TAG
payall
នគរបាលនិងកងរាជអាវុធហត្ថរារាំងអ្នកភូមិមិនឲ្យដាក់ញត្តិទៅកាកបាទក្រហម
កាលពីម្សិលមិញ នគរបាលនិងកងរាជអាវុធហត្ថរាជធានីបានរារាំងអ្នកភូមិមួយក្រុមប្រហែល១០០នាក់មកពីខេត្តក្រចេះ ដែលបានព្យាយាមដាក់ញត្តិនៅទីស្នាក់ការកាកបាទក្រហមកម្ពុជាក្នុងរាជធានីភ្នំពេញ ដោយបានអំពាវនាវឲ្យកាកបាទក្រហមជួយដោះស្រាយវិវាទដីធ្លីរបស់ពួកគាត់ជាមួយក្រុមហ៊ុនចម្ការកៅស៊ូវៀតណាម។
នគរបាលនិងកងរាជអាវុធហត្ថប្រហែល៥០នាក់ប្រដាប់ដោយខែលបង្ក្រាបបាតុកម្ម និងដំបងឆក់ បានមកជួបក្រុមអ្នកភូមិនៅម៉ោងប្រហែល៨ និង៣០នាទីព្រឹកក្បែរវត្តសាមគ្គីរង្សី ដែលពួកគាត់បានស្នាក់នៅបណ្ដោះអាសន្ន ហើយបានប្រាប់ពួកគាត់ឲ្យត្រឡប់ទៅវត្តនោះវិញ។
លោក ជា ស៊្រូ អាយុ៤៥ឆ្នាំ ជាសមាជិកសហគមន៍ដែលត្រូវបានបណ្ដេញចេញពីឃុំឃ្សឹម ស្រុកស្នួល បាននិយាយថា "យើងគ្រាន់តែចង់ដាក់ញត្តិទៅកាកបាទក្រហមកម្ពុជា ដើម្បីសុំជំនួយតែប៉ុណ្ណោះ ប៉ុន្តែនគរបាលនិងកងរាជអាវុធហត្ថប្រហែល៥០នាក់បានរារាំងពួកយើងមិនឲ្យទៅដាក់ញត្តិ ហើយពួកគេបានរុញច្រានពួកយើងឲ្យត្រឡប់ទៅវត្តក្បែរនោះវិញ"។
ចាប់តាំងពីត្រូវបានបណ្ដេញចេញកាលពីថ្ងៃទី២ ខែឧសភា ដោយក្រុមហ៊ុនវៀតណាម ប៊ិញភឿក២ (Binh Phoeuk 2) អ្នកភូមិមួយក្រុមនេះ ដែលបុព្វហេតុរបស់ពួកគាត់ត្រូវបានគាំទ្រដោយលោក សម រង្ស៊ី មេដឹកនាំគណបក្សប្រឆាំងនៅតាមទំព័រហ្វេសបុ៊ករបស់លោកនោះ បានធ្វើយុទ្ធនាការនៅក្នុងរាជធានីភ្នំពេញព្យាយាមដាក់ញត្តិទៅស្ថាប័នរដ្ឋាភិបាល និងស្ថានទូតនានាឲ្យជួយដោះស្រាយវិវាទដីធ្លីរបស់ពួកគាត់។
លោក ឃួង ស្រេង អភិបាលរងរាជធានីភ្នំពេញបានមានប្រសាសន៍ថា លោកទទួលបានញត្តិពីអ្នកភូមិទាំងនេះហើយ ហើយបានប្រគល់ទៅកាកបាទក្រហមកម្ពុជា ប៉ុន្តែលោកបានអះអាងថា ក្រុមអ្នកភូមិមានហេតុផលលាក់បាំង ហើយលោកចង់ឲ្យពួកគាត់ចាកចេញពីរាជធានីវិញ។
ដោយសំដៅយ៉ាងច្បាស់ទៅលើគណបក្សសង្គ្រោះជាតិ លោកបានមានប្រសាសន៍ថា "យើងកំពុងស្វែងរកការពិត ពីព្រោះប្រជាពលរដ្ឋមិនមែនមកពីខេត្តក្រចេះតែមួយទេ ប៉ុន្តែពួកគាត់មកពីគ្រប់ទីកន្លែង ដើម្បីបម្រើផលប្រយោជន៍គណបក្សនយោបាយ"។
លោក ឃួង ស្រេង បានមានប្រសាសន៍ថា លោកនឹងជួបជាមួយអាជ្ញាធរខេត្តក្រចេះ និងខេត្តកំពង់ចាមនៅថ្ងៃស្អែក ដើម្បីសម្រេច ថាតើត្រូវដោះស្រាយបែបណាជាមួយពួកគាត់។
លោកបានបន្ថែមថា "យើងនឹងមិនអនុញ្ញាតឲ្យពួកគាត់ស្នាក់នៅតាមវត្តទេ ហើយពួកគាត់គួរត្រឡប់ទៅផ្ទះវិញ ពីព្រោះរាជធានីភ្នំពេញមិនមែនជាកន្លែងសម្រាប់ពួកគាត់ប្រមូលផ្ដុំគ្នា និងធ្វើសកម្មភាពបម្រើគណបក្សនយោបាយឡើយ"។
តំណាងកាកបាទក្រហមកម្ពុជា ដែលកាលពីដើមខែនេះបានរៃអង្គាសប្រាក់បានប្រហែល១៤,៣លានដុល្លារ ដោយប្រើពាក្យស្លោកថា "ទីណាមានទុក្ខលំបាក ទីនោះមានកាកបាទក្រហមកម្ពុជា" បានមានប្រសាសន៍ថា កាកបាទក្រហមគ្មានសមត្ថកិច្ចជួយក្រុមអ្នកភូមិទេ។
លោក អ៊ុយ សំអាត ប្រធាននាយកដ្ឋានគ្រប់គ្រងគ្រោះមហន្តរាយនៅកាកបាទក្រហមកម្ពុជាបានសួរថា "ពួកគាត់មកកាកបាទក្រហមប្ដឹងអំពីស្ថានភាពដីធ្លីរបស់ពួកគាត់ តើបងប្អូនគិតថា វាជាសមត្ថកិច្ចរបស់កាកបាទក្រហមឬ?”។ លោកបានបន្ថែមថា "ពួកគាត់ស្នើឲ្យកាកបាទក្រហមជួយអន្តរាគមន៍ដើម្បីដោះស្រាយវិវាទដីធ្លី... ពួកគាត់ត្រូវទៅរករដ្ឋាភិបាលវិញ"។ លោកបានបដិសេធមិនធ្វើអត្ថាធិប្បាយបន្ថែមទេ។
ទោះជាយ៉ាងណា លោកស្រី ធីម ណារិន អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តក្រចេះបានមានប្រសាសន៍ថា ស្ថានភាពអស់សង្ឃឹមរបស់អ្នកភូមិដែលត្រូវគេបណ្ដេញចេញ គឺស្ថិតក្នុងដែនសមត្ថកិច្ចកាកបាទក្រហមកម្ពុជាដែលត្រូវជួយ។
លោកស្រីបានមានប្រសាសន៍ថា "ខ្ញុំគិតថា ការដាក់ញត្តិទាមទារឲ្យកាកបាទក្រហមកម្ពុជាជួយនោះ គឺជារឿងត្រឹមត្រូវហើយ ពីព្រោះឥឡូវនេះពួកគាត់កំពុងប្រឈមនឹងការលំបាកនិងគ្មានផ្ទះសំបែង"។ លោកស្រីបានបន្ថែមថា "ពួកគាត់ប្រឈមនឹងការលំបាកខ្លាំងណាស់ ដូច្នេះកាកបាទក្រហមកម្ពុជាត្រូវប្រឹងប្រែងជួយដោះស្រាយបញ្ហាជូនប្រជាពលរដ្ឋទាំងនេះ"៕ សារុន
សាលាដំបូងរាជធានីចោទប្រកាន់ស្ត្រីម្នាក់និងបុរសម្នាក់ពីបទជួញដូរអនីតិជនថ្លង់មានមេរោគអេដស៍
កាលពីម្សិលមិញ សាលាដំបូងរាជធានីភ្នំពេញ បានបើកសវនាការជំនុំជម្រះក្តីរបស់ស្ត្រីម្នាក់ និងបុរសសមគំនិតម្នាក់ ដែលត្រូវបានចោទប្រកាន់ពីបទជួញដូរក្មេងស្រីគថ្លង់ម្នាក់អាយុ១៣ឆ្នាំម្នាក់ ដែលកើតរោគអេដស៍នៅផ្ទះបនមួយ ក្នុងខណ្ឌចំការមន។
សវនាការជំនុំជម្រះនេះ ធ្វើឡើងនៅក្នុងបន្ទប់បិទទ្វារ ដោយសារមានវត្តមានរបស់ជនរងគ្រោះអនីតិជន។ បន្ទាប់ពីសវនាការបានបញ្ចប់ លោកស្រី គឹម ដានី ប្រធានក្រុមប្រឹក្សាជំនុំជម្រះបានមាន ប្រសាសន៍ថា “ឈ្មាះ លួញ ចាន់ អាយុ២៨ឆ្នាំ និងឈ្មោះ ឯម សុភា អាយុ៤៤ឆ្នាំ ត្រូវបានចោទប្រកាន់ពីបទជួញដូរ នៅផ្ទះបនមួយកន្លែង សម្រាប់ការរួមភេទ”។
អ្នកស្រីបានបន្ថែមថា តុលាការបានចេញដីកាចាប់ខ្លួនឈ្មោះ លួញ ចាន់ ដែលកំពុងត្រូវបានកាត់ទោសកំបាំងមុខ បន្ទាប់ពីគេចខ្លួនពីការតាមចាប់។ ឈ្មោះ សុភា និងឈ្មោះ លួញ ចាន់ ត្រូវបានចោទប្រកាន់កាលពីខែកក្កដា បន្ទាប់ពីនគរបាលទទួលបានពាក្យបណ្តឹងពីលោក សុខ ផល្លា នាយកប្រតិបត្តិនៃអង្គការក្តីសង្ឃឹមថ្មីសម្រាប់កុមារកម្ពុជា (NHCC) ជាអង្គការក្រៅរដ្ឋាភិបាលដែលជួយកុមារកើតជំងឺអេដស៍ និងបានផ្តល់ផ្ទះមួយខ្នងឲ្យជនរងគ្រោះរូបនេះ ចាប់តាំងពីឪពុកម្តាយរបស់នាងបានស្លាប់ដោយសារជំងឺអេដស៍កាលពីប្រាំឆ្នាំមុន។
ជនរងគ្រោះ ដែលរស់នៅឯមណ្ឌលកុមារកំព្រា NHCC នៅក្នុងខេត្តកំពង់ស្ពឺ បានចេញទៅលេងផ្ទះមិត្តរួមថ្នាក់របស់នាងម្នាក់ ក្នុងរាជធានីភ្នំពេញកាលពីខែមិថុនា ហើយក្រោយមកនាងក៏បានបាត់ខ្លួនអស់រយះពេលពីរថ្ងៃ។ នៅពេលនាងត្រឡប់មកវិញ នាងបានប្រាប់បុគ្គលិកថា នាងត្រូវបានគេបញ្ជូនទៅផ្ទះបនមួយកន្លែងនៅក្នុងរាជធានីភ្នំពេញ និងត្រូវបានគេរំលោភ។
លោក សាន សុដាឡែន មេធាវីរបស់ជនរងគ្រោះបានមានប្រសាសន៍ថា នាងបានចំណាយពេលមួយយប់នៅផ្ទះបនមួយក្នុងសង្កាត់ទន្លេបាសាក់ ជាទីដែលនាងត្រូវបានបង្ខំឲ្យរួមភេទជាមួយបុរសច្រើននាក់ មុនពេលនាងរត់ចេញបាន។
លោក ផល្លា នាយកប្រតិបត្តិអង្គការ NHCC បានឲ្យដឹងបន្តទៀតថា លទ្ធផលធ្វើកោសល្យវិច័យបានបញ្ជាក់ថាក្មេងស្រីនេះត្រូវបានគេរំលោភ។ លោក ផល្លា បានមានប្រសាសន៍ថា “យើងបានបញ្ជូននាងទៅមន្ទីរពេទ្យមួយក្នុងក្រុងតាខ្មៅ ហើយវេជ្ជបណ្ឌិតម្នាក់បានប្រាប់នគរបាលថា នាងត្រូវបានរំលោភ”។
លោក សូដាឡែន មេធាវីរបស់ជនរងគ្រោះបានឲ្យដឹងថា ឈ្មោះ សុភា បានច្រានចោលការចោទប្រកាន់ខ្លួនកាលពីម្សិលមិញ ដោយប្រាប់តុលាការថា ខ្លួនបានចេញក្រៅ នៅពេលដែលជនរងគ្រោះទៅផ្ទះរបស់ខ្លួនដើម្បីលេងជាមួយកូនស្រីរបស់ខ្លួន។
អ្នកស្រី ជា សារុន អាយុ៣៣ឆ្នាំ ជាអ្នកមើលថែកុមារនៅមណ្ឌលកុមារកំព្រា ដែលជាសាក្សីម្នាក់ក្នុងរឿងនេះ បានឲ្យដឹងបន្ទាប់ពីការជំនុំជម្រះក្តីបានបញ្ចប់ថា “យើងដឹងថា នាងបានបាត់ខ្លួនមួយយប់ក្នុងខែមិថុនា ហើយនៅពេលនាងត្រឡប់មកមណ្ឌលវិញ នាងមើលទៅស្ថិតក្នុងស្ថានភាពយ៉ាប់យ៉ឹន”។
អ្នកស្រី ជា សារុន បានមានប្រសាសន៍ថា “នាងបានប្រាប់ខ្ញុំថានាងត្រូវបានគេឃុំទុក ហើយរំលោភ”។ ឈ្មោះ សុភា ត្រូវប្រឈមនឹងការផ្តន្ទា ទោសឲ្យជាប់ពន្ធនាគាររយះពេល២០ឆ្នាំ ពីបទជួញដូរអនីតិជន។ ការជំនុំជម្រះក្តីនឹងបន្តនៅថ្ងៃនេះ៕ ប៊ុននី
ក្រុមហ៊ុនទូរស័ព្ទចល័តទាំងប្រាំបីគ្រោងជួបប្រជុំជាមួយបញ្ញត្តិករទូរគមនាគមន៍កម្ពុជានៅថ្ងៃច័ន្ទ
មន្ត្រីមួយរូបបានបញ្ជាក់កាលពីម្សិលមិញថា ក្រុមហ៊ុនបម្រើសេវាទូរស័ព្ទចល័តទាំងប្រាំបីនៅក្នុងប្រទេសកម្ពុជា គ្រោងជួបប្រជុំជាមួយបញ្ញត្តិករទូរគមនាគមន៍កម្ពុជានៅថ្ងៃច័ន្ទខាងមុខនេះ ដើម្បីត្រួតពិនិត្យឡើងវិញនូវច្បាប់កាលពីឆ្នាំ២០០៩ ដែលបានកំណត់នូវតម្លៃអប្បបរមាសម្រាប់ការហៅទូរស័ព្ទ។
លោក ឡាយ ម៉ារីវ៉ូ អនុប្រធានបញ្ញត្តិករទូរគមនាគមន៍កម្ពុជា បានមានប្រសាសន៍ថា “ យើងបានផ្ញើលិខិតអញ្ជើញទៅឲ្យក្រុមហ៊ុន...។ កិច្ចប្រជុំនេះគ្រោងពិភាក្សាអំពីតម្លៃ និងដើម្បីព្យាយាមកំណត់អត្រាទាបជាងមុន”។
តម្លៃអប្បបរមានាពេលបច្ចុប្បន្នមានកម្រិត៤,៥សេនក្នុងមួយនាទីសម្រាប់ការហៅទូរស័ព្ទក្នុងប្រព័ន្ធ និងមានកម្រិត៥,៩៥សេនសម្រាប់ការហៅឆ្លងប្រព័ន្ធ។ កាលពីថ្ងៃទី២៦ខែមេសា បញ្ញត្តិករទូរគមនាគមន៍កម្ពុជា បានបញ្ជាឲ្យក្រុមហ៊ុនបម្រើសេវាទូរស័ព្ទចល័តទាំងអស់អនុវត្តតាមច្បាប់ ហើយនៅក្នុងសប្តាហ៍នេះ ក្រុមហ៊ុនបម្រើសេវាទូរស័ព្ទចល័តធំជាងគេចំនួនពីរនៅក្នុងប្រទេសកម្ពុជា គឺក្រុមហ៊ុន ស្មាត (Smart) និងក្រុមហ៊ុន ម៉ូប៊ីថែល (MobiTel)មានភាពប្រទាញប្រទង់ជាមួយគ្នាជុំវិញបញ្ហាថា តើក្រុមហ៊ុនទាំងអស់នៅក្នុងទីផ្សារគួរតែត្រូវគោរពតាមការកំណត់តម្លៃអប្បបរមា ឬក៏អត់។
លោក ថូម៉ាស ហាន់ (Thomas Hundt)...