លោកនាយករដ្ឋមន្ត្រី ហ៊ុន សែន បានប្រកាសកាលពីម្សិលថាប្រទេសកម្ពុជានឹងបញ្ជូនកងយោធពលខេមរភូមិន្ទទៅកាន់ប្រទេសម៉ាលីដែលកំពុងហែកហួដោយសង្គ្រាម នៅអាហ្វ្រិកខាងត្បូង ក្រោមការឧបត្ថម្ភពីបេសកកម្មរក្សាសន្តិភាពរបស់អង្គការសហប្រជាជាតិ។
ការធ្វើរដ្ឋប្រហារកាលពីឆ្នាំ២០១២ បានធ្វើឲ្យប្រទេសម៉ាលី មានភាពច្របូកច្របល់ ខណៈកងជីវពលអ៊ីស្លាមបានកាន់កាប់តំបន់មួយភាគធំនៅក្នុងប្រទេសនេះ ដោយឃើញដូច្នោះប្រទេសបារាំងបានបើកប្រតិបត្តិការយោធា ដើម្បីវាយកម្ចាត់ក្រុមបះបោរ ដែលគាំទ្រដោយក្រុមភេរវករអាល់កៃដា មុនពេលប្រគល់ការគ្រប់គ្រងទៅឲ្យអង្គការសហប្រជាជាតិនៅដើមឆ្នាំនេះ។
លោក ហ៊ុន សែន ដែលបានធ្វើជាអធិបតីភាពនៅក្នុងពិធីបើកសិក្ខាសាលាមួយស្ដីអំពីការចាក់ថ្នាំវ៉ាក់សាំងនៅសណ្ឋាគារសូហ្វីតែលភ្នំពេញភោគីត្រាថ្លែងថា “ ក្នុងពេលឆាប់ៗនេះយើងនឹងបញ្ជូនកងទ័ពរក្សាសន្ដិភាពរបស់យើងទៅកាន់ប្រទេសម៉ាលី ហើយគ្រូពេទ្យទាហានរបស់យើងអាចជួយនៅក្នុងកម្មវិធីចាក់ថ្នាំវា៉ក់សាំងនៅក្នុងប្រទេសនេះ”។
អ្នកជំនាញដោះមីនដែលទទួលបានការហ្វឹកហាត់ខ្ពស់របស់ប្រទេសកម្ពុជាជារឿយៗតែងតែបានចូលរួមនៅក្នុងបេសកកម្មរក្សាសន្ដិភាពរបស់អង្គការសហប្រជាជាតិនៅក្នុងប្រទេសមួយចំនួន ដូចជា ប្រទេសលីបង់ ស៊ីរី និងប្រទេសសូដង់ខាងត្បូងជាដើម។ វរសេនីយ៍ឯក ឃ្លោក សារី អគ្គនាយកមជ្ឈមណ្ឌលជាតិកងកម្លាំងរក្សាសន្ដិភាពបានបញ្ជាក់ថា កងយោធពលខេមរភូមិន្ទយ៉ាងតិចចំនួន១៧៥នាក់នឹងត្រូវបញ្ជូនទៅកាន់ប្រទេសម៉ាលីមិនឲ្យហួសពីថ្ងៃទី១២ ខែធ្នូឡើយ។
លោកវរសេនីយ៍ឯកបានមានប្រសាសន៍ថា “ពួកគេនឹងមិនត្រឹមតែជួយក្នុងផ្នែកសុខាភិបាលប៉ុណ្ណោះទេ ប៉ុន្តែក៏ជួយក្នុងផ្នែកផ្ដល់ទឹកស្អាត ស្បៀងអាហារ និងការបោសសំអាតមីនផងដែរ”៕ ស៊ុយឈាង