រូប​ថត​មក​ពី​ទូទាំង​ពិភព​លោក​នឹង​ត្រូវចូលរួម​​ក្នុង​ពិធី​តាំង​ពិ​ព័រ​​ណ៍រូប​ថត​អង្គរ​នៅក្រុង​សៀម​រាប

អ្នក​រៀប​ចំ​ពិធី​តាំង​ពិព័រណ៍​រូប​ថត​​អង្គរ​លើក​ទី​៨ ដែល​នឹង​បើក​នៅ​ចុង​សប្ដាហ៍​នេះ​ ក្នុង​ក្រុង​សៀម​រាប ​ប្រឈម​នឹង​​ការ​ប្រកួត​ប្រជែង​ដ៏​ធំ​មួយ​​ គឺ​ការ​កើន​ឡើង​ប្រជា​ប្រិយ​ភាព​​នៃ​ពិធី​​នេះ​។ អ្នក​រៀប​ចំ​ពិធី​នេះ ​បាន​លើក​ឡើង​ថារូបថត​​សម្រាប់​ការ​ដាក់​តាំងពិពរណ៌​ និង​សម្រាប់​ការ​ដាក់​បង្ហាញ​តាមរយៈ​ការ​បញ្ចាំង​ ស្លាយ​​​នៅ​ខាង​ក្រៅ​​ គឺ​ត្រូវ​បាន​ជ្រើស​រើស​ឡើង​តាម​រយៈ​ដំណើរ​ការ​នៃ​ការ​ដាក់​រូបថត​មក​​ប្រកួត​ប្រជែង​ ហើយ​ពិធី​​នៅ​ឆ្នាំ​នេះ​គឺ​មាន​ការ​ចាប់​អារម្មណ៍​យ៉ាង​ខ្លាំង។ លោក ហ្វ្រង់​ស័រ​ កាលីយ៉េ (Francoise Callier) លើក​ឡើង​ថា យើង​ទទួល​បាន​ការ​ដាក់​ពាក្យ​​មក​ប្រកួត​ប្រជែង​ប្រហែល​១.២៥០​​ពី​អ្នក​ថត​រូប​ទាំង​អស់​ មក​ពី​ប្រទេស​ចំនួន​៦០។​ចំនួន​នេះ​​មាន​ការ​កើន​ឡើង​​ច្រើន​ណាស់​​។ ចុង​បញ្ចប់​ អ្នក​រៀប​ចំ​កម្មវិធី​បាន​កាត់​បន្ថយ​​ចំនួន​អ្នក​ថត​រូប​ ដែល​បាន​ដាក់​ពាក្យ​មក​ត្រឹម​១២៥​នាក់​ មក​ពី​៣៤​ប្រទេស​ដែល​នឹង​ត្រូវ​ដាក់​បង្ហាញ​នៅ​ក្នុង​ពិធី​តាំង​ពិព័រណ៍ចំនួន​១០​​កន្លែង និងការ​ដាក់​បង្ហាញ​តាមរយៈ​ការ​បញ្ចាំង ​​​ស្លាយ​​ចំនួន​ប្រាំបី​​កន្លែង​នៅ​ក្នុង​រយៈ​ពេល​ជាង​​ប្រាំបី​ថ្ងៃ​ដែល​ចាប់​ផ្ដើម​ពី​ថ្ងៃ​សៅរ៍​ នៅ​ក្នុង​សួន​​នៃ​សណ្ឋាគារ​ Raffles Grand Hotel d' Angkor ​ហើយ​និង​បញ្ចប់​នៅ​ថ្ងៃ​ទី​៨ ខែ​ធ្នូ នៅ​ឯ​សណ្ឋាគារ​អេហ្វ​ស៊ីស៊ី​ អង្គរ​។ កាល​ពី​ប៉ុន្មាន​ឆ្នាំ​មុន​ ពិធី​តាំង​ពិព័រណ៍​នេះ​ គឺ​ជា​ឱកាស​មួយ​សម្រាប់​អ្នក​ថត​រូប​មក​ពី​បណ្ដា​​ប្រទេស​លោក​ខាង​លិច ជួប​ជាមួយ​សម​ភាគី​   របស់​ខ្លួន​ និង​អ្នក​ថត​រូប​ក្មេង​ៗ​ជាច្រើន​ទៀត​មក​ពី​តំបន់​បូពា៌។​អាច​និយាយ​ម្យា៉ង​ទៀត​ថា​​ ពិធី​តាំង​ពិព័រណ៍ និង​ការបញ្ចាំងស្លាយរបស់​អ្នក​ថត​រូបនេះ​​​​ គឺជា​មធ្យោបាយ​មួយ ​ដែល​អាច​​ធ្វើ​ឲ្យ​អ្នក​ថត​រូប​មាន​ក្ដី​សង្ឃឹម​ចំពោះ​អ្វី​​ដែល​ខ្លួន​​និងក្រុម​​ការ​ងារ​របស់​ខ្លួន​បានធ្វើ និង​ជា​ឱកាស​សម្រាប់​ពួកគេ​បង្ហាញពី​ស្នាដៃរបស់​ខ្លួន​។ នៅ​ពេល​ដែល​មាន​ការ​ដាក់​ពាក្យ​មក​ប្រកួត​ប្រជែង​ជា​ច្រើន​នៅ​ក្នុង​ឆ្នាំ​នេះ​ អ្នក​ថត​​រ​ូប​ទូទាំង​ភព​លោក​ ឥឡូវ​នេះ​មាន​ចិត្ត​​ចង់​ចូល​​រួម​ក្នុង​ពិធី​ពិព័រណ៍​រូប​ភាព​អង្គរ​នេះ​យ៉ាង​ខ្លាំង​ និងដើម្បី​ចង​បណ្ដាញ​ជាមួយ​អ្នក​ថត​រូប​ផ្សេង​ៗ​ទៀត​។ ក្នុង​ឆ្នាំ​នេះ​មាន​ការ​ដាក់​ពាក្យ​​ច្រើន​ហួស​ពី​ការ​​រំពឹង​ទុក​​មក​ពី​ប្រទេស​រុស្ស៊ី ប្រទេស​ហ្សកហ្ស៊ី រួម​ទាំង​រូប​ភាព​ដ៏​អស្ចារ្យ​របស់​លោក​ មីសា ដូម៉ូហ្ស៊ីឡូវ (Misha Domozhilov) ដែល​មាន​សញ្ជាតិ​រុស្ស៊ី​ផងដែរ។ ហើយ​ក៏​នឹងមានការចូលរួមពី​​ការ​តាំង​ពិព័រណ៍​ធំ​មួយ​របស់​អ្នក​ថត​រូប​ជប៉ុន​នៅឯ​កន្លែង​តាំង​រូប​ភាព​ McDermott Gollery ផង​ដែរ។ លោកបាន​លើក​ឡើង​តាម​​អុីម៉េល​​កាល​ពី​ថ្ងៃ​ពុធ​ថា បន្ទាប់​ពី​ទទួល​ដំណឹង​ថាប្រទេស​ជប៉ុន​​មិន​បាន​មក​ចូល​រួម​ក្នុង​ពិធី​តាំង​ពិព័រណ៍​​រូប​ភាព​អង្គរ ​កាល​​ពី​ឆ្នាំ​មុន​ ​លោកតាកេគី ស៊ូហ្គីយាម៉ា (Takeki Sugiyama) ម្ចាស់​កន្លែង​​​តាំង​រូបភាព​​ Tento Tempo Photo Cafe and Gollery នៅ​ក្នុង​ទី​ក្រុង​កូបេ បាន​សម្រេច​ចិត្ត​ធ្វើ​​ឲ្យ​ស្ថាន​ភាព​នេះ​ប្រសើរ​ឡើង​​ក្នុង​ឆ្នាំ​នេះ​។ លោក​បាន​លើក​ឡើង​ថា លោក​​បាន​បង្កើត​កន្លែង​​តាំង​ពិព័រណ៍​មួយ​ដែល​មាន​អ្នក​ថត​រូប​ចូល​រួម​ចំនួន​ប្រាំមួយនាក់​ នៅ​ក្នុង​ការដាក់​បង្ហាញ​មួយ​ដែល​មាន​ចំណង​ជើង​ថា “ ផ្លូវ​ស្មុគស្មាញ” ​អំពី​ប្រទេស​​ជប៉ុន​កាល​ពី​ប៉ុន្មាន​ទសវត្សរ៍​មុន​ ​នៅ​ពេល​​ត្រូវ​បាន​បង្ហាញ​ដោយ​​អ្នក​ថត​រូប​ល្បី​ៗ​ក៏​ដូច​ជា​អ្នក​ថត​រូប​​ដែល​ទទួល​បាន​ជោគ​ជ័យ​​។ការ​តាំង​ពិព័រណ៍​នេះ​បាន​នាំ​ឲ្យ​អ្នក​ថត​រូប​ជន​ជាតិ​ជប៉ុន​ដាក់​ពាក្យ​មក​ប្រកួត​ប្រជែង​​ នៅ​ក្នុង​ពិធី​តាំង​ពិព័រណ៍​រូប​ភាព​អង្គរនេះផងដែរ។ របស់​ខ្លួន​ និង​អ្នក​ថត​រូប​ក្មេង​ៗ​ជាច្រើន​ទៀត​មក​ពី​តំបន់​បូពា៌។​អាច​និយាយ​ម្យា៉ង​ទៀត​ថា​​ ពិធី​តាំង​ពិព័រណ៍ និង​ការបញ្ចាំងស្លាយរបស់​អ្នក​ថត​រូបនេះ​​​​ គឺជា​មធ្យោបាយ​មួយ ​ដែល​អាច​​ធ្វើ​ឲ្យ​អ្នក​ថត​រូប​មាន​ក្ដី​សង្ឃឹម​ចំពោះ​អ្វី​​ដែល​ខ្លួន​​និងក្រុម​​ការ​ងារ​របស់​ខ្លួន​បានធ្វើ និង​ជា​ឱកាស​សម្រាប់​ពួកគេ​បង្ហាញពី​ស្នាដៃរបស់​ខ្លួន​។ នៅ​ពេល​ដែល​មាន​ការ​ដាក់​ពាក្យ​មក​ប្រកួត​ប្រជែង​ជា​ច្រើន​នៅ​ក្នុង​ឆ្នាំ​នេះ​ អ្នក​ថត​​រ​ូប​ទូទាំង​ពិភព​លោក​ ឥឡូវ​នេះ​មាន​ចិត្ត​​ចង់​ចូល​​រួម​ក្នុង​ពិធី​ពិព័រណ៍​រូប​ថត​អង្គរ​នេះ​យ៉ាង​ខ្លាំង​ និងដើម្បី​ភ្ជាប់បណ្ដាញ​ជាមួយ​អ្នក​ថត​រូប​ផ្សេង​ៗ​ទៀត​។ ក្នុង​ឆ្នាំ​នេះ​មាន​ការ​ដាក់​ពាក្យ​​ច្រើន​ហួស​ពី​ការ​​រំពឹង​ទុក​​មក​ពី​ប្រទេស​រុស្ស៊ី ប្រទេស​ហ្សកហ្ស៊ី រួម​ទាំង​រូប​ថត​ដ៏​អស្ចារ្យ​របស់​លោក​ មីសា ដូម៉ូហ្ស៊ីឡូវ (Misha Domozhilov)...

ដោះលែង​​​ជន​​​សង្ស័យ​​​ចំនួន​​​ប្រាំពីរ​​​នាក់ បន្ទាប់​​​ពី​​​ការ​​​ឆ្មក់​​​ចាប់​​​គ្រឿង​​​ញៀន​​​នៅ​​​ក្នុង​​​ភូមិ​​​គ្រឹះ​​​រ​​​បស់​​​អ្នក​​​ជំនួញ​​​ម្នាក់

នគរ​​​បាលបាន​​​ឲ្យ​​​ដឹង​​​កាល​​​ពី​​​ម្សិល​​​មិញ​​​ថា​អាជ្ញាធរ បាន​​​ដោះលែង​​​មនុស្ស​​​ប្រាំពីរ​​​នាក់​​​នៅ​​​ក្នុង​​​ការ​​​ឆ្មក់​​​ចាប់​​​គ្រឿង​​​ញៀន​​​​​​នៅ​​​ក្នុង​​​ភូមិ​​​គ្រឹះ​​​មួយ​​​នារាជធានី​​​ភ្នំពេញ ដែល​ជា​​​កម្មសិទិ្ធ​​​របស់​​​អ្នក​​​ជំនួញ​​​ម្នាក់ ដែល​​​មាន​​​​ខ្នង​ក្រាស់​ម្នាក់​កាល​​​ពី​​​ថ្ងៃ​​​អង្គារ។ លោកវរសេនីយ៍ទោ សឿង ណុល ប្រធាន​​​​អង្គ​ភា​ព​នៅ​​​​នាយក​​​ដ្ឋាន​​​នគរបាល​​​ប្រ​​​ឆាំង​​​គ្រឿង​​​ញៀន​​​ក្រសួង​​​មហាផ្ទៃ​​​​​​មាន​​​ប្រសាសន៍​ថា មនុស្ស​​​​​​ប្រាំ​​​នាក់​​​ក្នុង​​​ចំណោម​​​​​​មនុស្ស​​​១២​​​នាក់ ​ដែល​ត្រូវ​​​បាន​​​ចាប់​​​ខ្លួន​​​នៅ​​​ក្នុង​​​ភូមិគ្រឹះ​​​នេះ ​​​រួម​​​​ទាំង​ម្ចាស់​​​ភូមិ​​​គ្រឹះ គឺ​​​​ឧកញ៉ា ​តាន់ ​សេងហាក់ នោះបាន​​​សារ​​​ភាព​​​ថា ខ្លួន​បាន​ជាប់​​​ពាក់​​​ព័ន្ធ​​​​នឹង​ថ្នាំញៀនកូកាអុីន និង​មេតំ​ហ្វេ​តាមីន​​​ទឹក​​​កក ដែល​បាន​​​​រក​​​ឃើញ​​​នៅ​​​ក្នុង​​​ភូមិ​​​គ្រឹះ​​​នេះ​មែន។ នគរ​​​បាលបាន​​​ឃ្លាំ​​​មើល​​​ភូមិគ្រឹះ​​​ដ៏​​​ទំនើប​​​នេះ​​​នៅ​​​សង្កាត់​​​ភ្នំពេញ​​​ថ្មី ខណ្ឌ​​​សែនសុខ ​ដែល​​​​ជា​​​កម្មសិទិ្ធ​​​របស់​​​លោក ​សេងហាក់ ​អាយុ៥១​​​ឆ្នាំ អតីត​​​ទី​​​ប្រឹក្សា​​​​​​របស់​​​លោក ​ជា សុីម ប្រធាន​​​ព្រឹទ្ធសភា អស់​​​រយៈ​​​ពេល​​​ជា​​​ច្រើន​​​សប្ដាហ៍​​​មក​​​ហើយ ​​​មុន​​​ពេល​​​នគរបាល ​​​ឆ្មក់​ចូល​​​ក្នុង​​​ភូមិគ្រឹះ​​​នេះ ដោយបាន​​​បាញ់​​​ព្រមាន និងបាន​​​នាំ​​​ខ្លួន​​​​​​ម្ចាស់​​​ផ្ទះ និង​​​មនុស្ស​​​១១​​​នាក់​​​ផ្សេង​​​ទៀត។ លោកវរសេនីយ៍ទោ សឿង ណុល បាន​​​មាន​​​ប្រសាសន៍​​​ថា “ យើង​​​បាន​​​ដោះ​​​លែង​​​លោក​​​ស្រី ឡុង សុធារី អាយុ​​​៥២​​​ឆ្នាំ ​ជាភរិយា​​​របស់​​​លោក​​​ឧកញ៉ា​ តាន់ សេងហាក់ កាល​​​ពី​​​ថ្ងៃ​​​ពុធ ហើយ​​​កាល​​​ពី​​​ម្សិល​​​មិញ ​​​យើង​​​បាន​​​ដោះលែង មនុស្ស​​​ប្រាំមួយ​​​នាក់​​​ផ្សេង​​​ទៀត ​បន្ទាប់​​​ពី​​​យើង​​​ បាន​​​រក​​​ឃើញ​​​ថា ពួក​​​គេ​​​មិន​​​មាន​​​ជាប់​​​ពាក់ព័ន្ធ​​​ជា​​​មួយ​​​នឹង​​​ការ​​​ចាប់​គ្រឿង​​​ញៀន​​​នេះ​​​ទេ”។ លោកវរសេនីយ៍ទោ សឿង ណុល បាន​​​មាន​​​ប្រសាសន៍បន្ថែម​ថា ជន​ជាតិ​​​​ចិន​​​បី​​​នាក់ ដែល​​​បាន​​​អះអាង​​​ថា ពួក​​​គេស្ថិត​​​នៅ​​​​ភូមិគ្រឹះ​​​របស់​​​លោក​ សេង​ហាក់ ​គ្រាន់​​​តែ​​​ណែ​​​នាំ​​​បង្ហាញ​​​ពី​​​ការ​​​ងារ​​​បច្ចេកទេស​​​ប៉ុណ្ណោះ​​​ស្ថិត​​​នៅ​​​ក្នុង​​​ចំណោម​​​​មនុស្ស ដែល​​​ត្រូវ​​​​​​បាន​​​ដោះ​​​លែង​​​កាល​​​ពី​​​ម្សិល​​​មិញ។នគរ​​​បាលបាន​​​និយាយ​​​កាល​​​ពី​​​ថ្ងៃ​​​ពុធ​​​ថា មន្ត្រី​​​ពី​​​ស្ថានទូត​​​ចិន​​​នៅ​​​រាជធានី​​​ភ្នំពេញ បាន​​​ទៅ​​​​ជួប​​ជន​​​ជាតិ​​​ចិន​​​ទាំង​​​បី​​​នាក់​​​​​​នេះ​​​នៅ​​​ក្នុង​​​មន្ទីរ​​​​​​ឃុំឃាំង។ នគបាលបាន​​​និយាយ​​​បន្ថែម​​​​​​ទៀតថា ជន​​​សង្ស័យ​ប្រាំនាក់ ដែល​​​នៅ​​​សល់ រួមមាន​​​ស្ត្រី​​​ពីរ​​​នាក់ ​លោក សេង​​​ហាក់ និង​​​កូន​​​ប្រុស​​​អាយុ​២២​ឆ្នាំ​របស់គាត់​​​​ឈ្មោះ​​ តាន់ ភារម្យ ​បាន​​​សារភាព​​​ថា​ បាន​​​ជាប់​​​ពាក់ព័ន្ធ​​​ ហើយ​​​ត្រូវ​​​​បាន​​​បញ្ជូន​​​ទៅ​​​តុលាការ​​​នៅ​​​ថ្ងៃ​​​នេះ​​​ដើម្បី​​​ប្រឈម​​​មុខ​​​​​​នឹង​​​ការ​​​ចោទ​​​ប្រកាន់​​​ពី​​​បទ​​​ប្រើ​​​ប្រាស់​​​គ្រឿង​​​ញៀន ការ​​​ចែក​ចាយ​ និង​​​ការ​​ជួញ​ដូរ​គ្រឿង​ញៀន។ លោកវរសេនីយ៍ទោ សឿង ណុល បាន​​​មាន​​​ប្រសាសន៍​​​ថា “ ពួក​​​គេ​​​ទាំង​​​អស់គ្នាបាន​​​សារភាព​រួច​ហើយ​”។ ​​ក្នុង​កញ្ចប់​គ្រឿង​​​ញៀន ដែល​​​រឹប​​​អូស​​​បាន​​​​​​នៅ​​​ក្នុង​​​ការ​​​ឆ្មក់​​​ចាប់​​​នេះ នគរបាល​​​ប្រ​​​ឆាំង​​​គ្រឿង​​​ញៀន បាន​​​​​​បញ្ជាក់​​​ថា ​មាន​ថ្នាំ​​​ញៀន ​កូកាអុីន​​​ទម្ងន់​​​ប្រ​​​ហែល​​​១១៦​​​ក្រាម​​​និង​​​មេតំហ្វេ​តាមីន ទឹក​​​កក​​​ទម្ងន់​​​១៨៩ក្រាម។​ផ្សៅ​​​​​ពណ៌ស ដែល​​​គេ​​​មិន​​​ស្គាល់​​​ឈ្មោះ ទម្ងន់​​​ជាង​​​៩០០​​​ក្រាម​​​ក៏​​​ត្រូវ​​​បាន​​​រក​​​ឃើញ​​​ផង​​​ដែរ នៅ​​​ក្នុង​​​ការ​​​ឆ្មក់​​​ចាប់​​​​​​គ្រឿង​​​ញៀន​​​នេះ ​ព្រម​​​ទាំង​សម្ភារ​សម្រាប់​ប្រើ​ប្រាស់​​​​ថ្នាំ​​​ញៀន​​​​​​និង​​​អាវុធ​​​​ផង​ដែរ៕      ប្រែសម្រួលដោយ ស៊ុំ សុខភុំ

ប្រទេស​កម្ពុជា​ ជា​ប្រទេស​មួយ​ក្នុង​ចំណោមប្រទេ​ស​ផ្សេង​ទៀត ​កំពុង​ផ្គត់​ផ្គង់​ឈើ​ទៅ​ឲ្យ​ចិន

យោង​តា​ម​​របាយ​ការណ៍មួ​យ​​ចេញ​កា​ល​ពី​ម្សិល​មិញ​បាន​ឲ្យ​ដឹងថា ​ទីផ្សារ​ឈើ​ដែ​ល​កំ​ពុង​​តែ​កើន​ឡើង​​នៅ​ក្នុង​ប្រទេ​ស​ចិន​ កំ​ពុងនាំ​​ឲ្យ​មា​ន​កា​រ​​កាប់​ឈើខុស​ច្បាប់​កាន់​តែរី​ក​រា​ល​ដាល​នៅ​ទូ​ទាំង​ពិ​ភពលោក​រាប់​​ទាំ​ង​ប្រទេ​ស​​កម្ពុជា​ផ​ង​​ដែរ។ ​របាយ​ការណ៍​ពី​ទី​ភ្នាក់​ងារ​​ស៊ើប​អង្កេត​​បរិ​ស្ថាន​ ដែល​ជា​​អ​ង​្គ​កា​រ​ក្រៅ​​រដ្ឋាភិ​បា​ល​មា​ន​មូ​ល​ដ្ឋាន​​នៅក្នុ​ង​​ទី​ក្រុង​ឡុងដ៍​(EIA)មាន​​ចំ​ណង​ជើង​ថា “ មេរោគសម្រាប់​កា​រ​​​បំ​ផ្លាញ​ព្រៃ​ឈើ​ពាណិជ្ជកម្ម​​ឈើខុស​​ច្បាប់​​របស់​ប្រទេ​ស​ចិន​” បា​នបង្ហាញពី​តម្រូវ​កា​រ​​​កាន់​តែ​កើន​ឡើង​នូវ​ឈើ​គ្រប់​ប្រភេទ​​ទាំ​ង​អស់នៅ​ក្នុង​ប្រទេ​ស​​ចិន​​បា​ន​បំ​ផ្លាញកា​រ​អភិវឌ្ឍនៅ​បណ្តារដ្ឋអា​ហ្វ្រិក ប្រទេ​ស​​ជិត​ខាង​​​របស់​ចិន​ ប្រទេ​ស​កម្ពុជានិង​ទី​កន្លែង​​ផ្សេង​ទៀត។ របាយ​កា​រណ៍នេះ​លើក​ឡើង​ថាចាប់​តាំ​ង​ពី​ចុងទសវត្សរ៍១៩៩០​មក​ ប្រទេស​ចិន​​បា​ន​ផ្តួច​ផ្តើម​នយោបា​យ​កំ​ណត់​កា​រ​កាប់​​ឈើ​ក្នុ​ង​ស្រុក​ ​ដែល​នាំ​ឲ្យ​មា​ន​កំ​ណើ​ន​​ព្រៃ​ឈើ​នៅ​ចិន​ដីគោក​។ទោះ​ជា​យ៉ាង​​ណា ​របា​យ​ការណ៍​នេះ​បា​ន​ឲ្យ​ដឹង​ថា “ គម្លាត​​រវា​ង​កា​រ​ផ្គត់​ផ្គង់​ឈើ​ក្នុង​ស្រុក​​ និង​​ចំនួន​ឈើ​ដែល​ប្រើ​​​ដោ​យ​ឧស្សា​ហកម្ម​នេះ​ ​បា​ន​​​ធ្វើ​ឲ្យ​ប្រទេ​ស​​ចិន​​នាំ​ឈើ​​​កែ​​ច្នៃ​រួច​ទៅ​​ប្រទេ​ស​ដើម​វិញ​នៅ​ទូ​ទាំង​​ពិភព​លោក”។ របាយការណ៍​នេះផ្តោតលើ​ពាណិជ្ជ​កម្ម​​ឈើ​ខុស​ច្បាប់​គ្រប់​ប្រភេទ​ទាំ​ង​​អស់​របស់​ចិន​ ​ដែ​ល​មា​ន​ទឹក​ប្រាក់​៣,៧​ពាន់​លានដុល្លារ​ក្នុងមួ​យ​ឆ្នាំ​ ប៉ុន្តែពាណិជ្ជកម្ម​ឈើ​ប្រណីត​ ​ភាគ​ច្រើនជា​ប្រភេទ​ឈើ​គ្រញូង​​ដែល​កម្រ បា​ន​កើនឡើង​នៅ​​កម្ពុជា​ក្នុង​ប៉ុន្មាន​ឆ្នាំ​នេះ។ ​របាយ​ការណ៍​នេះ​​បា​នឲ្យ​ដឹង​ថា “ ដោយ​​សារ​តម្រូវ​កា​រ​ក្នុង​ស្រុក​កើន​ឡើង​សម្រាប់​​ឈើគ្រញូង​នៅ​ក្នុង​ប្រទេស​ចិន​​ បា​ន​នាំ​ឲ្យ​មា​ន​កា​រ​​កាប់ប្រភេទ​​ឈើ​ដ៏​កម្រ​​​នេះ​ដោយ​​ខុស​ច្បាប់​​នៅ​ទូ​ទាំ​ង​ពិ​ភព​លោក​”។ ទី​ភ្នាក់​ងារ​​ស៊ើប​អង្កេត​​បរិ​ស្ថាន ដែល​ធ្វើ​កា​រ​​ស៊ើប​អង្កេត​ជា​​សម្ងាត់​ដើម្បី​ប្រមូល​ព័ត៌មា​ន​​​របស់​ខ្លួន​មិន​ធ្វើ​កា​រ​​នៅ​ក្នុង​ប្រទេ​ស​កម្ពុជា​​​ដោយ​ខ្លួន​ឯង​ទេ​ ប៉ុន្តែ​កា​រ​ស្រាវ​ជ្រាវ​​របស់​ទីភ្នាក់​ងារ​​នេះ​ មា​ន​នៅ​ក្នុង​​ទិន្នន័យ​​ផ្លូវ​​កា​រ​​​របស់​គយ​ចិន​ ដែល​ទទួល​បា​ន​កា​ល​ពី​ខែ​​មុន។ទិន្នន័យ​នេះបង្ហាញថា បើទោះ​​ជាកម្ពុជា​ហា​ម​មិន​ឲ្យ​មា​ន​សម្បទាន​កាប់​ឈើ​​ ហា​ម​ប្រាម​កា​រ​កាប់​ឈើ​ដ៏​កម្រ​ និង​កា​រ​នាំ​​ចេញ​ឈើក៏​ដោយ ក៏​ឈើ​ប្រណីត​ជាង​៣៦.០០០​ម៉ែត្រ​គូប​​រាប់​ទាំ​ង​ឈើ​គ្រញូង​​ផង​ដែរត្រូ​វ​បា​ន​​ចិន​នាំ​​ចូ​ល​ពី​ប្រទេ​ស​កម្ពុជា​នៅ​ចន្លោះ​​ឆ្នាំ​​២០០៧និង​ខែ​សី​ហា ​ឆ្នាំ​​២០១២ដែរ។ ​យោង​តា​ម​ទិ​ន្នន័យ​គយ​ចិនបា​ន​ឲ្យ​ដឹង​ថាឈើ​ប្រណីត​​ពី​ប្រទេ​ស​កម្ពុជា​ ត្រូ​វ​បាន​នាំទៅ​ទី​កន្លែង​ជា​ច្រើន​​​នៅក្នុង​ប្រទេ​ស​​ចិន​ រួម​មា​ន​ខេត្ត​ក្វាង​ទុងសៀង​ហៃនិង​ ហ្វាង​ចេង​កាង​ ​នៅ​​ជិត​​ព្រំ​​ដែន​ចិន​វៀត​ណាម។ ជន​កម្ពុជារាប់​សិ​ប​នាក់ត្រូវ​បា​ន​សម្លាប់​ក្នុង​រយៈ​ពេល​​ប៉ុន្មាន​​ឆ្នាំ​នេះ​ ​ពេល​​ប៉ុន​ប៉ង​កាប់​ឈើ​គ្រញូង​​ខុស​ច្បាប់​នៅ​ក្នុង​ទឹក​ដី​ថៃ។ ​របាយ​ការណ៍​របស់​ទី​ភ្នាក់​ងារ​​ស៊ើប​អង្កេត​​​បរិ​ស្ថាន​ឲ្យ​​ដឹង​ថា “ នៅ​ក្នុ​ង​ប្រទេស​ចិន​ មជ្ឈ​មណ្ឌល​សំ​ខាន់សម្រាប់​ផលិត​គ្រឿង​សង្ហារិម​ធ្វើ​ពី​ឈើ​គ្រញូង​ គឺ​​នៅ​​ហ្សុ៊ង​សាន ក្នុងខេត្ត​ក្វាង​ទុង​ ស្មើ​នឹង​៦០​ភាគ​រយ​នៃ​ផលិត​កម្មក្នុង​ប្រទេ​ស​នេះ​”។ទី​ភ្នាក់​ងារ​នេះ​ក៏ចាត់ទុក​សៀង​ហៃ​និងហ្វាងចេង​ហ្គាងជា​មជ្ឈ​មណ្ឌល​កែ​ច្នៃឈើ​គ្រញូ​ងផងដែរ។ ​របាយ​ការណ៍​នេះ​បង្ហាញ​ថាទិន្នន័យ​​គយ​ប្រហែលជាវាយ​តម្លៃ​​មិន​បាន​ពេញ​លេញ​​នូវ​​ចំ​នួន​ឈើ​គ្រញូ​ង​ពិត​ប្រាកដ ​ដែល​នាំ​ចេញ​ពី​ប្រទេ​ស​​កម្ពុជា​ ទៅ​កាន់​ប្រទេ​ស​​ចិនព្រោះ​ឈើ​ដែល​រត់​ពន្ធ​តា​ម​ប្រទេស​វៀត​ណាម​ប្រហែលជាមិន​ត្រូ​វ​បា​ន​រាប់បញ្ចូល​ឡើយ។​ប្រទេ​ស​វៀត​ណាម​បា​ន​នាំ​ចេញ​ឈើគ្រញូង​​១២៣.000ម៉ែត្រ​គូប​​ទៅ​ប្រទេស​ចិន​ក្នុង​ឆ្នាំ​២០១១ ​​ដែល​ខ្លះ​កាប់​ខុស​ច្បាប់​ក្នុងព្រៃរបស់​ប្រទេ​ស​វៀត​ណាម​។របាយ​ការណ៍​នេះ​បន្ត​ថា“ ទោះជា​យ៉ាង​ណា​ កា​រ​​នាំ​​ចេញ​ឈើ​គ្រញូង​ភាគច្រើន​​​របស់​ប្រទេ​ស​វៀត​ណាម ​មា​ន​ប្រភព​​នៅ​ក្នុង​ប្រទេ​ស​ឡាវ ប្រទេ​ស​ថៃនិង​ប្រទេ​ស​កម្ពុជា​។ ទី​ភ្នាក់​ងារ​​ស៊ើប​អង្កេត​​បរិ​ស្ថាន​ប៉ាន់​ប្រមាណ​​​ពី​ប្រទេ​ស​ទាំ​ង​អស់​ថា ​ចិន​បា​ន​នាំ​ចូ​ល​ឈើ​គ្រញូង​៥៦៥.០០០​ម៉ែត្រគូប​ក្នុង​ឆ្នាំ​​២០១១ ដោ​យ​​ជិត​​ពាក់​កណ្តាល​នាំ​​ចេញ​ពី​​មហា​តំ​បន់​​​ទន្លេមេគង្គ​។ របា​យ​ការណ៍​នេះ​ឲ្យ​ដឹង​​ថា “ ពាណិជ្ជករចិន​រីក​ចម្រើន​តា​ម​រយៈ​បទ​ល្មើស ​អំពើ​ពុករលួយការ​ទិញ​​អំណាច​​នយោបាយនិង​អភិបា​លកិច្ច​​ព្រៃ​ឈើ​មិន​បាន​ល្អ​ក្នុង​ប្រទេ​ស​អ្នក​​ផលិត​”។ទី​ភ្នាក់​ងារ​នេះ​អំ​ពាវ​នាវ​ឲ្យ​រដ្ឋា​ភិ​បាល​ចិន​​ចាត់​​វិធាន​ការ​។ យោងតាម​​របាយ​ការណ៍នេះ​បា​នឲ្យដឹង​ថា ​កា​រ​ឆ្លើយ​តប​​ដ៏​សំខាន់​របស់​ចិន​​ទៅនឹង​​ពាណិជ្ជ​កម្ម​​ខុស​ច្បាប់​​មក​ទល់​ពេល​នេះ​គឺ​ការ​​​ចុះ​​ហត្ថលេខា​លើ​​កិច្ច​ព្រម​ព្រៀង​ទ្វេ​ភាគី​ជាមួ​យ​ប្រទេស​​ផលិត​ឈើ​ ដូចជា​ប្រទេ​ស​ឥណ្ឌូណេស៊ី​ដើម្បី​អនុវត្ត​ច្បាប់​​​ឲ្យ​បាន​ជោគ​ជ័យ​។ ប្រទេ​ស​កម្ពុជា​គ្មាន​​កិច្ច​ព្រម​ព្រៀង​​​ស្រដៀង​គ្នា​នេះ​​ជាមួ​យ​ចិន​ឡើយ​៕ ប្រែសម្រួល​ដោ​យចេវប៊ុននី​​​​​​​​​​ ​​​

ឯកសារ​ផ្តល់​សេចក្តី​លម្អិត​​អំ​ពី​​តម្លៃ​ថាមពលអគ្គិសនី​ពី​ទំ​នប់​វារីអគិ្គសនីសេសានក្រោម២

យោង​តា​​ម​ឯក​សារ​​ពី​ក្រសួ​ង​​ឧស្សាហកម្មរ៉ែនិង​​ថា​ម​ពលបា​ន​ឲ្យ​ដឹងថា ​អគ្គ​ិ​សនី​​​ដែល​​ផលិត​​ឡើង​​ដោ​យ​​ទំ​នប់​​វារីអគ្គិសនី​សេសាន​ក្រោម​២ នៅ​ក្នុ​ង​ខេ​ត្ត​ស្ទឹង​ត្រែង​ នឹង​ត្រូ​វ​លក់​ឲ្យ​ក្រុ​ម​ហ៊ុន​អគិ្គសនី​កម្ពុជា​(EDC)​ក្នុង​តម្លៃ​៦,៩៥សេន​ក្នុង​មួ​យ​គីឡូវ៉ាត់​ម៉ោង​។ ​ឯក​សារ​ដែលចុះថ្ងៃទី៣១ខែតុលា​​ឲ្យ​ដឹង​ថា​ “​ គម្រោង​​សម្រាប់​ទំ​នប់​វារី​អគ្គិសនី​សេសានក្រោម​២​ដែល​មា​ន​កម្លាំង​​៤០០​មេហ្គាវ៉ាត់​ អា​ច​ផលិត​អគ្គិសនី​១,៩១ពាន់​លាន​គីឡូវ៉ាត់​ម៉ោង​​ក្នុង​មួយ​ឆ្នាំ​”។ ឯក​សារ​នេះ​​បន្ថែម​ថា “ ថាម​ពល​អគ្គិសនី​១០០ភាគ​រយពី​ទំ​នប់​វារី​អគ្គិសនី​សេសានក្រោម២ ត្រូវ​តែ​លក់​​ឲ្យ​ក្រុម​​ហ៊ុន​អគ្គិសនី​កម្ពុជា​”។ ​ឯក​សារ​នេះ​ក៏​បា​ន​បង្ហាញ​ដែរ​ថា ​ថាម​ពល​អគ្គិសនី​​​ដែល​​ផលិត​​​លើស​​​ពី​១,៩១ពាន់​លាន​គីឡូវ៉ាត់​ម៉ោង​ នឹ​ង​​ត្រូ​វ​លក់​បញ្ចុះតម្លៃ​​៦០​ភាគ​រយ​។ ទោះ​ជា​​យ៉ាង​ណា ​ឯក​សារ​នេះ​មិន​​បាន​បញ្ជាក់​ថា ​តើថាមពល​អគ្គិសនី​នេះ​នឹង​មាន​​តម្លៃ​​ប៉ុន្មាន​សម្រាប់​អ្នក​ប្រើ​ប្រាស់​ទេ​។ ឯកសារ​នោះ​​ឲ្យ​ដឹង​ផង​ដែរ​ថា ​បច្ចុប្បន្ន​នេះ ប្រទេ​ស​កម្ពុជា​​​​ផលិត​​ថាម​ពល​អគ្គិសនី​បា​ន​​១,០២ពា​ន់​លាន​​គី​ឡូវ៉ាត់​ម៉ោង​ក្នុង​មួយ​ឆ្នាំ ប៉ុន្តែ​មា​ន​ថាម​ពល​អគ្គិសនី​១,៧៧ពាន់​លាន​មួយ​គីឡូវ៉ាត់​ម៉ោង​ថែម​ទៀត​ ដែល​នាំ​ចូ​ល​​​រាល់​ឆ្នាំ​​ពី​ប្រទេ​ស​​ថៃ និង​ប្រទេ​ស​​វៀត​ណាម។ ឯក​សារ​​​របស​់​ក្រសួ​ង​​ឧស្សា​ហ​កម្មរ៉ែនិង​ថា​ម​ពល ក៏​បង្ហាញ​ដែរ​ថា បណ្តាក្រុ​ម​ហ៊ុន​ដែលពាក់​ព័ន្ធ​ក្នុង​គម្រោង​នេះ គឺក្រុ​ម​ហ៊ុនកម្ពុជា Royal Group និង​ក្រុម​ហ៊ុនថាម​ពល​អន្តរជាតិ​ Hydrolancang ​​របស់​ចិននឹង​ព្យាយាមជួល​​បុគ្គលិក​​ក្នុង​ស្រុក​​តាម​តែ​អាច​ធ្វើ​ទៅ​បាន​។ ឯក​សារ​នេះ​បញ្ជាក់​ថា ​អំឡុង​រយៈ​ពេល​៤០​ឆ្នាំ​ ក្រុមហ៊ុននេះ​នឹង​ប្រតិ​បត្តិកា​រ​ទំ​នប់​វារី​អគ្គិសនី​​នេះ​ដោយ​ខ្លួន​ឯង​ និង​ទទួលបា​ន​កា​រ​​កាត់​បន្ថយ​អត្រាពន្ធ​លើ​ប្រាក់​ចំ​ណេញ​ទំា​ង​អស់​ អំឡុង​ពេលប្រតិ​បត្តិ​កា​រ​​រយៈ​ពេល​ប្រាំ​បួន​ឆ្នាំ​ដំ​បូង​របស់​ខ្លួន​។ ​បន្ទាប់​ពី​នោះ​នឹង​ត្រូវ​បង់​ពន្ធ២០ភាគ​រយ​។ ​ឯកសារនេះ​ឲ្យ​ដឹង​ទៀត​ថា “នៅ​ពេល​ក្រុម​ហុ៊ន​​កំពុង​ធ្វើ​អា​ជីវ​កម្ម​ ខ្លួនបាន​យល់​​ព្រម​ផ្តល់ជា​អំ​ណោយ​ជា​ទឹក​ប្រាក់​ចំ​នួន​៥០០.០០០ដុល្លារ​ក្នុង​មួ​យ​ឆ្នាំ​​សម្រាប់រយៈ​ពេល​​៤០​ឆ្នាំ​ដល់​ក្រុម​ហ៊ុន​អគ្គិសនី​កម្ពុជា ​​សម្រាប់​កា​របំ​ពាក់​បំ​ប៉ន​ធន​ធាន​មនុស្ស​ និង​កា​រកសាង​សមត្ថ​​ភាព​​សម្រាប់​​បុគ្គលិក​នៅ​ក្រុម​ហ៊ុន​អគ្គិសនី​កម្ពុជា”។ លោកស្រីអា​មេត្រាន់ដិម (Ame Trandem) ប្រធា​ន​កម្មវិធី​សម្រាប់​អង្គការ​ទន្លេ​អន្តរជាតិ​ ជា​អង្គការ​ក្រៅ​រដ្ឋាភិបាល​តា​ម​មើល​បរិស្ថាន​ ​នៅ​អា​ស៊ី​អាគ្នេយ៍ បា​ន​មា​ន​ប្រ​សាសន៍​ថាផល​ប៉ះ​​ពាល់​​របស់​ទំ​នប់​វារី​អគ្គិសនី​នេះ​លើកា​រ​នេសាទនិង​កសិកម្មក្នុង​អា​ង​ទន្លេមេគង្គ សំ​ខាន់​ជាង​ផល​ប្រយោជន៍​ហិរញ្ញវត្ថុរបស់​ខ្លួន​។ លោកស្រី​បា​ន​លើកឡើង​​ក្នុង​អុីម៉េល​មួយ​​ថា “ ​ផល​ប៉ះ​ពាល់​​​ពីកា​រ​កាប់​បំផ្លាញ​ព្រៃ​របស់​ទំ​នប់នេះ​ចំ​ពោះ​ធន​ធានជលផល​តែ​មួយត្រូ​វ​បា​ន​គេរំពឹង​ថា ​នឹង​ត្រូ​វ​ចំ​ណាយ​ទឹក​ប្រាក់​​ប្រហែល​​៨០០​លាន​ដុល្លារ​​ក្នុង​មួ​យ​ឆ្នាំ​។ ជា​សរុប ទំ​នប់​នេះ​ គឺ​ជា​​​អា​ជីវ​កម្ម​មិន​ល្អ​”៕ ប្រែសម្រួល​ដោយចេវប៊ុននី​​​​​​​​​

តំណាង​រាស្ត្រ​មក​ពី​គណ​បក្ស​ប្រជាជន​សូម​ទោសចំពោះ​ការ​​ប្រើពាក្យ​មាក់​ងាយ​​ជន​ជាតិ​ភាគតិច​ព្នង

លោក ឈាង​ វុន តំណាង​រាស្ត្រ​មក​ពី​គណ​បក្ស​ប្រជាជន​កាល​ពី​ម្សិល​មិញ​បាន​មាន​ប្រសាសន៍​ថា លោក​នឹងសូម​ទោស​ចំពោះ​ការដែល​លោក​បាន​​ប្រើ​ប្រាស់​ឈ្មោះ​ជន​ជាតិ​ភាគ​តិច​ ដើម្បី​ប្រមាថ​អ្នក​នយោ​បាយ​ម្នាក់​នៅ​ក្នុង​រដ្ឋ​សភា ប៉ុន្ដែ​ លោក​នៅ​តែ​អះ​អាង​ថា លោក​មិន​ដែល​មាន​បំណង​មាក់​ងាយ​ជនជាតិ​ព្នង​ទេ។​ ​​​​​​លោកឈាង​ វុនបាន​ប្រើ​ប្រាស់​ពាក្យ​ព្នង​ដែល​ជា​ឈ្មោះ​ជន​ជាតិ​ភាគតិច​នៅ​ភូមិ​ភាគ​ឦសាននៃ​ប្រទេស​កម្ពុជា​ដើម្បី​ជេរ​លោកកឹមសុខាប្រធាន​គណបក្ស​សិទ្ធិ​មនុស្ស​ថាជា​ជន​គ្មាន​អរិយ​ធម៌​អំឡុង​កិច្ច​ប្រជុំ​ក្នុង​រដ្ឋ​សភា​ កាល​ពី​ដើម​ខែ​នេះ។​បន្ទាប់​ពី​ហេតុការ​ណ៍​​នោះ​មក​ សមាគម​យុ​វជន​ជន​ជាតិ​ដើម​ភាគ​តិច​កម្ពុជា​បាន​សរសេរ​លិខិត​ជូន​លោកហេង​ សំរិន ប្រធាន​​រដ្ឋ​សភា​​ដោយ​ទាម​ទារ​ឲ្យ​​លោកឈាងវុនសូម​ទោស​ជា​សាធា​រណៈ​ចំពោះ​ការ​ដែល​លោក​បាន​មាក់​ងាយ​ជន​ជាតិ​ព្នង។​ លោកឈាងវុន​ ដែល​កាល​ពី​ដំបូង​មាន​​ប្រតិ​កម្ម​ជំទាស់​ថា មិន​ដែល​មាន​ជន​ជាតិ​ព្នង​នោះ កាល​ពី​ម្សិល​មិញ​​មាន​ប្រសាសន៍​ថា លោក​នឹង​ធ្វើ​ការ​សូម​ទោស​នៅ​ក្នុង​កិច្ច​ប្រជុំ​លើក​ក្រោយ​នៅ​ឯ​រដ្ឋ​សភា​ ប៉ុន្ដែ មិន​ទាន់​ដឹង​ថាពេល​ណា​នៅ​ឡើយ​ទេ។ លោក​បាន​បន្ដ​ថា “ ខ្ញុំ​នឹង​សូម​ទោស​ជា​សាធារណៈ​ក្នុង​កិច្ច​ប្រជុំ​លើក​ក្រោយ​នៅ​រដ្ឋ​សភា។ ខ្ញុំ​សោក​ស្ដាយ​ខ្លាំង​ណាស់​ ហើយ​ខ្ញុំ​ចង់​ធ្វើការ​លុប​លាង​នូវ​ពាក្យ​សម្ដី​​ដែល​បាន​ធ្វើ​ឲ្យ​ប៉ះ​ពាល់​ដល់​អា​រម្មណ៍​របស់​ពួក​គេ”។ លោកឈាងវុនបាន​មាន​ប្រសាសន៍​ថាលោក​បាន​ប្ដូរ​ចិត្ត​វិញបន្ទាប់​ពី​លោក​បាន​អាន​អត្ថ​បទ​អំពី​ជន​ជាតិ​ព្នង​ ហើយ​លោក​បានដឹង​ថា ជនជាតិ​ភាគ​តិច​នេះ​ត្រូវ​បានបញ្ចូល​នៅ​ក្នុង​​ច្បាប់​រដ្ឋ​​ជាផ្លូវ​ការ​តាំង​ពី​ទសវត្សរ៍​ឆ្នាំ១៩៦០​មក​ម៉្លេះហើយ​ក៏​ត្រូវ​បាន​ក្រសួង​មហា​ផ្ទៃ​ទទួល​ស្គាល់​ថា ជា​ជនជាតិ​ភាគតិច​​​ពិត​ប្រាកដ​មែន​​។ ​​​​លោកស្រី ​យុនម៉ាណេ ​ប្រធាន​សមាគម​យុវជន​ជនជាតិ​ដើម​ភាគតិច​កម្ពុជា បានមាន​ប្រសាសន៍​ថា លោក​ស្រី​ស្វាគមន៍​ចំពោះ​ការ​ដែល​ថា លោក ឈាង វុន នឹង​ធ្វើ​ការ​សូម​ទោស​ក្នុង​រដ្ឋ​សភា​ នា​ពេល​ខាង​មុខ​នេះប៉៉ុន្ដែ​លោក​ស្រី​រំពឹង​ថា លោក​តំណាង​រាស្ត្រ​​រូប​នេះ​​នឹង​អាច​ធ្វើ​លើស​ពីនេះ​ទៀត។​ លោក​ស្រីបាន​មានប្រសាសន៍ថា “ យើង​ក៏​ចង់​ឲ្យ​លោក ឈាង វុន សូម​ទោស​តាម​ទំនៀម​ទម្លាប់​ប្រពៃណី​របស់​យើង​ផង​ដែរ។នៅ​ពេល​នរណាម្នាក់​ធ្វើ​អ្វី​មួយ​ខុស​ក្នុង​ចំណោមជនជាតិ​ព្នង​ គេ​ត្រូវ​តែ​សូម​ទោស​ដោយ ​​ សត្វ​ពាហនៈ​ដល់​ដូន​តា​ព្នង​របស់ពួកយើង”។លោក​ស្រី​បន្ដថា ជា​ធម្មតា​គេសែន​សត្វ​គោ​ថ្វាយ​ដូ​នតា​របស់​យើង​។​ លោកឈាងវុនបាន​បដិសេធ​មិននិយាយ​ថា​ តើ​លោក​នឹង​ធ្វើ​បែប​នោះ​ដែរ​ឬអត់​នោះទេ។ ទោះ​យ៉ាង​ណា  លោកតំណាង​រាស្ត្រ​នៅ​​តែ​លើកឡើង​ថា លោក​នៅ​តែ​មិន​សប្បាយ​​ចិត្ត​ជាមួ​យលោក​ កឹមសុខាប្រធាន​គណបក្ស​សិទ្ធិ​មនុស្ស ហើយ​ថា មេដឹក​នាំ​គណបក្ស​ប្រឆាំង​​រូប​នេះ​គួរ​តែត្រូវ​​ផ្ដន្ទាទោស​ ព្រោះ​លោក​បាន​ធ្វើ​ឲ្យ​ខូចដំណើរ​ការ​ច្បាប់​រដ្ឋ​សភា​។​ ជម្លោះ​នោះ​បាន​ចាប់​ផ្ដើមឡើង​​ពេល​​លោកកឹមសុខាឆ្លៀត​ឱកាស​នៃ​កិច្ច​ប្រជុំ​រដ្ឋ​សភា​កាល​ពី​ថ្ងៃ​ទី១៤​ ខែ​វិច្ឆិកា ដែល​ត្រូវ​ផ្ដោត​លើ​អនុសញ្ញា​អន្ដរជាតិ​ស្ដី​ពី​សុវត្ថិ​ភាព​និងការ​មិន​រីក​សាយ​នៃ​អាវុធ​នុយ​ក្លេ​អ៊ែរដើម្បី​និយាយ​អំពីសិទ្ធ​ិ​មនុស្ស​នៅ​ក្នុង​ប្រទេស​កម្ពុជា។ ពេល​ដែល​លោក កឹម សុខា បាន​បញ្ចប់​ លោក ឈាង វុន ក៏​បាន​ក្រោក​ឈរ​និយាយ​ទាំង​កំហឹង​ចំពោះ​​លោក​ កឹម សុខាតែ​ម្ដង​​ ដោយ​ចាត់​ទុក​​លោក កឹម​ សុខា ថា​ជា​ពួក​ព្នង ដែល​ក្នុង​ភាសា​ខ្មែរ​មាន​ន័យ​ផ្សេង​ទៀត​ថា ជា​ពួក​ដើរ​ថយ​ក្រោយ​ ឬពួក​គ្មាន​អរិយ​ធម៌។ ដោយ​ខឹង​នឹង​ពាក្យ​មាក់​ងាយ​នេះលោក​ កឹម សុខា បាន​ដាល់​តុ និងបាន​​នាំ​តំណាង​រាស្ត្រ​​គណបក្ស​ប្រឆាំង​២០​នាក់​ទៀត​ដើរ​ចេញ​ពី​កិច្ច​ពិភាក្សា​​របស់​រដ្ឋ​សភា​។ លោក ឈាង វុន បាន​មាន​ប្រសាសន៍ថា “ខ្ញុំ​ខឹង​នឹង​លោកកឹមសុខានិង​តំណាង​រាស្ត្រ​គណបក្ស​ប្រឆាំង​ដទៃ​ទៀត​ ដែល​បាន​ដាល់​តុ និង​ស្រែក​ខ្លាំង​ៗ​ ពេល​ខ្ញុំ​កំពុង​ថ្លែង​សុន្ទរកថា​។ ពួកគេ​គួរក្រោក​ឈរ​និយាយ​ដូច​ជា​ខ្ញុំ​អ៊ី​ចឹង មិន​គួរ​ធ្វើ​ដូច​ជា​ពួក​គ្មាន​​វប្បធម៌​បែប​នោះ​ទេ ហើយ​ក៏​មិន​គួរ​​បំពាន​បទ​បញ្ជា​​ដែរ”៕    ប្រែ​សម្រួល​ដោយហមសុផាណ្ណា​​​​​​​​​​​​​​​

​ប្រ​ជា​ពល​រដ្ឋ​​ជន​ជាតិ​ភាគ​តិច​​ចង់​បាន​​​​ប័ណ្ណ​កម្មសិទ្ធិ​ដី​ឯក​ជន​ ជាង​​ប័ណ្ណ​កម្ម​សិទ្ធិ​ដី​សហគមន៍​

ទោះ​បី​​ជា​​ពួក​គាត់​មាន​ក្តី​សង្ឃឹម​ជា​ច្រើន​ឆ្នាំ​មក​ហើយ​ថា​ នឹង​អាច​ទទួល​បាន​ប័ណ្ណ​កម្ម​សិទ្ធិ​ដី​សហ​គមន៍​ក៏​ដោយ​​ ក៏​ពេល​នេះ​ជន​ជាតិ​​ដើម​ភាគ​តិចរាប់​រយ​គ្រួសារ​​​នៅក្នុង​ខេត្ត​មណ្ឌល​គិរី និងរតនគិរី​​ ​បាន​សម្រេច​​​ទទួល​​យក​​ប័ណ្ណ​កម្មសិទ្ធិ​ដី​ធ្លី​​ឯក​ជន​ពី​​​គម្រោង​ផ្តល់​ប័ណ្ណ​កម្មសិទ្ធិ​ថ្មី​របស់​លោក នាយក​រដ្ឋ​មន្ត្រីហ៊ុនសែន​ វិញ​។ ខណៈពេល​ប័ណ្ណ​កម្មសិទ្ធិ​ឯក​ជន​អាច​ការ​ពារ​​មិន​ឲ្យ​មាន​​ការ​ចាប់​យក​ដី​ពី​​អ្នក​រក​ស៊ី​ និង​ក្រុម​ហ៊ុន​​អភិវឌ្ឍន៍​​នោះ ​ជន​ជាតិ​ដើម​ភាគ​តិច​ ដែល​បាន​ទទួល​ប័ណ្ណ​កម្ម​សិទ្ធិ​ដី​ធ្លី​ឯក​ជន​មិន​មាន​សិទ្ធិ​ទទួល​ប័ណ្ណ​កម្មសិទ្ធិ​ដី​សហគមន៍​​សម្រាប់​តំបន់​​កសិកម្ម​​ព​នេចរ ​ដី​កប់​ខ្មោច និង​​ “ ដី​ព្រៃ​ដូន​តា”នោះ​ទេ។ ​លោកយុទ្ធសារិនមេឃុំ​ប៊ូស្រាបាន​មាន​ប្រសាសន៍​កាល​ពី​ម្សិល​មិញ​ថា​ប្រ​ជា​ពល​រដ្ឋ​ជន​ជាតិ​ភាគ​តិច​ព្នង​ប្រ​ហែល​៤០០​គ្រួសារ​​ក្នុង​ចំណោម​ប្រ​ជា​ពលរដ្ឋ​​ប្រ​ហែល​១.០០០​គ្រួសារ​ដែល​រស់​នៅ​ក្នុង​ឃុំ​ប៊ូ​ស្រា ​​ក្នុង​ស្រុកពេជ្រា​ដា​​ខេត្ត​មណ្ឌល​គិរី​បាន​​ទទួល​ប័ណ្ណ​​កម្មសិទ្ធិ​ដីធ្លី​ឯកជនកាល​ពី​ថ្ងៃ​ទី​១៥ ​ខែ​វិច្ឆិកា ​​បន្ទាប់​ពី​ដី​របស់​ពួក​គាត់​​ត្រូវ​បាន​ក្រុម​និស្សិត​ស្ម័គ្រ​ចិត្ត​​វាស់​វែងរួច​មក​។ លោក សារិន បាន​មាន​ប្រ​សាសន៍​បន្តថា​“ ប្រ​ជា​ពល​រដ្ឋ​ភាគ​ច្រើន​​...ចង់​បាន​ប័ណ្ណ​កម្ម​សិទ្ធិ​ឯក​ជន​។​ប្រ​ហែល​ជា​ពួក​គាត់​គិត​ថា​ ការ​ដាក់​ពាក្យ​ស្នើ​សុំ​​ប័ណ្ណ​កម្ម​សិទ្ធិ​ដី​​សហគមន៍​នឹង​ប្រើ​ពេល​យូរ​ពេក”។​​លោក​បន្ថែម​ថា ​​គ្រួសារ​ជន​ជាតិ​ដើម​ភាគ​តិច​ព្នង​ស្ទើ​តែ​ទាំង​អស់​បាន​ទទួល​ការ​វាស់​វែង​ដី​របស់​ពួក​គាត់​​ពី​សំណាក់​ក្រុម​និស្សិត​ស្ម័គ្រ​ចិត្ត។ ការ​​ប្តូរ​មក​​យក​ប័ណ្ណ​កម្មសិទ្ធិ​ឯក​ជន​នេះ​​កើត​ឡើង​​ចំពេល​មាន​​ការ​តវ៉ា​ទាម​ទារ​​​សិទ្ធិ​គ្រប់​គ្រង​ដី​ធ្លី​ជា​​យូរ​មក​ហើយ​រវាង​សហ​គមន៍​ជនជាតិ​ភាគ​តិច​នៅ​ក្នុង​ឃុំ​ប៊ូស្រា​​ និង​ក្រុមហ៊ុន​សូហ្វីន​ KCD គ្រប់​គ្រង​ដោយ​ជន​ជាតិ​បារាំង។ លោកសាលវណ្ណសាយប្រធាន​អង្គការ​គាំ​ទ្រ​សហគមន៍​ជនជាតិ​ដើម​ភាគ​តិច​​ដែល​បាន​ជួយ​អប់​រំ​ពី​សិទ្ធិ​ដល់​ជន​ជាតិ​ដើម​ភាគ​តិច​៣៣​ក្រុម​ ដែល​រស់​នៅ​ក្នុង​ខេត្ត​នេះ​​​មាន​ប្រ​សាសន៍​ថា​​ ដូច​គ្នា​នេះ​ដែរ​​ជន​ជាតិ​ភាគតិច​ទំពួន​ជិត​៨២​គ្រួសារ​​ដែល​រស់​នៅ​ក្នុង​ឃុំ​កិះចុង​​ក្នុង​ស្រុក​បរ​កែវ ​ខេត្ត​រតនគិរី​​ក៏​បាន​ទទួល​ប័ណ្ណ​កម្មសិទ្ធិ​ដី​ធ្លី​ឯក​ជន​ផង​ដែរ​កាល​ពី​ដើម​​ខែ​នេះ​​​ ដោយ​​សង្ឃឹម​​​ថា​វា​អាច​ការពារ​ដី​របស់​​ពួក​គាត់​​ពី​ក្រុម​ហ៊ុន​ដែល​ទទួល​បាន​ដី​សម្ប​ទាន​សេដ្ឋ​កិច្ច​​នៅ​ក្បែរ​នោះ​។ ​លោកវណ្ណសាយមាន​ប្រសាសន៍​បន្តថា​ “ ​សម្បទាន​ដី​សេដ្ឋ​កិច្ចបាន​​​គាប​សង្កត់​សហ​គមន៍​​ទាំង​នេះ​។ពួកគាត់​គ្មាន​ជម្រើស​ឡើយ។​​​ពួក​គាត់​ត្រូវ​​តែ​ទទួល​យក​​កម្ម​សិទ្ធិ​ឯក​ជន​”។ ទោះ​បី​ជា​សមាជិក​ជន​ជាតិ​ភាគ​តិច​​កំពុង​តែ​ដំណើរការ​ទទួល​បាន​ប័ណ្ណ​កម្មសិទ្ធិដី​​សហ​គមន៍​​ដែល​ជា​ដំណើរការ​ដ៏​វែង ​និង​ស្មុគ​​ស្មាញ​​​ដែល​តម្រូវឲ្យ​ចុះ​បញ្ជី​ជា​មួយ​​ក្រ​សួង​អភិវឌ្ឍន៍​ជន​បទ​​ហើយ​ទទួល​ស្គាល់តាម​ផ្លូវ​ច្បាប់​​ដោយ​​ក្រសួង​មហាផ្ទៃ​និងជា​ចុង​ក្រោយ​ត្រូវ​ចេញ​​ប័ណ្ណ​កម្មសិទ្ធិ​​​ដោយ​ក្រសួង​​​រៀបចំដែនដី​​នគរូបនីយកម្ម​ក៏​ដោយ​​ ឥឡូវ​នេះ​​ពួក​គាត់​បាន​ទទួល​យក​ប័ណ្ណ​កម្មសិទ្ធិ​ឯក​ជន។ លោកសេកសុភ័ណ ​​អ្នក​សម្រប​សម្រួល​ប្រ​ចាំ​​អង្គការ​ពល​កម្ម​អន្តរជាតិ​ ​បាន​មាន​ប្រ​សាសន៍​ថា​ ចាប់​តាំង​ពី​ច្បាប់​​ភូមិ​បាល​ត្រូវ​បាន​បង្កើត​ឡើង​កាល​ពី​​​ឆ្នាំ​២០០១​មក​សហ​គម​ន៍​ជន​ជាតិ​ភាគ​តិច​ចំនួន​៨៨​បាន​ចុះ​បញ្ជី​ជា​មួយ​ក្រ​សួង​អភិវឌ្ឍន៍​ជន​បទ ​​ហើ​យ​សហគម​ន៍​ចំ​នួន​៥៦​​បាន​ទទួល​ស្គាល់​​ថា ​ជា​សហគមន៍​ជន​ជាតិ​ភាគតិច​។ទោះ​ជា​យ៉ាង​ណា​ក៏​ដោយ ​មាន​តែ​បីសហគមន៍​ប៉ុណ្ណោះ​​​បាន​​ទទួល​ប័ណ្ណ​កម្មសិទ្ធិ​​ដី​សហគមន៍​​ចំពោះ​​ដី​ដូន​តា​របស់​ពួក​គេ​។ ទោះ​ជា​ច្បាប់​នេះ​​បាន​អនុម័ត​ជាង​មួយ​ទសវត្សរ៍មក​ហើ​យ​ក៏​ដោយ​​ ក៏​ប័ណ្ណ​កម្មសិទ្ធិ​ដី​សហគមន៍​ទើប​តែ​​​ផ្តល់​ឲ្យ​​អ្នក​ភូមិ​ជន​ជាតិ​គ្រឹង​​ និង​​ទំពួន​នៅ​ក្នុង​ខេត្ត​​រតនគិរី​​លើក​ដំបូង​កាលពី​ខែ​ធ្នូ​ ឆ្នាំ​មុន​ប៉ុណ្ណោះ​។ ប័ណ្ណ​កម្មសិទ្ធិដី​សហគមន៍​ទី៣​ត្រូវ​បាន​ផ្តល់​ឲ្យ​​ជនជាតិ​​ភាគ​តិច​ព្នង​នៅ​ក្នុង​ស្រុក​អូររាំង​ខេត្ត មណ្ឌល​គិរី​កាល​ពី​ខែ​មីនា​។ សហគមន៍​ជនជាតិ​ភាគតិច​ព្នង​ចំនួន​បីនៅ​ក្នុង​ខេត្ត​មណ្ឌល​គិរី​​បាន​បញ្ចប់​ដំណើរការ​​និង​កំពុង​រង់​ចាំ​ប័ណ្ណ​កម្មសិទ្ធិ​ដី​សហគមន៍​។ លោកឆាយធីអ្នក​សម្រប​សម្រួល​ប្រ​ចាំ​អង្គការ​អាដហុក​​ ខេត្តរតនគិរី​មាន​ប្រ​សាសន៍​ថា​​ ប្រ​ជា​ពល​រដ្ឋ​ជន​ជាតិ​ដើម​ភាគ​តិច​គ្រឹង​ជាង​១០០​គ្រួសារ​នៅ​ក្នុង​ឃុំ​ល្អក់ ក្នុង​ស្រុក​អូរ​ជុំ​បាន​ស្នើ​ឲ្យ​​អង្គការ​របស់​លោក ជួយ​បំពេញ​ពាក្យ​សុំ​ប័ណ្ណ​កម្មសិទ្ធិ​ដី​សហគមន៍​ជា​លើក​ដំបូង​កាល​ពី​ដើម​ខែ​នេះ​។ លោកធីមាន​ប្រ​សាសន៍​បន្ត​ថា ​បើ​មិន​មាន​ប័ណ្ណ​កម្មសិទ្ធិ​ដីសហគមន៍ទេ ​​​គ្រួសារ​ជនជាតិ​ភាគ​តិច ទាំង​នោះ​ងាយ​នឹង​បាត់​បង់​ដី​របស់​ពួ​កគេ​ទៅ​លើ​​ក្រុម​ហ៊ុន​​ចម្ការ​កៅ​ស៊ូ​CRD​ដែល​គ្រប់​គ្រង​ដោយ​ជន​ជាតិ​វៀត​ណាម​​។​​​​​ លោក​​​​​​មាន​​​ប្រ​​​សាសន៍​​​ថា ការធ្វើ​​​ឲ្យ​​​បញ្ហា​​​នេះ​​​ស្មុគ​​​ស្មាញ គឺ​​​ដោយ​​​សារ​​​តែ​​​ក្រុមនិស្សិត​​​ស្ម័គ្រ​​​ចិត្តបាន​​​ជំរុញ​​​ឲ្យ​​​គ្រួសារ​​​ទាំង​​​នោះ​​​វាស់​​​​វែង​​​ដី​​​ធ្លី​​​របស់​​​ពួកគាត់ ដើម្បី​​​​​​ទទួល​​​បាន​​​កម្ម​​​សិទ្ធិ​​​ដី​​​​​​​​រៀងៗ​​​ខ្លួន ជំនួស​​​ឲ្យ​​​ការ​​​រង់​​​ចាំ​​​ក្តី​​​សង្ឃឹម​​​ទទួល​​​បាន​​​ប័ណ្ណ​​​កម្មសិទ្ធិ​​​ដី​​សហគមន៍។លោក ឆាយ ធី​ បាន​មាន​​​ប្រ​​​សាសន៍​​​ថា“ ពួកគាត់​​​មាន​​​ការ​​​យល់​​​ច្រឡំជា​​​ខ្លាំង។ក្រុម​​​និស្សិត​​​ស្ម័គ្រ​​​ចិត្ត​​​ចង់​​​ឲ្យ​​​ពួកគាត់​​​វាស់​​​វែង​​​ដី​​​លំនៅ​​​ដ្ឋាន ​​​និង​​​ដី​​​ចម្ការ​​​របស់​​​ពួកគាត់ ទាំង​​​នៅពេល​​​ពួកគេកំពុង​​​ស្ថិត​​​ក្នុង​​​ដំណើរ​​​ការ​ដាក់ជូន​​​​​​ឯក​​​សារ​​​ដើម្បី​​​ទទួល​​​បាន​​​ប័ណ្ណ​​​កម្ម​​​សិទ្ធិដី​​​​សហគមន៍​​​​”។ លោក និត ប្រាក់ តំណាងសហ​​​គមន៍​​​ព្នង​​​ក្នុងស្រុក​​​ប៊ូស្រា ខេត្ត​​​មណ្ឌល​​​គិរី បាន​​​លើក​​​ឡើង​​​ថា គ្រួសារ​​​​​​ដែលបាន​​​ទទួល​​​យក​​​ប័ណ្ណ​​​កម្ម​​​សិទ្ធិ​​​ដី​​​ឯក​​​ជន​​​ ពិត​​​ជា​​​បានធ្វើ​​ដូច្នេះ​​​មែន​​​ពីព្រោះ​​​ពួកគាត់​​​ត្រូវ​​​ក្រុម​​​និស្សិត​​​ស្ម័គ្រ​​​ចិត្ត​​​ប្រាប់ថា ការ​​​មាន​​​ប័ណ្ណ​​​កម្ម​​​សិទ្ធិ​​​ដី​​​ធ្លី​​​ឯក​​​ជន ​​​នឹង​​​មិន​​​ប៉ះ​​​ពាល់ដល់​​​ឱកាស​​​របស់​​​ពួកគាត់​​​ក្នុង​​​ការ​​​ទទួល​​​បានប័ណ្ណ​​​កម្ម​​​សិទ្ធិ​​​ដី​​​ធ្លី​​​​សហគមន៍​​នៅ​​​​ពេល​​​ខាង​​​មុខ។ លោក​​បាន​មាន​ប្រសាសន៍​បន្ថែម​ថា “ ពីមុន​ពួកគាត់​​​ទាំង​​​អស់​​​គ្នា​​​សុទ្ធ​​​តែ​​​ចង់​​​បាន​​ដី​​​សហ​​​គមន៍​​​ មិន​​​​មែន​​​ដី​​កម្ម​​​សិទ្ធិ​​​ឯក​​​ជន​​​ឡើយ។​នៅ​ពេល​​​ក្រុម​​​និស្សិត​​​ស្ម័គ្រ​​​ចិត្តមក​​​ពន្យល់​​​ពី​​​អត្ថ​​​ប្រ​​​យោជន៍​​​នៃ​​​ប័ណ្ណ​​​កម្ម​​​សិទ្ធិ​​រឹង​​​ ហើយ​​​ថា វា​​​នឹង​​​មិន​​​ប៉ះ​ពាល់​​​ដល់​​​ដី​​​សហ​​​គមន៍​​​នោះ ប្រ​​​ជា​​​ជនក៏​​​​​​បាន​នាំគ្នា​​គោរព​​​តាម​​​កម្មវិធី​​​វាស់​​​វែង​​​ដី​​​ធ្លី​​​នេះតែ​​​ម្តង​​​​​​”។ លោក​​​ កោស សុខ អាយុ៣៤ឆ្នាំ ជា​​​​​​ជន​​​ជាតិភាគ​​​តិច​​​ព្នងក្នុង​​​ឃុុំប៊ូស្រា បាន​​​និយាយ​​​ថា ប្រ​​​ជាជន​​​ទាំង​​​នេះ​​​បាន​​​យល់​​​ខុស​​​ចំពោះ​​​បញ្ហា​​​នេះ។​​​គាត់​​​បាន​​​បន្ត​​​ថា “ ការ​​​យល់​​​ច្រ​​​ឡំ​​​នេះ​បាន​​​​កើត​​​មាននៅពេល​​​ដែល​​​ក្រុម​​​និស្សិត​ស្ម័គ្រ​​​ចិត​្ត​​និយាយ​​​ថា វា​​​គ្មាន​​​បញ្ហា​​អ្វី​​​ឡើយ​​​​​​សម្រាប់​​​អ្នក​​​ភូមិ​​​ទទួល​​​បាន​​​ប័ណ្ណ​​​កម្មសិទ្ធិ​​​ដី​​​​សហគមន៍ ប្រសិន​​​បើ​​​ពួកគាត់​​​ទទួលបាន​​​ប័ណ្ណ​​​កម្ម​​​សិទ្ធិ​​​ដី​​​ឯក​​​ជន​​​ដែរ​​​​នោះ”។ ប្រ​​​ជា​​​ពល​​​រដ្ឋម្នាក់ទៀត​​​រស់​​​នៅ​​​ក្នុងឃុំ​​​ប៊ូស្រា ឈ្មោះ ផ្លាង ស៊ិន អាយុុ​​​៥២​​​ឆ្នាំ​​​​​​បាន​និយាយថា “ ជាការ​​​ពិត​​​ណាស់ ជន​​​ជាតិ​​​ភាគ​​​តិច​​​នៅ​​​ទី​​​នេះគិតថា ពួកគាត់​​​នឹង​​​អាច​​​ទទួល​​​បាន​​​ទាំង​​​ពីរ​​​ គឺ​​​ទាំង​​​ប័ណ្ណ​​​កម្ម​​​សិទ្ធិ​​​ដី​​​ឯក​​​ជន​​​និង​​​កម្ម​​​សិទ្ធិ​​ដី​សហគមន៍​។​​​ប្រ​​​ជា​​​ជន​​​គិត​​​បែប​​​នេះ បន្ទាប់ពី​​​ក្រុម​​​និស្សិត​​​ស្ម័គ្រ​​​ចិត្ត​​​​​​បាន​​​ប្រាប់​​​ថា​ការវាស់​​​វែង​​​ដី​​​ដើម្បី​​​ទទួល​​​បាន​​​ប័ណ្ណ​​​​កម្ម​សិទ្ធិ​​​ដីធ្លីឯក​ជន​​​​ នឹង​​មិន​​​ប៉ះ​​​ពាល់ដល់​​​កិច្ច​​​ខំ​​​ប្រឹង​​​ប្រែង​​​ដើម្បី​​​ទទួល​​​បាន​​​ប័ណ្ណ​​​​កម្ម​សិទ្ធិដី​​​​សហ​គមន៍​ឡើយ”។ លោក​​​ស្រី យុន ម៉ាណេ ប្រធាន​​​សមាគម​​​យុវ​​​ជន​​​ជន​​​ជាតិដើម​​​ភាគ​​​តិច​​​ បាន​​​មាន​​​ប្រ​​​សាសន៍​​​ថា ការ​​​យល់​​​​​ច្រ​​​ឡំ​​​បែប​​​នេះ​​​រវាង​​​យុវ​​​និស្សិត​​​ស្ម័គ្រ​​​ចិត្ត​​​ និងសហ​​​គមន៍​​​ជន​​​ជាតិ​​​ដើម្បី​​​ភាគ​​​តិច​​​ គឺ​​​ជា​​ក្តី​​​បារម្ភ​​​មួូយ​​​។ លោក​​​ស្រី​​​បាន​ថ្លែង​​​ថា “ នៅពេល​​​ក្រុម​​​យុវជន​​​ស្ម័គ្រ​​​ចិត្ត​​​ទៅ​​​វាស់​​​វែង​​​ដីប្រ​​​ជា​​​ជន​​​មួួ​យ​​​ចំនួនក្នុង​​​សហគមន៍​​យល់​​​ខុស”។​​​លោក​​​ស្រី​​​បានបន្ថែម​​​ថា អនុ​​​ក្រឹត្យ​​​មួយ​​​ចុះ​​​កាល​​​បរិច្ឆេទ​​​ឆ្នាំ​​​២០០៩ស្តីពី​​​ដំណើរ​​​ការ​​​ចុះ​​​ឈ្មោះ​​​សុំ​​​ប័ណ្ណ​​​កម្ម​​​សិទ្ធិ​​​ដី​​​សហគមន៍​ ចែង​​​ថា បុគ្គល​​​ម្នាក់ៗ​​​មិន​អាច​​​​​​មានដី​​​ឯក​​​ជន​​​ផ្ទាល់​​​ខ្លួន​​​ផង​​​ និង​​​ដី​​​សហ​គមន៍​​​​ផង​​​បាន​​​ទេ។ លោក ទីម ស៊ីណាត ប្រធាន​​​មន្ទីរ​​​រៀបចំ​​​ដែន​​​ដី នគរូបនីយ​​​កម្ម និង​​​សំណង់ ខេត្ត​​​រតនគិរី បានមាន​​​ប្រ​​​សាសន៍​​​ថា ភាគ​​​ច្រើន​​​នៃ​​​ប័ណ្ណ​​​កម្ម​​​សិទ្ធិ​​​ដីធ្លី​​​ឯក​​​ជន​​​ចំនួន​​​៥៤១​​​ប័ណ្ណ​​​ដែល​​​ត្រូវ​​​ប្រ​​​គន់​​​ជូន​​​ប្រ​​​ជា​​​ជន​​​នៅ​​​ក្នុង​​​ខេត្តនេះ​​​​​​នៅ​​​ថ្ងៃ​​​ទី​​​៧ខែ​​​ធ្នូ​​​ នឹង​​​បាន​​​ទៅ​​​លើ​​​ក្រុម​​​ជន​​​ជាតិ​​​ដើមភាគ​​​តិច​​​។ លោក​​​បាន​​​​​​មាន​​​ប្រ​​​សាសន៍​​​ទៀតថា “ ទោះ​​​បីជា​​​ជន​​​ជាតិ​​​ភាគ​​​តិច​​​មាន​​​សិទ្ធិ​​​ពិសេស​​​ទទួល​​​​ប័ណ្ណ​​​កម្ម​​​សិទ្ធិ​​​ដី​​​​សហគមន៍​​​​ក្តី​​​ ក៏ពួកគាត់​​​គ្មាន​​​សិទ្ធិ​​​ទទួល​​​ប័ណ្ណកម្ម​​​សិទ្ធិពីរ​​​ឡើយ។ពួកគាត់​​​ទទួួល​​​បាន​​​តែ​​​មួយ​​ប៉ុណ្ណោះ”។ យោងតាម​​​ក្រសួង​​​រៀប​​​ចំ​​​ដែនដី ​នគរូប​នី​យ​​​កម្ម និង​​​សំណង់​​​បាន​​​ឲ្យ​​​ដឹងថា ​​​ផ្ទុយពី​​​ប័ណ្ណ​​​កម្មសិទ្ធិ​​​ដី​​​​សហគមន៍​ចំនួន​​​បី​​​ដែល​​​ត្រូវបាន​​​ផ្តល់​​​ឲ្យ​​​សហ​​​គមន៍​​​ជន​​​ជាតិ​​​ភាគ​​​តិច​​​ចាប់​​​តាំង​​​ពី​​​ឆ្នាំ២០០១​​​មក​​​នោះ​​​ ប័ណ្ណ​​​កម្ម​​​សិទ្ធិ​​​ដី​​​ឯក​​​ជន​​​ជាង​​​១០០.០០០​​​ប័ណ្ណ​​​ត្រូវបាន​​​ចែក​​​ជូន​​​ប្រ​​​ជា​​​ពល​​​រដ្ឋ​​​ចាប់​​​តាំង​​​ពី​​ខែ​​​មិថុនា​​​នៅ​​​ទូទាំង​​​ប្រទេស​​​នៅពេល​​​ក្រុម​​​និស្សិត​​​ស្ម័គ្រ​​​ចិត្ត​​​ដំបូង​​​ត្រូវបាន​​​បញ្ជូនទៅ​​​តាម​​​ខេត្ត​​​។ លោក ទី ឡាតាយ ប្រធាន​​​ផ្នែក​​​ដីធ្លី​​​ និង​​​ធន​​​ធាន​​​ធម្មជាតិនៅ​​​​​​អង្គ​​​ការ​​​អាដហុក បានមាន​​​ប្រ​​​សាសន៍​​​ថា ប័ណ្ណ​​​កម្មសិទ្ធិ​​​ដី​​​​ឯក​ជន​​​​មិនមាន​សុវត្ថិ​​​ភាព​​​ដូច​​​ប័ណ្ណ​​​កម្ម​​​សិទ្ធិ​​​ដី​សហគមន៍​​​​សម្រាប់សហ​​​គមន៍​​​ជន​​​ជាតិ​​​ភាគ​​​តិច​​​ទេ។ លោក​​មាន​​​ប្រ​​​សាសន៍​​​ថា “ ខ្ញុំ​​​មានការ​​​ព្រួយ​​​បារម្ភអំពី​​​សមត្ថភាព​​​របស់​​​ពួកគាត់​​​ក្នុង​​​ការ​​​គ្រប់​​​គ្រង​​​ដី​​​កម្មសិទ្ធិ​​​ឯក​​​ជន​​​”។លោក​​​ពន្យល់​​​ថា អ្នក​​​ភូមិជនជាតិ​​​ភាគ​​​តិច​​​ប្រ​​​ហែល​​​ជាត្រូវ​​​គេ​​​បញ្ចុះ​​​​បញ្ចូល​​​ឲ្យ​​​លក់​​​ដី​​ឯក​​​ជន​​​របស់​​​ពួកគាត់​​​នៅ​​​ពេល​​​អនាគត ដោយ​​​ធ្វើ​​​ឲ្យ​​​ពួកគាត់​​​គ្មានសូម្បី​​​តែ​​​សហ​​​គមន៍​​​នៅទីបំផុត។ លោក​​​បន្ត​​​ថា “ ប្រសិនបើ​​​ពួកគាត់​​​មួយ​​​ចំនួន​​​ទទួូល​​​បាន​​​ប័ណ្ណ​​​កម្មសិទ្ធិ​​​ដី​​​ឯក​​​ជន​​​ តើ​​​ពួកគាត់​​​អាច​​​ធានា​​​ការ​​​រស់​​​នៅ​​​យូរ​​​អង្វែង​​​នាពេលអនាគត​​​របស់​​​ពួកគាត់​​​បាន​​​ដោយ​​​របៀប​​​ណា?”៕ ប្រែ​​​សម្រួល​​​ដោយ ឃិន ណៃ  និង តែម សុខុម​​​​​​​​​​​​​​​​​​​​​​​​​​​​​​​​​ ​​​​​​​​​                             ​​​​​​​  

​ចំនួន​ទេសចរ​មក​​ប្រទេស​កម្ពុជា​កើន​ឡើង​ជាង​២៣​ភាគ​រយ​

យោង​តាម​ទិន្នន័យ​ ដែល​ត្រូវ​បាន​ចេញ​ផ្សាយ​ដោយ​ក្រសួង​ទេសចរណ៍​ កាល​ពី​ម្សិល​មិញ​បាន​បង្ហាញ​ថា​ ចំនួន​ភ្ញៀវ​ទេស​ចរ​ ដែល​ធ្វើ​ដំណើរ​មក​ទស្សនា​ប្រទេស​កម្ពុជា​បាន​កើន​ឡើង​ដល់​ចំនួន​២,៨៦​លាន​នាក់​នៅ​ក្នុង​រយៈ​ពេល​១០​ខែ​ដំបូង​នៃ​ឆ្នាំ​២០១២​នេះ​ ពោល​គឺ​មាន​ការ​កើន​ឡើង​ចំនួន​២៣,៧​ភាគ​រយ​ បើ​ប្រៀប​ធៀប​ទៅ​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។ លោក​ គង់​ សុភា​រក្ស ប្រធាន​នាយក​ដ្ឋាន​ព័ត៌​មាន​ និង​ស្ថិតិ​នៃ​ក្រសួង​ទេសចរណ៍​ បាន​មាន​ប្រសាសន៍​ថា​ ជើង​ហោះ​ហើរ​ផ្ទាល់​ថ្មីៗ​ជា​មួយ​ប្រទេស​កម្ពុជា​នៅ​ឆ្នាំ​នេះ​បាន​ជួយ​ជំរុញឲ្យ​មាន​ចំនួន​ភ្ញៀវ​ទេសចរ​កាន់​តែ​ច្រើន​មក​ទស្សនា​ប្រទេស​កម្ពុជា។​ ទី​ក្រុង​ម៉ានីល​ និង​ទីក្រុង​គន់​មីង​ (Kunming)​នៅ​ក្នុង​ខេត្ត​យូណាន​ (Yunnan)​ ប្រទេស​ចិន​គឺ​ជា​ទី​កន្លែង​ពីរ​ ដែល​មាន​ជើង​ហោះ​ហើរ​ផ្ទាល់​មក​កាន់​ប្រទេស​កម្ពុជា​នា​ពេល​បច្ចុប្បន្ន​នេះ។ លោក​បាន​ឲ្យ​ដឹង​ដូច្នេះ​ថា​ “​ ទន្ទឹម​នឹង​ការ​មាន​ជើង​ហោះ​ហើរ​ផ្ទាល់​ថ្មីៗ​ច្រើន​ ចំនួន​ភ្ញៀវ​​ទេសចរក៏​បាន​កើន​ឡើង​ផង​ដែរ​ ចាប់​តាំង​ពី​យើង​មាន​ការ​តភ្ជាប់​ផ្លូវ​រថយន្ត​ក្រុង​នៅ​ក្នុង​ប្រទេស​កម្ពុជា​មក”។​ លោក​បាន​ឲ្យ​ដឹង​បន្ថែម​ទៀត​ថា​ ភ្ញៀវ​ទេសចរជន​ជាតិ​វៀត​ណាម​ ដែល​ចូល​មក​ទស្ស​នា​ប្រទេស​កម្ពុជា​មាន​ចំនួន​ច្រើន​ជាង​គេ​បង្អស់​ បន្ទាប់​មក​គឺ​ជន​ជាតិ​កូរ៉េខាង​ត្បូង​ និង​ជន​ជាតិ​ចិន។ យោង​តាម​ទិន្នន័យ​នេះ​បាន​បង្ហាញ​ថា​ ក្នុង​ចំណោម​ភ្ញៀវ​ទេសចរ​សរុប​ ដែល​បាន​ធ្វើ​ដំណើរ​មក​ទស្សនា​ប្រទេស​កម្ពុជា​នៅ​ក្នុង​រយៈ​ពេល​១០​ខែ​ដំបូង​ នៃ​ឆ្នាំ​២០១២​នេះ​ មាន​ភ្ញៀវ​ទេសចរ​ចំនួន​១,៣៦​លាន​នាក់​បាន​ធ្វើ​ដំណើរ​មក​ដល់​ប្រទេស​កម្ពុជា​តាម​ផ្លូវ​អាកាស​ ពោល​គឺ​កើន​ឡើង​ចំនួន​១៦,៦​ភាគ​រយ​ បើ​ធៀប​នឹង​ឆ្នាំ​មុន៕ ប្រែសម្រួល​ដោយ​ ហួង​ កុក​ទៀន

ក្រុមមន្ត្រីរដ្ឋបាល​​​ព្រៃឈើ​​​រឹបអូស​​​​​​ឈើគ្រញូង​​​រត់ពន្ធ​​​បាន​​​ពី​​​រថយន្ដ​​​ក្រុង​​​ដឹក​​​អ្នក​​​ដំណើរ​​​មួយ​​​គ្រឿង

ក្រុម​​​មន្ត្រីបាន​​​និយាយ​​​ថា ​​​មន្ត្រី​​​រដ្ឋ​​​បាល​​​​​​ព្រៃឈើរឹប​​​អូស​​​ឈើ​​​គ្រញូង​​​​​​រត់​​​ពន្ធ បាន​​​ចំនួន​​​២២​​​កំណាត់​​​ពី​​​រថយន្ដ​​​ក្រុង​​​ដឹក​​​អ្នក​​​ដំណើរ​​​មួយ​​​គ្រឿង​​​​​​ ដែល​​​ធ្វើ​​​ដំណើរ​​​ចេញ​​​ពី​​​ក្រុង​​​សៀមរាប ឆ្ពោះ​​​មក​​​​​​រាជធានី​​​ភ្នំ​​​ពេញ​​​កាល​​​ពី​​​ពេល​​​ព្រឹក​​​ព្រលឹម​​​ថ្ងៃ​​​អង្គារ។ បន្ទាប់​​​ពី​​​ទទួល​​​បាន​​​ព័ត៌មាន​​​ពី​​​ជន​​​មិន​​​ស្គាល់​​​ឈ្មោះ​​​ម្នាក់ ក្រុម​​​មន្ត្រី​​​រដ្ឋបាល​​​ព្រៃ​​​ឈើ​​​ស្រុក​​​សន្ទុក ខេត្ត​​​កំពង់ធំ បាន​​​ឃាត់​​​រថយន្ដ​​​ក្រុង​​​ដឹក​​​អ្នក​​​ដំណើរ​​​របស់​​​ក្រុមហ៊ុន រិទិ្ធ មុនី ដែល​​​បាន​​​ផ្ទុក​​​អ្នក​​​ដំណើរ​​​ជាង​​​៥០​​​នាក់​​​ភ្លាម​​​ៗ​​​នៅ​​​មុន​​​ម៉ោង​​​៤​​​ទៀប​​​ភ្លឺ។ លោក សុទ្ធ ម៉ារី នាយ​​​​ខណ្ឌ​រដ្ឋបាល​​​ព្រៃ​​​ឈើ បាន​​​មាន​​​ប្រសាសន៍​​​កាល​​​ពី​​​ម្សិល​​​មិញ​​​ថាបន្ទាប់​​​ពី​​​ធ្វើ​​​ការ​​​ឆែក​​​ឆេរ ក្រុម​​​មន្ត្រី​​​រដ្ឋបាល​​​ព្រៃឈើ បាន​​​រក​​​ឃើញ​​​ឈើ​​​គ្រ​ញូង​​​ចំនួន​0,៣០៣ ម៉ែត្រគូប ដែល​​​លាក់​​​នៅ​​​ខាង​​​ក្រោយ​​​​អីវ៉ាន់​​​របស់​​​អ្នក​​​ដំណើរ។ លោក ម៉ារី បាន​​​មាន​​​ប្រសាសន៍​​​ទៀត​​​ថា​ “ យើង​​​បាន​​​រក​​​ឃើញឈើ​​​គ្រ​ញូង​​​ចំនួន​​​២២​​​កំណាត់ ហើយ​​​បាន​​​នាំ​​​រថយន្ដ​​​ក្រុង​​​នេះ​​​ និង​​​ឈើ​​​គ្រ​ញូង​​​ទៅ​​​កាន់​​​ការិយាល័យ​​​រដ្ឋបាល​​​ព្រៃ​​​ឈើ​​​នឃុំ​​​កំពង់ថ្ម”។ លោក​​​​​​មាន​​​ប្រសាសន៍​​​​បន្ថែម​​​ថា អ្នក​​​បើក​​​រថយន្ដ​​​ក្រុង បាន​​​គេច​​​ខ្លួន​​​ចូល​​​ទៅ​​​ក្នុង​​​ព្រៃ ហើយ​​​អ្នក​​​ដំណើរ បាន​​​រង់​​​ចាំ​​​រថយន្ដ​​​ក្រុង​​​ផ្សេង​​​ទៀត​​​ពី​​​ក្រុមហ៊ុន​​​រិទិ្ធ​​​ មុនី​ដើម្បី​​​ដឹក​​​ពួក​​​គេ​​​បន្ត​​​ដំណើ​​​រ​​​ទៅ​​មុខ​​​​ទៀត។ លោក ម៉ារី មាន​​​ប្រសាសន៍​​​ថា “ ក្រុម​​​អ្នក​​​រត់​​​ពន្ធ ច្រើន​​​តែ​​​ប្រើ​​​ល្បិច​​​ដើម្បី​​​រត់ពន្ធ​​​ឈើ​​​មាន​​​តម្លៃ ហើយ​​​ជា​​​ពិសេសគឺ​​​ឈើ​​​គ្រ​ញូង​​​”។ នៅ​​​ពេល​​​នេះ​​​ក្រុមហ៊ុន​​​ រិទ្ធិ​​​មុនី មាន​​​ពេល​​​៣០​​​ថ្ងៃ​​​​​​ដើម្បី​​​ដោះស្រាយ​​​ករណី​​​នេះ ជា​​​មួយ​​​នឹង​​​រដ្ឋបាល​​​ព្រៃឈើ។លោក ម៉ារី បាន​​​មាន​​​ប្រសាសន៍​​​​ថា “ ប្រសិន​​​បើ​​​ក្រុម​​​ហ៊ុន​​​មិន​​​មក​​​ដោះ​​​ស្រាយ​​​​​​បញ្ហា​​​នេះ​​​នៅ​​​ក្នុង​​​រយៈ​​​ពេល​​​៣០​​​​ថ្ងៃ​​​​​​នោះ​​​ទេ យើង​​​នឹង​​​បញ្ជូន​​​ករណី​​​នេះ​​​ទៅ​​​តុលាការ​​​”។ លោក ស៊ុំ ពិចិត្រ អ្នក​​​គ្រប់​​​គ្រង​​​ក្រុម​​​ហ៊ុន​​​រិទិ្ធ មុនី បាននិយាយ​​​​​ថា បុគ្គល​​​អ្នក​​​បើក​​​បរ​​​រថយន្ដ​​​ គឺជាអ្នក​​​ទទួល​​​ខុសត្រូវ ​​​មិន​​​មែន​​​ក្រុម​​​ហ៊ុន​​​ ជា​​​អ្នក​​​ទទួល​​​ខុស​​​ត្រូវនោះ​​​ទេ ពី​​​ព្រោះ​​​បទ​​​បញ្ជា​​​ផ្ទៃ​​​ក្នុង​​​របស់​​​ក្រុម​​​ហ៊ុន​​​ចែង​​​យ៉ាង​​​ច្បាស់​​​ថា គ្រប់​​​អ្នក​​​បើក​​​បរ​​​ទាំង​​​អស់​​​ មិន​​​អនុ​ញ្ញាត​​​ឲ្យ​​​ដឹក​​​ទំនិញ​​​ខុស​​​ច្បាប់​​​នោះ​​​ទេ។ លោក ពិចិត្រ បាននិយាយ​​​ទៀត​​​ថា “ ការ​​​ដឹក​​​ឈើ​​​គ្រ​ញូង​​​នេះ​​​ គឺ​​​ធ្វើ​​​ឡើង​​​ដោយ​​​ខុស​​​ច្បាប់ ដោយ​​​អ្នក​​​បើក​​​បរ ហើយ​​​ក្រុម​​​ហ៊ុន មិន​​​មាន​​​ជាប់​​​ពាក់​​​ព័ន្ធ​​​ទេ”។ លោកស៊ុំ ពិចិត្រ បាន​​​​​បន្ថែម​​​ថា លោក​​​នឹង​​​សហការ​​​ជា​​​មួយ​​​នឹង​​​អាជ្ញាធរ​​​ព្រៃ​​​ឈើ ដើម្បី​​​ធ្វើ​​​ឲ្យ​​​ប្រាកដ​​​ថា អ្នក​​​បើក​​​បរ​​​ឈ្មោះ ជុំ ​កុសល អា​​​យុ​​​​៤៣​​​ឆ្នាំ​​​នេះ មាន​​​ជាប់​​​ពាក់​​​ព័ន្ធ​​​នឹង​​​ករណីនេះ។ លោក ពិចិត្រ បាន​​​​​​និយាយ​​​ទៀត​​​ថា ​លោក​កុសល បាន​​​ធ្វើ​​​ការ​​​ជា​​​មួយ​​​ក្រុម​​​ហ៊ុន​​​រយៈ​​​ពេល​​​​ជាង​​​បី​​​ឆ្នាំ​​​មក​​​ហើយ ប៉ុន្តែ​​​មិន​​​ធ្លាប់​​​មាន​​​បញ្ហា​​​ណា​​​មួយ​​​ពី​​​មុន​​​មក​​​នោះ​​​ទេ។​​​លោក​​​​​​និយាយ​​​​បន្ថែម​​​ទៀត​​​ថា “ យោង​​​តាម​​​បទ​​​បញ្ជា​​​របស់​​​ក្រុមហ៊ុន អ្្នក​​​បើកបរ​​​នេះ ត្រូវ​​​បាន​​​បញ្ឈប​​​់​​​ពី​​​ការងារ​​​ជា​​​ស្វ័យ​​​ប្រវត្តិ”។ កាល​​​ពី​​​ឆ្នាំ​​​មុន ឈើ​​​គ្រ​ញូង​​​ចំនួន​​​១០៩​​​ម៉ែត្រគូប ត្រូវ​​​រឹ​បអូស​​​បាន​​​នៅ​​​ខេត្ត​​​កំពង់ធំដែល​​​មាន​​​តម្លៃ​​​ប្រហែល​​​២០​​​លាន​​​ដុល្លារ៕   ប្រែសម្រួលដោយ ស៊ុំ សុខភុំ  

ឯក​សារ​ដែល​បាត់​ក្នុង​រឿង​ក្តី​របស់លោក មុឹក ដារ៉ា អតីត​ប្រធាន​ប្រឆាំង​គ្រឿង​ញៀន​ ត្រូ​វ​បា​ន​​រកឃើញ​

ឯក​សារ​​ផ្លូវ​​ច្បាប់​ចំនួន​ប្រាំ​មួយ​ទាក់​ទ​ង​នឹង​រឿង​ក្តី​ប្តឹង​ឧទ្ធរណ៍របស់​លោកមុឹកដារ៉ា  ​​អតី​ត​ប្រធា​ន​នគរបា​ល​ប្រឆាំ​ង​គ្រឿង​ញៀន​ ហើយ​គេ​ជឿ​​ថា​បាន​​បាត់​ ​ឬ​​ត្រូវ​គេ​លួច​បាត់​​រយៈ​ពេល​​ជា​ង​មួ​យ​ឆ្នាំ​មក​ហើយ ត្រូ​វ​បា​ន​​រក​ឃើញ​​នៅ​ក្នុ​ង​កា​រិ​យាល័យ​ចៅក្រម​ប្រធា​ន​ក្រុម​ប្រឹក្សាជំនុំ​​ជម្រះ។ កា​ល​ពី​ខែ​មុន ​មេធា​​វី​​របស់​លោក​ មុឹកដារ៉ា ដែល​​កំ​ពុង​ប្តឹង​ឧទ្ធរណ៍​​​ជំទាស់​នឹង​ការ​​​ផ្តន្ទា​​​ទោស​​ក្នុ​ង​ខែ​មករា​តាម​ការ​​ចោទ​ប្រកាន់​​ជា​ច្រើ​ន​ករណី​​ពី​បទ​​ជួញ​​ដូ​រ​គ្រឿ​ង​ញៀន​ និង​អ​ំ​ពើ​ពុក​​រលួ​យ​​ដែល​ត្រូ​វ​ជាប់​ពន្ធនា​គា​រ​​អស់​មួ​យ​ជី​វិត​ បា​នលើ​ក​ឡើ​ង​​ថាតុ​លា​កា​រ​គួរ​តែ​​​រក​​ឯក​សារ​​ដើមមិន​មែន​​ឯកសារ​ថត​ចម្លងដែល​ត្រូ​វ​ប្រើ​​ដើម្បី​ចោទ​ប្រកាន់​គាត់​ទេ​។ ក្រុ​ម​មេធាវី​​ក៏បា​ន​ស្នើ​ឲ្យ​មាន​កា​រ​ស៊ើប​អង្កេត​ផង​ដែរ ​ចំ​ពោះ​ឯក​សារ​​ដែល​បាត់​នៅ​កន្លែ​ង​​ដំ​បូ​ង។លោកអុិតសម្ផស្ស ​អនុ​ប្រធា​ន​​សាលា​ដំ​បូ​ង​​ខេត្ត​​បន្ទាយ​មា​ន​ជ័យ​ និង​ជា​​​ចៅក្រម​ប្រធា​ន​ក្រុម​ប្រឹក្សាជំនុំ​​ជម្រះអំ​ឡុង​រឿ​ង​ក្តី​តុលាកា​រ​​ដំ​បូ​ង​​របស់​លោក ដារ៉ា បា​ន​មាន​ប្រ​សាសន៍​ថា “ យើង​បា​ន​​រក​ឃើញ​​ឯក​សារ​​ទាំ​ង​នេះ​កា​ល​ពី​ថ្ងៃ​​​អា​ទិត្យ​។វា​​ជា​ឯក​សារ​​ដើម​ពិត​ប្រាកដ”។ លោក​បា​ន​​ថ្លែង​ថា “ ​ខ្ញុំ​មិន​ដឹង​​ថា ​វា​កើត​ឡើង​យ៉ាង​ម៉េចទេ​”។ លោក​បាន​ពន្យល់​​ថា ​ឯក​សារ​នេះ​ត្រូ​វ​បា​ន​​រក​ឃើញ​​នៅ​ក្នុង​​ថត​តុ​មួ​យ​។លោក​បា​ន​បន្ត​ថា“ ប្រហែលជា​ក្រឡា​​បញ្ជី​ច្រឡំ​ដៃទុ​ក​ដាក់​ឯក​សារ​នេះ​ ឬប្រហែ​លជា​​ខ្ញុំ​ច្រឡំ​​ដៃ​។ ​មាន​មនុស្ស​​ច្រើ​ន​ ពី​ព្រោះ​​ក្រឡា​​បញ្ជីឬ​ជំ​នួយ​កា​រ​ និង​ខ្លួ​នខ្ញុំ​​ផ្ទាល់​ទាំ​ង​អស់​គ្នា​​ប្រើ​បន្ទប់​នោះ”។ លោកផាន់វណ្ណ​រ៉ាត់ព្រះ​រាជ​អា​ជ្ញា​អ​ម​សា​លា​​ដំ​បូ​ង​​ខេត្ត​បន្ទាយ​មា​ន​​ជ័យ ​បា​ន​មា​ន​ប្រ​សាសន៍​ថា ឯ​ក​សារ​​​ដែ​ល​រាប់​​ទាំ​ងចំ​ណារ​ដោយ​ដៃ​ពេល​នគរបា​ល​​សាក​សួរ​​ឈ្មោះ​ ទុយ ធី អ្នក​ជួញ​ដូរ​​គ្រឿង​ញៀន​​ដែល​ជាប់​ពន្ធ​នា​គា​រ​ ​ដែល​អះ​អា​ង​ថា​​ ខ្លួន​បាន​ទិញ​ថ្នាំ​ញៀន​                  មេតំ​ហ្វតាមីន​​រាប់​​ពាន់​គ្រាប់​​ពី​លោកដារ៉ា ​គឺ​ជា​ភ័ស្តុ​តា​ង​​ដ៏​សំ​ខាន់​​នៅ​ក្នុ​ង​រឿ​ង​ក្តី​នេះ​។​ លោក​បន្តថា“ ឯក​សារ​នេះ​​​រក​ឃើញ​​ក្នុង​​ថត​តុ​​របស់​​ចៅ​ក្រម​។ឯក​សារ​​​ទាំ​ង​នេះ ​គឺ​ជា​ភ័ស្តុតា​ង​​ ដែលអា​ច​​ចោទ​​លោក​ ដារ៉ាបា​ន​”។ លោកម៉ៃវណ្ណដានី ​មេធាវី​​របស់​លោកដារ៉ាបា​ន​មា​ន​ប្រ​សាសន៍​កា​ល​ពី​ម្សិល​មិញ​ថា ​ខណៈ​ដែ​ល​លោក​មិន​ទាន់​ឃើញ​ឯក​សារ​នេះ លោក​មិន​​ទាន់​ដឹង​​ច្បាស់​ថា ​វាជា​ឯក​​សារ​​ដើ​ម​នោះ​ទេ​។ ​​លោក​មា​ន​ប្រ​សាសន៍​ថា “ ខ្ញុំ​មិន​ដឹង​ថាតើ​ឯក​សារ​ទំាង​នោ​ះ ពិត​ប្រាកដ ឬ​មិន​មែន​នោះ​ទេ ព្រោះ​​វា​បាត់​យូ​រ​ហើយ។តើ​ឯក​សារ​​នោះ​ត្រូ​វ​បា​ន​រក​ឃើញ​​មែន​ទេ​ ឬ​​ពួក​គេ​​បង្កើត​​ឯកសារ​ ដើម្បី​​ចោទ​ប្រកា​ន់​កូ​នក្តី​របស់​ខ្ញុំ​ ពី​ព្រោះ​វា​​ជា​ឯក​សារ​សំ​ខាន់​​ដែ​ល​​ចោទ​គាត់​​​ពី​បទឧក្រិដ្ឋ​ឬ?”។ ​បើទោ​ះ​​ជា​អ្នក​ស្រី​ ទុយធីដើម​ឡើយ​​​បា​ន​ប្រាប់​​នគរបា​ល​ថាខ្លួន​​បាន​ទិញ​ថ្នាំ​ញៀន​មេតំ​ហ្វេតាមីន​​ចំ​នួន​​២.០០០គ្រាប់​​​ពី​លោក ដារ៉ា  ​ក្នុង​ឆ្នាំ​២០១០ ​អំឡុង​​ផ្តល់​​សក្ខី​កម្ម​របស់​អ្នក​ស្រីនៅ​ក្នុ​ង​​កា​រ​បើក​សវនា​កា​របណ្តឹង​ឧទ្ធរណ៍​​កា​ល​ពី​ក្នុ​ង​ខែ​​សី​ហា ​អ្នក​ស្រី​​បា​នភ្លេច​ពាក្យ​សម្តី​ និង​បា​ន​​បដិ​សេធ​​ដាច់​ខាត​​ថា ​មិន​បាន​ទិញ​ថ្នាំ​ញៀន​​ពី​អតីត​ប្រធាន​នគរបាល​រូប​នេះ​ទេ​។ សាលា​ឧទ្ធរណ៍​​នឹង​ប្រកាស​សាល​​ដីកា​​នៅ​​ថ្ងៃ​ទី​​៣១ ​ខែ​ធ្នូ​៕ ប្រែសម្រួលដោ​យ​ចេវប៊ុននី​​​​​  

ជ្រើស​រើស​ទីតាំង​ទី​១​​​សម្រាប់​ប្រជា​ពលរដ្ឋ​ដែល​ត្រូវ​​ផ្លាស់​ទី​លំនៅ​​ដោយ​សារ​​ទំនប់​ទន្លេសេសានក្រោម

អាជ្ញាធរ​ខេត្ត​កាល​ពី​ថ្ងៃ​អង្គារ​បានជូន​ដំណឹង​ដល់​​ប្រជា​ពលរ​ដ្ឋ​ប្រហែល​៥០០​គ្រួសារ​នៅ​ក្នុង​ខេត្ត​ស្ទឹង​ត្រែង​ថា មន្ត្រី​បាន​សម្រេចជ្រើស​រើស​ទីតាំង​ថ្មី​មួួយ​កន្លែង​​សម្រាប់​ឲ្យ​ពួកគាត់​រស់​នៅ​បន្ទាប់​ពី​គេ​តម្រូវ​ឲ្យពួកគាត់ផ្លាស់​​ទីលំនៅ​​មុន​ពេល​សាង​សង់​ទំនប់​ទន្លេ​សេសាន​ក្រោម​២។​ កាល​ពី​លើក​មុនអាជ្ញាធរ​​មូល​ដ្ឋាន​គ្រោង​​ឲ្យ​ពួក​គាត់​តំាង​លំនៅ​ក្នុង​ទី​តាំង​មួយ ​ដែល​ស្ថិត​ក្នុង​ឃុំ​ស្រែ​គរ​ ជា​ទី​រហោ​ឋាន​និង​មិន​អាច​ប្រកប​របរ​កសិកម្ម​បាន​។​ លោក​ ឡូយសុផាតអភិបាល​ខេត្ត​ស្ទឹង​ត្រែង​បាន​មានប្រសាសន៍​ថា ទី​តាំង​ថ្មី​នេះ​អ្នក​ភូមិ​ចូល​ចិត្ត​ជាង​។​លោក​បាន​បន្ថែម​ថា ក្រុម​ហ៊ុនរ៉ូយ៉ាល់​គ្រុប​ និង​ក្រុម​ហ៊ុនហាយដ្រូ​ឡាន​កាង (Hydrolancang)​​​​​​​​ ដែល​​សាងសង់​ទំនប់​នេះ​កំពុង​ទទួល​ខុសត្រូវ​ក្នុង​ការ​សាង​សង់​លំនៅ​ដ្ឋាន​ថ្មី​ឲ្យ​ពួកគាត់​។ លោក​ សុផាត​ បាន​មានប្រសាសន៍​ពាក់​ព័ន្ធ​នឹង​ទីតាំង​ថ្មី​ដែល​ស្ថិត​នៅចម្ងាយ​ប្រហែល​១៥​គីឡូ​ម៉ែត្រពី​ឃុំ​ស្រែគរ​ក្បែរ​​ទន្លេ​សេសាន​​ថា “ យើង​ចង់​ឲ្យ​ក្រុម​ហ៊ុន​ចាប់​ផ្ដើម​ប្រគល់​ប្រាក់​សំណង​ឲ្យ​គ្រួសារ​ដែល​រង​ផល​ប៉ះ​ពាល់​​ទាំង​អស់​​ត្រឹម​ដើម​ឆ្នាំ​២០១៣ដើម្បី​ឲ្យ​ពួកគាត់​អាច​ចាប់​ផ្ដើម​បង្ក​បង្កើន​ផលបាន”។​ ​លោកសុផាតបាន​បន្ត​ថាអ្នក​ភូមិ​នៅ​ក្នុង​ឃុំ​ក្បាល​រមាស ប្រហែល​​៣០០​គ្រួសារ​ដែល​បាត់​បង់​លំនៅ​ដ្ឋាន​ដោយ​សារ​តែ​ការ​សាង​សង់​ទំនប់​​នេះ​​បាន​ស្នើ​សុំ​ទី​តាំង​សង់​លំនៅ​ដ្ឋាន​ថ្មី​តាមបណ្ដោយ​ផ្លូវ​ជាតិ​លេខ​៧៨​ដែល​មួយ​ផ្នែក​​នៅ​ជាប់​នឹង​ខេត្ត​មណ្ឌល​គិរី។​ប៉ុន្ដែ​ ទោះ​យ៉ាង​ណា​ អាជ្ញា​ធរ​នៅ​មិន​ទាន់​​បាន​សម្រេចថា តើ​គួរឲ្យ​គ្រួសារ​​​ទាំង​នេះ​តាំង​លំនៅ​ដ្ឋានថ្មី ​នៅ​កន្លែង​ណា​នោះ​ទេ។ គម្រោង​សាងសង់​ទំនប់​វារី​អគ្គិសនី​កម្លាំង​៤០០​មេហ្គាវ៉ាត់​ដែល​មាន​ឈ្មោះ​ថា ទំនប់​វារី​អគ្គិសនី​សេសាន​ក្រោម​២​នេះ ត្រូវ​បាន​ទី​ស្ដី​ការ​គណៈរដ្ឋ​មន្ត្រី​អនុម័តឲ្យ​សាងសង់​​កាលពីដើម​ខែ​នេះ និង​កំណត់​ឲ្យ​អ្នក​ភូមិ​​ប្រហែល​​៥.០០០​គ្រួសារនៅ​​ក្នុង​ស្រុក​សេសានផ្លាស់​លំនៅ​ដ្ឋាន។​​​​​ ​​​​​លោក​ ចាន់​ ថនតំណាង​សហគមន៍​ក្នុង​ឃុំ​ស្រែ​គរបាន​មាន​ប្រសាសន៍​​ថា លោក​សប្បាយ​​ចិត្ត​ណាស់​ដែល​អ្នក​ភូមិ​នៅ​ក្នុង​ឃុំ​របស់​លោក​​ទទួល​បាន​ទីតាំង​សង់​លំនៅ​ដ្ឋាន​ថ្មី​តាម​សំណើ។ លោក​បាន​មាន​ប្រសាសន៍​បន្ដថា “ យើង​កំពុងតែ​អំពាវ​នាវ​ឲ្យ​រដ្ឋា​ភិបាល​និង​ក្រុម​ហ៊ុន​ដែល​ពាក់​ព័ន្ធ​ចុះ​វាស់​វែង​ដី​ក្នុង​ទីតាំង​ថ្មី​នេះ​ឲ្យ​ពួក​យើង​ដោយ​ផ្ទាល់ ​​ហើយ​ការ​វាស់​វែង​ដី​នេះ​គួរតែ​ប្រព្រឹត្ត​ទៅ​ដោយ​យុត្តិ​ធម៌​និង​គ្មាន​សម្ពាធ ឬ​ការ​បង្ខំ”។ ឯក​សារ​ចុះ​ថ្ងៃទី​៣១ ​ខែ​តុលា​ ដែល​ទទួល​បាន​ពី​ក្រសួង​ឧស្សាហកម្ម​ រ៉ែនិង​ថាម​ពល​ចែង​ថា ក្រុម​ហ៊ុន​នឹង​ទុក​ប្រាក់​ចំនួន​៨,២៨​លាន​ដុល្លារសម្រាប់​ជា​ប្រាក់​សំណង​ដល់​អ្នក​ភូមិ។ ប៉ុន្ដែ​ទោះ​ជា​យ៉ាង​ណា ឯកសារ​នោះ​មិន​បាន​បញ្ជាក់​ថាតើ​ពេល​ណាឬ​នរណា​​ជាអ្នក​​​បែង​ចែក​ប្រាក់​បុន្មាន​ទៅ​ឲ្យ​គ្រួសារ​នីមួយ​ៗ​នោះទេ៕​​ប្រែ​សម្រួល​ដោយហមសុផាណ្ណា​​​