កម្ពុជាបាននាំចេញជ័រកៅស៊ូសរុបចំនួនជាង១៦ម៉ឺនតោន ទៅលក់នៅក្រៅប្រទេសក្នុងរយៈពេល១០ខែ ឆ្នាំ២០១៨នេះ ទទួលបានចំណូល២១៨លានដុល្លារអាមេរិក។
នេះបើតាមរបាយការណ៍របស់អគ្គនាយកដ្ឋានកៅស៊ូ ដែលត្រូវបានផ្សព្វផ្សាយជាសាធារណៈកាលពីថ្ងៃទី២៦ ខែវិច្ឆិកា បង្ហាញថាចាប់ពីខែមករា ដល់តុលា ឆ្នាំ២០១៨ កម្ពុជាបាននាំចេញជ័រកៅស៊ូចំនួន១សែន៦ម៉ឺនតោន ដែលកើនឡើង២៣ភាគរយ បើធៀបនឹងរយៈពេលដូចគ្នាកាលពីឆ្នាំ២០១៧។
ជ័រកៅស៊ូរបស់កម្ពុជាបាននាំចេញទៅលក់ឲ្យបណ្តាប្រទេសមួយចំនួនក្នុងតំបន់អាស៊ី ដែលរួមមានប្រទេសវៀតណាម ម៉ាឡេស៊ី សិង្ហបុរី ចិន និងប្រទេសកូរ៉េខាងត្បូង។
របាយការណ៍ដដែលឲ្យដឹងទៀតថា ក្រុមហ៊ុនដែលកំពុងរកស៊ី និងដាំដុះកៅស៊ូនៅកម្ពុជាចំនួន១២៩ក្រុមហ៊ុន ក្នុងនោះមាន៣០ក្រុមហ៊ុនហើយដែលប្រមូលផល និងធ្វើការនាំចេញ។
រហូតមកទល់ពេលនេះកម្ពុជាមានផ្ទៃដីដាំដុះកៅស៊ូចំនួនជាង៤សែនម៉ឺនហិកតា ហើយផ្ទៃដីដែលអាចចៀរជ័រកៅស៊ូបានមានទំហំជាង ២សែនហិកតា ៕