អតីតមន្ត្រីគណបក្សសង្រ្គោះជាតិនៅខេត្តកំពត មួយរូបបានស្នើឱ្យតុលាការទម្លាក់ចោលបទចោទប្រកាន់ លើអ្នកស្រី និងអតីតមន្ត្រីគណបក្សប្រឆាំងដទៃទៀត ដោយសារពួកគាត់មិនបានប្រព្រឹត្តដូចការចោទប្រកាន់អ្វីនោះឡើយ។
អតីតមន្រ្តីគណបក្សសង្រ្គោះជាតិអ្នកស្រី ប៉ែន មុំ ត្រូវបានតុលាការសម្រេចដោះលែងឱ្យនៅក្រៅឃុំបណ្តោះអាសន្ន កាលពីឆ្នាំ២០១៩ ប៉ុន្តែអ្នកស្រីត្រូវបានតុលាការដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការ ដូចជាតម្រូវឱ្យអ្នកស្រីទៅជួបមន្ត្រីនគរបាលប៉ុស្តិ៍១ខែម្តង មិនអាចចេញទៅក្រៅប្រទេសបាន មិនអាចប្តូរទីលំនៅបាន និងមិនអាចធ្វើសកម្មភាពប្រមូលផ្តុំ ធ្វើបាតុកម្ម ឬការតវ៉ាណាមួយដែលខុសច្បាប់ជាដើម។ អ្នកស្រី ប៉ែន មុំ ត្រូវបានតុលាការខេត្តកំពតចោទប្រកាន់ពីបទរួមគំនិតក្បត់ជាតិ។
យ៉ាងនេះក្តី តាមរយៈវីដេអូឃ្លីបមួយ អ្នកស្រី ប៉ែន មុំ បានស្នើទៅរដ្ឋាភិបាលលោកហ៊ុន សែន និងតុលាការ មេត្តាទម្លាក់ចោលបទចោទប្រកាន់ទាំងឡាយមកលើអ្នកស្រី។ ជាងនេះទៅទៀតអ្នកស្រីហៅការចោទប្រកាន់មកលើគាត់ថា ជារឿងអយុត្តិធម៌ ដោយសារអ្នកស្រីមិនបានប្រព្រឹត្តដូចការចោទប្រកាន់អ្វីនោះឡើយ។
បន្ថែមពីនេះ អ្នកស្រីក៏ស្នើទៅតុលាការទម្លាក់ចោទសំណុំរឿងលើអ្នកជាប់ឃុំនយោបាយផ្សេងទៀត ដើម្បីឱ្យពួកគេមានសេរីភាពរស់នៅជួបជុំគ្រួសារប្រកបមុខរបរដោយគ្មានការភ័យខ្លាច និងដើម្បីបង្ហាញពីឆន្ទៈបង្រួបបង្រួមជាតិពិតប្រាកដ ដូចអ្វីដែលប្រមុខរដ្ឋាភិបាលធ្លាប់លើកឡើង។
ទោះបីជាយ៉ាងនេះក្តីកាលពីថ្ងៃទី១ ខែមិថុនា លោកនាយករដ្ឋមន្ត្រី ហ៊ុន សែន បានព្រមានសារជាថ្មីទៀត ក្នុងការប្រើប្រាស់យុទ្ធសាស្ត្រកាត់ក្បាលបំបែកដងខ្លួនគណបក្សសង្រ្គោះជាតិបន្ថែមទៀត ពិសេសនឹងតាមកម្ទេចអ្នកនៅក្នុងស្រុក ដែលហ៊ានបង្កចលាចលក្រោមលេសជំងឺកូវីដ១៩ ដើម្បីផ្តួលរំលំរដ្ឋាភិបាលរបស់លោក។
ស្របគ្នានឹងសារព្រមាននេះយ៉ាងហោចណាស់មានអតីតសមាជិកក្រុមប្រឹក្សារាជធានី-ខេត្តគណបក្សសង្រ្គោះជាតិ៤ រូប ត្រូវបានសមត្ថកិច្ចចាប់ខ្លួនជាបន្តបន្ទាប់ ហើយតុលាការសម្រេចឃុំខ្លួនជាបន្តបន្ទាប់ ពាក់ព័ន្ធការចោទប្រកាន់ពីបទញុះញង់ឱ្យប្រព្រឹត្តបទល្មើស បទរួមគំនិតក្បត់ និងញុះញង់កុំឱ្យយោធាស្តាប់បង្កាប់ជាដើម ខណៈសំណុំរឿងទាំងនោះជាសំណុំរឿងចាស់ដែលកើតឡើងតាំងពីឆ្នាំ២០១៨ និង២០១៩។
ក្រុមអ្នកឃ្លាំមើលសង្គមបានចាត់ទុកសារព្រមានកម្ទេចបក្សប្រឆាំងពីសំណាក់លោកហ៊ុន សែន នោះថានឹងមិនផ្តល់ប្រយោជន៍អ្វីដល់ប្រជាជន និងប្រទេសជាតិនោះឡើយ ប៉ុន្តែជាការបង្ហាញកាន់តែច្បាស់ពីរូបភាពបែកបាក់ជាតិកាន់តែខ្លាំងតែប៉ុណ្ណោះ៕