ម្ចាស់កាសែត The Cambodia Daily អ្នកស្រី Deborah Krisher Steele បានអះអាងជាថ្មីទៀតថា កាសែតមួយនេះនឹងមិនវិលត្រឡប់ទៅកម្ពុជាវិញជាដាច់ខាតដរាបណាច្បាប់របស់កម្ពុជាមិនទាន់រឹងមាំល្អ។
ការបញ្ជាក់ជំហរចុងក្រោយរបស់ម្ចាស់កាសែត The Cambodia Daily ធ្វើឡើងក្រោយពីក្រសួងការបរទេសកម្ពុជាកាលពីថ្ងៃទី១១ខែធ្នូបាន ច្រានចោលទាំងស្រុងចំពោះការលើកឡើងរបស់ម្ចាស់កាសែត The Cambodia Daily ដែលថា រដ្ឋាភិបាលកម្ពុជាបានបញ្ឈប់ប្រតិបត្តិការ និងបានបិទគណនីធនាគាររបស់ខ្លួន ដោយសារតែជំហររិះគន់រដ្ឋាភិបាល។រដ្ឋាភិបាលអះអាងថា សារព័ត៌មាន The Cambodia Dailyបានដំណើរការអាជីវកម្មរបស់ខ្លួនចាប់តាំងពីឆ្នាំ២០០៧មក ដោយមិនបានបង់ពន្ធនោះឡើយ ហើយថា ពន្ធទាំងនោះមានទឹកប្រាក់ដល់ជាង ៦លានដុល្លារអាមេរិក។
ប៉ុន្តែអ្នកស្រី Deborah Krisher Steele ដែលជាម្ចាស់កាសែត The Cambodia Dailyអះអាងថា រដ្ឋាភិបាលកន្លងមកបានចោទប្រកាន់ ស្ថាប័នកាសែតរបស់អ្នកស្រីថា ជាប់ពាក់ព័ន្ធនឹងបញ្ហាបដិវត្តន៍ពណ៌រួមជាមួយអង្គការអាមេរិកាំងដទៃទៀត ហើយក្រោយមករដ្ឋាភិបាលបានប្តូរការចោទប្រកាន់របស់ខ្លួនទៅលើបញ្ហាពន្ធដារតាមការចុះផ្សាយរបស់សារព័ត៌មានFresh Newsទៅវិញ ថា បើសារព័ត៌មានមួយនេះមិនព្រមបង់លុយចំនួន៦លាន៣សែនដុល្លារ ដល់រដ្ឋាភិបាលទេ នោះរដ្ឋាភិបាលនឹងបិទកាសែតមួយនេះក្នុងរយៈពេល៣០ថ្ងៃជាកំហិត។ អ្នកស្រីបន្តថា បន្ទាប់មករដ្ឋាភិបាលកម្ពុជាបានបញ្ឈប់ប្រតិបត្តិការ និងបានបិទគណនីធនាគាររបស់កាសែត The Cambodia Dailyដែលធ្វើឲ្យកាសែតមួយនេះមិនអាចដកលុយបើកប្រាក់ខែឲ្យបុគ្គលិករបស់ខ្លួនបាន។
អ្នកស្រី Deborah Krisher Steele បន្តថា សមត្ថកិច្ចនៃរបបលោកហ៊ុន សែន បានហាមមិនឲ្យលោកDouglas Steele ដែលជាស្វាមីរបស់អ្នកស្រីធ្វើដំណើរចាកចេញពីកម្ពុជារយៈពេល៦ខែដោយមិនបានជួបមុខកូនប្រុសរបស់អ្នកទាំងពីរថែមទៀត។ អ្នកស្រីបន្តថា រដ្ឋាភិបាលបានចោទអ្នកស្រីពីបទបរិហារកេរ្តិ៍ថែមទៀត ហើយថា ការធ្វើទុក្ខបុកម្នេញរបស់រដ្ឋាភិបាលកម្ពុជាមកលើកាសែត The Cambodia Dailyគឺដោយសារតែកាសែតមួយនេះហ៊ាននិយាយពីការណ៍ពិត និងហ៊ានរិះគន់រដ្ឋាភិបាល។
ទោះជាយ៉ាងណាក៏ដោយអ្នកស្រីប្រកាសថា ស្ថាប័នកាសែត The Cambodia Dailyនឹងមិនវិលត្រឡប់ទៅកម្ពុជាវិញនោះទេ ដរាបណាកម្ពុជានៅតែអនុវត្តនយោបាយចាប់ហើយដោះលែងវិញ ការធ្វើទុក្ខបុកម្នេញដដែលៗ អំពើពុករលួយ ការប្រើប្រាស់ស្ថាប័នពន្ធដារ និងតុលាការជាឈ្នាន់ដើម្បីគំរាមកំហែងខាងផ្នែកនយោបាយដល់ស្ថាប័នសារព័ត៌មាន។ អ្នកស្រីបន្តថា សារព័ត៌មាន The Cambodia Daily នឹងបន្តជីវិតទីពីររបស់ខ្លួននៅលើបណ្តាញអ៊ិនធឺណេតវិញម្តង ហើយរហូតមកទល់ពេលសារព័ត៌មានមួយនេះកំពុងទទួលការស្វាគមន៍ និងការចូលមើលច្រើនពីក្រុមអ្នកប្រើប្រាស់បណ្តាញសង្គមហ្វេសប៊ុក៕