កាលពីម្សិលមិញ ខុទ្ទកាល័យរបស់លោកនាយករដ្ឋមន្ត្រី ហ៊ុន សែន បានប្រកាសប្រាប់មន្ត្រីរដ្ឋាភិបាលទូទាំងប្រទេសអំពីការឆបោក ឲ្យផ្ទេរលុយតាមលេខទូរស័ព្ទជាថ្នូរនឹងការដំឡើងបុណ្យស័ក្ដិ។
យោងតាមសេចក្ដីប្រកាសមួយដែលខុទ្ទកាល័យនេះបានចេញឲ្យដឹងថា មន្ត្រីរដ្ឋាភិបាលមួយចំនួនបានទទួលការហៅទូរស័ព្ទពីមនុស្សដែលអះអាងថា ធ្វើការនៅខុទ្ទកាល័យរបស់លោក ហ៊ុន សែន និងបានស្នើឲ្យផ្ទេរលុយតាមរយៈសេវាផ្ទេរលុយវីង ជាថ្នូរនឹងការដំឡើងបុណ្យស័ក្ដិ។
សេចក្ដីប្រកាសព័ត៌មានខ្លីដែលចុះហត្ថលេខាដោយលោក ហូ សិទ្ធី ប្រធានខុទ្ទកាល័យនេះលើកឡើងថា “នៅពេលថ្មីៗនេះ ជនល្មើសបានឆបោកមន្ត្រីខេត្ត និងមន្ត្រីក្រុង ព្រមទាំងកងកម្លាំងប្រដាប់អាវុធតាមរយៈការហៅទូរស័ព្ទ ដោយនិយាយថា ពួកគេធ្វើការនៅខុទ្ទកាល័យរបស់សម្ដេចតេជោនាយករដ្ឋមន្ត្រី”។ “ បន្ទាប់មកពួកគេនិយាយថា ពួកគេអាចដំឡើងតំណែង ឬឋានន្តរស័ក្ដិ ប៉ុន្តែត្រូវការរៀបចំឯកសារ ដូច្នេះហើយពួកគេបានប្រាប់ឲ្យផ្ទេរលុយតាមវីង”។ “ ខុទ្ទកាល័យសូមជូនដំណឹងដល់មន្ត្រីខេត្ត និងក្រុង ព្រមទាំងកងកម្លាំងប្រដាប់អាវុធឲ្យមានការប្រុងប្រយ័ត្នចំពោះទង្វើទុច្ចរិតនេះ។
ប្រសិនបើបងប្អូនទទួលការហៅទូរស័ព្ទពីជនណាដែលអះអាងថា “ជាមន្ត្រីខុទ្ទកាល័យ និងស្នើឲ្យផ្ទេរលុយសម្រាប់កិច្ចការណាមួយនោះ សូមទាក់ទងមកខុទ្ទកាល័យជាមុនសិន”។
សេចក្ដីប្រកាសព័ត៌មានខ្លីនេះមិនបានបញ្ជាក់ថា ការឆបោកបែបនេះមានរយៈពេលយូរប៉ុណ្ណា ប្រកាសឲ្យមន្ត្រីដឹងអំពីការឆបោកនេះដោយរបៀបណា ឬមិនបញ្ជាក់ថាតើមានមន្ត្រីណាបានបង់លុយដើម្បីទទួលបានការដំឡើងឋានន្តរស័ក្ដិនោះទេ។
លោក សុក សំអឿន អ្នកជំនាញផ្នែកច្បាប់ និងជានាយកប្រតិបត្តិក្រុមអ្នកច្បាប់ការពារសិទ្ធិកម្ពុជាបានមានប្រសាសន៍ថា ទោះបីជាពួកគេគឺជាជនរងគ្រោះក៏ដោយ ក៏អាចប្រឈមការផ្ដន្ទាទោសចំពោះការសូកប៉ាន់តាមច្បាប់ប្រឆាំងអំពើពុករលួយដែរ។ លោកបានមានប្រសាសន៍ថា ” វាអាស្រ័យលើគោលបំណង”។ លោកបានបន្ថែមថា មន្ត្រីបែបនេះក៏ជាជនរងគ្រោះដោយសារប្រព័ន្ធនយោបាយ ដែលពុករលួយរួចហើយនេះដែរ។ ” តាមប្រព័ន្ធរបស់យើង មានការពិបាកចោទនរណាម្នាក់ពីបទសូកបា៉ន់ណាស់”។
កាលពីម្សិលមិញ មន្ត្រីនៅខុទ្ទកាល័យរបស់លោក ហ៊ុន សែន បានបដិសេធមិនធ្វើអត្ថាធិប្បាយ ហើយមន្ត្រីនៅអង្គភាពប្រឆាំងអំពើពុករលួយមិនអាចទាក់ទងបាន។
លោក អានថូនី ពើគិន នាយកប្រតិបត្តិក្រុមហ៊ុនវីង បានមានប្រសាសន៍ថា លោកមិនបានដឹងអំពីការឆបោកពាក់ព័ន្ធនឹងខុទ្ទកាល័យរបស់លោក ហ៊ុន សែន ទេ ប៉ុន្តែក្រុមហ៊ុនវីងបានចាត់វិធានការប្រុងប្រយ័ត្នជាមុនរួចហើយចំពោះអ្នកឆបោក។
លោក ពើគិន បានមានប្រសាសន៍ថា ” យើងបានផ្សព្វផ្សាយជាសាធារណៈតាមទូរទស្សន៍ និងវិទ្យុ ដោយមានការសម្ភាសតំណាងរបស់យើង និងមានការពន្យល់ប្រាប់អំពីការឆបោក។ យើងបានផ្សព្វផ្សាយតាមអុីនធើណិត និងនៅតាមកន្លែងផ្ទេរលុយដើម្បីប្រាប់អតិថិជនកុំឲ្យផ្ញើលុយទៅឲ្យមនុស្សដែលពួកគាត់មិនស្គាល់។ “ភ្នាក់ងារវីង ក៏ត្រូវបានបណ្ដុះបណ្ដាលអំពីរបៀបសួរអតិថិជនអំពីការផ្ញើលុយរបស់ពួកគេ និងរបៀបតាមដានសកម្មភាពរបស់ឧក្រិដ្ឋជនផងដែរ ហើយនៅកន្លែងផ្ញើលុយក៏មានបំពាក់កាមេរ៉ាសុវត្ថិភាពដែរ”។
លោក ពើគិន បានមានប្រសាសន៍ថា ក្នុងចំណោមប្រតិបត្តិការផ្ទេរលុយចំនួន៣លានប្រតិបត្តិការដែលក្រុមហ៊ុនធ្វើក្នុងមួយខែ មានតែមួយឬពីរករណីប៉ុណ្ណោះដែលអាចជាករណីឆបោក។ លោកបានមានប្រសាសន៍ថា ករណីឆបោកជាទូទៅមានចន្លោះពី១០ដុល្លារទៅក្រោម២.០០០ដុល្លារ។ លោកបានឲ្យដឹងទៀតថា “ករណីឆបោកមួយដែលធំជាងគេ គឺមានចំនួន១.២០០ដុល្លារ” ការអប់រំនៅតែជាកត្តាសំខាន់ក្នុងការរារាំងជនឆបោក។ “ត្រូវមានការចំណាយពេលយូរក្នុងការអប់រំប្រជាពលរដ្ឋអំពីការឆបោក។ យើងកំពុងប្រឹងប្រែងយ៉ាងខ្លាំងដើម្បីទប់ស្កាត់អំពើនេះ ប៉ុន្តែនៅទីបញ្ចប់នៅពេលនរណាម្នាក់ចាញ់បោកគេហើយ វាមិនងាយបានលុយមកវិញទេ”។
ការឆបោកតាមទូរស័ព្ទពាក់ព័ន្ធនឹងការផ្ទេរលុយមិនមែនជារឿងថ្មីទេនៅក្នុងប្រទេសកម្ពុជា។ កាលពីឆ្នាំមុន បុរសអាយុ៤២ឆ្នាំម្នាក់មកពីខេត្តរតនគិរី បានក្លាយជាជនរងគ្រោះដោយសារគេប្រាប់ឲ្យគាត់ផ្ទេរលុយចំនួន២លានរៀលតាមវីង ដើម្បីទទួលលុយឈ្នះឆ្នោតចំនួន៥.០០០ដុល្លារ។
នៅពេលថ្មីៗនេះ កម្មវិធីមួយរបស់ទូរទស្សន៍ស៊ីធីអិន កាលពីសប្ដាហ៍មុនក៏បានជូនដំណឹងដល់ទស្សនិកជនអំពីរបៀបរកការឆបោក ហើយបានបង្ហាញស្ត្រីម្នាក់ដែលស្ទើរតែបានក្លាយជាជនរងគ្រោះដោយសារការឆបោកតាមទូរស័ព្ទ ប៉ុន្តែបានរួចផុតពីការឆបោកនោះវិញ បន្ទាប់ពីប្ដីរបស់គាត់ទាមទារជួបអ្នកហៅទូរស័ព្ទនោះ៕ គឹមហឿន