មួយថ្ងៃបន្ទាប់ពីសមាជិកបីនាក់ក្នុងចំណោមសមាជិកសហគមន៍របស់ខ្លួនត្រូវបានចាប់ខ្លួនបន្ទាប់ពីការប៉ះទង្គិចគ្នាដ៏ហិង្សាជាមួយនគរបាលមក អ្នកភូមិប្រហែល៥០នាក់មកពីខេត្តកំពង់ឆ្នាំងបានបន្តហែក្បួនដោយសន្តិវិធីឆ្ពោះមកកាន់រាជធានីភ្នំពេញកាលពីម្សិលមិញ ប៉ុន្តែត្រូវបានរារាំងដោយមន្ត្រីនគរបាលខណ្ឌឫស្សីកែវអស់មួយសន្ទុះធំ។
អ្នកភូមិដែលភាគច្រើនមកពីភូមិឡពាង ស្រុកកំពង់ត្រឡាច ខេត្តកំពង់ឆ្នាំងមានគម្រោងយកញត្តិទៅដាក់ជូនក្រសួងយុត្តិធម៌ រដ្ឋសភា និងស្ថានទូតនានាដើម្បីអំពាវនាវឲ្យមានការដោះលែងអ្នកភូមិប្រាំនាក់ដែលត្រូវបានចាប់ដាក់ពន្ធនាគារជុំវិញការប៉ះទង្គិចគ្នាជាមួយកម្មករក្រុមហ៊ុនខេឌីស៊ី ដែលពួកគាត់លើកឡើងថា បានរំលោភយកដីរបស់ពួកគាត់រយៈពេលជាងមួយទសវត្សរ៍មកហើយ។
បន្ទាប់ពីចំណាយពេលមួយយប់ស្នាក់នៅវត្តមួយក្នុងខេត្តកណ្តាល ក្រុមអ្នកភូមិបានបន្តដំណើរមកកាន់រាជធានី ប៉ុន្តែត្រូវបានរារាំងដោយអាជ្ញាធរខណ្ឌឫស្សីកែវនៅម៉ោងប្រហែល១០ព្រឹក ហើយត្រូវបានអញ្ជើញឲ្យទៅជួបជាមួយលោក ធុយ សុខន អភិបាលខណ្ឌនៅក្នុងសាលារៀនមួយក្បែរនោះ។ លោក ធុយ សុខុន ដែលពួកគេបានប្រាប់ពួកគាត់ថា ការហែក្បួនរបស់ពួកគាត់ត្រូវបានហាមឃាត់។
លោកបានពន្យល់ថា “ជាទូទៅ អ្នកភូមិមានសិទ្ធិពេញលេញដូចដែលបានចែងក្នុងរដ្ឋធម្មនុញ្ញអំពីសេរីភាពនៃការបញ្ចេញមតិ ប៉ុន្តែយើងមិនអាចអនុញ្ញាតឲ្យពួកគាត់ហែក្បួនដោយមានមនុស្សមួយក្រុមធំបែបនេះឡើយ។ ឥឡូវនេះពួកគាត់បានចូលមកដល់រាជធានី ដូច្នេះ យើងត្រូវការពារសន្តិសុខ និងសណ្តាប់ធ្នាប់។ ពិតមែនហើយ យើងមិនអាចអនុញ្ញាតឲ្យពួកគាត់បន្តដំណើរទៅមុខបានទេ”។
លោកបានមានប្រសាសន៍ថា “ថ្នាក់លើ” បានបញ្ជាឲ្យរារាំងការហែក្បួននេះ។ ក្រុមហ៊ុនខេឌីស៊ី គឺជាក្រុមហ៊ុនដែលអ្នកភូមិចោទថា បានប្លន់យកដីរបស់ពួកគាត់ទំហំ១៤៥ហិកតានោះ ត្រូវបានកាន់កាប់ដោយអ្នកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល។
នៅខាងក្រៅសាលារៀន មានការប៉ះទង្គិចគ្នាមួយបានកើតឡើងបន្ទាប់ពីអ្នកភូមិបានឃើញបុគ្គលិកក្រុមហ៊ុនខេឌីស៊ីម្នាក់លួចស្ដាប់ការប្រជុំរបស់ពួកគេ។ បុគ្គលិកនោះត្រូវអ្នកភូមិដែលមានកំហឹងដេញចេញពីបរិវេណសាលារៀន ហើយព្រះសង្ឃមួយអង្គបានយកឆត្រវាយមុនពេលបុគ្គលិកនោះធ្លាក់ចូលប្រឡាយមួយ។ ទីបំផុត កម្មករនោះបានរត់គេចពីកន្លែងនោះតាមរថយន្តមួយគ្រឿង។
ប៉ុន្មានម៉ោងក្រោយមក ក្រុមមន្ត្រីបានអនុញ្ញាតឲ្យក្រុមអ្នកភូមិបន្តដំណើរ។ ក្រុមអ្នកភូមិមានគម្រោងដាក់ញត្តិនៅក្នុងរាជធានីនៅថ្ងៃនេះ។
អ្នកស្រី អ៊ុំ សុភី ជាតំណាងអ្នកភូមិដែលប្ដីរបស់គាត់ឈ្មោះ ស្ងួន ញឿន ជាបុរសម្នាក់ក្នុងចំណោមបុរសបីនាក់ដែលត្រូវបានចាប់ខ្លួនក្នុងការប៉ះទង្គិចគ្នាកាលពីថ្ងៃអង្គារ តាមផ្លូវជាតិលេខ៥ បានហែក្បួនពីភូមិឡពាងមកកាន់រាជធានីភ្នំពេញជាមួយនឹងទារកអាយុ៤ខែរបស់អ្នកស្រី។
អ្នកស្រីបាននិយាយថា ” យើងចង់ឲ្យសហរដ្ឋអាមេរិក សហភាពអឺរ៉ុប និងប្រទេសបារាំងដាក់សម្ពាធលើរដ្ឋាភិបាល ពីព្រោះមេដឹកនាំរដ្ឋាភិបាលមិនបានដោះស្រាយបញ្ហាវិវាទដីធ្លីជូនប្រជាពលរដ្ឋក្រីក្រ ដែលបានតស៊ូទាមទារដីស្រែរបស់ខ្លួនពីអ្នកស្រី ជា ខេង ភរិយារបស់លោក ស៊ុយ សែម មកវិញ”។
លោក សុរិយា ស៊ូបេឌី ប្រេសិតពិសេសរបស់អង្គការសហប្រជាជាតិទទួលបន្ទុកសិទិ្ធមនុស្សក្នុងប្រទេសកម្ពុជា បានចេញសេចក្ដីថ្លែងការណ៍មួយកាលពីខែមុន អំពាវនាវឲ្យក្រុមហ៊ុនខេឌីស៊ីបញ្ឈប់ការអភិវឌ្ឍលើដីដែលមានវិវាទនេះ រហូតដល់វិវាទដីធ្លីត្រូវបានដោះស្រាយរួចរាល់។
លោក សម រង្ស៊ី ប្រធានគណបក្សសង្គ្រោះជាតិបានលើកឡើងនៅក្នុងទំព័រហ្វេសប៊ុករបស់លោកកាលពីម្សិលមិញថា លោកចង់អញ្ជើញលោក ស៊ុយ សែម ឲ្យមកបង្ហាញមុខនៅរដ្ឋសភា ដើម្បីពន្យល់ ” ហេតុអ្វីបានជាលោកអនុញ្ញាតឲ្យភរិយារបស់លោកប្រើប្រាស់ឥទ្ធិពលនយោបាយរបស់លោកប្លន់យកដីពីក្រុមអ្នកភូមិ ហើយប្រព្រឹត្តទង្វើអមនុស្សធម៌ទៅលើជនរងគ្រោះ”។
ថ្លែងតាមទូរស័ព្ទ លោក សម រង្ស៊ី បានមានប្រសាសន៍ថា ចំណាត់ការរបស់នគរបាល និងតុលាការបង្ហាញឲ្យឃើញថា ពួកគេកំពុងបម្រើឲ្យផលប្រយោជន៍នយោបាយ។
លោកបានមានប្រសាសន៍ថា ” វាជាសិទ្ធិរបស់យើងក្នុងការដាក់ញត្តិសម្ដែងការមិនពេញចិត្ត ហើយខ្ញុំសង្ឃឹមថា ក្នុងចំណោមសមាជិកសភាគណបក្សប្រជាជនកម្ពុជាក៏មានអ្នកដែលមានក្ដីមេត្តាករុណាដល់ជនរងគ្រោះដោយសារការរំលោភយកដីធ្លីដែរ ហើយអាចចូលរួមជាមួយពួកយើងដើម្បីដាក់ទណ្ឌកម្មលោក ស៊ុយ សែម “៕ សារុន