ប្រធានគណបក្សខ្មែររួបរួមជាតិ លោក ញឹក ប៊ុនឆៃ អះអាងថា គណបក្សភ្លើងទៀនអាចនឹងរលត់ភ្លើងទៀនបាត់នៅសល់តែទៀនទទេ ខណៈគណបក្សដែលកំពុងចេញធ្វើសកម្មភាពមួយនេះមានវត្តមានលោក សម រង្ស៊ី នៅពីក្រោយ។
ក្នុងពិធីសំណេះសំណាលជាមួយពលរដ្ឋនៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ កាលពីថ្ងៃទី២៧ ខែកុម្ភៈ នេះ ប្រធានគណបក្សខ្មែររួបរួមជាតិ លោក ញឹក ប៊ុនឆៃ លើកឡើងថា លោក សម រង្ស៊ី និងលោក កឹម សុខា មិនមែនជាមនុស្សតែមួយដូចពីមុនទៀតទេ ដោយសារលោក សម រង្ស៊ី បានវិលទៅកាន់គណបក្សភ្លើងទៀន ដែលជាគណបក្សដើមរបស់លោក ហើយបច្ចុប្បន្ន បក្សនេះកំពុងធ្វើសកម្មភាព និងលើកស្លាកដើម្បីចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់។
ចំណែកគណបក្សសិទ្ធិមនុស្សរបស់លោក កឹម សុខា វិញ លោកថាហាក់នៅមិនទាន់មានសកម្មភាពអ្វីនៅឡើយទេ បើទោះបីជាបច្ចុប្បន្នមនុស្សមួយចំនួនដែលស្និទ្ធនឹងលោក កឹម សុខា បាននាំគ្នាចេញទៅបង្កើតគណបក្សថ្មីមួយចំនួនក៏ដោយ។
លោក ញឹក ប៊ុនឆៃ អះអាងថា ត្បិតបច្ចុប្បន្ននេះ គណបក្សភ្លើងទៀនកំពុងធ្វើសកម្មភាពយ៉ាងគគ្រឹកគគ្រេងក៏ពិតមែន តែលោកបង្ហាញជំនឿថា អនាគតគណបក្សភ្លើងទៀនប្រហែលជាមុជមិនជ្រៅទៅមិនឆ្ងាយទេ ហើយមិនស្រួលរលត់ភ្លើងទៀនបាត់ នៅសល់តែទៀនទទេក៏ថាបានដែរ។
លោកបញ្ជាក់ថា មូលហេតុដែលលោកលើកឡើងបែបនេះ ដោយសារបក្សនេះមានការពាក់ព័ន្ធជាមួយលោក សម រង្ស៊ី ដែលបច្ចុប្បន្នលោកត្រូវបានតុលាការផ្ដន្ទាទោស និងចេញដីកាចាប់ខ្លួនផងដែរ។
កាលពីពេលថ្មីៗនេះ លោក សម រង្ស៊ី ដែលកំពុងរស់នៅក្រៅប្រទេសនោះ បានទៅជួបជុំអ្នកគាំទ្រនៅសហរដ្ឋអាមេរិក ដោយក្នុងពិធីនោះ លោក សម រង្ស៊ី បានដាក់ជើងពានមួយ ហើយអុជទៀន និងនាំគ្នាស្រែកជ័យឃោសគាំទ្របក្សភ្លើងទៀនថែមទៀត។
កាលពីខែវិច្ឆិកា ឆ្នាំ២០២១ ប្រធានគណបក្សសង្គ្រោះជាតិ លោក កឹម សុខា បានចេញសារនយោបាយមួយថា លោក សម រង្ស៊ី និងលោក កឹម សុខា លែងជាមនុស្សតែមួយហើយ ដោយសារលោក សម រង្ស៊ី បានដើរចេញពីគោលការណ៍រួបរួមដោយវិលទៅកាន់គណបក្សភ្លើងទៀនវិញ ខណៈលោកកំពុងជាប់បម្រាមតុលាការនោះ។
គណបក្សភ្លើងទៀនជាគណបក្សចាស់របស់លោក សម រង្ស៊ី ហើយគណបក្សនេះបានច្របាច់បញ្ចូលគ្នាជាមួយគណបក្សសិទ្ធិមនុស្សរបស់លោក កឹម សុខា កាលពីឆ្នាំ២០១២ ដោយបង្កើតជាគណបក្សសង្គ្រោះជាតិ។ ក្រោយពីការច្របាច់បញ្ចូលគ្នា ដើម្បីចូលរួមប្រកួតប្រជែងការបោះឆ្នោតឃុំ-សង្កាត់នោះ គណបក្សសង្គ្រោះជាតិបានទទួលអាសនៈទាំងឃុំ-សង្កាត់ និងក្នុងរដ្ឋសភាប្រហាក់ប្រហែលនឹងគណបក្សប្រជាជនកម្ពុជាដែរ ប៉ុន្តែគណបក្សប្រឆាំងនេះ ត្រូវតុលាការរំលាយកាលពីឆ្នាំ២០១៧ ដោយផាត់ចេញពីឆាកនយោបាយ ខណៈអាសនៈត្រូវបានគណបក្សកាន់អំណាចយកទៅបែងចែកឱ្យគណបក្សផ្សេងដែលពលរដ្ឋមិនបានបោះឆ្នោតឱ្យ៕