ក្រោយពីការបោះឆ្នោតជម្រុះពីជុំទី១ និងដល់ជុំទី៥ ដែលជ្រុះបេក្ខជនជាច្រើនរូប គឺទីបំផុត គេបានរកឃើញបេក្ខជន ២រូបបានឡើងមកដល់វគ្គផ្ដាច់ព្រ័ត្រ គឺអតីតរដ្ឋមន្ត្រីហិរញ្ញវត្ថុ Rishi Sunak និងអ្នកស្រី Liz Truss រដ្ឋមន្ត្រីការបរទេសកំពុងកាន់តំណែងនៃគណៈរដ្ឋមន្ត្រីចាំផ្ទះរបស់លោក Boris Johnson។
នៅមុនវគ្គជម្រុះដំបូង គឺមានបេក្ខជនមួយចំនួនបានដកខ្លួនពីការប្រកួត។ បេក្ខជនប្រាំរូបបានសម្រេចឈរជាផ្លូវការ គឺលោក Rishi Sunak អ្នកស្រី Liz Truss អ្នកស្រីរដ្ឋមន្ត្រីពាណិជ្ជកម្ម Penny Mordaunt រដ្ឋលេខាធិការទទួលបន្ទុកកិច្ចការសមភាពយេនឌ័រ អ្នកស្រី Kemi Badenoch និងប្រធានគណៈកម្មាធិការកិច្ចការបរទេសនៃសភា គឺលោក Tom Tugendhat។
បណ្ដាញផ្សាយព័ត៌មានរបស់អាល្លឺម៉ង់ DW បានចុះផ្សាយនៅថ្ងៃទី២១ ខែកក្កដា នេះថា អតីតរដ្ឋមន្ត្រីហិរញ្ញវត្ថុ លោក Rishi Sunak និងរដ្ឋមន្ត្រីការបរទេស អ្នកស្រី Liz Truss បានក្លាយជាបេក្ខជន ២រូបចុងក្រោយគេដែលត្រូវប្រកួតប្រជែងក្នុងជុំផ្តាច់ព្រ័ត្រ ដើម្បីឡើងជាប្រធានគណបក្សអភិរក្សនិយមរបស់ចក្រភពអង់គ្លេស ហើយនឹងក្លាយជានាយករដ្ឋមន្ត្រីជំនួសលោក Boris Johnson ដែលបានលាលែងពីតំណែង។
ក្នុងការបោះឆ្នោតជម្រុះជុំទី៥ កាលពីថ្ងៃពុធសប្តាហ៍នេះ លោក Rishi Sunak បន្តទទួលបានការគាំទ្រច្រើនជាងគេ គឺ ១៣៧សំឡេង។ ចំណែកអ្នកស្រី Liz Truss បានឡើងមកលេខពីរជាមួយការគាំទ្រ ១១៣សំឡេង។ យោងតាមលទ្ធផលនេះ បាននាំឱ្យរដ្ឋមន្ត្រីពាណិជ្ជកម្ម អ្នកស្រី Penny Mordaunt ធ្លាក់ទៅលេខបីវិញ ហើយត្រូវខ្ទាតចេញពីការប្រកួត ព្រោះតែមានការគាំទ្រតិចជាងអ្នកស្រី Liz Truss រដ្ឋមន្ត្រីការបរទេស។
បន្ទាប់ពីនេះ គឺការបោះឆ្នោតជុំចុងក្រោយ នឹងត្រូវធ្វើឡើងក្នុងចំណោមសមាជិកសកម្មប្រហែល ២០ម៉ឺននាក់នៃគណបក្សអភិរក្សនិយមវិញម្តង។ អ្នកដែលទទួលជ័យជម្នះ នឹងត្រូវប្រកាសនៅថ្ងៃទី៥ ខែកញ្ញា ហើយនឹងក្លាយជាប្រធានបក្ស និងជានាយករដ្ឋមន្ត្រីថ្មីនៃចក្រភពអង់គ្លេស។
ក្នុងការបោះឆ្នោតជម្រុះទាំង ៥ជុំកន្លងមកដែលធ្វើឡើងដោយក្រុមសមាជិកសភារបស់បក្សអភិរក្សនិយម គឺលទ្ធផលស្ទង់មតិថ្មីមួយដែលចេញផ្សាយកាលពីថ្ងៃអង្គារសប្តាហ៍នេះ បង្ហាញថា អតីតរដ្ឋមន្ត្រីហិរញ្ញវត្ថុ លោក Rishi Sunak មិនសូវមានប្រជាប្រិយភាព ឬគាំទ្រក្នុងចំណោមសមាជិកជាន់ខ្ពស់របស់គណបក្សអភិរក្សនិយមដែលនាំឱ្យមានការព្យាករថា លោកអាចនឹងចាញ់អ្នកស្រី Liz Truss នៅក្នុងការបោះឆ្នោតមួយទល់នឹងមួយក្នុងវគ្គផ្ដាច់ព្រ័ត្រ។
ដំណើរការបោះឆ្នោតជ្រើសរើសប្រធានគណបក្សអភិរក្សនិយម និងនាយករដ្ឋមន្ត្រីថ្មីនៃចក្រភពអង់គ្លេស ធ្វើឡើងបន្ទាប់ពីលោក Boris Johnson ត្រូវបានបង្ខំឱ្យចុះចេញពីប្រធានបក្ស ហើយកាលពីថ្ងៃទី៧ ខែកក្កដា ស្រាប់តែសមាជិកគណៈរដ្ឋមន្ត្រីរបស់លោកជាច្រើនរូបបាន ដោយរួមមានលោករដ្ឋមន្ត្រីហិរញ្ញវត្ថុ លោក Rishi Sunak ម្នាក់ផងដែរ។ ប៉ុន្តែសម្រាប់អ្នកស្រី Liz Truss ដែលមានការកោតសរសើរថាជាអ្នកការទូតមានឥទ្ធិពលដោយមិនបានចុះចេញពីតំណែង ហើយរួមទាំងលោករដ្ឋមន្ត្រីការពារជាតិ Ben Wallace ក៏មិនបានចុះចេញពីតំណែងផងដែរ។ អ្នកទាំងពីរប្រកាន់គោលជំហររឹងមាំប្រឆាំងនឹងរុស្ស៊ី ដែលលើកទ័ពឈ្លានពានអ៊ុយក្រែន។
តើលោក Boris Johnson មានកំហុសអ្វីបានជាលោកត្រូវបានបក្សអភិរក្សនិយមគាបសង្កត់ឱ្យចុះចេញពីតំណែង?
សម្រាប់លោក ចនសុន បាននិងកំពុងបន្តកាន់តួនាទីជានាយករដ្ឋមន្ត្រីចាំផ្ទះរហូតទាល់តែជ្រើសរើសបានអ្នកថ្មីមកជំនួសរូបលោកដែលនឹងដឹងជាផ្លូវការនៅថ្ងៃទី៥ កញ្ញា។
បើតាមការចុះផ្សាយជាច្រើនរបស់បណ្ដាញផ្សាយព័ត៌មានអង់គ្លេស គឺអាចមាន ៥ករណី គឺ៖
- ទី១ លោកមានកំហុសក្នុងការបំពានវិធានការរឹតបន្តឹងការប្រឆាំងនឹងការរីករាលដាលនៃជំងឺកូវីដ-១៩ ដូចជាលោកជួបជុំគ្នាជប់លៀង និងការដែលលោកមិនពាក់ម៉ាស់។
- ទី២ លោកការពារមន្ត្រីជាន់ខ្ពស់ម្នាក់ដែលរងការចោទថាមានការបៀតបៀនផ្លូវភេទ។
- ទី៣ លោកការពារមន្ត្រីម្នាក់ទៀតដែលមន្ត្រីរូបនោះការពារផលប្រយោជន៍បុគ្គល។
- ទី៤ ករណីប្រទេសធ្លាក់ក្នុងវិបត្តិសេដ្ឋកិច្ច។
- ទី៥ ការអនុវត្តមិនបានជោគជ័យនូវគោលនយោបាយ Brexit ចេញពីសហភាពអឺរ៉ុប។
កំហុសទាំង ៥ នេះដែលសុទ្ធជារឿងអ្នកសង្កេតការណ៍មួយចំនួនថាជាករណីអាចយោគយល់បានទៅលើលោក Johnson។
ដោយសារកំហុសទាំងនេះ លោក Boris Johnson បានសម្រេចទៅឆ្លើយនៅចំពោះមុខសមាជិកសភាជាថ្មីម្ដងទៀតដែលគេថាជានាទីចុងក្រោយរបស់លោកជានាយករដ្ឋមន្ត្រីអង់គ្លេស។
សាររបស់លោក Boris Johnson ដែលធ្វើឱ្យមានការចងចាំ គឺលោកបានទទូចសុំឱ្យអ្នកស្នងតំណែងរបស់លោកត្រូវសហការជាមួយអាមេរិកឱ្យបានខ្លាំងក្លាក្នុងការជួយប្រទេសអ៊ុយក្រែនធ្វើសង្គ្រាមប្រឆាំងនឹងរុស្ស៊ី គឺជួយឱ្យអ៊ុយក្រែន មានសេរីភាព និងប្រជាធិបតេយ្យ។ សម្រាប់បេក្ខជន ២រូបដែលរំពឹងថានឹងអាចស្នងតំណែងពីលោក Johnson គឺអតីតរដ្ឋមន្ត្រីហិរញ្ញវត្ថុ លោក Rishi Sunak មានអាយុ ៤២ឆ្នាំ និងអ្នកស្រី Liz Truss រដ្ឋមន្ត្រីការបរទេសមានអាយុ ៤៦ឆ្នាំ៕