TAG
paywall
តុលាការបន្តដោះលែងអ្នកទោសពាក់ព័ន្ធបទល្មើសតូចតាច ខណៈដែលអនុក្រឹត្យឲ្យលុបចោលឡូត៍នេសាទ
ប៉ុន្មានថ្ងៃប៉ុណ្ណោះបន្ទាប់ពីលោកនាយករដ្ឋមន្ត្រី ហ៊ុនសែនបានប្រកាសឲ្យលើកលែងទោសទូទៅដល់ជនសង្ស័យ និងទណ្ឌិតទាំងអស់ដែលបានជាប់ពន្ធនាគារ ពីបទល្មើសនេសាទតូចតាចនោះ កាលពីម្សិលមិញលោកនាយករដ្ឋមន្ត្រីបានចុះហត្ថលេខាឲ្យអនុក្រឹត្យមួយចូលជាធរមានដើម្បីបិទឡូត៍នេសាទពាណិជ្ជកម្មនៅទូទាំងប្រទេស។
កាលពីខែមុនលោក ហ៊ុន សែន បានប្រកាសថា លោកនឹងលុបចោលឡូត៍នេសាទទាំងអស់ ដើម្បីបង្កើនបរិមាណត្រីសម្រាប់ប្រជានេសាទដែលនេសាទសម្រាប់ទប់ទល់ជីវភាព។
នៅក្នុងអនុក្រឹត្យមួយមាន៨មាត្រាដែលត្រូវបានចុះហត្ថលេខាកាលពីម្សិលមិញ លោក ហ៊ុនសែន បានបញ្ជាឲ្យលុបចោលឡូត៍នេសាទជាបន្ទាន់នៅក្នុងខេត្តបាត់ដំបងសៀមរាបពោធិ៍សាត់ កំពង់ឆ្នាំងនិងខេត្តកំពង់ធំ។ឡូត៍នេសាទនៅក្នុងខេត្តបន្ទាយមានជ័យត្រូវបញ្ជាឲ្យលុបចោលនៅថ្ងៃទី១០ខែមេសា។
ក្រុមព្រះរាជអាជ្ញាអមសាលាដំបូងខេត្តដែលបានអនុវត្តតាមការប្រកាសរបស់លោកហ៊ុនសែនឲ្យមានការលើកលែងទោសនេះបាននិយាយកាលពីម្សិលមិញថាពួកគេកំពុងបន្តដោះលែងជនសង្ស័យទាំងឡាយណាដែលត្រូវបានចោទប្រកាន់ពីបទល្មើសនេសាទ។
លោកពេញវិបុលព្រះរាជអាជ្ញាអមសាលាដំបូងខេត្តកំពង់ឆ្នាំង បានលើកហេតុផលថា"តុលាការបានដោះលែងជនសង្ស័យទាំងអស់ ដែលជាប់ពាក់ព័ន្ធនឹងការនេសាទខុសច្បាប់ ពីព្រោះសម្តេចហ៊ុនសែនបានប្រកាសលុបចោលឡូត៍នេសាទ ហើយជនសង្ស័យទាំងនេះត្រូវបានចោទប្រកាន់ថាបានប្រព្រឹត្តបទល្មើស នៅក្នុងតំបន់ឡូត៍នេសាទទាំងនោះ"។
ក្រុមអ្នកជំនាញផ្នែកច្បាប់ បានសម្តែងកង្វល់ជុំវិញការលើកលែងទោសនេះដោយលើកឡើងថាការលើកលែងទោសបែបនេះផ្ទុយពីនីតិវិធីផ្លូវច្បាប់ ហើយវាទំនងជាការខិតខំរបស់រដ្ឋាភិបាល ដើម្បីធ្វើឲ្យមានការគាំទ្រកាន់តែច្រើនពីសាធារណជនអំឡុងពេលបោះឆ្នោត។
ទោះជាយ៉ាងណាកាលពីម្សិលមិញព្រះរាជអាជ្ញានានាបានបន្តអះអាងថាគ្មានអ្វីទាស់ខុសទេ ដែលលោកនាយករដ្ឋមន្ត្រីបញ្ជាឲ្យតុលាការដោះលែងអ្នកទោសបទល្មើសនេសាទនោះ។
លោកវិបុលដែលបានដោះលែងជនសង្ស័យប្រាំបួននាក់ ឲ្យនៅក្រៅឃុំកាលពីម្សិលមិញហើយបានបញ្ជូនជនសង្ស័យពីរនាក់ទៀតទៅកាត់ក្តីលឿនៗនិងត្រូវបានដកការចោទប្រកាន់ភ្លាមៗដែរនោះ...
នាយកស្ថានីយវិទ្យុសម្បុកឃ្មុំអំពាវនាវឲ្យធ្វើកំណែទម្រង់គណៈកម្មាធិការជាតិរៀបចំការបោះឆ្នោត
លោក ម៉មសូណង់ដូ នាយកស្ថានីយវិទ្យុសម្បុកឃ្មុំ ដែលជាស្ថានីយវិទ្យុឯករាជ្យបានអំពាវនាវសុំឲ្យធ្វើកំណែទម្រង់គណ:កម្មាធិការជាតិរៀបចំការបោះឆ្នោត ហៅកាត់ថាគ.ជ.បឲ្យបានមុនការបោះឆ្នោតឃុំ-សង្កាត់ដែលនឹងប្រព្រឹត្តទៅនាថ្ងៃទី៣ខែមិថុនាខាងមុខនេះ។
នៅក្នុងលិខិតផ្ញើជូនគណបក្សនយោបាយចំនួន៤០កាលពីថ្ងៃច័ន្ទ តាងនាមឲ្យសមាគមអ្នកប្រជាធិបតេយ្យ ហៅកាត់ថា AoD របស់លោក ម្ចាស់ស្ថានីយវិទ្យុនេះអះអាងថា គ.ជ.បដែល "ពោរពេញទៅដោយសមាជិកគណបក្សប្រជាជនកម្ពុជា"និងដែលមានទីស្នាក់ការនៅក្នុងក្រសួងមហាផ្ទៃនោះគឺមិនឯករាជ្យទេហើយក៏មិនអព្យាក្រឹតដែរ។
ខ្លឹមសារនៅក្នុងលិខិតនេះចោទប្រកាន់ គ.ជ.ប ថា បានអនុញ្ញាតឲ្យ"គណបក្សប្រជាជនកម្ពុជាកំពុងកាន់អំណាច ប្រព្រឹត្តទង្វើខុសច្បាប់និងបទឧក្រិដ្ឋមួយចំនួន" ហើយក៏បានលើកឡើងថា "ភាពអសកម្មនិងការលម្អៀងរបស់គ.ជ.ប បានបណ្តាលឲ្យមានបាតុកម្មតវ៉ា និងអំពើហិង្សាដែលមិនគួរកើតឡើង ក្រោយការបោះឆ្នោតនីមួយៗ"។
ខ្លឹមសារក្នុងលិខិតនេះក៏បានអំពាវនាវសុំឲ្យមានការរុះរើសមាសភាពរបស់ គ.ជ.ប តាមរយ:ការដាក់បញ្ចូល"បេក្ខជនឯករាជ្យ"ជំនួសសមាជិក ដែលគាំទ្រគណបក្សប្រជាជនកម្ពុជា និងសុំឲ្យការបោះឆ្នោតជាតិ ឆ្នាំ២០១៣ប្រព្រឹត្តទៅក្រោមការរៀបចំរបស់អន្តរជាតិ ដូចការបោះឆ្នោតឆ្នាំ១៩៩៣ដែលត្រូវរៀបចំឡើងដោយអ៊ុនតាក់ (UNTAC) អ៊ីចឹងដែរ។
លោកម៉មសូណង់ដូ មិនបានឆ្លើយតបចំពោះសំណើសុំការអត្ថាធិប្បាយបុ៉ន្មានលើក កាលពីម្សិលមិញនោះ គឺជាអ្នករិះគន់រដ្ឋាភិបាលជាយូរមកហើយ ហើយក៏ធ្លាប់បានជួបបញ្ហាបុ៉ន្មានដងដែរ ដោយសារតែទស្សនរិះគន់មិនសំចៃរបស់លោក។
កាលពីឆ្នាំ២០០៣លោកម៉មសូណង់ដូបានជាប់ពន្ធនាគារប៉ុន្មានថ្ងៃ និងត្រូវបានចោទប្រកាន់ពីបទផ្សព្វផ្សាយព័ត៌មានមិនពិត និងបទញុះញង់ប្រជាពលរដ្ឋឲ្យរើសអើង និងឲ្យប្រព្រឹត្តបទល្មើស ក្រោយពីមានការចោទប្រកាន់ថាលោកបានធ្វើសេចក្តីថ្លែងការណ៍ញុះញង់តាមវិទ្យុ បន្ទាប់ពីមានបាតុកម្មតវ៉ា ក្នុងរាជធានីភ្នំពេញ ដែលអំឡុងពេលនោះស្ថានទូតថៃ បានរងការបំផ្លាញ។
កាលពីឆ្នាំ២០០៥ លោកត្រូវបានចាប់ខ្លួនតាមការចោទប្រកាន់ទាក់ទិន នឹងបទសម្ភាសន៍ជាមួយក្រុមមួយនៅក្នុងទីក្រុងប៉ារីស ឈ្មោះគណ:កម្មាធិការព្រំដែនកម្ពុជា (Cambodia's Border Committee) ដែលបានរិះគន់គោលនយោបាយព្រំដែនរបស់រដ្ឋាភិបាលដោយនាំឲ្យអង្គការលើកលែងទោសអន្តរជាតិហៅ លោក ម៉ម សូណង់ដូ ថាជាអ្នកទោសមនសិការ។ លោកបានអនុវត្តទោសបីខែនៅ ក្នុងពន្ធនាគារព្រៃស ក្នុងរាជធានីភ្នំពេញ មុនពេលមានការលើកលែងការចោទប្រកាន់។
លោក ទេព នីថា អគ្គលេខាធិការរបស់ គ.ជ.ប បានមានប្រសាសន៍ថា លោកមិនទាន់បានឃើញខ្លឹមសារនៃលិខិតនេះទេ បុ៉ន្តែថាលោក ម៉ម សូណង់ដូ ប្រាកដជាគ្រាន់តែ និយាយឡើងវិញអំពីអ្វីដែលលោកធ្លាប់បាននិយាយជាច្រើនដងណាស់ហើយបុ៉ណ្ណោះ។
លោកបានមានប្រសាសន៍ថា "លិខិតរបស់លោក ម៉ម សូណង់ដូ មិនត្រឹមត្រូវទេ។ប្រសិនបើគាត់ចង់កែប្រែគ.ជ.បគាត់គួរតែសរសេរលិខិតផ្ញើទៅតំណាងរាស្ត្រក្នុងរដ្ឋសភា សុំឲ្យធ្វើវិសោធនកម្មច្បាប់នេះ មិនមែនសរសេរទៅគណបក្សទាំងនេះអ៊ីចឹងទេ"។
ដោយបដិសេធមិនធ្វើអត្ថាធិប្បាយអំពីសមាជិករបស់ គ.ជ.ប ដែលមានទំនាក់ទំនងនយោបាយនោះលោកថ្លែងបន្ថែមថា "ខ្ញុំសូមច្រានចោលរាល់អ្វីដែលលោកម៉មសូណង់ដូ លើកឡើង ប៉ុន្តែគាត់មានសិទ្ធិបញ្ចេញមតិ"៕
(រាយការណ៍បន្ថែមដោយអ៊ាងម៉េងឡេង)
ប្រែសម្រួលដោយតែម សុខុម
ប្រាំមួយខែហើយ មិនទាន់មានចម្លើយតបចំពោះលិខិតអ្នកជំនាញអន្តរជាតិ ស្តីពីសេសាន
អ្នកជំនាញផ្នែកជលផលរាប់សិបនាក់មកពីទូទាំងពិភពលោកបានផ្ញើលិខិតមួយច្បាប់ សម្តែងអំពីកង្វល់របស់ខ្លួនជូននាយករដ្ឋមន្ត្រីកម្ពុជានិងទីស្តីការគណៈរដ្ឋមន្ត្រី ដោយព្រមានថា ប្រសិនបើសំណង់ទំនប់វារីអគ្គិសនីទន្លេសេសានក្រោម២ ដំណើការដូចដែលបានគ្រោងទុកនោះវានឹងបង្កប៉ះពាល់ជាអវិជ្ជមានដល់មនុស្សរាប់មុឺននាក់ និងបង្កឲ្យមានអស្ថិរភាពក្នុងប្រទេសកម្ពុជានិងអាចប៉ះពាល់ដល់គោលដៅការអភិវឌ្ឍសហស្សវត្សរ៍ទៀតផង។
លិខិតនោះដែលបានផ្ញើនៅក្នុងខែកញ្ញានិងទទួលបានកាលពីម្សិលមិញបានលើកឡើងពីផលប៉ះពាល់របស់ទំនប់នេះ រាប់ទាំងផល
ប៉ះពាល់ទៅលើការបម្លាស់ទីរបស់ត្រី និងសុវត្ថិភាពស្បៀងអាហារ។ក៏ប៉ុន្តែរយៈពេលប្រាំមួយខែបន្ទាប់នោះវាទំនងជាធ្វើឲ្យមានការប៉ះពាល់តិចតួចហើយមន្ត្រីទីស្តីការគណៈរដ្ឋមន្ត្រីនិងមន្ត្រីខុទ្ទកាល័យរបស់លោកនាយករដ្ឋមន្ត្រីហ៊ុនសែននិយាយថា ពួកគេមិនដឹងអំពីលិខិតនោះទេ។
អ្នកវិទ្យាសាស្រ្តចំនួន២នាក់ បានសរសេរក្នុងលិខិតនោះថា “ យើងសរសេរនេះ ដើម្បីសម្តែងការព្រួយបារម្ភរបស់យើងថាប្រសិនបើទំនប់សេសាន២នេះត្រូវបានសម្រេចយល់ព្រម ដូចដែលបានគ្រោងឡើងនាពេលថ្មីៗនេះ ជាអកុសលនឹងបង្កឲ្យមានភាពក្រីក្រនិងកង្វះអាហារនៅក្នុងតំបន់ដ៏ធំមួយក្នុង
ប្រទេសកម្ពុជា ដូច្នេះការជំទាស់នឹងផែនការអភិវឌ្ឍន៍របស់រដ្ឋាភិបាលកម្ពុជាសម្រាប់ជាតិ រាប់ទាំងការប្រឹងប្រែងរបស់ខ្លួន ដើម្បីឈានទៅសម្រេចគោលដៅការអភិវឌ្ឍសហស្សវត្សរ៍សហប្រជាជាតិ”។ អ្នកវិទ្យាសាស្ត្របានបន្ថែមថា“យើងគិតថា ការបញ្ជាក់ច្បាស់អំពីស្ថានភាពទាំងនេះ គឺសំខាន់ណាស់”។
ក្រុមនេះបា៉ន់ប្រមាណនៅក្នុងលិខិតថាប្រជាពលរដ្ឋយ៉ាងតិច៧៨.០០០នាក់នៅខាងលើទំនប់នេះនឹងមិនអាចនេសាទត្រីបានដោយសារការបម្លាស់ទីរបស់ត្រី ចំណែកឯមនុស្សរាប់មឺុននាក់នៅខ្សែទឹកខាងក្រោម...
ជប៉ុន ស្នើឲ្យកម្ពុជា កាត់បន្ថយពន្ធនិងកែលម្អការគ្រប់គ្រងនៅកំពង់ផែ
កាលពីថ្ងៃអង្គារស្ថានទូតជប៉ុនប្រចាំរាជធានីភ្នំពេញ បានអំពាវនាវសុំឲ្យរដ្ឋាភិបាលកម្ពុជា ជួយលើកទឹកចិត្តដល់ការវិនិយោគរបស់ជប៉ុននៅក្នុងប្រទេសនេះ តាមរយៈការកាត់បន្ថយពន្ធលើប្រាក់ចំណេញរបស់ក្រុមហ៊ុននិងការកាត់បន្ថយពន្ធគយខ្ពស់ខ្លាំងដោយការអនុវត្តគោលនយោបាយមានតម្លាភាព និងមានប្រសិទ្ធភាពជាងនេះ។
យោងតាមសំណើមួយចំនួនដែលស្ថានទូតជប៉ុន បានត្រៀមសម្រាប់លើកឡើងនៅកិច្ចប្រជុំវិស័យរដ្ឋនិងឯកជនលើកទី៦រវាងកម្ពុជានិងជប៉ុននៅក្រុមប្រឹក្សាអភិវឌ្ឍន៍កម្ពុជា(CDC) បានឲ្យដឹងថាប្រទេសជប៉ុនចង់ឲ្យរដ្ឋាភិបាលគោរពតាមការសន្យាមួយដែលបានធ្វើឡើងកាលពីឆ្នាំមុន ដើម្បីកាត់បន្ថយពន្ធលើប្រាក់ចំណេញចំនួន២០ភាគរយរបស់កម្ពុជា សម្រាប់ក្រុមហ៊ុន ដែលចូលមករកស៊ីក្នុងទីផ្សារកម្ពុជា។
ប៉ុន្តែលោកសុខចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានមានប្រសាសន៍អំឡុងកិច្ចប្រជុំនេះថា លោកនឹងផ្តល់ការកាត់បន្ថយពន្ធលើប្រាក់ចំណេញដល់ក្រុមហ៊ុននានាតាមការជាក់ស្តែង ខណៈ ពេលដែលក្រុមអ្នកជំនាញបន្តលើកឡើងថាកម្ពុជាគួរតែបង្កើនប្រាក់ចំណូលរបស់ខ្លួនតាមរយៈការដំឡើងពន្ធ។
លោកថ្លែងថា“ខ្ញុំមិនគាំទ្រឲ្យក្រុមហ៊ុនទាមទារកាត់បន្ថយអត្រាពន្ធលើប្រាក់ចំណេញ ឬស្នើសុំពន្យារពេលបង់ពន្ធនោះឡើយ”។លោកបានថ្លែងបន្ថែមថា ទោះជាយ៉ាងណាក្រុមហ៊ុនមួយចំនួនទទួលបានការកាត់បន្ថយពន្ធលើប្រាក់ចំណេញរហូតដល់ទៅប្រាំមួយឆ្នាំឯណោះ។
លោក ចន ប្រ៊ីនស្តេន អនុប្រធានសភាពាណិជ្ជកម្មអន្តរជាតិនៃកម្ពុជា បានមានប្រសាសន៍កាលពីម្សិលមិញថា ការកាត់បន្ថយពន្ធលើប្រាក់ចំណេញសម្រាប់ក្រុមហ៊ុនថ្មីៗនឹងផ្តល់អត្ថប្រយោជន៍ដល់សេដ្ឋកិច្ចក្នុងស្រុក។
លោក ចន ប្រ៊ីនស្តេន បានមានប្រសាសន៍ថា “ ការកាត់បន្ថយពន្ធនេះនឹងបង្កលក្ខណ:កាន់តែងាយស្រួលសម្រាប់ក្រុមហ៊ុនធំៗ ដែលចង់ធ្វើការវិនិយោគរយ:ពេលវែង ដើម្បីនាំចូលនូវបច្ចេកវិទ្យាទំនើបៗ ក៏ដូចជាបង្កើនតម្លៃដល់កម្លាំងការងារផងដែរ។វាជាទង្វើដ៏ឆ្លាតវៃមួយ”។
អំឡុងកិច្ចប្រជុំកាលពីថ្ងៃអង្គារនេះក្រុមមន្ត្រីជប៉ុនក៏បានបង្ហាញវិធីមួយចំនួនសម្រាប់ដោះស្រាយដំណើរការដែលគ្មានប្រសិទ្ធភាព និងចំណាយអស់ប្រាក់ច្រើននៅកំពង់ផែធំៗចំនួនពីររបស់កម្ពុជា ដែលស្ថិតក្នុងរាជធានីភ្នំពេញ...
ក្មេងស្រីជនជាតិខ្មែរពីរនាក់ ត្រូវបានជួយសង្គ្រោះនៅក្នុងទីក្រុងប៉ាតាយ៉ា ប្រទេសថៃ
យោងតាមសេចក្តីរាយការណ៍ព័ត៌មានក្នុងស្រុករបស់ថៃបានឲ្យដឹងថា ក្មេងស្រីខ្មែរពីរនាក់ត្រូវបានជួយសង្គ្រោះក្នុងប្រទេសថៃ កាលពីថ្ងៃអាទិត្យ បន្ទាប់ពីពួកគេទាំងពីរនាក់ ត្រូវបានគេលក់ឲ្យទៅធ្វើការនៅរមណីយដ្ឋានមួយនៅតាមឆ្នេរសមុទ្រក្នុងក្រុងប៉ាតាយ៉ា។
យោងតាមព័ត៌មាន Pattaya Daily និង Pattaya People បានរាយការណ៍ថា ក្មេងស្រីទាំងពីរនាក់នេះមានអាយុ៧ឆ្នាំនិង១០ឆ្នាំ តាមចោទថា ត្រូវបានស្ត្រីជនជាតិវៀតណាមម្នាក់នាំយកទៅលក់ឲ្យគេ ហើយស្ត្រីនេះបានប្រាប់ពួកគេថា ពួកគេនឹងត្រូវកាត់ដៃនិងជើងចោល ប្រសិនបើពួកគេមិនព្រមទៅលក់គ្រឿងអលង្ការ កាឡៃនិងស្ករគ្រាប់នៅតាមឆ្នេរសមុទ្រទេនោះ។
សេចក្តីរាយការណ៍ទាំងនេះបានឲ្យដឹងថា ស្ត្រីជនជាតិវៀតណាមរូបនេះបានទិញក្មេងស្រីទាំងពីរនាក់នេះពីឪពុកម្តាយរបស់ពួកគេក្នុងប្រទេសកម្ពុជា ហើយបានលើកឡើងទៀតថាអាជីវករលក់ដូរនៅតំបន់ឆ្នេរសមុទ្របានប្រទះឃើញក្មេងស្រីទាំងពីរនាក់នេះត្រូវស្ត្រីរូបនេះវាយដំ និងបានចាប់ពួកគេប្រគល់ឲ្យនគរបាលមូលដ្ឋាន ដែលបានយកពួកគេទៅឃុំក្នុងមណ្ឌលទប់ស្កាត់ការជួញដូរមនុស្សក្នុងក្រុងប៉ាតាយ៉ា។
លោកជីវផល្លីអនុប្រធាននាយកដ្ឋានប្រឆាំងការជួញដូរមនុស្សនិងការពារអនីតិជនក្រសួងមហាផ្ទៃបានមានប្រសាសន៍ថា លោកមិនបានទទួលព័ត៌មានអំពីរឿងនេះទេ ប៉ុន្តែលោកនឹងធ្វើការស៊ើបអង្កេតលើរឿងនេះ។
លោក ចាន់ សុវ៉េត អនុប្រធានផ្នែកអង្កេតនៅអង្គការសិទ្ធិមនុស្សអាដហុក បានមានប្រសាសន៍ថា បញ្ហាឪពុកម្តាយលក់កូនស្រីរបស់ខ្លួនគឺជារឿងគួរឲ្យបារម្ភ។ លោកបានមានប្រសាសន៍ថា “រឿងទាំងនេះកើតឡើងមិនមែនតែនៅក្នុងប្រទេសថៃប៉ុណ្ណោះទេ ប៉ុន្តែនៅក្នុងប្រទេសវៀតណាមក៏មានដែរ។បណ្តោយឲ្យកូនៗរបស់ខ្លួនលក់របស់របរដូចជាផ្កានៅតាមផ្លូវ។ ពួកគេប្រឈមនឹងហានិភ័យខ្លាំងណាស់ មិនត្រឹមតែត្រូវបានបង្ខំឲ្យធ្វើការ
ប៉ុណ្ណោះទេ គឺថែមទាំងអាចរងគ្រោះពីការរំលោភបំពានផ្លូវភេទទៀតផង៕
ប្រែសម្រួលដោយ សោមសារុន
អ្នកដំណើរប្រាំបីនាក់ រងរបួស ដោយសាររថយន្តក្រុងក្រឡាប់
អ្នកធ្វើដំណើរប្រាំបីនាក់ បានរងរបួសពេលរថយន្តក្រុងមួយគ្រឿង បានក្រឡាប់នៅក្នុងខេត្តបន្ទាយមានជ័យ កាលពីល្ងាចថ្ងៃអង្គារ។ ឧប្បតិ្តហេតុនេះបង្ហាញឲ្យឃើញថា ជាគ្រោះថ្នាក់រថយន្តក្រុងដ៏ធ្ងន់ធ្ងរលើកទី៣ នៅក្នុងរយៈពេលមួយសប្តាហ៍ ដោយបានធ្វើឲ្យមានការបារម្ភ ចំពោះការគោរពគោលការណ៍សុវត្ថិភាពរបស់បណ្តាក្រុមហ៊ុនដឹកអ្នកដំណើេរ។
លោក ខេង ស៊ុំ ស្នងការនគរបាលខេត្តបន្ទាយមានជ័យ បានឲ្យដឹងថា រថយន្តក្រុងរបស់ក្រុមហ៊ុន រិទិ្ធ មុនី មួយគ្រឿងនេះ ចេញដំណើរពីក្រុងប៉ោយប៉ែត មកកាន់រាជធានីភ្នំពេញ បានរេចង្កូតធ្លាក់ចេញពីផ្លូវជាតិលេខ៥ នៅវេលាម៉ោង៧ៈ២០នាទីយប់ថ្ងៃអង្គារ ហើយបង្កឲ្យអ្នកធ្វើដំណើរប្រាំបីនាក់ រងរបួសដោយក្នុងចំណោមនោះ មានស្ត្រីជនជាតិអុីតាលីម្នាក់ បុរសជនជាតិបារាំងម្នាក់ បុរសជនជាតិប៉ាគីស្ថានម្នាក់ និងមានខ្មែរប្រាំនាក់។
លោក ខេង ស៊ុំ បានមានប្រសាសន៍ថា រថយន្តក្រុងមួយគ្រឿងនេះបានព្យាយាមជែងទាំង ពេលកំពុងភ្លៀងធ្លាក់ខ្លាំង ហើយនៅពេលនោះបានរអិលធ្លាក់ចេញពីផ្លូវ រួចក្រឡាប់តែម្តង។ លោកបានថ្លែងបន្ថែមថា ប្រហែល២០នាទី ក្រោយមក មានរថយន្ត Lexus មួយគ្រឿងក៏បានជួបគ្រោះថ្នាក់នៅលើផ្លូវនេះដែរ ដោយធ្វើឲ្យស្ត្រីអ្នកធ្វើដំណើរបីនាក់ រងរបួសបាក់ជើង។
លោកបានមានប្រសាសន៍ថា ស្ត្រីជនជាតិអីុតាលី អាយុ៣៤ឆ្នាំ ដែលគេស្គាល់ឈ្មោះថា អេលីហ្សាបេត ( Elizabeth) កំពុងសម្រាកការព្យាបាលនៅក្នុងមន្ទីរពេទ្យខេត្តបាត់ដំបង ចំណែកឯបុរសជនជាតិបារាំងអាយុ៦២ឆ្នាំ និងបុរសជនជាតិបា៉គីស្ថាន អាយុ៣០ឆ្នាំ ដែលរងរបួសស្រាលបានបន្តដំណើរមកកាន់រាជធានីភ្នំពេញ។ លោក ខេង ស៊ុំ បានថ្លែងថា អ្នកបើកបររថយន្តក្រុងនោះ បានគេចខ្លួនពីកន្លែងកើតហេតុ ហើយនគរបាលកំពុងតែស្វែងរកចាប់ខ្លួនគាត់។
លោក សំ វិចិត្រ អ្នកចាត់ការទូទៅរបស់ក្រុមហ៊ុន រិទិ្ធ មុនី បាននិយាយថា “យើងសោកស្តាយណាស់ ចំពោះអ្នកធ្វើដំណើេររបស់យើង ដែលរថយន្តរបស់យើងជួបសំណាងអាក្រក់ ហើយធ្វើឲ្យពួកគេរងរបួសបែបនេះ”។ លោកបានបន្តថា ស្ត្រីជនជាតិអុីតាលី រូបនេះនៅសន្លប់បាត់ស្មារតីក្នុងមន្ទីរពេទ្យខេត្ត នៅឡើយ កាលពីយប់មិញ ហើយក្រុមហ៊ុនធានារ៉ាប់រងកម្ពុជា ហៅកាត់ថា (CAMINCO) បស់ក្រុមហ៊ុន រិទិ្ធ មុនី ជាអ្នកចេញថ្លៃព្យាបាលឲ្យគាត់។
ក្រុមហ៊ុនដឹកអ្នកដំណើរ រិទិ្ធ មុនី បានលក់សំបុត្ររថយន្តឲ្យអ្នកដំណើរតាមរយៈរថយន្តក្រុងរបស់ក្រុមហ៊ុន ផារ៉ាម៉ោន អង្គរ ដែលមានគ្រោះថ្នាក់នៅក្នុងខេត្តកោះកុង កាលពីថ្ងៃទី២៨ខែកុម្ភៈ ដោយធ្វើឲ្យជនបរទេសពីរនាក់ ស្លាប់ និងអ្នកធ្វើ់ដំណើរ៤៥នាក់ ទៀតរងរបួស។
អ្នកបើកបរនោះ ក៏បានគេចខ្លួនពីកន្លែងកើតហេតុដែរ ប៉ុន្តែក្រោយមកត្រូវបាននគរបាលចាប់ខ្លួន និងចោទប្រកាន់ពីបទបើកបរដោយធ្វេសប្រហែស។ កាលពីថ្ងៃសៅរ៍ បុរសខ្មែរម្នាក់បានស្លាប់ពេលរថយន្តក្រុងមួយគ្រឿងរបស់ក្រុមហ៊ុនដឹកអ្នកដំណើរវីរៈ ប៊ុនថាំ អុិចប្រេស្ស ដែលបានព ្យាយាមជែងគ្នាលើស្ពាន បានបុកជាមួយរថយន្តដឹកស៊ីម៉ង់ត៍មួយគ្រឿង និងបានធ្វើឲ្យអ្នកធ្វើដំណើរប្រាំពីរនាក់ ទៀតរងរបួសនៅក្នុងឧប្បត្តិហេតុនេះ។
លោក សុក នុប ប្រធានផ្នែកកត់ត្រាទិន្នន័យគ្រោះថ្នាក់ចរាចរណ៍ របស់នាយកដ្ឋាននគរបាលសណ្ដាប់ធ្នាប់សាធារណៈនៃក្រសួងមហាផ្ទៃបានមានប្រសាសន៍ថា ក្រុមហ៊ុនដឹកអ្នកដំណើរចំនួនបួន បានបង្កឲ្យមានគ្រោះថ្នាក់ក្នុងខែនេះ ដោយក្នុងនោះ មានទេសចរម្នាក់ក៏បានរងរបួសនៅក្នុងគ្រោះថ្នាក់តូចតាចមួយរបស់ក្រុមហ៊ុន សាប៉ាកូ(Sapaco Tuorist)ដែរ។
លោក សុក នុប បានបន្ថែមថា ក្រុមហ៊ុនដឹកអ្នកដំណើរទាំងអស់នៅក្នុងប្រទេសកម្ពុជា ត្រូវបានអញ្ជើញឲ្យចូលរួមប្រជុំ កាលពីសប្តាហ៍មុន ដើម្បីព្យាយាមរកដំណោះស្រាយកាត់បន្ថយគ្រោះថ្នាក់។ លោកបានមានប្រសាសន៍ថា នគរបាលនឹងរឹតបន្តឹងការពិនិត្យសុវត្ថិភាពនៅតាមបណ្តាចំណតរថយន្តក្រុង មុនពេលចេញដំណើរ។
លោកបានថ្លែងបន្ថែមថា នគរបាលបានត្រួតពិនិត្យសុវត្ថិភាពតាមបណ្តាក្រុមហ៊ុនដឹកអ្នកដំណើរចំនួនប្រាំកន្លែង កាលពីម្សិលមិញ។កាលពីខែមុន នគរបាលជាតិបានផ្តល់ប័ណ្ណសរសើរដល់ក្រុមហ៊ុនដឹកអ្នកដំណើរមេគង្គ អុិចប្រេស្ស ដែលជាក្រុមហ៊ុនតែមួយគត់ ក្នុងចំណោមក្រុមហ៊ុនដឹកអ្នកដំណើរប្រហែល៣០ក្រុមហ៊ុន ដែលមិនមានគ្រោះថ្នាក់ទាល់តែសោះនៅក្នុងឆ្នាំ២០១១៕
ប្រែសម្រួលដោយ ឌឿង សាវតា
ផ្តល់ម៉ូតូ ឬ ប្រាក់ឲ្យជងរងគ្រោះនៅក្នុងតំបន់សេដ្ឋកិច្ចពិសេស ប្រសិនបើមិនប្តឹង
កាលពីម្សិលមិញ មន្ត្រីក្រុងបាវិតបានបញ្ជាឲ្យអនុប្រធានភូមិម្នាក់ ទៅផ្តល់សំណងជាប្រាក់ ឬម៉ូតូមួយគ្រឿងឲ្យស្ត្រីពីរនាក់ ដែលជាជនរងគ្រោះដោយការបាញ់ប្រហារនៅក្នុងតំបន់សេដ្ឋកិច្ចពិសេស កាលពីថ្ងៃទី២០ ខែកុម្ភៈ ក្នុងខេត្តស្វាយរៀង ដើម្បីកុំឲ្យប្តឹងអ្នកបាញ់ប្រហារពួកគេ។
លោក សុខ សៀ អនុប្រធានភូមិព្រែកផ្តៅក្នុងឃុំច្រកម្ទេស បានមានប្រសាសន៍ថា លោកកែវ គង់ អធិការនគរបាលក្រុងបាវិតនិងអធិការរងរបស់លោកឈ្មោះ កៅ ហន ព្រមទាំងលោកយិនគឹមយៀន សមាជិកក្រុមប្រឹក្សាឃុំ និងលោកមេឃុំ ហួត សាម៉ៃ បានមកផ្ទះរបស់លោក និងបានបញ្ជាឲ្យលោកផ្តល់ប្រាក់ដល់ជនរងគ្រោះឈ្មោះ ប៊ុន ចន្តា អាយុ២១ឆ្នាំនិងឈ្មោះ កែវនៀអាយុ១៨ឆ្នាំ។
លោកសុខសៀបានមានប្រសាសន៍ថា “អាជ្ញាធរនិងមន្ត្រីនគរបាលបានមកផ្ទះខ្ញុំ និងបញ្ជាឲ្យខ្ញុំទៅសួរសុខទុក្ខនាង ចិន្តា និងក្រុមគ្រួសាររបស់នាង ដើម្បីសម្របសម្រួលគ្នាដោយផ្តល់សំណងជាប្រាក់ចំនួន១.០០០ដុល្លារ ឬ ជាម៉ូតូថ្មីមួយគ្រឿង ប្រសិនបើពួកគេឈប់ប្តឹងជនសង្ស័យ”។
លោកបានមានប្រសាសន៍ថា “ខ្ញុំក៏ទៅសួរសុខទុក្ខក្រុមគ្រួសាររបស់ កែវ នៀ ផងដែរ ដើម្បីសម្របសម្រួលគ្នា ដោយផ្តល់ជាសំណង ប្រសិនបើជនរងគ្រោះឈប់ប្តឹងជនសង្ស័យ”។
ការផ្តល់សំណងជាប្រាក់នេះ គឺជាលើកទី២ហើយ ដែលមន្ត្រីជាន់ខ្ពស់ និងអាជ្ញាធរខេត្ត ខំបញ្ចុះបញ្ចូលជនរងគ្រោះតាមរយៈអំណោយជាប្រាក់ ដើម្បីគាបសង្កត់ជនរងគ្រោះ មិនឲ្យប្តឹងអ្នកបាញ់ប្រហារ។ ជនសង្ស័យក្នុងការវាយប្រហារនោះគឺជាលោកឈូក បណ្ឌិត អភិបាលក្រុងបាវិត តែម្នាក់ប៉ុណ្ណោះ ដែលតុលាការត្រូវកោះហៅមកសួរបំភ្លឺនៅចុងខែនេះ។
ដោយទាក់ទងតាមទូរស័ព្ទ កាលពីម្សិលមិញ ទាំងលោកកែវគង់និងលោកកៅហនដែលជាអធិការ និងអធិការរងក្រុងបាវិត បាន
បដិសេធចំពោះការផ្តល់ប្រាក់ ដើម្បីជាថ្នូរកុំឲ្យជនរងគ្រោះប្តឹង។
លោក គង់ បានថ្លែងថា “ខ្ញុំមិនបានទៅសួរសុខទុក្ខពួកគេទេ។ ខ្ញុំកំពុងតែធ្វើការ”។ទោះជាយ៉ាងណាលោកបានបន្ថែមថា“វាជារឿងធម្មតាទេ សម្រាប់អាជ្ញាធរ...ទៅសួរសុខ
ទុក្ខគ្រួសារជនរងគ្រោះនោះ”។
ជនរងគ្រោះទី៣ ក្នុងការវាយប្រហារនេះឈ្មោះ នុតសុខនអាយុ២៣ឆ្នាំ បាននិយាយថា ខ្លួនមិនបានទទួលអំណោយឧបត្ថម្ភជាលើកទី២ទេ តែបានយល់ព្រមរួចហើយថា មិនប្តឹងទាមទារឲ្យមានការចោទ
ប្រកាន់អ្នកបាញ់នាងឡើយ។
នាងសុខន បាននិយាយថា លោកដួងវណ្ណា សមាជិកសភាមកពីគណបក្សប្រជាជនកម្ពុជា បានមកសួរសុខទុក្ខ ព្រមទាំងបាន
ផ្តល់ប្រាក់៥០០ដុល្លារ ដើម្បីកុំឲ្យនាងប្តឹងអ្នកបាញ់ប្រហារ។ លោក ដួង វណ្ណា មិនបានឆ្លើយតបនឹងសំណួរតាមទូរស័ព្ទទេ។
នាងសុខនបាននិយាយថា “ខ្ញុំបានផ្តិតមេដៃ យល់ព្រមថាមិនប្តឹងឡើយពីព្រោះខ្ញុំខ្លាចណាស់”។ នាងបាននិយាយថា “ពួកគេមានអំណាច ហើយខ្ញុំមិនចង់មានបញ្ហាទេ”។នាងបានបន្ថែមថារបួសនាងនៅឈឺនៅឡើយ ដោយសារគ្រាប់កាំភ្លើងមួយគ្រាប់បានទម្លុះខ្នងនាង។
អ្នកស្រីគុមសាម៉េន អាយុ៣០ឆ្នាំ ត្រូវជាម្តាយរបស់ជនរងគ្រោះ ឈ្មោះ កែវនៀ បាននិយាយថា អ្នកស្រីបានយល់ព្រមយកលុយ ពីមន្ត្រីរដ្ឋាភិបាល និងយល់ព្រមឈប់ប្តឹង។
អ្នកស្រី សាម៉េនបាននិយាយថា “ខ្ញុំយល់ព្រមជាមួយអាជ្ញាធរថា មិនប្តឹងជនសង្ស័យទេ ពីព្រោះពួកគេសន្យាឲ្យខ្ញុំ១.០០០ដុល្លារដើម្បីជាសំណង ពីព្រោះកូនស្រីរបស់ខ្ញុំរងរបួសស្រាល ទេ។ ខ្ញុំមិនចង់មានបញ្ហាទេ”។
នាង ចិន្តា ដែលរងរបួសធ្ងន់បំផុត នៅពេលគ្រាប់កាំភ្លើងមួយគ្រាប់បានទម្លុះខ្នងរបស់នាង មិនអាចទាក់ទងបានទេកាលពីម្សិលមិញនេះ។ ទោះជាយ៉ាងណា...
បាតុកម្មតម្លៃទឹកឡើងថ្លៃនឹងបន្ត ក្នុងខេត្តស្វាយរៀង បន្ទាប់ពីកិច្ចចរចាបរាជ័យ
អ្នកស្រុកជាច្រើនបាននិយាយថា“កាលពីថ្ងៃម្សិលមិញ ការតវ៉ាបានបន្តដល់ថ្ងៃទីពីរនៅក្នុងទីរួមខេត្តព្រៃវែងខណៈដែលអ្នកស្រុកជាងមួយពាន់នាក់បានប្រមូលផ្តុំគ្នាធ្វើបាតុកម្ម នៅខាងមុខការិយាល័យទីរួមខេត្តស្តីពីការដំឡើងថ្ងៃទឹកដែលត្រូវបានតម្លើងដោយក្រុមហ៊ុនឯកជនដែលកាលពីពេលថ្មីៗនេះបានកាន់កាប់លើរដ្ឋករទឹកក្រុងព្រៃវែង”។ក្រុមហ៊ុនផ្គត់ផ្គង់ទឹកគីមទូចដែលបានកាន់កាប់ពីរដ្ឋាភិបាលក្នុងខែមករាកំពុងតែទាមទារអោយអ្នកស្រុកបង់ថ្លៃទឹក៥០ភាគរយលើសពីតំលៃមុន រឺក៏១៨០០រៀលក្នុង១ម៉ែត្រគូប។
អ្នកតំណាងមួយរូបរបស់ហ្វូងបាតុករ ដែលស្នើសុំមិនបញ្ចេញឈ្មោះព្រោះខ្លាចមានការយាយីធ្វើបាបបាននិយាយថា“ហ្វូងបាតុករបានជួបជាមួយក្រុមហ៊ុនផ្គត់ផ្គង់ទឹកកាលពីម្សិលមិញដើម្បីចរចាពីតម្លៃទឹកឡើងវិញប៉ុន្តែកិច្ចចរចានេះត្រូវបានបរាជ័យ”។ អ្នកតំណាងរូបនេះបានបន្តថា“ពួកយើងបាននាំគ្នាធ្វើបាតុកម្មនិងបានបញ្ជូនអ្នកតំណាងជាច្រើនរូបទៅចរចាជាមួយអាជ្ញាធររដ្ឋករទឹកប៉ុន្តែមិនដែលទទួលបានលទ្ធិផលនោះទេ។ អ្វីដែលអ្នកស្រុកទាមទារគឺចង់បានតម្លៃទឹកស្ថិតត្រឹម១៥០០រៀលក្នុង១ម៉ែត្រគូប”។
អ្នកតំណាងជាច្រើនរូបបាននិយាយថា “ក្រុមហ៊ុនបានចេញគំរោងតម្លៃមួយដែលតម្រូវឲ្យអ្នកប្រើប្រាស់បង់តិចជាង១៨០០រៀលក្នុង១ម៉ែត្រគូបប្រសិនបើពួកគេប្រើតិចជាង១០ម៉ែត្រគូប”ពួកគេបានបន្តថា “គំរោងតម្លៃដែលបានដាក់ចេញនេះត្រូវបានច្រានចោលខណៈដែលអ្នកប្រើប្រាស់បានប្រើលើសពី១០ម៉ែត្រគូប ដោយមិនបានចូលក្នុងគំរោងសន្សំសម្ចៃនេះទេ”។
អ្នកស្រុកជាច្រើនក្នុងខេត្តព្រៃវែងក៏បានប្តឹងនៅដើមសប្តាហ៍នេះដែរថាក្រុមហ៊ុនផ្គត់ផ្គង់ទឹកក្នុងស្រុក បានកាត់ផ្តាច់ទឹកនៅដើមខែនេះចំពោះអ្នកណាដែលមិនព្រមអនុវត្តន៍តាមគំរោងដែលពួកគេបានដាក់ចេញ។ លោកស៊ីនសារ៉ាក់អភិបាលខេត្តព្រៃវែង បានមានប្រសាសន៍នៅពេលដែលលោកមានវត្តមានក្នុងកិច្ចចរចាកាលពីថ្ងៃម្សិលមិញថា“ក្រុមហ៊ុននិងមន្ត្រីថ្នាក់ខេត្តជាច្រើនថ្មីៗ នេះកំពុងធ្វើការជាមួយគ្នាលើដំណោះស្រាយ
មួយចំនួនដើម្បីបញ្ចប់ការតវ៉ានេះរាប់ទាំងការបិទនូវប្រព័ន្ធចម្រោះទឹកថ្មីដែលចាយលុយអស់ច្រើនរបស់ខេត្តនឹងបើកឲ្យប្រើប្រាស់ឡើងវិញនូវប្រព័ន្ធចម្រោះទឹកសម័យអណានិគមន៍បារាំងចាស់”។
លោក សារ៉ាក់ បានបន្តថា “ពួកយើងបានចំណាយពេលអស់ជាងមួយម៉ោងដើម្បីចរចាជាមួយអ្នកតំណាងទាំងប្រំាបីរបស់អ្នកស្រុកខេត្តស្វាយរៀង ប៉ុន្តែពួកយើងមិនមានការព្រមព្រៀងគ្នានោះទេ”។ អ្នកតវ៉ាជាច្រើនបាននិយាយកាលពីម្សិលមិញថា“ទម្រាំដល់ភាគីទាំងពីរអាចឈានទៅរកការព្រមព្រៀងគ្នា ហ្វូងបាតុករត្រូវបាន គេរំពឹងថានឹងបន្ត”ពួកគេបានបន្ថែមថា“ពួកគេមានគំរោងបិទផ្លូវជាតិលេខ១១នៅព្រឹកនេះ”៕
ប្រែសម្រួលដោយស៊ាស៊ុយឈាង
អ្នកភូមិសហគមន៍បុរីកីឡាដាក់ ពាក្យបណ្តឹងព្រហ្មទណ្ឌ ប្តឹងក្រុមហ៊ុន ផានអីុម៉ិច
អ្នកភូមិបាននិយាយថាប្រជាជន១២៥គ្រួសារ ដែលត្រូវបានបណ្ដេញចេញពីសហគមន៍បុរីកីឡា បានដាក់ពាក្យបណ្តឹងព្រហ្មទណ្ឌទៅសាលាដំបូងរាជធានីភ្នំពេញកាលពីម្សិលមិញប្តឹងក្រុមហ៊ុនផានអីុម៉ិច ជាក្រុមហ៊ុនដែលបានបញ្ជាឲ្យឈូសកម្ទេចផ្ទះសម្បែងរបស់ពួកគាត់ ដោយស្វែងរកសំណងការខូចខាតជាប្រាក់ចំនួន៣៦០.០០០ដុល្លារ។
អ្នកស្រី អិុនស្រីមុំជាអតីតអ្នកភូមិសហគមន៍បុរីកីឡាបាននិយាយាថាពាក្យបណ្តឹងនោះបានដាក់ឈ្មោះអ្នកស្រីស៊ុយសុផានប្រធានក្រុមហ៊ុនផានអីុម៉ិចថាជាអ្នកទទួលខុសត្រូវចំពោះការបណ្តេញអ្នកភូមិជាង៣០០គ្រួសារកាលពីថ្ងៃទី៣ ខែមករា។
អ្នកស្រីស្រីមុំ បាននិយាយបន្ថែមទៀតថាអ្នកភូមិ១២០គ្រួសារ ដែលបានដាក់ពាក្យបណ្តឹងនេះគឺជាអ្នកភូមិនៅសេសសល់ចុងក្រោយដែលមិនព្រមទទួលយកសំណើតាំងលំនៅដ្ឋានថ្មី ហើយបន្តធ្វើការតវ៉ាជំទាស់នឹងក្រុមហ៊ុននេះ។
អ្នកស្រី ស្រីមុំបាននិយាយថា“យើងបានដាក់ពាក្យបណ្តឹងព្រហ្មទណ្ឌប្តឹងក្រុមហ៊ុននេះពីព្រោះក្រុមហ៊ុននេះបានឈូសកម្ទេចផ្ទះសម្បែងនិងបំផ្លាញទ្រព្យសម្បត្តិរបស់យើងទាំងស្រុង”។អ្នកស្រីបានបន្ថែមថាគ្រួសារនីមួយៗទាមទារសំណងជាប្រាក់ចំនួន៣.០០០ដុល្លារ។
ពាក្យបណ្តឹងនេះធ្វើឡើងបន្ទាប់ពីមានការដាក់ពាក្យបណ្តឹងរដ្ឋប្បវេណីដោយអ្នកភូមិសហគមន៍បុរីកីឡាដែលត្រូវបានបណ្តេញចេញចំនួន៩៩គ្រួសារកាលពីថ្ងៃទី៣ ខែកុម្ភៈ
ទៅតុលាការដដែលនេះ ប្តឹងក្រុមហ៊ុន ផានអីុម៉ិច ចំពោះការមិនគោរពកិច្ចសន្យាឆ្នាំ២០០៣ដែលថានឹងសាងសង់អគារផ្ទះល្វែងចំនួន១០សម្រាប់អ្នកភូមិ ដើម្បីដោះដូរនឹងដីរបស់ពួកគាត់។កាលពីឆ្នាំ២០១០ក្រុមហ៊ុននេះបានប្រកាសថាខ្លួននឹងសាងសង់អគារតែប្រាំបីប៉ុណ្ណោះដោយធ្វើឲ្យអ្នកភូមិជាង៣០០គ្រួសារនៅក្រៅកិច្ចសន្យានោះ។ អ្នកស្រីស៊ុយសុផាន មិនអាចទាក់ទងសុំការអត្ថាធិប្បាយបានទេ។
បុគ្គលិកម្នាក់នៅការិយាល័យរដ្ឋបាលសាលាដំបូងរាជធានីភ្នំពេញ ដែលបានប្រាប់តែឈ្មោះថា“ហាក់”នោះបានអះអាងកាលពីម្សិលមិញថាតុលាការបានទទួលពាក្យបណ្តឹងនេះហើយ។ ដោយបដិសេធមិនធ្វើអត្ថាធិប្បាយបន្ថែម លោកបាននិយាយថា“យើងនឹងចាប់ផ្តើមនីតិវិធីលើបណ្តឹងព្រហ្មទណ្ឌនេះក្នុងពេលឆាប់ៗនេះ”។
លោក ប៉ិចលឹមឃួនអតីតអ្នកភូមិសហគមន៍បុរីកីឡា ដែលបានទៅដាក់ពាក្យបណ្តឹងជាមួយអ្នកស្រី...
លោក ជា មុនី ប្រឈមនឹងការសាកសួរដោយតុលាការជុំវិញកូដកម្មរបស់កម្មករកាត់ដេរ
មន្ត្រីសហជីពបាននិយាយថាកាលពីម្សិលមិញ សាលាដំបូងខេត្តកំពង់ឆ្នាំងបានសាកសួរលោកជាមុនី ប្រធានសហជីពសេរីកម្មករជុំវិញការចោទប្រកាន់លោកពីបទញុះញង់កម្មករ ដែលត្រូវបានប្តឹងដោយរោងចក្រកាត់ដេរមួយរបស់ក្រុមហ៊ុន M&V International Manufacturing Ltd។
លោកជាមុនីបានមានប្រសាសន៍ថាសាលាដំបូងបានសាកសួររូបលោកនិងអ្នកតំណាងសហជីពសេរីកម្មករពីររូបផ្សេងទៀតគឺលោក ម៉ាន់សេងហាក់ និងលោកឃឹមចំណានដែលត្រូវរោងចក្រកាត់ដេរ M&V ចោទប្រកាន់ពីបទញុះញង់បទប៉ុនប៉ងធ្វើឲ្យខូចខាតផលប្រយោជន៍ និងបទដឹកនាំកូដកម្មខុសច្បាប់មួយកាលពីខែតុលា។
លោកជាមុនី បានបន្តថា “ការចោទប្រកាន់ទាំងនេះគឺមិនត្រឹមត្រូវទេ”។លោកបានបដិសេធថាលោកមិនបានញុះញង់កម្មករកម្មការិនីឲ្យធ្វើកូដកម្មនោះឡើយហើយបានមានប្រសាសន៍ថាក្រុមហ៊ុនប្តឹងរូបលោកគឺខុសហើយ។
លោកបានមានប្រសាសន៍ថា“កម្មករកម្មការិនីបានធ្វើកូដកម្មនោះដោយខ្លួនឯងពីព្រោះពួកគេមិនពេញចិត្តនឹងថៅកែរោងចក្រដែលតែងតែរំលោភសិទ្ធិកម្មករ។វាជាពាក្យបណ្តឹងមួលបង្កាច់ការពិត”។ លោកសេងហាក់ បានមានប្រសាសន៍ថា“ខ្ញុំគិតថាក្រុមហ៊ុននេះដាក់ពាក្យប្តឹងពួកយើងដោយសារតែពួកគេមានបំណងគំរាមកំហែងសេរីភាពនៃការបញ្ចេញមតិនិងសិទ្ធិដែលមានចែងក្នុងច្បាប់”។
លោកបានបន្តថា“យើងយល់ថាវាគឺជាការព្រមានមួយមកលើសហជីពរបស់យើងដែលតែងតែទាមទារសិទ្ធិសេរីភាពជូនកម្មករ កុំឲ្យមានការគាបសង្កត់និងការកេងប្រវ័ញ្ចពីសំណាក់ក្រុមហ៊ុន និងដោយសារតែពួកគេចង់បញ្ឈប់ពួកយើងមិនឲ្យប្រឆាំងនឹងពួកគេ”។
លោកយិនណាក់ប្រធានរដ្ឋបាលនៅរោងចក្រ M&V បាននិយាយថាលោកបានដាក់ពាក្យបណ្តឹងនេះជួសមុខឲ្យលោកស៊ីជីន ជាជាតិចិនដែលជាថៅកែរោងចក្រនេះកាលពីថ្ងៃទី២៤ខែតុលា។លោកបានអះអាងថាលោកជាមុនី និងអ្នកក្រោមបង្គាប់របស់លោកបានញុះញង់ឲ្យកម្មករធ្វើកូដកម្មកាលពីចន្លោះថ្ងៃទី៥ដល់ថ្ងៃទី១០ខែតុលា ដែលបានធ្វើឲ្យក្រុមហ៊ុនខាតបង់ប្រាក់ចំណូលជាច្រើន។
លោក...