកម្ពុជារបស់យើង ដែលស្លាប់អំឡុងអំពើព្រៃផ្សៃនៃរបប ប៉ុល ពត ហើយជាការប្រមាថដល់ប្រជាជនកម្ពុជាទាំងអស់នៅទូទាំងប្រទេស ដែលរួចផុតពីរបបកាប់សម្លាប់នេះ”។
សេចក្តីថ្លែងការណ៍របស់គណបក្ស ហ្វុ៊នសុិនបុិច ក៏បានចោទប្រកាន់ទាំងលោក កឹម សុខានិងលោក គង់ គាំ ប្រធានគណបក្ស សម រង្ស៊ី ដែលថ្មីៗនេះបានរួមបញ្ចូលជាមួយគណបក្ស សង្គ្រោះជាតិ ថាចង់ផ្តួលរំលំរាជានិយម។ “ សម្តីរបស់លោក គង់ គាំ បានប្រមាថអតីតព្រះមហាក្សត្រ នរោត្តម សីហនុ ដែលជាព្រះមហាវីរក្សត្រ និងបានបន្ទោសព្រះអង្គដោយអយុត្តិធម៌។ គណបក្ស ហ្វុ៊នសុិនបុិចចាត់ទុកសកម្មភាពរបស់មេដឹកនាំគណបក្ស
ទាំងពីរថាមានបំណងលុបបំបាត់រាជានិយមនៅក្នុងប្រទេសកម្ពុជា”។
សេចក្តីថ្លែងការណ៍នេះធ្វើឡើងបន្ទាប់ពីអង្គភាពព័ត៌មាន និងប្រតិកម្មរហ័សរបស់ទីស្តីការគណៈរដ្ឋមន្ត្រី បានបង្ហោះនៅលើគេហទំព័ររបស់ខ្លួនកាលពីថ្ងៃច័ន្ទ នូវខ្សែអាត់សំឡេង ដែលខ្លួនអះអាងថា លោក គង់ គាំ បាននិយាយកាលពីថ្ងៃសុក្រ ដែលនៅក្នុងខ្សែអាត់នោះ លោកលើកឡើងថា ព្រះបរម
រតនកោដ្ឋ បានរៀបចំឲ្យលោក លន់ នល់ ផ្តួលរំលំព្រះអង្គក្នុងឆ្នាំ១៩៧០។
យោងតាមខ្សែអាត់សំឡេងនេះ លោក គង់ គាំ បានលើកឡើងថា“ លន់ នល់ មិនបានក្បត់ព្រះមហាក្សត្រទេ ប៉ុន្តែព្រះមហាក្សត្រអង្គឯងទេបានបញ្ជាលោក លន់ នល់។ ព្រះមហាក្សត្រ បានបញ្ជាលោក លន់ នល់ ថា ពេលនេះមានភាពចលាចល លោកគួរតែធ្វើជានាយករដ្ឋមន្ត្រីដើម្បីដឹកនាំរដ្ឋាភិបាលមានឈ្មោះថា រដ្ឋាភិបាលសង្គ្រោះជាតិ”។
កាលពីម្សិលមិញ លោក គង់ គាំ បដិសេធចំពោះការអះអាងដែលថា ព្រះបរមរតនកោដ្ឋ បានរៀបចំគម្រោងទម្លាក់អង្គឯងដោយលោកបញ្ជាក់ថា ព្រះអង្គគ្រាន់តែលើកឡើងថា នរោត្តម សីហនុ បានលើកលោក លន់ នល់ឲ្យធ្វើជានាយករដ្ឋមន្ត្រី ជាតំណែងមួយដែលព្រះអង្គបានកាន់កាប់ក្នុងឆ្នាំ១៩៦៩មួយឆ្នាំមុនរដ្ឋប្រហារនោះ ដើម្បីដឹកនាំការប្រយុទ្ធប្រឆាំងនឹងកងកម្លាំងខ្មែរក្រហម និងកងកម្លាំងកុម្មុយនីស្តវៀតណាម ដែលបានឈ្លានពានប្រទេសនេះ។
លោក គង់ គាំ ដែលបានចោទរដ្ឋាភិបាលថា លើកឡើងដោយមិនត្រឹមត្រូវពីពាក្យសម្តីរបស់លោកដើម្បីបង្ខូចឈ្មោះគណបក្សប្រឆាំងមុនការបោះឆ្នោតក្នុងខែកក្កដានោះមានប្រសាសន៍ថា “ ព្រះមហាក្សត្របានតែងតាំងលោក លន់ នល់ ឲ្យធ្វើជានាយករដ្ឋមន្ត្រីដើម្បីសង្គ្រោះប្រទេសរបស់ព្រះអង្គ”។
គណបក្សសង្គ្រោះជាតិ ក៏បានចោទរដ្ឋាភិបាលដែរថា បានបកស្រាយខុសនូវការអត្ថាធិប្បាយរបស់លោក កឹម សុខា អំពីខ្មែរក្រហម ដោយគណបក្សសង្គ្រោះជាតិលើកឡើងថា លោក កឹម សុខា មិនដែលបដិសេធថា ខ្មែរក្រហមមិនបានប្រព្រឹត្តបទឧក្រិដ្ឋនៅទួលស្លែងនោះទេ៕
ប្រែសម្រួលដោយ ចេវ ប៊ុននី