គណបក្សប្រឆាំងស្នើសុំព្រះមហាក្សត្រ ធ្វើព្រះរាជអន្ដរាគមន៍ទៅតុលាការកំពូលឲ្យសើរើបណ្ដឹងរំលាយគណបក្សសង្គ្រោះជាតិ ក្រុមតំណាងរាស្ត្រគណបក្សសង្គ្រោះជាតិចំនួន៧រូបបានដាក់លិខិតជាថ្មីស្នើសុំព្រះមហាក្សត្រធ្វើព្រះរាជអន្ដរាគមន៍ ទៅតុលាការកំពូលដើម្បីឲ្យជំនុំជម្រះសាជាថ្មីលើសាលដីការំលាយគណបក្សប្រឆាំង កាលពីឆ្នាំ២០១៧។
ក្រុមអ្នកតំណាងរាស្ត្ររបស់គណបក្សសង្គ្រោះជាតិទាំងនេះក៏បានសុំព្រះរាជអន្តរាគមន៍ក្នុងការផ្ដល់សិទ្ធិដល់ថ្នាក់ដឹកនាំទាំង១១៨នាក់ ឲ្យបានចូលរួមធ្វើនយោបាយឡើងវិញ នៅមុនការបោះឆ្នោត ថ្ងៃទី២៩ កក្កដា។
តុលាការកំពូលកាលពីខែវិច្ឆិកា ឆ្នាំ២០១៧ បានចេញសេចក្ដីសម្រេចរំលាយគណគណបក្សសង្គ្រោះជាតិ និងដកសិទ្ធិធ្វើនយោបាយរបស់តំណាងរាស្រ្ត និងថ្នាក់ដឹកនាំគណបក្សសង្គ្រោះជាតិចំនួន១១៨រូបមិនឲ្យធ្វើនយោបាយរយៈពេល៥ឆ្នាំ។
ក្រុមអ្នកឃ្លាំមើលនិយាយថា ព្រះមហាក្សត្រមានអំណាច អាចសើរើបណ្ដឹងរបស់តុលាការកំពូលឡើងវិញបាន។
ពាក់ព័ន្ធនឹងបញ្ហានេះ ក្រុមតំណាងរាស្រ្តរបស់គណបក្សសង្គ្រោះជាតិ កន្លងមកធ្លាប់ទាមទារឲ្យតុលាការកំពូលជំនុំជម្រះសារថ្មី លើសំណុំរឿងរំលាយគណបក្សសង្គ្រោះជាតិ និងសុំរក្សាការពារសមាជិកភាពតំណាងរាស្ត្រ និងសមាជិកក្រុមប្រឹក្សាឃុំសង្កាត់ ស្រុក ក្រុង ខេត្ត រាជធានីរបស់គណបក្សសង្គ្រោះជាតិ។
ប៉ុន្តែការទាមទារនេះតែងត្រូវបាន បដិសេធជាបន្តបន្ទាប់៕