មន្ត្រីអង្គការសហប្រជាជាតិម្នាក់បាននិយាយកាលពីម្សិលមិញថា អភិបាលខេត្តរតនគិរីមិនបានសហការជាមួយការខិតខំប្រឹងប្រែងរបស់អង្គការសហប្រជាជាតិក្នុងការចរចារកច្រកសុវត្ថិភាពសម្រាប់អ្នកស្វែងរកសិទ្ធិជ្រកកោនជនជាតិដើមភាគតិចម៉ុងតាញ៉ាប្រាំនាក់ ដែលបានឆ្លងព្រំដែនពីប្រទេសវៀតណាមរយៈពេលជិតពីរសប្ដាហ៍កន្លងមកនេះ។
លោកស្រី វ៉ានហ៊ី លី តំណាងប្រចាំប្រទេសនៃការិយាល័យឧត្ដមស្នងការសហប្រជាជាតិទទួលបន្ទុកសិទ្ធិមនុស្ស បានលើកឡើងតាមអុីម៉េលថា ការិយាល័យរបស់លោកស្រីបានព្យាយាមទាក់ទងជាមួយអភិបាលខេត្ត គឺលោក ថោង សាវុន ដើម្បីពិភាក្សាជុំវិញការអនុញ្ញាតឲ្យជនជាតិដើមភាគតិចម៉ុងតាញ៉ដាក់ពាក្យសុំសិទ្ធិជ្រកកោន។
លោកស្រី លី បានមានប្រសាសន៍ថា ”កាលពីថ្ងៃម្សិលមិញ គាត់បានឆ្លើយតបថា គាត់មិនអាចចូលរួមក្នុងអ្វីដែលគាត់ចាត់ទុកថា ជាកិច្ចប្រជុំក្រៅផ្លូវការបានឡើយ”។ លោកស្រីបានបន្ថែមថា លោក សាវុន បានសុំឲ្យឧត្ដមស្នងការសហប្រជាជាតិទទួលបន្ទុកសិទ្ធិមនុស្សសុំការអនុញ្ញាតពីក្រសួងមហាផ្ទៃ និងក្រសួងការបរទេសមុនពេលគាត់យល់ព្រមចូលរួមការពិភាក្សានោះ។
លោកស្រី លី បានមានប្រសាសន៍ថា “ឧត្ដមស្នងការសហប្រជាជាតិទទួលបន្ទុកសិទ្ធិមនុស្សមិនដឹងថា មានច្បាប់ ឬបទប្បញ្ញត្តិណាដែលតម្រូវឲ្យអង្គការអន្តរជាតិសុំការអនុញ្ញាតពីរដ្ឋមន្ត្រីទាំងនេះក្នុងការជួបប្រជុំជាមួយអភិបាលខេត្តនេះឡើយ”។
នៅពេលត្រូវបានទាក់ទងកាលពីម្សិលមិញ លោក សាវុន បានបញ្ជាក់ថា លោកទទួលបានសំណើពីមន្ត្រីឧត្ដមស្នងការសហប្រជាជាតិទទួលបន្ទុកសិទ្ធិមនុស្សសុំការសហការក្នុងការអនុញ្ញាតឲ្យជនជាតិដើមភាគតិចម៉ុងតាញ៉ា ដែលជាជនជាតិដើមភាគតិចមកពីតំបន់ខ្ពង់រាបកណ្ដាលប្រទេសវៀតណាម ក្នុងការដាក់ពាក្យសុំសិទ្ធិជ្រកកោន។
លោក សាវុន បានមានប្រសាសន៍ថា “ខ្ញុំបានប្រាប់គាត់ថា ខ្ញុំមិនអាចទទួលមន្ត្រីទាំងនេះបានទេ លុះណាតែក្រសួងមហាផ្ទៃប្រាប់ឲ្យខ្ញុំចូលរួមក្នុងការស្វែងរកអ្នកទាំងនោះ”។ លោកបានបន្ថែមថា “ខ្ញុំមិនអនុញ្ញាតឲ្យអង្គការសហប្រជាជាតិជួបអ្នកទាំងប្រាំនាក់នេះនៅក្នុងព្រៃទេ ប្រសិនបើពួកគេមិនទទួលបានការអនុញ្ញាតពីថ្នាក់លើនោះ”។
លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា លោកបានត្រឡប់មកពីវិស្សមកាលកាលពីម្សិលមិញ ហើយមិនបានដឹងព័ត៌មានថ្មីៗស្តីពីស្ថានភាពរបស់ជនជាតិដើមភាគតិចម៉ុងតាញ៉ាឡើយ។
អ្នកភូមិជនជាតិដើមភាគតិចចារ៉ាយម្នាក់ ដែលបានបិទបាំងក្រុមនេះចាប់តាំងពីពួកគេមកដល់ ហើយបាននិយាយក្នុងភាពអនាមិកដោយភ័យខ្លាចការរករឿងពីអាជ្ញាធរបាននិយាយថា ជនជាតិដើមភាគតិចម៉ុងតាញ៉ាកំពុងលាក់ខ្លួននៅឡើយ ហើយកំពុងរង់ចាំការទាក់ទងពីអង្គការសហប្រជាជាតិ។
លោកបានមានប្រសាសន៍ថា នគរបាលស្រុកដែលបានចុះទៅរកតាមផ្ទះជនជាតិដើមភាគតិចចារ៉ាយកាលពីថ្ងៃទី១០ ខែមករានោះ នៅតែស្វែងរកក្រុមនេះដដែល។
ជនជាតិដើមភាគតិចម៉ុងតាញ៉ា១៣នាក់ទៀត បានរត់គេចខ្លួនពីប្រទេសវៀតណាមមកប្រទេសកម្ពុជាកាលពីខែតុលា ហើយបានលាក់ខ្លួនក្នុងព្រៃរយៈពេលជាងពីរខែ រហូតដល់អង្គការសហប្រជាជាតិបានទាក់ទងពួកគេកាលពីចុងខែធ្នូ។ បន្ទាប់មកពួកគេត្រូវបានបញ្ជូនមករាជធានីភ្នំពេញ ទីដែលពួកគេកំពុងដំណើរការស្វែងរកឋានៈជាជនភៀសខ្លួនពីក្រសួងមហាផ្ទៃ៕ សារុន