អគ្គលេខាធិការអង្គការយោធាណាតូ (NATO) លោក Jens Stoltenberg ទទូចទៅមេដឹកនាំណាតូ ថាត្រូវដោះស្រាយវិបត្តិសន្តិសុខដ៏ធ្ងន់ធ្ងរបំផុត ជាពិសេសណាតូត្រូវតែសម្រេចវាយបកភ្លាមៗ ប្រសិនបើសមាជិករបស់ខ្លួនរងការវាយប្រហារពីសំណាក់គ្រាប់កាំភ្លើងរបស់រុស្ស៊ី។
ក្នុងកិច្ចប្រជុំកំពូលវិសាមញ្ញរបស់អង្គការយោធាណាតូ ក្នុងទីក្រុងប្រ៊ុចសែល ប្រទេសបែលហ្សិក កាលពីថ្ងៃព្រហស្បតិ៍ ទី២៤ ខែមីនា ឆ្នាំ២០២២ ដែលធ្វើឡើងនៅចំពោះមេដឹកនាំកំពូលៗរបស់ណាតូ លោក Jens Stoltenberg បានបញ្ជាក់ថា ប្រទេសដែលមានព្រំដែនជាប់នឹងប្រទេសអ៊ុយក្រែន និងប្រទេសជាប់នឹងព្រំដែននៃប្រទេសរុស្ស៊ី ដូចជាប្រទេសប៉ូឡូញ ហុងគ្រី ប៊ុលហ្គារី រូម៉ានី ស្លូវើនៀ សាធារណរដ្ឋឆេក និងក្រុមប្រទេសនៅបាល់ទិច ជាដើម គឺជាក្រុមប្រទេសផុយស្រួយរងការវាយប្រហារពីសំណាក់កងទ័ពរុស្ស៊ី ដែលចាំបាច់ណាតូត្រូវការពារប្រទេសទាំងនេះ ហើយត្រូវធ្វើការវាយបកភ្លាមៗទៅលើប្រទេសរុស្ស៊ី។
លោកថា ណាតូបើទោះជាប្រកាន់នូវភាពអត់ធ្មត់ក្ដី តែណាតូមិនបណ្ដោយឲ្យសមាជិកណាមួយរងការឈ្លានពានឡើយ។ នេះបើយោងតាមបណ្ដាញផ្សាយព័ត៌មាន Independent ដែលបានចុះផ្សាយនៅថ្ងៃទី២៥ មីនា។
នៅក្នុងជំនួបកំពូលនេះ ប្រធានាធិបតី លោក ចូ បៃដិន អះអាងថា សហរដ្ឋអាមេរិកបានប្រកាសដាក់ទណ្ឌកម្មថ្មីថែមទៀតទៅលើបុគ្គល និងអង្គភាពជាង ៤០០ រួមទាំងសមាជិកសភារុស្ស៊ី មហាសេដ្ឋី និងក្រុមហ៊ុនការពារជាតិជាង ៣០០ របស់ប្រទេសមួយនេះ ខណៈលោកបញ្ជាក់ថា ជាលើកដំបូងហើយដែលណាតូមិនដែលរួមគ្នាខ្លាំងជាងពេលនេះទេ ហើយផ្ទុយពីអ្វីដែលប្រធានាធិបតី ពូទីន គិតថាណាតូពុំអាចមានកម្លាំងរួមគ្នាបាន។
នៅក្នុងឱកាសនេះដែរ លោក បៃដិន ព្រមានរុស្ស៊ីធ្ងន់ៗថា ប្រសិនបើរុស្ស៊ី ប្រើអាវុធគីមី គឺអាមេរិក និងសម្ពន្ធមិត្តនឹងឆ្លើយតប ព្រោះជាការរំលោភច្បាប់សង្គ្រាមដ៏ធ្ងន់ធ្ងរណាស់។ ថ្លែងនៅចំពោះមុខមេដឹកនាំណាតូ លោក បៃដិន អះអាងថា លោកបានបញ្ជាក់យ៉ាងច្បាស់ទៅកាន់ប្រធានាធិបតីចិន ស៊ី ជីនពីង ថានឹងធ្វើឲ្យទំនាក់ទំនងសេដ្ឋកិច្ចរបស់ចិនមានគ្រោះថ្នាក់ ប្រសិនបើចិនហក់ចង់ជួយរុស្ស៊ី ទោះជាការជួយដោយលួចលាក់ក៏ដោយ។ ត្រង់ចំណុចនេះ លោក បៃដិន ពុំបាននិយាយលម្អិតនោះទេ តែទំនងលោកចង់សំដៅទៅលើការជួយរុស្ស៊ី ដោយការបញ្ជូនសព្វាវុធ ឬកងទ័ព។
ជំនួបរវាងលោក បៃដិន និងលោក ស៊ី ជីនពីង ដែលបានធ្វើឡើងតាមវីដេអូ conference មុនជំនួបកំពូលណាតូ ធ្វើឡើង គឺតែប៉ុន្មានថ្ងៃប៉ុណ្ណោះ។ តែជំនួបនេះ មិនសម្រេចបាននូវការឈានដល់កិច្ចព្រមព្រៀងអ្វីឡើយ។ ផ្ទុយទៅវិញ លោក ស៊ី បានប្រកាសមិនចូលរួមដាក់ទណ្ឌកម្មទៅលើប្រទេសរុស្ស៊ី នោះទេ។
មេដឹកនាំចិនរូបនេះបានបន្ទោសថា សង្គ្រាមរុស្ស៊ី និងអ៊ុយក្រែន ក៏ជាការកើតចេញពីអង្គការណាតូផងដែរ ព្រោះក្រុមអង្គការណាតូនេះហើយជាអ្នកបន្ថែមភ្លើង ហើយបង្កអសន្តិសុខដល់រុស្ស៊ី។ យ៉ាងណាក៏ដោយ រុស្ស៊ីអាចប្រឈមនឹងការដកសមាជិកភាពរបស់ខ្លួនចេញពីប្រទេសឧស្សាហកម្ម G20។
លោក បៃដិន បន្តប្រាប់ទៅមេដឹកនាំយោធាណាតូថា អាមេរិក និងសម្ពន្ធមិត្តកំពុងសិក្សាអំពីការដករុស្ស៊ី ចេញពីក្រុមប្រទេស G20។
នៅចំពោះមុខមេដឹកនាំណាតូ នាយករដ្ឋមន្ត្រីអង់គ្លេស បូរិស ចនសុន ប្រកាសថា ចក្រភពអង់គ្លេសបានសម្រេចបង្កើនជំនួយយោធាដល់អ៊ុយក្រែន ដើម្បីជួយប្រធានាធិបតី Zelenskiy ក្នុងការការពារប្រទេសអ៊ុយក្រែន ដែលកំពុងធ្លាក់ក្នុងសង្គ្រាមឈ្លានពានពីរុស្ស៊ី។ លោកបញ្ជាក់ថា មីស៊ីលរាប់ពាន់គ្រាប់នឹងទៅដល់កងទ័ពអ៊ុយក្រែននៅពេលឆាប់ៗនេះ។
តាមបណ្ដាញផ្សាយព័ត៌មាន Independent អង់គ្លេសនឹងបញ្ជូនមីស៊ីលចំនួន ៦ពាន់គ្រាប់បន្ថែមទៀត និងថវិកា ២៥លានផោនដល់កងទ័ពអ៊ុយក្រែន ជាមួយនឹងការដាក់ពង្រាយកងទ័ពទៅកាន់ប្រទេសប៊ុលហ្គារី ប្រទេសប៉ូឡូញ និងនៅអេស្តូនី បន្ថែមទៀត។
តែយ៉ាងណាក៏ដោយ អគ្គលេខាធិការអង្គការណាតូ លោក Jens Stoltenberg ដែលជាអ្នកធ្វើសេចក្ដីសម្រេចមួយដ៏សំខាន់ក្នុងការបញ្ជាទ័ពណាតូវាយបកនឹងប្រទេសណាមួយ បានថ្លែងថា អង្គការណាតូបានច្រានចោលម្តងទៀតនូវការស្នើដាក់តំបន់គ្មានការហោះហើរលើអ៊ុយក្រែន ដែលស្នើដោយប្រធានាធិបតីអ៊ុយក្រែន ខណៈលោកថ្លែងអំពីការគំរាមកំហែងនូវការប្រើប្រាស់អាវុធនុយក្លេអ៊ែរពីសំណាក់រុស្ស៊ី ដែលលោកថាជាអំពើសាហាវបំផុត។
លោកបញ្ជាក់ថា ណាតូក៏មានអាវុធប្រល័យលោកនេះដែរ តែណាតូមិនចង់ធ្វើឱ្យមានវិនាសកម្មដ៏ធ្ងន់ធ្ងរនៅលើពិភពលោកនេះទេ។ លោកក៏ព្រមានរុស្ស៊ីកុំឲ្យប្រើប្រាស់អាវុធជីវសាស្ត្រ ព្រោះជាការប្រឆាំងនឹងមនុស្សជាតិទាំងស្រុង។
បច្ចុប្បន្ន កងទ័ពណាតូត្រូវបានដាក់ពង្រាយទៅកាន់ប្រទេសជាប់នឹងព្រំដែនរុស្ស៊ី និងអ៊ុយក្រែន គឺមានជាង ៤ម៉ឺននាក់ ក្នុងគោលបំណងឆ្លើយតបទៅនឹងការវាយលុកពីកងទ័ពរុស្ស៊ី។ សម្រាប់កងទ័ពអាមេរិក មានច្រើនជាងគេ ហើយស្ថិតនៅក្នុងប្រទេសប៉ូឡូញ ដែលមានព្រំដែនធំជាងគេជាប់នឹងប្រទេសអ៊ុយក្រែន។
អ្វីដែលជាការកត់សម្គាល់ កិច្ចប្រជុំកំពូលវិសាមញ្ញរបស់អង្គការណាតូ គឺមានចំណុចពីរសំខាន់ដែលប្រទេសជាសមាជិកបានសម្រេចរួមគ្នា គឺ៖
- ទី១ ការផ្តល់អាវុធបន្ថែមទៀតទៅឱ្យកងទ័ពអ៊ុយក្រែន
- ទី២ បន្ថែមទណ្ឌកម្មជាច្រើនទៀតលើសេដ្ឋកិច្ចរបស់រុស្ស៊ី ដែលសហរដ្ឋអាមេរិកបានប្រកាសមុនគេ ហើយក្រុមប្រទេសឧស្សាហកម្ម G7 នឹងរិះរកមធ្យោបាយកាត់ផ្ដាច់ទាំងស្រុងការនាំឧស្ម័ន និងប្រេងពីរុស្ស៊ី។
ក្រោយពីបិទកិច្ចប្រជុំអង្គការណាតូ ប្រធានាធិបតីអាមេរិក លោក ចូ បៃដិន ត្រូវធ្វើដំណើរទៅកាន់ប្រទេសប៉ូឡូញ។ ប៉ូឡូញ គឺជាប្រទេសដែលទទួលជនភៀសខ្លួនអ៊ុយក្រែនច្រើនជាងគេ គឺមានជាង ២លាននាក់ក្នុងចំនួន ៣លាន ៦សែននាក់។
នៅទីក្រុងវ៉ាសូវី លោក បៃដិន ត្រូវជួបពិភាក្សាជាមួយប្រធានាធិបតីប៉ូឡូញ លោក Andrzej Duda ដោយផ្ដោតអំពីវិបត្តិជនភៀសខ្លួនដោយសារតែការឈ្លានពានពីសំណាក់ប្រទេសរុស្ស៊ី លើអ៊ុយក្រែន។
គេរំពឹងថា លោក បៃដិន អាចនឹងទៅសួរសុខទុក្ខកងទ័ពអាមេរិកដែលនៅលើទឹកដីប្រទេសប៉ូឡូញ។ នៅខណៈមេដឹកនាំណាតូកំពុងជួបប្រជុំគ្នា លោកប្រធានាធិបតីអ៊ុយក្រែន Volodymyr Zelenskiy ដែលកំពុងស្ថិតនៅក្នុងការរដ្ឋធានីគៀវ នៃប្រទេសអ៊ុយក្រែន ហើយទីក្រុងមួយនេះកំពុងរងការបាញ់ផ្លោងដោយកាំជ្រួចរបស់រុស្ស៊ី លោកបានសម្ដែងការសាទរចំពោះការរួមកម្លាំងគ្នារបស់អង្គការណាតូប្រឆាំងរុស្ស៊ី តែលោកបន្តសុំឲ្យណាតូបន្ថែមអាវុធច្រើនថែមទៀតជួយកងទ័ពរបស់លោក។
មកទល់នឹងពេលនេះ សង្គ្រាមអ៊ុយក្រែននៅមិនទាន់នាំឲ្យមានការប៉ះទង្គិចគ្នាផ្នែកយោធាដោយផ្ទាល់រវាងរុស្ស៊ី និងអង្គការណាតូនៅឡើយទេ ប៉ុន្តែមានការបារម្ភកាន់តែខ្លាំងឡើងថា រុស្ស៊ីអាចនឹងវាយប្រហារទៅលើអ៊ុយក្រែនដោយប្រើអាវុធគីមី ឬអាវុធជីវសាស្ត្រ ឬក៏អាចឈានដល់ប្រើអាវុធនុយក្លេអ៊ែរទៀតផង ព្រោះរុស្ស៊ីបានដាក់ពង្រាយអាវុធប្រល័យលោកនេះរួចទៅហើយ៕