ការជួបជុំគ្នាទូទាំងប្រទេសដើម្បីរំឭកដល់ទិវាសិទ្ធិមនុស្សនៅសប្ដាហ៍ក្រោយ តែសកម្មជន ព្រះសង្ឃ និងជនជាតិដើមភាគតិចនៅខេត្តរតនគិរី នឹងធ្វើការជួបជុំគ្នានៅថ្ងៃនេះមុនពេលដែលទិវានេះមកដល់ ដើម្បីហែក្បួនរយៈពេល១សប្ដាហ៍មកកាន់រាជធានីភ្នំពេញ។
យោងតាមលោកស្រី ណាលី ពីឡូក ប្រធានអង្គការសិទ្ធិមនុស្សលីកាដូ បានឲ្យដឹងថា សមាជិក៣០០នាក់មកពីក្រុមជនជាតិដើមភាគតិចប្រាំពីរផ្សេងគ្នា គ្រោងចូលរួមក្នុងការរាំរបាំប្រពៃណី និងការបញ្ចាំង ភាពយន្តឯកសារនៅក្នុងស្រុកអូរជុំ ដោយកត់សម្គាល់ជាលើកដំបូងដែលអ្នកភូមិនៅក្នុងខេត្តភាគឦសានដាច់ស្រយាលនេះចូលរួមរំឭកដល់ទិវាសិទ្ធិមនុស្ស។
លោក ចា សីហៈ ប្រធានសមាគមសម្ព័ន្ធនិស្សិតបញ្ញវន្តខ្មែរបានមានប្រសាសន៍ថា និស្សិត២៥នាក់ ព្រះសង្ឃ៣៥អង្គ និងអ្នកភូមិខេត្តរតនគិរី២០០នាក់ មានគម្រោងហែក្បួនមករាជធានីភ្នំពេញដោយចាប់ផ្ដើមនៅថ្ងៃស្អែក ចែកខិត្តប័ណ្ណ និងកាន់បដានៅតាមផ្លូវ។
លោកបានមានប្រសាសន៍ថា “យើងនឹងកាន់បដាមួយចំនួន…ដើម្បីឲ្យប្រជាពលរដ្ឋដឹងអំពីសិទ្ធិរបស់ខ្លួន និងសិទ្ធិក្នុងការបញ្ចេញមតិ រីឯជនជាតិដើមភាគតិចនឹងលើកឡើងនូវបញ្ហា និងកង្វល់របស់ខ្លួនដែលពួកគាត់បានប្រឈម។
ក្រុមមកពីខេត្តរតនគិរី គឺជាក្រុមមួយក្នុងចំណោមក្រុមចំនួនប្រាំពីរមកពីទូទាំងប្រទេស ដែលរយៈពេលពីរឆ្នាំជាប់គ្នានេះមានគម្រោងហែក្បួនតាមផ្លូវជាតិមួយចំនួន ហើយនឹងជួបជុំគ្នានៅមុខរដ្ឋសភាក្នុងរាជធានីភ្នំពេញនៅថ្ងៃទី១០ ខែធ្នូ ដែលជាទិវាសិទ្ធិមនុស្ស។
លោក ងួន គឿន ស្នងការនគរបាលខេត្តរតនគិរីបានមានប្រសាសន៍ថា ការហែក្បួនគួរចាប់ផ្តើមដោយរលូន។ លោកបានមានប្រសាសន៍ថា ” យើងបានជួបជាមួយតំណាងរបស់ពួកគាត់ ហើយយើងបានអនុញ្ញាតឲ្យពួកគាត់ហែក្បួន។ យើងសុំឲ្យពួកគាត់កុំដើរពេញផ្លូវ និងធ្វើឲ្យស្ទះចរាចរណ៍ ហើយកុំបណ្ដោយឲ្យមានអ្នកប្រើអំពើហិង្សា”។
យោងតាមរបាយការណ៍របស់អង្គការលីកាដូដែលលើកឡើងថា ក្រុមមកពីខេត្តរតនគិរីនឹងជួបជាមួយអ្នកធ្វើដំណើរមកពីខេត្តកំពង់ចាម មុនពេលមកកាន់រាជធានីភ្នំពេញបានឲ្យដឹងថា នៅចុងសប្ដាហ៍ សកម្មជនជាង៦០០នាក់មកពីទូទាំងប្រទេស នឹងចាប់ផ្តើមដើរដោយថ្មើរជើងមកកាន់រាជធានី។
ប៉ុន្តែបើយោងតាមលោក ជឹម លាវ អភិបាលរងខេត្តកំពង់ចាមបានឲ្យដឹងថា ក្រុមនេះប្រហែលជាមិនត្រូវបានទទួលដោយកក់ក្ដៅទេ។ លោកបានមានប្រសាសន៍ថា ” យើងទទួលបានព័ត៌មានអំពីការហែក្បួននេះកាលពីម្សិលមិញ។ យើងនឹងមិនអនុញ្ញាតឲ្យពួកគាត់ហែក្បួនទេ ប្រសិនបើប៉ះពាល់ដល់សណ្ដាប់ធ្នាប់សាធារណៈ នយោបាយ ឬប្រសិនបើពួកគាត់ទាមទារសិទ្ធិនោះ”៕ សារុន (រាយការណ៍បន្ថែមដោយ Maria Paula Brito)