យោងតាមនគរបាលមូលដ្ឋានបានឲ្យដឹងថា មន្ត្រីកងរាជអាវុធហត្ថពីរនាក់ត្រូវបានចាប់ខ្លួនកាលពីវេលាទៀបភ្លឺថ្ងៃម្សិលមិញបន្ទាប់ពីធ្វើការបោះក្នុងទីសាធារណៈអំឡុងការប៉ះទង្គិចគ្នានៅកន្លែងផឹកស៊ីមួយពេលស្រវឹងស្រាស្ថិតក្នុងខណ្ឌ៧មករា រាជធានីភ្នំពេញ។
លោក ម៉ុក បុរាណឆសាក់ នាយប៉ុស្តិ៍សង្កាត់វាលវង់បានមានប្រសាសន៍ថា លោក គុជ យឹមសុភា អាយុ៥២ឆ្នាំ និងលោក អ៊ុក បូរ៉ា អាយុ៣៨ឆ្នាំបានផឹកស៊ីនៅកន្លែងលក់ស្រាតាមចិញ្ចើមផ្លូវមួយជាមួយមិត្តភក្តិពីរនាក់ទៀត ស្រាប់តែមានជម្លោះកើតឡើងនៅម៉ោងប្រហែល៤និង៥៥នាទីទៀបភ្លឺបន្ទាប់ពីលោក បូរ៉ា បាននិយាយថា លោកចង់ត្រឡប់ទៅផ្ទះ។
លោក បុរាណឆសាក់ បានមានប្រសាសន៍ថា លោក យឹមសុភា អាយុ៥២ឆ្នាំជាគណនេយ្យករនៅកងរាជអាវុធហត្ថ បានបាញ់មួយគ្រាប់ឡើងលើជាការ “ព្រមាន” ទៅលោក បូរ៉ា ជាជំនួយការរដ្ឋបាលកងរាជអាវុធហត្ថ កុំឲ្យចាកចេញពីកន្លែងនោះ។
លោក បុរាណឆសាក់ បានមានប្រសាសន៍ថា “លោក យឹមសុភា បានបាញ់មួយគ្រាប់ឡើងលើ ហើយបន្ទាប់មកបានប្រើអំពើហិង្សាដោយវាយលោក បូរ៉ា ចំក្បាល។ ពួកគេទាំងពីរនាក់ជាមន្ត្រីកងរាជអាវុធហត្ថ ហើយមានកំាភ្លើងដូចគ្នា។លោក បូរ៉ា រងរបួសត្រង់មាត់ ដោយបែកឈាមអំឡុងការវាយនោះ ប៉ុន្តែមិនធ្ងន់ធ្ងរទេ”។
លោក បុរាណឆសាក់ បានមានប្រសាសន៍ថា អ្នកទាំងពីរនិងមិត្តភក្តិពីរនាក់ទៀតត្រូវបានចាប់ខ្លួន ហើយបញ្ជូនទៅកាន់អធិការនគរបាលខណ្ឌដើម្បីធ្វើការសាកសួរមុនពេលបញ្ជូនទៅទីបញ្ជាការដ្ឋានកងរាជអាវុធហត្ថ។
លោកបានមានប្រសាសន៍ថា បុរសពីរនាក់ទៀតមានអាយុចន្លោះ៣៨ទៅ៤០ឆ្នាំ ប៉ុន្តែលោកមិនបានកត់ឈ្មោះពួកគេទេ ពីព្រោះពួកគេគ្រាន់តែជាសាក្សីចំពោះហេតុការណ៍នោះតែប៉ុណ្ណោះ។
ឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថបានមានប្រសាសន៍កាលពីម្សិលមិញថា លោកដឹងថា ជម្លោះនេះបានកើតឡើងមែន។
នៅពេលត្រូវបានសួរថា តើមន្ត្រីទាំងនោះនឹងត្រូវបញ្ជូនទៅតុលាការឬយា៉ងណានោះ លោក ទីតូ បានមានប្រសាសន៍ថាវាគ្រាន់តែជា “ករណីតូចតាច” តែប៉ុណ្ណោះ ហើយបានលើកឡើងថា បុរសម្នាក់បានរងរបួស ប៉ុន្តែលោកមិនបាននិយាយដល់ចំណាត់ការរបស់តុលាការទេ។
លោកបានមានប្រសាសន៍ថា “ពួកគេនឹងត្រូវដាក់ទោសទណ្ឌតាមបទបញ្ជាផ្ទៃក្នុងរបស់ទាហាន ពីព្រោះ ពួកគេរំលោភបទបញ្ជាផ្ទៃក្នុង [ដោយបាញ់បោះក្នុងទីសាធារណៈ]។
ឧត្តមសេនីយ៍ត្រី ទីតូ បានមានប្រសាសន៍ថា កាលពីម្សិលមិញ អ្នកទាំងបួនត្រូវបានឃុំខ្លួននៅទីបញ្ជាការដ្ឋានកងរាជអាវុធហត្ថលើផ្ទៃប្រទេស ហើយនឹងត្រូវ “ធ្វើការអប់រំ” មុនពេលប្រឈមនឹងការដាក់ទោសទណ្ឌ៕សារុន