នគរបាលបាននិយាយថា មនុស្សទី៥ម្នាក់ទៀតបានស្លាប់ក្នុងខេត្តក្រចេះកាលពីម្សិលមិញ បន្ទាប់ពីហូបសាច់ឆ្កែដែលងាប់ដោយសារពុលថ្នាំ ចំណែកមនុស្សប្រាំបីនាក់ទៀតកំពុងសម្រាកព្យាបាលនៅមន្ទីរពេទ្យនៅឡើយបន្ទាប់ពីហូបសាច់ឆ្កែដូចគ្នានេះ។
សត្វឆ្កែនេះបានងាប់នៅក្នុងឃុំស្នួល ស្រុកស្នួល ដោយមិនដឹងមូលហេតុច្បាស់លាស់កាលពីសប្ដាហ៍មុន ហើយត្រូវលោក ជា រ័ត្ន អាយុ៧៦ឆ្នាំបានសុំទិញក្នុងតម្លៃ៣៥.០០០រៀល ដែលគាត់បានយកទៅដុត ហើយហៅមិត្តភក្តិមកជប់លៀងកាលពីថ្ងៃអាទិត្យ។
ចុងភៅ និងមនុស្សពីរនាក់ទៀតបានស្លាប់បន្ទាប់ពីហូបសាច់ឆ្កែនេះ ចំណែកមនុស្សទី៤បានស្លាប់បន្ទាប់ពីហូបសាច់ឆ្កែដែលនៅសល់អំឡុងពិធីបុណ្យសពលោក ជា រ័ត្ន។ លោក ថៃ លីថុន នាយប៉ុស្តិ៍ឃុំបានមានប្រសាសន៍ថា ជនរងគ្រោះទី៥ក៏បានស្លាប់ដែរបន្ទាប់ពីហូបសាច់ឆ្កែនេះអំឡុងពិធីបុណ្យសពនោះ។
លោក លីថុន បានថ្លែងថា “លោក ហ៊ឹម សារីបុត្រ អាយុ៤១ឆ្នាំ ដែលបានមកចូលរួមបុណ្យសពលោក ជា រ័ត្ន ហើយបានហូបសាច់ឆ្កែនោះដែរ បានស្លាប់នៅម៉ោង៤ទៀបភ្លឺនៅចម្ការរបស់គាត់ ពីព្រោះគាត់មិនបានទៅពេទ្យទេ។ យើងមិនទាន់ដឹងថាតើមូលហេតុអ្វីបណ្ដាលឲ្យសត្វឆ្កែនេះងាប់ឡើយ ប៉ុន្តែយើងគិតថា មនុស្សដែលស្លាប់ទាំងនេះគឺដោយសារហូបសាច់ឆ្កែនេះឯង”។
លោកបានបន្ថែមថា ”មនុស្សប្រាំបីនាក់កំពុងសម្រាកព្យាបាលនៅមន្ទីរពេទ្យនៅឡើយ ចំណែកមនុស្ស២៦នាក់ទៀតបានត្រឡប់ទៅផ្ទះវិញហើយបន្ទាប់ពីបានធូរស្រាលពីជំងឺ”។
អ្នកស្រី ឈាង អែម អាយុ៣៧ឆ្នាំ ជាកូនស្រីរបស់លោក លីន ឈាង អាយុ៦៧ឆ្នាំ ជាមនុស្សម្នាក់ក្នុងចំណោមអ្នកស្លាប់បាននិយាយថា អ្នកស្រីសន្និដ្ឋានថា ឪពុករបស់អ្នកស្រីស្រវឹងស្រានៅពេលគាត់ត្រឡប់មកពីជប់លៀងវិញកាលពីថ្ងៃអាទិត្យ។
អ្នកស្រី ឈាង អែម បាននិយាយថា “ឪពុករបស់ខ្ញុំបានហូបសាច់ឆ្កែ ហើយបានផឹកស្រាជាមួយក្រុមគ្រួសារលោក ជា រ័ត្ន។ គាត់គ្រុនក្ដៅខ្លាំង ហើយត្រូវបានបញ្ជូនទៅមន្ទីរពេទ្យបង្អែកស្រុក។ មុនពេលគាត់ស្លាប់ គាត់និយាយថា ‘កូនៗទាំងអស់គ្នា ទ្រូងឪក្ដៅខ្លាំងណាស់ ហើយបន្ទាប់មកគាត់បានផុតដង្ហើមទៅ។ យើងទាំងអស់គ្នាយំសោកយ៉ាងខ្លាំង”។
លោក ចាន់ សុគីម អធិការនគរបាលស្រុកបានមានប្រសាសន៍ថា អាជ្ញាធរកំពុងតែប្រឹងប្រែងកំណត់ប្រភពនៃការពុលនេះនៅឡើយ ហើយម្នាក់ៗគិតថាដោយសារសាច់ឆ្កែនេះឯង។
លោកបានមានប្រសាសន៍ថា “យើងបានប្រមូលភ័ស្តុតាង និងបានបញ្ជូនទៅមន្ទីរសុខាភិបាលខេត្ត ហើយយើងមិនទាន់ទទួលបានលទ្ធផលនៅឡើយទេ”៕ សារុន