សហរដ្ឋអាមេរិកបានអះអាងថា រដ្ឋាភិបាលលោកហ៊ុន សែនគ្មានឆន្ទៈពិតប្រាកដក្នុងការលុបបំបាត់អំពើជួញដូរមនុស្សនោះទេ។
ក្នុងរបាយការណ៍ស្ដីពីការជួញដូរមនុស្សក្នុងពិភពលោករបស់សហរដ្ឋអាមេរិក ដែលចេញផ្សាយកាលពីថ្ងៃម្សិលមិញ បានសម្រេចដាក់ប្រទេសកម្ពុជាក្នុងបញ្ជី ដែលត្រូវតាមដានរបស់ខ្លួន ដោយអាមេរិកថា រដ្ឋាភិបាលលោកហ៊ុន សែនមិនបានបំពេញការអនុវត្តច្បាប់ឱ្យគ្រប់គ្រាន់ក្នុងការលុបបំបាត់អំពើជួយដូរមនុស្សនោះឡើយ។ អាមេរិកថា រដ្ឋាភិបាលកម្ពុជាបានឲ្យធ្វើចំណាត់ថ្នាក់របស់ខ្លួន កាន់តែធ្លាក់ចុះមួយកម្រិតទៀត។
របាយការណ៍ដដែលក៏បានលើកឡើងថា រដ្ឋាភិបាលមិនបានស៊ើបអង្កេតឱ្យបានត្រឹមត្រូវទៅលើឧក្រិដ្ឋជន ដែលពាក់ព័ន្ធករណីជួញដូរមនុស្សកន្លងមកនោះទេ។ ក្រៅពីនេះបញ្ហាអំពើពុករលួយនៅតែជាឧបសគ្គរារាំងដល់ប្រតិបត្តិការអនុវត្តច្បាប់ ឈានទៅចាប់ជនល្មើសយកមកផ្តន្ទាទោស និងមិនមានការផ្តល់សេវាដល់ជនរងគ្រោះឱ្យបានគ្រប់គ្រាន់នោះឡើយ។
ប្រភពដដែលឲ្យដឹងទៀតថា ដោយសារតែកង្វះកិច្ចខិតខំប្រឹងប្រែងនិងកង្វះការស៊ើបអង្កេតដោយឯករាជ្យ ព្រមទាំងគ្មានតម្លាភាពជាដើមនោះ ទើបបណ្តាលឲ្យបុរស ស្ត្រី និងកុមាររាប់ពាន់នាក់នៅទូទាំងប្រទេសក្លាយជាជនរងគ្រោះនៃការជួញដូរមនុស្ស តាមរយៈបំណុល ជាពិសេសក្នុងអាជីវកម្មឡឥដ្ឋ។
កាលពីខែមេសាឆ្នាំនេះ រដ្ឋមន្ត្រីក្រសួងមហាផ្ទៃលោកស ខេង បានដាក់ទិសដៅបោសសម្អាតអំពើជួញដូរមនុស្សតាមគ្រប់រូបភាព ពិសេសការរត់ពន្ធមនុស្សឆ្លងដែន ដោយលោកបានណែនាំឱ្យអាជ្ញាធរខេត្តជាប់ព្រំដែនទាំងអស់ ជាពិសេសអាជ្ញាធរនៅតាមព្រំដែនខ្មែរ ថៃក្នុងខេត្តបាត់ដំបង ត្រូវទប់ស្កាត់គ្រប់រូបភាពនៃការជួញដូរមនុស្សឆ្លងដែនតាមទឹកដីនៃខេត្តនេះ ដើម្បីបានទៅធ្វើការដោយខុសច្បាប់នៅប្រទេសថៃ ឬទៅប្រទេសផ្សេងទៀត។
លើសពីនេះ លោកស ខេងក៏បានបញ្ជាឲ្យស្រាវជ្រាវរកអ្នកពាក់ព័ន្ធនៅពីក្រោយខ្នងនៃអំពើជួញដូរមនុស្សទាំងនោះដើម្បីយកទៅផ្តន្ទាទោសតាមច្បាប់។ ក្រៅពីបទល្មើសជួញដូរមនុស្សលោកស ខេងក៏បានបញ្ជាឱ្យមន្ត្រីតាមព្រំដែនទាំងអស់ ត្រូវទប់ស្កាត់បទល្មើសផ្សេងទៀត ដូចជាបទល្មើសឧក្រិដ្ឋកម្មឆ្លងដែន ការនាំលុយខ្មៅចូលមកកម្ពុជា និងបទល្មើសគ្រឿងញៀនជាដើម។
យ៉ាងណាក៏ដោយ សហរដ្ឋអាមេរិកបានផ្តល់អនុសាសន៍ក្នុងរបាយការណ៍ដដែលថា កម្ពុជាគប្បីបង្កើតភ្នាក់ងារស៊ើបអង្កេតសម្ងាត់និងមានមន្ត្រីតាមមើលដំណើរការក្នុងតុលាការ និងការកំណត់មុខសញ្ញាជនងាយរងគ្រោះ ជាពិសេសអ្នកធ្វើការនៅឡឥដ្ឋ។
រដ្ឋាភិបាលប្រទេសមហាអំណាចមួយនេះក៏បានស្នើឲ្យរដ្ឋាភិបាលកម្ពុជាត្រូវបង្កើនការស្ដារនីតិសម្បទាដល់ជនរងគ្រោះ និងត្រួតពិនិត្យលើស្ថាប័នផ្ដល់ប្រាក់កម្ចីឯកជនដើម្បីកាត់បន្ថយភាពងាយរងគ្រោះនៃបំណុល លើកទឹកចិត្តដល់ជនរងគ្រោះទាំងក្នុង និងក្រៅប្រទេសកែសម្រួលច្បាប់ដើម្បីឲ្យមានការសងជំងឺចិត្តដល់ជនរងគ្រោះ បង្កើនការយល់ដឹងជាសាធារណៈអំពីការធ្វើចំណាកស្រុក និងពង្រឹងការត្រួតពិនិត្យលើភ្នាក់ងារជ្រើសរើសពលករទៅធ្វើការងារនៅក្រៅប្រទេសជាដើម៕