លោក សេរហ្គេ ប៉ូលុនស្គី សេដ្ឋីជនជាតិរុស្សីដែលរត់គេចខ្លួនបានដាក់ពាក្យបណ្ដឹងទៅសាលាដំបូងខេត្តព្រះសីហនុ ចោទប្រកាន់លោក នីកូឡៃ ដូរ៉ូសិនកូ អតីតដៃគូជំនួញរបស់ខ្លួនពីបទបរិហារកេរ្តិ៍ ដោយចោទប្រកាន់រូបលោកថា នៅពីក្រោយការវាយកូនប្រុសរបស់គាត់ក្នុងក្រុងព្រះសីហនុកាលពីសប្ដាហ៍មុន។
ជនជាតិរុស្ស៊ីរូបនេះមានវិវាទជាយូរមកហើយជុំវិញអចលនទ្រព្យមួយចំនួន ដែលពួកគេកាន់កាប់រួមគ្នានៅក្នុងទីប្រជុំជនទេសចរណ៍ និងនៅកោះមួយ។ លោក បែនសុន សម័យ មេធាវីរបស់លោក ប៉ូលុនស្គី បានមានប្រសាសន៍កាលពីម្សិលមិញថា “យើងបានដាក់ពាក្យបណ្ដឹងពីបទបរិហារកេរ្តិ៍ទៅតុលាការនៅម៉ោង៤និង៣០នាទីល្ងាចថ្ងៃអង្គារ”។
លោកស្រី ចាត សុរស្មី ព្រះរាជអាជ្ញាអមសាលាដំបូងខេត្តបានបញ្ជាក់ថា លោកស្រីទទួលបានពាក្យបណ្ដឹងនេះហើយ។
យោងតាមនគរបាលបានឲ្យដឹងថា លោក អូសថេប ដូរ៉ូសិនកូ អាយុ៣៦ឆ្នាំ មានសញ្ជាតិខ្មែរ និងជាអនុសេនីយ៍ឯកក្នុងកងកម្លាំងនគរបាលអន្តោប្រវេសន៍ខេត្តព្រះសីហនុ ត្រូវបានជនជាតិរុស្ស៊ីពីរនាក់ដាល់ជាច្រើនដៃចំមុខ កន្លែងដែលឪពុករបស់ខ្លួនបានឲ្យទៅជួបនៅតាមផ្លូវមួយទៅកាន់សណ្ឋាគារឯករាជ្យកាលពីល្ងាចថ្ងៃទី២៧ ខែវិច្ឆិកា។
របាយការណ៍ពេទ្យដែលចុះហត្ថលេខាដោយប្រធានពហុព្យាបាល CT ក្នុងក្រុងព្រះសីហនុ ដែលលោក អូសថេប ដូរ៉ូសិនកូ បានចូលសម្រាកព្យាបាលបន្ទាប់ពីការវាយប្រហារ បញ្ជាក់ថា គាត់បានទទួលរងបាក់ឆ្អឹងថ្គាម ដោយមានស្នាមជាំ និងរយះលើផ្ទៃមុខ។
កាលពីថ្ងៃអាទិត្យ លោក នីកូឡៃ ដូរ៉ូសិនកូ អាយុ៥៦ឆ្នាំបានចោទប្រកាន់លោក ប៉ុលុនស្គី អាយុ៤២ឆ្នាំថា បានបញ្ជាឲ្យមានការវាយនេះ ដែលលោកលើកឡើងថា ត្រូវបានសំដៅមករូបលោក។ លោកបាននិយាយនៅពេលនោះថា “ប្រសិនបើខ្ញុំទៅជួបពួកគេ ម្លេ៉ះសមពួកគេសម្លាប់ខ្ញុំទៅហើយ។
នៅថ្ងៃបន្ទាប់ លោក បែនសុន សម័យ មេធាវីរបស់លោក ប៉ូលុនស្គី បានធ្វើសន្និសីទកាសែតនៅការិយាល័យរបស់លោកក្នុងរាជធានីភ្នំពេញ ដែលអំឡុងពេលនោះលោកបានលើកឡើងថា ដៃរបស់កូនក្ដីលោកស្អាតស្អំ។
លោកបានមានប្រសាសន៍ថា “គាត់ [ប៉ូលុនស្គី] បាននិយាយថា វាជារឿងភាពយន្តតែប៉ុណ្ណោះ មិនមែនជារឿងពិតទេ”។ លោកបានបន្ថែមថា រូបថតរបស់លោក អូសថេប ដូរ៉ូសិនកូ ប្រឡាក់សុទ្ធតែឈាមបន្ទាប់ពីការវាយប្រហារ ហើយបានចុះផ្សាយនៅតាមកាសែតក្នុងស្រុកកាលពីចុងសប្ដាហ៍នោះ គឺជាការយល់ខុស។ លោក បែនសុន សម័យ បានមានប្រសាសន៍ថា ” លោក ប៉ូលុនស្គី បាននិយាយថា វាជាឈាមត្រី ឈាមមាន់ទេ”។
លោក ប៉ូលុនស្គី ជាមនុស្សម្នាក់ក្នុងចំណោមអ្នកមានទ្រព្យច្រើនបំផុតក្នុងប្រទេសរុស្ស៊ី ត្រូវបានចោទប្រកាន់កំបាំងមុខដោយក្រសួងមហាផ្ទៃរុស្ស៊ី ពីបទកិបកេងប្រាក់រាប់លានដុល្លារពីវិនិយោគិនមួយចំនួនក្នុងការរកស៊ីខាងអចលនទ្រព្យ។
បន្ទាប់មកលោកត្រូវបានស្ថិតក្នុងបញ្ជីឧក្រិដ្ឋជន ដែលគេចង់ចាប់ខ្លួនបំផុតរបស់នគរបាលអាំងទែប៉ូលពីបទ “ឆបោកទ្រង់ទ្រាយធំ” ប៉ុន្តែតុលាការកម្ពុជាបានបដិសេធសំណើសុំធ្វើបត្យាប័នជាច្រើនលើករបស់ក្រុងមូស្គូ។
នៅក្នុងបទសម្ភាសកាលពីដើមសប្ដាហ៍នេះនៅកោះដែកគោល ជាកោះឯកជនតូចមួយនៅក្នុងសមុទ្រក្រុងព្រះសីហនុ ដែលលោក ប៉ូលុនស្គី បានចំណាយពេលភាគច្រើនរបស់លោកនៅទីនោះ លោកបានមានប្រសាសន៍ថា ខណៈដែលលោក អូសថេប ដូរ៉ូសិនកូ ត្រូវបានបង្ករបួសស្នាមនោះ កាលចោទប្រកាន់តាមតែចិត្តរបស់ឪពុកគាត់មិនគិតមុខគិតក្រោយឡើយ។ លោកបានមានប្រសាសន៍ថា “ឪពុករបស់បុរសរូបនេះបាននិយាយថា អូ ប៉ូលុនស្គី! ប៉ូលុនស្គី!”។ ដោយសំដៅដល់ការចោទប្រកាន់របស់លោក នីកូឡៃ ដូរ៉ូសិនកូ លោកបានមានប្រសាសន៍ថា “ហេ ឈប់ទៅ”។ លោកបានបន្ថែមថា “នេះមិនមែនជាគំនិតរបស់ខ្ញុំទេ។ រយៈពេល៤២ឆ្នាំមកហើយ ខ្ញុំមិនដែលសម្លាប់នរណាម្នាក់ទេ”។
លោក ប៉ូលុនស្គី ក៏បានកត់សម្គាល់ដែរថា វាមិនពិបាកស្វែងរកជនសង្ស័យពិតឡើយ។ លោកបានមានប្រសាសន៍ថា ” វាមិនពិបាកក្នុងការស្វែងរកជនជាតិរុស្ស៊ីស្បែកសពីរនាក់នៅក្នុងប្រទេសកម្ពុជាឡើយ”។
នៅពេលត្រូវបានទាក់ទងកាលពីម្សិលមិញ លោក នីកូឡៃ ដូរ៉ូសិនកូ បានបង្វែរសំណួរទៅកូនប្រុសរបស់គាត់ ដែលបានគាំទ្រការអះអាងរបស់ឪពុកខ្លួន។
នៅពេលស្ថិតក្នុងសភាពពាក់កណ្ដាលដឹងខ្លួនអំឡុងការវាយនោះ លោក អូសថេប ដូរ៉ូសិនកូ បាននិយាយថា លោកបានស្តាប់ឮអ្នកវាយរូបលោកនិយាយគ្នាថា ពួកគេត្រូវលោក ប៉ូលុនស្គី ជួល។
លោកបាននិយាយថា “ខ្ញុំបានឮបុរសជនជាតិរុស្ស៊ីពីរនាក់នេះនិយាយថា ប្រសិនបើខ្ញុំមិនស្លាប់ទេនោះ លោក ប៉ូលុនស្គី មិនឲ្យលុយពួកគេឡើយ”។ លោកបានបន្ថែមថា លោកកំពុងលាក់ខ្លួនជាមួយប្រពន្ធដែលមានផ្ទៃពោះ និងកូនស្រីអាយុ២ឆ្នាំរបស់លោក។
លោកបាននិយាយថា លោកបានដាក់ពាក្យបណ្ដឹងទៅសាលាដំបូងខេត្តព្រះសីហនុ ចោទប្រកាន់លោក ប៉ូលុនស្គី ពីបទប៉ុនប៉ងមនុស្សឃាត ដោយថតចម្លងពាក្យបណ្តឹងនេះបញ្ជូនមកសាលាដំបូងរាជធានីភ្នំពេញដែរ។
លោកស្រី សុរស្មី ព្រះរាជអាជ្ញាអមសាលាដំបូងខេត្តព្រះសីហនុ បានមានប្រសាសន៍ថា លោកស្រីមិនបានទទួលពាក្យបណ្ដឹងរបស់លោក អូសថេប ដូរ៉ូសិនកូ ទេ។ លោក ធៀង រ៉ាមី ក្រឡាបញ្ជីនៅសាលាដំបូងរាជធានីក៏បានមានប្រសាសន៍ផងដែរថា លោកមិនបានឃើញច្បាប់ចម្លងនៃពាក្យបណ្ដឹងនោះឡើយ។
លោក ម៉ែន វណ្ណី នាយនគរបាលព្រហ្មទណ្ឌកម្រិតស្រាលខេត្តព្រះសីហនុ បានមានប្រសាសន៍កាលពីម្សិលមិញថា មន្ត្រីរបស់លោកកំពុងស៊ើបអង្កេតឧបទ្ទវហេតុនេះ ប៉ុន្តែនៅរង់ចាំការរៀបរាប់ភិនភាគជនសង្ស័យពីសំណាក់លោក អូសថេប ដូរ៉ូសិនកូ នៅឡើយ៕សារុន (រាយការណ៍បន្ថែមដោយ ឃួន ណារីម និង Chris Mueller)