កាលពីម្សិលមិញ លោក ឈាង វុន អ្នកនាំពាក្យរដ្ឋសភាបាននិយាយការពារសារាចរដ៏ចម្រូងចម្រាសរបស់រដ្ឋាភិបាលដែលបានប្រកាសជាសាធារណៈកាលពីសប្តាហ៍មុនដែលផ្តល់សិទ្ធិទាំងស្រុងដល់លោក ហេង សំរិន ប្រធានរដ្ឋសភាក្នុងការសម្រេចថា នរណាអាចចូលបរិវេណសភាបាន និងរារាំងពលរដ្ឋឯកជនមិនឲ្យចូលរួមក្នុងកិច្ចប្រជុំរបស់គណៈកម្មការសភា។
ថ្លែងនៅសន្និសីទកាសែតនៅរដ្ឋសភា លោក ឈាង វុន សមាជិកសភាជាន់ខ្ពស់គណបក្សប្រជាជនកម្ពុជាបានមានប្រសាសន៍ថា ក្នុងនាមជាប្រធានរដ្ឋសភា វាជាសមត្ថកិច្ចរបស់សម្តេច ហេង សំរិន ក្នុងការចេញសារាចរដែលបានចុះហត្ថលេខា និងចុះថ្ងៃទី១២ ខែធ្នូ ដោយមិនចាំបាច់ពិគ្រោះយោបល់ជាមួយសមាជិកសភាដទៃឡើយ។
លោកបានមានប្រសាសន៍ថា “ដូចមានចែងក្នុងរដ្ឋធម្មនុញ្ញ…សម្តេចប្រធាន [ហេង សំរិន] មានសិទ្ធិចេញសារាចរដោយផ្ទាល់។ វាជាតួនាទីរបស់លោកក្នុងការរក្សាសណ្តាប់ធ្នាប់នៅក្នុងសភា”។
ក្រុមសមាជិកគណបក្សប្រឆាំងបានលើកឡើងថា សារាចរថ្មីនេះអាចរារាំងផែនការរបស់ខ្លួនមិនឲ្យកោះហៅរដ្ឋមន្ត្រីក្នុងជួររដ្ឋាភិបាលនិងអ្នកជំនាញមកពីអង្គការមិនមែនរដ្ឋាភិបាលមកសាកសួរ។ ពួកគេលើកឡើងថា វាផ្ទុយនឹងស្មារតីនៃកិច្ចព្រមព្រៀងថ្ងៃទី២២ ខែកក្កដារវាងលោកនាយករដ្ឋមន្ត្រី ហ៊ុន សែន និងលោក សម រង្ស៊ី ប្រធានគណបក្សសង្គ្រោះជាតិដែលបានបញ្ចប់ការធ្វើពហិការមិនចូលសភា។
កាលពីម្សិលមិញ លោក ឈាង វុន បានបដិសេធការចោទប្រកាន់នេះ។លោកបានមានប្រសាសន៍ថា “តើនេះវាប៉ះពាល់ដល់ស្មារតីនៃកិច្ចព្រមព្រៀងយ៉ាងម៉េចទៅ?”។ បទបញ្ជាផ្ទៃក្នុងចែងថា អាហ្នឹងគឺវាអ៊ីចឹង ដូច្នេះតើយើងអាចធ្វើអ្វីបាន?”។
នៅពេលត្រូវបានទាក់ទងតាមទូរស័ព្ទ លោក យ៉ែម បុញ្ញឫទ្ធិ សមាជិកសភាគណបក្សសង្គ្រោះជាតិ និងជាប្រធានគណៈកម្មការអប់រំនៃរដ្ឋសភាដែលទើបជាប់ឆ្នោតថ្មីបានមានប្រសាសន៍ថា សារាចរនេះមិនអាចទទួលយកបានឡើយ។
លោក បុញ្ញឫទ្ធិ បានមានប្រសាសន៍ថា “គ្មានច្បាប់ណាហាមឃាត់ពួកយើងមិនឲ្យពិនិត្យមើលសារាចរនេះឡើយ។ យើងចង់ឲ្យមានអំណាចទូលំទូលាយសម្រាប់សមាជិកសភា គណបក្សសង្គ្រោះជាតិ…ក្នុងការធ្វើការនៅរដ្ឋសភា”។
លោក គល់ បញ្ញា នាយកប្រតិបត្តិគណៈកម្មាធិការខុមហ្វ្រែលជាអង្គការឃ្លាំមើលការបោះឆ្នោតបានមានប្រសាសន៍ថា លោក ហេង សំរិន គ្មានសិទ្ធិចេញសារាចរមុនពេលត្រូវបានអនុម័តដោយសភាឡើយ ហើយថា រដ្ឋធម្មនុញ្ញមិនបានផ្តល់សិទ្ធិដល់លោកក្នុងការសម្រេចថា នរណាអាចចូលក្នុងបរិវេណសភាឡើយ។
លោកបានមានប្រសាសន៍ថា “គ្មានអ្វីនៅក្នុងរដ្ឋធម្មនុញ្ញដែលអនុញ្ញាតឲ្យប្រធានសភាចេញសារាចរបែបនេះឡើយ។ តើគាត់ពឹងផ្អែកទៅលើអំណាចអ្វី? តួនាទីរបស់គាត់គឺដើម្បីសម្របសម្រួលកិច្ចប្រជុំតែប៉ុណ្ណោះ។ គាត់មិនមែនជានាយកប្រតិបត្តិ ឬប្រធានក្រុមហ៊ុនឡើយ” ៕សារុន