អ្នកភូមិជាង១០០នាក់ក្នុងខណ្ឌច្បារអំពៅ រាជធានីភ្នំពេញ បានធ្វើការតវ៉ានៅក្បែរផ្ទះរបស់ពួកគាត់ស្ថិតនៅតាមដងទន្លេបាសាក់កាលពីម្សិលមិញ ប្រឆាំងការបន្តបូមខ្សាច់ដែលពួកគាត់លើកឡើងថា អាចបណ្តាលឲ្យផ្ទះរបស់ពួកគាត់បាក់រលំ។
លោក សំ ស៊ីណា អាយុ៥១ឆ្នាំបាននិយាយថា “យើងបានតវ៉ានៅថ្ងៃនេះទាមទារឲ្យអាជ្ញាធរយកទូកបូមខ្សាច់ចំនួនពីរទៅកន្លែងផ្សេង ពីព្រោះអ្នកភូមិទាំងអស់ព្រួយបារម្ភខ្លាចផ្ទះរបស់ពួកគាត់បាក់រលំដោយសារការបូមខ្សាច់នេះ”។
លោកបាននិយាយថា “យើងនឹងធ្វើការតវ៉ាម្ដងទៀត ដោយបិទផ្លូវជាតិលេខ១ ប្រសិនបើអាជ្ញាធរមិនរកដំណោះស្រាយតាមការទាមទាររបស់យើងទេនោះ”។
លោក ណុប ថា អភិបាលរងខណ្ឌច្បារអំពៅ បានមានប្រសាសន៍ថា អាជ្ញាធរមូលដ្ឋានបានសុំឲ្យអ្នកបូមខ្សាច់បញ្ឈប់ប្រតិបត្តិការរបស់ខ្លួនកាលពីខែធ្នូ អំឡុងពេលដែលក្រសួងរ៉ែ និងថាមពល បានសរសេរលិខិតផ្ញើជូនសាលារាជធានី ដោយលើកឡើងថា មានបម្រាមបូមខ្សាច់នៅទន្លេមេគង្គ និងទន្លេបាសាក់។
លោក ណុប ថា បានមានប្រសាសន៍ថា “ខ្ញុំបានបញ្ជាឲ្យម្ចាស់បូមខ្សាច់ផ្អាកបណ្ដោះអាសន្ន ដើម្បីសុំសេចក្ដីសម្រេចពីថ្នាក់លើ”។ លោកបានបន្ថែមថា ម្ចាស់ទូកបូមខ្សាច់នេះនៅតែបន្តប្រតិបត្តិការរបស់ខ្លួនដដែល បើទោះជាមានការលើកឡើងរបស់ពួកលោកក៏ដោយ។
លោកបានមានប្រសាសន៍ថា “សាលារាជធានីភ្នំពេញបានបញ្ជាឲ្យម្ចាស់បូមខ្សាច់នោះបញ្ឈប់ប្រតិបត្តិការរបស់ខ្លួន ពីព្រោះអស់សុពលភាពទៅហើយ ប៉ុន្តែបុគ្គលនោះមិនបានគោរពតាមបទបញ្ជារបស់ថ្នាក់លើឡើយ”។
លោក គឹម ម៉េង ម្ចាស់បូមខ្សាច់ដែលមានទូកពីរបាននិយាយថា លោកបានបញ្ឈប់ប្រតិបត្តិការរបស់ខ្លួនកាលពីព្រឹកម្សិលមិញ បន្ទាប់ពីអាជ្ញាធរបានចុះមកមើល ប៉ុន្តែបានបន្ថែមថា លោកមិនជឿថា ការបូមខ្សាច់នឹងបណ្ដាលឲ្យបាក់ច្រាំងទន្លេឡើយ។
លោក គឹម ម៉េង បាននិយាយថា “ខ្ញុំមានលិខិតអនុញ្ញាតឲ្យបូមខ្សាច់ចេញដោយលោក ប៉ា សុជាតិវង្ស អភិបាលរាជធានីភ្នំពេញ ប៉ុន្តែកាលពីពេលថ្មីៗនេះគាត់បានណែនាំឲ្យខ្ញុំបំពេញបែបបទថ្មីសុំធ្វើអាជីវកម្មពីក្រសួងធនធានទឹក ប៉ុន្តែខ្ញុំនៅតែប្រើប្រាស់លិខិតចាស់របស់ខ្ញុំដដែល ពីព្រោះវានៅមានសុពលភាពនៅឡើយ”។
ម្ចាស់បូមខ្សាច់រូបនេះបាននិយាយថា “ខ្ញុំគិតថា អ្នកភូមិយល់ច្រឡំថា ការបូមខ្សាច់ធ្វើឲ្យផ្ទះរបស់ពួកគាត់បាក់រលំ ពីព្រោះពួកគាត់រស់នៅច្រាំងទន្លេឯណោះ”។
កាលពីខែមុន នគរបាលរាជធានីបានដកហូតទូកចំនួន១០គ្រឿង និងម៉ាស៊ីនបូមខ្សាច់ប្រាំគ្រឿងនៅក្បែរកោះពេជ្រ ចំណុចប្រសព្វនៃទន្លេមេគង្គ និងទន្លេបាសាក់ តែប៉ុន្មានថ្ងៃប៉ុណ្ណោះបន្ទាប់ពីក្រសួងរ៉ែ និងថាមពល បានចេញលិខិត៕ សារុន