កាលពីថ្ងៃព្រហស្បតិ៍ មហាសន្និបាតអង្គការសហប្រជាជាតិបានផ្ដល់អនុសាសន៍ថ្មីបំផុតរបស់ខ្លួនដល់រដ្ឋាភិបាលកម្ពុជាស្ដីពីការធ្វើឲ្យមានភាពប្រសើរឡើងដល់ស្ថានភាពសិទ្ធិមនុស្សក្នុងប្រទេសនេះ បន្ទាប់ពីមានការពិនិត្យរបាយការណ៍សិទ្ធិមនុស្សនៅក្នុងទីក្រុងហ្សឺណែវ កាលពីសប្ដាហ៍មុន។
អនុសាសន៍ដែលផ្ដល់ដោយគណៈប្រតិភូមកពីប្រទេសចំនួន៧៦អំឡុងការពិនិត្យរបាយការណ៍សិទ្ធិមនុស្សនេះមានការជំរុញឲ្យកម្ពុជាបំពេញតាមការសន្យាពីការបង្កើតស្ថាប័នសិទ្ធិមនុស្សឯករាជ្យ ពីការអនុវត្តកំណែទម្រង់ដើម្បីបង្កើតប្រព័ន្ធតុលាការឯករាជ្យ ពីការកែទម្រង់ការបោះឆ្នោតក្នុងលក្ខណៈស៊ីជម្រៅ និងពីការកែលម្អការការពារស្ត្រី និងកុមារ។
ប្រទេសមួយចំនួនក៏បានផ្ដល់អនុសាសន៍ឲ្យរដ្ឋាភិបាលផ្ដល់ឡើងវិញនូវសិទ្ធិសេរីភាពក្នុងការប្រមូលផ្ដុំគ្នាស្របតាមរដ្ឋធម្មនុញ្ញ ការបង្កើតសមាគម និងការបញ្ចេញមតិបន្ទាប់ពីមានការបង្ក្រាបដោយហិង្សាលើការធ្វើបាតុកម្ម និងលើក្រុមប្រឆាំងកាលពីខែមុន ពេលអ្នកតវ៉ាប្រាំនាក់ត្រូវបានសម្លាប់ ២៣នាក់ត្រូវបានចាប់ខ្លួនដាក់ពន្ធនាគារ និងរងរបួសរាប់សិបនាក់។
គណៈប្រតិភូមកពីប្រទេសស្វ៊ីស បានផ្ដល់អនុសាសន៍ថា “ត្រូវបង្កើតបរិយាកាសល្អពោរពេញដោយសុខសន្តិភាពដែលបុគ្គលម្នាក់ៗ និងក្រុមនីមួយៗអាចអនុវត្តសិទ្ធិសេរីភាពក្នុងការបញ្ចេញមតិ ការបង្កើតសមាគម និងការប្រមូលផ្ដុំគ្នាដោយសន្តិវិធី ហើយត្រូវបញ្ចប់ការយាយី ការបំភិតបំភ័យ ការចាប់ខ្លួនតាមអំពើចិត្ត និងការប្រើអំពើហិង្សាលើរាងកាយ ជាពិសេសគឺអំឡុងពេលធ្វើបាតុកម្ម”។ សាធារណរដ្ឋឆែក បានផ្ដល់អនុសាសន៍ថា “ត្រូវស៊ើបអង្កេតដោយមិនលម្អៀងនូវករណីនៃការប្រើកម្លាំងហួសហេតុលើបាតុករ និងករណីបាញ់សម្លាប់អំឡុងបាតុកម្មកាលពីពេលថ្មីៗនេះ”។
លោក Maina Kiai អ្នករាយការណ៍ពិសេសរបស់អង្គការសហប្រជាជាតិទទួលបន្ទុកលើសិទ្ធិសេរីភាពក្នុងការបង្កើតសមាគម និងការប្រមូលផ្ដុំគ្នាដោយសន្តិវិធី បានប្រកាសកាលពីថ្ងៃសុក្រថា លោកនឹងមកធ្វើទស្សនកិច្ចនៅក្នុងប្រទេសកម្ពុជាចាប់ពីថ្ងៃទី៥ រហូតដល់ថ្ងៃទី៧ ខែកុម្ភៈ។ លោក Maina Kiai បានលើកឡើងនៅក្នុងសេចក្ដីថ្លែងការណ៍ថា “ចលនាតវ៉ាក្រោយការបោះឆ្នោតក្នុងប្រទេសកម្ពុជា គឺមានលក្ខណៈគួរឲ្យកត់សម្គាល់ ទាំងទំហំ និងពេលវេលា។ នេះគឺជាការឆ្លុះបញ្ចាំងពីសារៈសំខាន់នៃសិទ្ធិសេរីភាពក្នុងការប្រមូលផ្ដុំគ្នាដោយសន្តិវិធី ហើយខ្ញុំមានការព្រួយបារម្ភជាទីបំផុតចំពោះការបង្ក្រាបយ៉ាងសាហាវរបស់អាជ្ញាធរក្នុងរយៈពេលមួយខែចុងក្រោយនេះ”។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានលើកឡើងកាលពីម្សិលមិញថា ក្រសួងមហាផ្ទៃកំពុងតាមដានស្ថានភាពនយោបាយ ហើយនឹងបន្តធ្វើការសម្រេចថា តើក្រុមណាមួយដែលអាចអនុញ្ញាតឲ្យធ្វើការប្រមូលផ្ដុំ និងធ្វើបាតុកម្មបាន។ លោក ផៃ ស៊ីផាន បានមានប្រសាសន៍ថា “ពាក់ព័ន្ធនឹងបញ្ហា [ប្រមូលផ្ដុំគ្នាដោយសន្តិវិធី] ហ្នឹងយើងត្រូវឲ្យច្បាប់និងសណ្ដាប់ធ្នាប់ សុខសន្តិភាព…និងភាពស្ងប់ស្ងាត់វិលមកភាពប្រក្រតីវិញសិន រួចទើបយើងអនុញ្ញាតឲ្យមានការប្រមូលផ្ដុំគ្នាដោយសន្តិវិធីវិញបាន”។
លោក ខេង ទីតូ អ្នកនាំពាក្យកងរាជអាវុធហត្ថ បានអះអាងកាលពីខែមករាថា សិទ្ធិសេរីភាពក្នុងការធ្វើបាតុកម្ម នឹងមិនត្រូវបានផ្ដល់ឲ្យវិញទេរហូតទាល់តែសមាជិកសភាគណបក្សប្រឆាំងបញ្ឈប់ការធ្វើពហិការសភាតាមរយៈការទទួលយកអាសនៈសភាទាំង៥៥របស់ខ្លួន។
លោក ផៃ ស៊ីផាន បានលើកឡើងកាលពីម្សិលមិញថា បម្រាមនេះគឺមិនអនុវត្តដោយស្មើភាពគ្នាទេ ដោយមានប្រសាសន៍ថា “ ខ្ញុំគិតថា អង្គការខ្លះនៅតែមានសិទ្ធិធ្វើ [បាតុកម្ម] ប៉ុន្តែ…មិនមែនគណបក្សសង្គ្រោះជាតិ ឬអង្គការពាក់ព័ន្ធផ្សេងៗទៀតឡើយ៕ សេរីវុធ