កិច្ចប្រជុំកំពូលអាស៊ានលើកទី៤០ និងទី៤១ នៅកម្ពុជាចាប់ផ្ដើមហើយនៅព្រឹកថ្ងៃទី១១ ខែវិច្ឆិកា ដោយមានវត្តមានមេដឹកនាំបណ្ដាប្រទេសជាសមាជិក ប៉ុន្តែពុំមានវត្តមានប្រទេសមីយ៉ាន់ម៉ា នោះទេ ពីព្រោះប្រទេសនេះមិនបញ្ជូនតំណាងមិនមែននយោបាយចូលរួមតាមការអញ្ជើញរបស់កម្ពុជាក្នុងនាមជាប្រធានអាស៊ាន។
មេដឹកនាំអាស៊ានដែលមានវត្តមានក្នុងកិច្ចប្រជុំកំពូលនេះមាន៖
- លោកនាយករដ្ឋមន្ត្រី ហ៊ុន សែន ដែលជាប្រធានកិច្ចប្រជុំ
- ព្រះចៅស៊ុលតង់ ហាស់សាណាល់ បុលគីយ៉ាស់ (Hassanal Bolkiah) ព្រះមហាក្សត្រប្រ៊ុយណេ
- ប្រធានាធិបតីឥណ្ឌូនេស៊ី ចូកូ វីដូដូ (Joko Widodo)
- នាយករដ្ឋមន្ត្រីឡាវ ផនខាំ វីផាវ៉ាន់ (Phankham Viphavanh)
- ប្រធានាធិបតីហ្វីលីពីន ហ្វើឌីណាន់ ម៉ាកូស (Ferdinand Marcos)
- នាយករដ្ឋមន្ត្រីសិង្ហបុរី លី សៀនឡុង
- នាយករដ្ឋមន្ត្រីថៃ ប្រាយុទ្ធ ចាន់អូចា (Prayut Chan-o-cha)
- និងនាយករដ្ឋមន្ត្រីវៀតណាម ផាម មិញជីញ (Pham Minh Chinh)។
ចំណែកឯប្រទេសម៉ាឡេស៊ី អវត្តមាននាយករដ្ឋមន្ត្រី ព្រោះរវល់ក្នុងការបោះឆ្នោតសភា ដោយបញ្ជូនប្រេសិតពិសេសចូលរួមជំនួសវិញ។ ឯប្រទេសមីយ៉ាន់ម៉ា មេដឹកនាំរបបយោធា មីន អ៊ុងឡាំង មិនត្រូវបានអញ្ជើញឡើយ ដោយម្ចាស់ផ្ទះអញ្ជើញតំណាងមិនមែននយោបាយឱ្យចូលរួម តែប្រទេសនេះក៏មិនបញ្ជូនមកដែរ។
បញ្ហាមីយ៉ាន់ម៉ា គឺជាប្រធានបទក្ដៅក្នុងជំនួបកំពូលនេះ ដោយមេដឹកនាំអាស៊ាននឹងជជែកពីផែនការដែលត្រូវធ្វើដើម្បីបញ្ចប់ជម្លោះក្នុងប្រទេសនេះ។
លើសពីនេះទៀត បញ្ហាសមុទ្រចិនខាងត្បូង នុយក្លេអ៊ែរនៅឧបទ្វីបកូរ៉េ និងសង្គ្រាមអ៊ុយក្រែន ក៏ជាប្រធានបទសំខាន់ដែរ។
ព្រឹត្តិការណ៍កិច្ចប្រជុំកម្រិតកំពូលដែលនឹងប្រព្រឹត្តទៅក្នុងរយៈពេល ៤ថ្ងៃនេះ រួមមាន៖
- កិច្ចប្រជុំកំពូលអាស៊ានលើកទី៤០ និងលើកទី៤១
- កិច្ចប្រជុំកំពូលអាស៊ាន-ចិន លើកទី២៥
- កិច្ចប្រជុំកំពូលអាស៊ាន-ជប៉ុន លើកទី២៥
- កិច្ចប្រជុំកំពូលអាស៊ាន-សាធារណរដ្ឋកូរ៉េ លើកទី២៣
- កិច្ចប្រជុំកំពូលអាស៊ានបូកបី លើកទី២៥
- កិច្ចប្រជុំកំពូលរំលឹកខួប ៣០ឆ្នាំនៃទំនាក់ទំនងដៃគូសន្ទនាអាស៊ាន-ឥណ្ឌា
- កិច្ចប្រជុំកំពូលអាស៊ាន-សហរដ្ឋអាមេរិក លើកទី១០
- កិច្ចប្រជុំកំពូលអាស៊ាន-អូស្ត្រាលី លើកទី២
- កិច្ចប្រជុំកំពូលរំលឹកខួបនៃទំនាក់ទំនងអាស៊ាន-កាណាដា
- និងកិច្ចប្រជុំកំពូលអាស៊ាន-អង្គការសហប្រជាជាតិ និងកិច្ចប្រជុំកំពូលអាស៊ីបូព៌ា (អាស៊ាន១០ ចិន អាមេរិក រុស្ស៊ី ជប៉ុន កូរ៉េខាងត្បូង អូស្ត្រាលី ឥណ្ឌា នូវែលហ្សេឡង់) លើកទី១៧៕