ក្រោយពីអ្នកភូមិ និងសកម្មជនការពារបរិស្ថានប្រមាណ៧០នាក់ បានចំណាយពេលចុងសប្ដាហ៍ព្យាយាមបណ្ដេញស្រឡាងបូមខ្សាច់ដែលពួកគាត់អះអាងថា ធ្វើប្រតិបត្តិការបូមខ្សាច់ដោយខុសច្បាប់នៅឆ្នេរខេត្តកោះកុង មន្ត្រីមូលដ្ឋានមួយរូបបានលើកឡើងកាលពីម្សិលមិញថា លោកបានបញ្ជាឲ្យផ្អាកប្រតិបត្តិការបូមខ្សាច់ទាំងអស់ជាបណ្ដោះអាសន្ននៅក្នុងតំបន់នោះហើយ។
គ្រួសារអ្នកនេសាទមូលដ្ឋានបានចាប់ផ្ដើមធ្វើការតវ៉ាប្រចាំថ្ងៃប្រឆាំងនឹងប្រតិបត្តិការបូមខ្សាច់កាលពីថ្ងៃព្រហស្បតិ៍ ដោយជិះទូកផ្ទាល់ខ្លួនដើម្បីបណ្ដេញស្រឡាងចំនួន១២គ្រឿងរបស់ក្រុមហ៊ុន International Rainbow ដែលពួកគាត់អះអាងថា ធ្វើសកម្មភាពបូមខ្សាច់ដោយគ្មានលិខិតអនុញ្ញាតត្រឹមត្រូវនៅក្នុងដែនទឹកជុំវិញកោះកាពិ។
កាលពីម្សិលមិញ លោក ពេជ្រ ស៊ីយន់ ប្រធានមន្ទីររ៉ែ និងថាមពលខេត្តកោះកុង បានមានប្រសាសន៍ថា លោកបានបញ្ជាឲ្យក្រុមហ៊ុន International Raibow ផ្អាកប្រតិបត្តិការបូមខ្សាច់របស់ខ្លួនអំឡុងពិធីបុណ្យចូលឆ្នាំខ្មែរប្រពៃណីជាតិនៅសប្ដាហ៍នេះ។
លោកមានប្រសាសន៍ថា ” យើងបានសុំឲ្យពួកគេផ្អាកទាំងស្រុង”។ លោកបានបន្ថែមថា លោកបានចុះទៅដល់ឃុំកោះកាពិ ស្រុកកោះកុង ដើម្បីជូនដំណឹងដល់អ្នកស្រុកដែលនិយាយថា ការបូមខ្សាច់គំរាមកំហែងដល់បរិមាណត្រីដែលពួកគាត់ពឹងអាស្រ័យ។ លោកបានបន្តថា ” យើងបារម្ភខ្លាច [ក្រុមហ៊ុន] មានបញ្ហាជាមួយអ្នកភូមិអំឡុងចូលឆ្នាំខ្មែរ”។
លោកបានទទួលស្គាល់ថា ក្រុមហ៊ុន International Rainbow បានធ្វើប្រតិបត្តិការបូមខ្សាច់នៅខាងក្រៅព្រំប្រទល់តំបន់អនុញ្ញាតក្នុងអាជ្ញាប័ណ្ណចេញដោយរដ្ឋាភិបាល ប៉ុន្តែថា អាជ្ញាប័ណ្ណនោះមានសុពលភាពរហូតដល់ខែធ្នូ ឆ្នាំ២០១៥ឯណោះ។
លោកមានប្រសាសន៍ថា ” ទីតាំងប្រតិបត្តិការគឺស្ថិតនៅក្នុងតំបន់នោះ ក៏ប៉ុន្តែវាបានឆ្លងខ្សែបន្ទាត់ព្រំប្រទល់បន្តិច”។ លោកបានលើកឡើងទៀតថា លោកមិនដឹងច្បាស់ថា តើក្រុមហ៊ុនបានធ្វើប្រតិបត្តិការហួសព្រំប្រទល់តំបន់ដែលត្រូវបានអនុញ្ញាតប៉ុណ្ណាទេ។
ទោះជាយ៉ាងណា លោក ស៊ុន ម៉ាឡា សហស្ថាបនិកអង្គការមាតាធម្មជាតិ ជាអង្គការមិនមែនរដ្ឋាភិបាលដែលបានចូលរួមការតវ៉ាទាំងនេះ បានជំទាស់នឹងការលើកឡើងរបស់លោក ពេជ្រ ស៊ីយន់។ លោកបានមានប្រសាសន៍ថា បន្ទាប់ពីលោក ពេជ្រ ស៊ីយន់ ចុះទៅដល់ឃុំនោះកាលពីថ្ងៃអាទិត្យ ស្រឡាងបូមខ្សាច់ប្រាំបួនគ្រឿង និងទូកដឹកខ្សាច់ប្រាំបីគ្រឿងបានវិលត្រឡប់ទៅបូមខ្សាច់វិញនៅយប់ថ្ងៃអាទិត្យ ហើយបានស្ថិតនៅក្នុងតំបន់នោះរហូតដល់ព្រឹកម្សិលមិញ ដែលអ្នកភូមិបានបណ្ដេញស្រឡាងទាំងនោះចេញជាថ្មីម្ដងទៀត។
លោកមានប្រសាសន៍ថា ” ក្រុមហ៊ុនមិនបានបញ្ឈប់ទេ ហើយយើងមិនទទួលបានការជូនដំណឹងណាមួយពាក់ព័ន្ធនឹងការផ្អាកសកម្មភាពរបស់ក្រុមហ៊ុននេះទេ”។
លោក ហ៊ុំ សារឿន អ្នកនេសាទម្នាក់ក្នុងចំណោមអ្នកនេសាទដែលបានជួយបណ្ដេញស្រឡាងបូមខ្សាច់ទាំងនេះបាននិយាយថា លោក ពេជ្រ ស៊ីយន់ មិនបានប្រាប់ប្រជាពលរដ្ឋមូលដ្ឋានអំពីការបញ្ជារបស់លោកឲ្យក្រុមហ៊ុន International Rainbow បញ្ឈប់ការបូមខ្សាច់ទេ។ គាត់និយាយទៀតថា ” អ្វីដែលគាត់និយាយ [ទៅកាន់ប្រព័ន្ធផ្សព្វផ្សាយ] គឺខុសពីអ្វីដែលគាត់បាននិយាយទៅកាន់អ្នកភូមិ”។
ពេលទាក់ទងម្ដងទៀតដើម្បីសុំការបំភ្លឺ លោក ពេជ្រ ស៊ីយន់ បានមានប្រសាសន៍ថា លោកមិនចាំបាច់ជូនដំណឹងអ្នកភូមិអំពីការផ្អាកនេះទេ។ លោកបានលើកឡើងយ៉ាងដូច្នេះថា ” ឲ្យពួកគាត់ទៅមើលស្រឡាងទាំងនោះទៅ ពីព្រោះខ្ញុំបានជូនដំណឹងក្រុមហ៊ុនរួចហើយ”៕ សុខុម