ក្រុមយុវជនស្រឡាញ់បរិស្ថានជាច្រើននាក់ ដង្ហែញត្តិតាមដងផ្លូវជាថ្មីទៅក្រសួងបរិស្ថាន ដើម្បីទាមទារឱ្យក្រសួងដាក់កោះកុងក្រៅជាឧទ្យានជាតិសមុទ្រតាមការសន្យារបស់ខ្លួនកាលពី ៤ឆ្នាំមុន ក្នុងបំណងការពារកោះកុងក្រៅ កុំឱ្យធ្លាក់ទៅជាកម្មសិទ្ធិរបស់ក្រុមហ៊ុនឯកជន។
ក្រុមយុវជនបរិស្ថានប្រមាណ ២០នាក់ បានដង្ហែញត្តិនៅថ្ងៃទី២០ ខែមិថុនា ឆ្នាំ២០២៤ នេះ ដោយថ្មើរជើងទៅកាន់ក្រសួងបរិស្ថាន ដោយការគូរមុខប្លែកៗ និងយកក្រណាត់ពណ៌សចងក្បាល ព្រមទាំងយកកន្សែងពានាពាក់ឆៀងលើខ្លួនសម្ដែងការកាន់ទុក្ខផងដែរ ដើម្បីសុំឱ្យក្រសួងជួយបកស្រាយពីការពន្យារពេលដាក់កោះកុងក្រៅ ទៅជាឧទ្យានជាតិសមុទ្រ។
ក្រុមយុវជនបរិស្ថានទាំងនេះ នាំគ្នាកាន់បដាដែលបានសរសេរផ្សេងៗ ដូចជាសរសេរថា ហេតុអ្វីក្រសួងបរិស្ថាន ក្បត់សន្យាមិនព្រមដាក់កោះកុងក្រៅ ជាឧទ្យានសមុទ្រ ជាដើម។
ក្រុមយុវជនចលនាមាតាធម្មជាតិ លើកឡើងថា ដើម្បីឱ្យកោះកុងក្រៅ ក្លាយជាឧទ្យានជាតិសមុទ្រ ពួកគេបានដាក់ញត្តិជាច្រើនលើកច្រើនសាទៅកាន់ក្រសួងបរិស្ថាន នាពេលកន្លងមក ប៉ុន្តែក្រសួងមិនបានឆ្លើយតបនឹងសំណើរបស់ពួកគេម្តងណាឡើយ បើទោះបីក្រសួងធ្លាប់សន្យាកាលពីឆ្នាំ២០២១ ថានឹងដាក់កោះកុងក្រៅ ឱ្យទៅជាឧទ្យានជាតិសមុទ្រក៏ដោយ។
ការដង្ហែញត្តិនេះ ធ្វើឡើងដើម្បីជំរុញឱ្យស្ថាប័នពាក់ព័ន្ធ ដាក់កោះកុងក្រៅជាឧទ្យានជាតិសមុទ្រឱ្យបានឆាប់ ក្នុងបំណងបញ្ចៀសការផ្តល់សិទ្ធិអភិវឌ្ឍន៍កោះមួយនេះឱ្យទៅក្រុមហ៊ុនឯកជនដែលជាកត្តានាំទៅរកការបំផ្លាញធនធានធម្មជាតិនៅតំបន់មួយនេះ។
កោះកុងក្រៅ ស្ថិតនៅក្នុងភូមិអាវឡាតាន់ ឃុំជ្រោយប្រស់ ស្រុកកោះកុង ខេត្តកោះកុង មានទំហំផ្ទៃដី ១០៣គីឡូម៉ែត្រក្រឡា ទទឹងប្រវែង ៧គីឡូម៉ែត្រ បណ្តោយ ១៩គីឡូម៉ែត្រ ព្រមទាំងមានឆ្នេរ ៦កន្លែង គឺឆ្នេរទី១ ប្រវែង ១៨០០ម៉ែត្រ និងឆ្នេរទី២ ប្រវែង ២០៥០ម៉ែត្រ។ ចំណែកឆ្នេរទី៣ ប្រវែង ៧០០ម៉ែត្រ រីឯឆ្នេរទី៤ ប្រវែង ៩០០ម៉ែត្រ ខណៈឆ្នេរទី៥ ប្រវែង ៧៥០ម៉ែត្រ និងឆ្នេរទី៦ ប្រវែង ៦៥០ម៉ែត្រ។ ក្រៅពីនេះ ក៏មានតំបន់ទឹកធ្លាក់ ៩កន្លែង និងកូនភ្នំជាច្រើន ដែលមានចម្ងាយត្រឹមតែ ៣០គីឡូម៉ែត្រប៉ុណ្ណោះពីក្រុងខេមរភូមិន្ទ។
កាលពីអំឡុងឆ្នាំ២០១៦ ក្រសួងបរិស្ថាន បានបញ្ជូនមន្ត្រីជំនាញចុះសិក្សាស្រាវជ្រាវនៅតំបន់កោះកុងក្រៅ ដោយអះអាងថានឹងប្រកាសតំបន់កោះកុងក្រៅជាឧទ្យានជាតិសមុទ្រ អំឡុងឆ្នាំ២០២១ ក្រោយពីបញ្ចប់ការសិក្សាស្រាវជ្រាវនោះ ប៉ុន្តែមកដល់ឆ្នាំ២០២៤ នេះ ក្រសួងបរិស្ថាន មិនទាន់បានប្រកាសជាសាធារណៈអំពីលទ្ធផលនៃការស្រាវជ្រាវដើម្បីដាក់កោះកុងក្រៅជា «ឧទ្យានជាតិសមុទ្រ» នៅឡើយទេ។
ផ្ទុយទៅវិញ បន្ទាប់ពីការចុះស្រាវជ្រាវរបស់ក្រសួងបរិស្ថាន ប្រមាណជា ៣ឆ្នាំ នៅថ្ងៃទី១៤ ខែមិថុនា ឆ្នាំ២០១៩ សេចក្តីសម្រេចមួយរបស់ទីស្ដីការគណៈរដ្ឋមន្ត្រី ត្រូវបានគេទម្លាយជាសាធារណៈអំពីការប្រគល់កោះកុងក្រៅ ទៅឱ្យក្រុមហ៊ុន «កោះកុង អេស អ៊ី ហ្ស៊ិត ខូអិលធីឌី (KOH KONG SEZ CO., LTD.)» របស់ឧកញ៉ា លី យ៉ុងផាត់ ដែលជាសមាជិកសភារបស់គណបក្សប្រជាជនកម្ពុជា ដើម្បីធ្វើការអភិវឌ្ឍ។
ជាងនេះទៀត នៅថ្ងៃទី៤ ខែមិថុនា ឆ្នាំ២០២០ រាជរដ្ឋាភិបាលកម្ពុជាក៏បានចេញសេចក្តីសម្រេចបង្កើតគណៈកម្មាធិការត្រួតពិនិត្យការអភិវឌ្ឍលើគម្រោងអភិវឌ្ឍន៍កោះកុងក្រៅរបស់ក្រុមហ៊ុនកោះកុង អេស អ៊ី ហ្សិត នេះផងដែរ។
ជុំវិញបញ្ហានេះ អភិបាលខេត្តកោះកុង អ្នកស្រី មិថុនា ភូថង ថ្លែងក្នុងសន្និសីទសារព័ត៌មានមួយកាលពីថ្ងៃទី១១ ខែមិថុនា ឆ្នាំ២០២០ ថា អ្នកស្រីមិនទាន់ដឹងថា តើគម្រោងវិនិយោគរបស់ក្រុមហ៊ុនកោះកុង អេស អ៊ី ហ្សិត (Koh Kong SEZ) នឹងប៉ះពាល់យ៉ាងដូចម្ដេចខ្លះដល់បរិស្ថាន និងធនធានធម្មជាតិនៅតំបន់កោះកុងក្រៅនោះទេ។
ប៉ុន្តែអភិបាលខេត្តរូបនេះបញ្ជាក់ថា គម្រោងវិនិយោគជាទូទៅត្រូវបានអនុវត្តតែទៅលើផ្នែកណាមួយប៉ុណ្ណោះនៃតំបន់ធម្មជាតិដែលរដ្ឋបានផ្ដល់ឱ្យក្រុមហ៊ុនឯកជន មិនអាចគ្របដណ្ដប់ទាំងស្រុងនោះទេ។
កោះកុងក្រៅ ជាកោះមួយដែលធំជាងគេនៅកម្ពុជា ត្រូវគេដឹងថារដ្ឋាភិបាលបានប្រគល់ផ្ដាច់មុខដោយស្ងាត់ៗទៅឱ្យក្រុមហ៊ុនរបស់លោក លី យ៉ុងផាត់ សមាជិកព្រឹទ្ធសភាដើម្បីធ្វើការអភិវឌ្ឍ ដោយមិនបានធ្វើការវាយតម្លៃផលប៉ះពាល់បរិស្ថានជាមុន និងប្រកាសប្រាប់សាធារណៈឱ្យដឹងឡើយ។
ទាក់ទិននឹងបញ្ហានេះ មានសកម្មជនចលនាមាតាធម្មជាតិចំនួន ១០នាក់ហើយដែលកំពុងរងការចោទប្រកាន់ពីបទ រួមគំនិតក្បត់ និងប្រមាថអង្គព្រះមហាក្សត្រ បន្ទាប់ពីពួកគេទាមទារឱ្យរដ្ឋាភិបាលការពារបរិស្ថាន និងការពារតំបន់កោះកុងនេះផងដែរ៕
© 2024, ឌឹ ខេមបូឌា ដេលី. All rights reserved.