កូនស្រីបង្កើតអគ្គទេសាភិបាលធនាគារជាតិនៃកម្ពុជាលោក ជា ចាន់តូ គឺអ្នកស្រី ជា សិរី ត្រូវបានតែងតាំងឱ្យឡើងកាន់តំណែងជាអគ្គទេសាភិបាលធនាគារជាតិនៃកម្ពុជាជំនួសឪពុក ខណៈកូនៗមន្ត្រីរដ្ឋាភិបាលគ្រាក់ៗផ្សេងទៀតក៏ចូលទៅកាន់តំណែងជំនួសឪពុកដែរ បន្ទាប់ពីលោក ហ៊ុន ម៉ាណែត ត្រូវបានប្រកាសឱ្យឡើងកាន់តំណែងជានាយករដ្ឋមន្ត្រីជំនួសលោក ហ៊ុន សែន ដែលជាឪពុក ដើម្បីត្រៀមដឹកនាំរដ្ឋាភិបាលថ្មីសម្រាប់អាណត្តិទី៧ នេះ។
ព្រះមហាក្សត្រខ្មែរសម្តេចព្រះនរោត្តម សីហមុនី បានចេញព្រះរាជក្រឹត្យត្រាស់បង្គាប់តែងតាំងអ្នកស្រី ជា សិរី ជាអគ្គទេសាភិបាលធនាគារជាតិនៃកម្ពុជា មានឋានៈស្មើទេសរដ្ឋមន្ត្រីជំនួសលោក ជា ចាន់តូ កាលពីថ្ងៃទី២៩ ខែកក្កដា ឆ្នាំ២០២៣ តាមការស្នើសុំរបស់លោក ហ៊ុន សែន ខណៈលោក សាយ សំអាត កូនប្រុសលោក សាយ ឈុំ និងលោក យឹម លាត កូនប្រុសលោក យឹម ឆៃលី ក៏បានត្រូវតែងតាំងជាអគ្គទេសាភិបាលរងនៃធនាគារជាតិកម្ពុជាផងដែរ។
ការប្រកាសតែងតាំងកូនមន្ត្រីរដ្ឋាភិបាលជាន់ខ្ពស់នេះ ធ្វើឡើងបន្ទាប់ពីលោក ហ៊ុន សែន បានប្រកាសលាលែងតំណែងជានាយករដ្ឋមន្ត្រី និងប្រកាសតែងតាំងលោក ហ៊ុន ម៉ាណែត ដែលជាកូនប្រុសរបស់គាត់ឱ្យឡើងកាន់តំណែងជំនួសខ្លួន ដើម្បីដឹកនាំរដ្ឋាភិបាលអាណត្តិថ្មីនេះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៣១ កក្កដា នេះថា ការជំនួសតំណែងមន្ត្រីរដ្ឋាភិបាលកម្ពុជាពីឪពុកទៅកូន មិនមែនជារឿងចម្លែកទេសម្រាប់រដ្ឋាភិបាលដែលដឹកនាំដោយគណបក្សប្រជាជនកម្ពុជា ប៉ុន្តែបើមិនចង់ឱ្យមានការរៀបចំប្រព័ន្ធបែបនេះ មានតែបក្សប្រឆាំងខិតខំកៀងគររកសំឡេងគាំទ្រពីពលរដ្ឋ ដើម្បីឱ្យខ្លួនឈ្នះឆ្នោតដឹកនាំរដ្ឋាភិបាល ឬមានសំឡេងក្នុងរដ្ឋសភាដើម្បីធ្វើការកែប្រែប៉ុណ្ណោះ។
លោក សេក សុជាតិ លើកឡើងថា តំណែងតួនាទីដែលផ្តល់ទៅឱ្យអ្នកដែលមានចំណេះដឹងជ្រៅជ្រះ និងមានបទពិសោធន៍ ព្រមទាំងធ្លាប់ទទួលបានការបណ្តុះបណ្តាលខ្ពស់ គឺជារឿងល្អ ប៉ុន្តែអ្វីៗក៏ត្រូវតែធ្វើឡើងឱ្យស្របទៅនឹងខ្លឹមសារពិត និងវត្ថុបំណងដែលប្រទេសកម្ពុជាត្រូវបានកំណត់ឱ្យប្រកាន់យករបបប្រជាធិបតេយ្យសេរីពហុបក្សដែរ ដែលមិនមែនគ្រាន់តែមានរូបភាពជាប្រជាធិបតេយ្យនោះទេ គឺជាប្រជាធិបតេយ្យដែលធានានូវប្រយោជន៍សម្រាប់ពលរដ្ឋ និងប្រទេសជាតិទាំងមូល។
ទាក់ទិននឹងបញ្ហានេះ បើទោះបីជាសមាសភាពរដ្ឋាភិបាលថ្មីដែលនឹងដឹកនាំដោយលោក ហ៊ុន ម៉ាណែត មិនទាន់ត្រូវបានប្រកាសជាផ្លូវការក៏ដោយ ក៏មានការទម្លាយពីរចនាសម្ព័ន្ធដែលគណបក្សប្រជាជនកម្ពុជាបានរៀបចំទុកសម្រាប់រដ្ឋាភិបាលថ្មីរបស់លោក ហ៊ុន ម៉ាណែត កាលពីថ្ងៃទី១៩ ខែកក្កដា ឆ្នាំ២០២៣ កន្លងទៅដែរ ក្នុងនោះលោក ហ៊ុន ម៉ាណែត នឹងកាន់តំណែងជានាយករដ្ឋមន្ត្រីជំនួសលោក ហ៊ុន សែន លោក ស សុខា នឹងកាន់តំណែងជារដ្ឋមន្ត្រីក្រសួងមហាផ្ទៃជំនួសលោក ស ខេង ខណៈលោក ទៀ សីហា ក៏នឹងកាន់តំណែងរដ្ឋមន្ត្រីក្រសួងការពារជាតិជំនួសលោក ទៀ បាញ់ ផងដែរ។
ជុំវិញការប្រកាសផ្ទេរអំណាចពីឪពុកទៅកូនសម្រាប់ដឹកនាំប្រទេសកម្ពុជានេះ សមាគមអ្នកសារព័ត៌មានកម្ពុជា ខេមបូចា បានលាតត្រដាងក្នុងរបាយការណ៍ស៊ើបអង្កេតរបស់ខ្លួនកាលពីពេលថ្មីៗនេះថា ពួកគេបានរកឃើញសែស្រឡាយបក្ខពួករបស់លោក ហ៊ុន សែន ជាច្រើននាក់តាមរយៈបញ្ជីឈ្មោះបេក្ខជនតំណាងរាស្ត្ររបស់គណបក្សប្រជាជនកម្ពុជា ដែលមានរហូតដល់ទៅជិត ១ភាគ៤ ដែលត្រូវបានដាក់ឱ្យឈរឈ្មោះជាបេក្ខជនតំណាងរាស្ត្រសម្រាប់ការបោះឆ្នោតអាណត្តិទី៧ នេះ។
ក្រុមអ្នកសង្កេតការណ៍លើកឡើងថា កម្ពុជានៅពេលនេះប្រៀបដូចជាក្រុមហ៊ុនឯកជនមួយរបស់គ្រួសារអ្នកមានអំណាចអ៊ីចឹងដែរ ព្រោះពួកគេបានដោះដូរ និងតែងតាំងកូនៗរបស់ពួកគេឱ្យជំនួសតំណែងរបស់ខ្លួនតាមអំពើចិត្ត ខណៈពលរដ្ឋម្ចាស់ប្រទេសត្រូវរស់នៅក្រោមការគាបសង្កត់ និងរងនូវការភ័យខ្លាច និងអត់ឃ្លានគ្រប់ពេលវេលា៕