តុលាការក្រុងភ្នំពេញ សម្រេចចោទប្រកាន់លោក ដួង តារា ជំនួយការផ្ទាល់របស់ប្រធានគណបក្សប្រជាជនកម្ពុជា លោក ហ៊ុន សែន ពីបទ «ឆបោក» ពាក់ព័ន្ធនឹងករណីឆបោកលុយពលរដ្ឋជាច្រើនគ្រួសារក្នុងគម្រោងវិនិយោគដីធ្លី និងផ្ទះល្វែងរបស់ក្រុមហ៊ុន ភូមិខ្មែរគ្រុប (Phum Khmer Group) នៅខេត្តស្វាយរៀង។
យោងតាមការចុះផ្សាយរបស់សារព័ត៌មានក្នុងស្រុក បានដកស្រង់សម្ដីរបស់ព្រះរាជអាជ្ញារងអយ្យការអមសាលាដំបូងរាជធានីភ្នំពេញ លោក ប្លង់ សុផល ថាលោក ដួង តារា ជំនួយការផ្ទាល់របស់លោក ហ៊ុន សែន និងជារដ្ឋលេខាធិការទីស្ដីការគណៈរដ្ឋមន្ត្រី ត្រូវបានតុលាការចោទប្រកាន់ពីបទ «ឆបោក» តាមមាត្រា៣៧៧ និងមាត្រា៣៧៨ នៃក្រមព្រហ្មទណ្ឌ។
សមត្ថកិច្ចឃាត់ខ្លួនលោក ដួង តារា កាលពីថ្ងៃទី១០ ខែតុលា ដើម្បីធ្វើការសាកសួរពាក់ព័ន្ធនឹងបណ្ដឹងរបស់ប្រជាពលរដ្ឋ បន្ទាប់ពីមានផ្ទុះរឿងអាស្រូវពាក់ព័ន្ធនឹងករណីឆបោកលុយពលរដ្ឋជាច្រើនគ្រួសារក្នុងគម្រោងវិនិយោគដីធ្លី និងផ្ទះល្វែងរបស់ក្រុមហ៊ុន ភូមិខ្មែរគ្រុប (Phum Khmer Group) នៅខេត្តស្វាយរៀង។
លោក ដួង តារា ត្រូវបានគេសង្ស័យជាប់ពាក់ព័ន្ធនឹងការឆបោក ឬរត់ការដើម្បីផ្ដល់តួនាទីដល់បុគ្គលដែលមានបំណងចូលបម្រើការងាររដ្ឋ។ ករណីនេះ ទំនងជាជាប់ពាក់ព័ន្ធនឹងលោក លី សាម៉េត ហៅ គ្រូមា ទីប្រឹក្សាលោក ហ៊ុន សែន តែងតែយកឈ្មោះអតីតនាយករដ្ឋមន្ត្រីទៅបោកប្រាស់លុយពីអ្នកដទៃ ដើម្បីជាថ្នូរនឹងការទទួលបានតួនាទីក្នុងជួររដ្ឋាភិបាល និងគោរមងារផ្សេងៗ។
ជនរងគ្រោះពីការបោកប្រាស់ក្នុងក្រុមហ៊ុន ភូមិខ្មែរគ្រុប រាប់រយនាក់ បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះកន្លងមកថា លោក សោម សុធា ហ៊ានបោកប្រាស់លុយរាប់សិនលានដុល្លារពីជនរងគ្រោះរាប់រយនាក់ ដោយសារតែមានលោក ដួង តារា ដែលជាជំនួយការលោក ហ៊ុន សែន គឺជាអ្នកកាងនៅពីក្រោយខ្នង។ ការដែលលោក ដួង តារា កាងនៅពីក្រោយក្រុមហ៊ុននេះ ក៏មកពីមានលោក ដួង វិរ៉ាត់ ដែលជាប្អូនប្រុសបង្កើតរបស់លោកជាម្ចាស់ភាគហ៊ុនធំក្នុងក្រុមហ៊ុននេះដែរ។
ជនរងគ្រោះពីការបោកប្រាស់តាមគម្រោង Ponzi Scheme រាប់សិបលានដុល្លារ ទាមទារឱ្យជំនួយការរបស់លោក ហ៊ុន សែន គឺលោក ដួង តារា និងប្អូនប្រុសបង្កើតឈ្មោះ ដួង វិរ៉ាត់ រួមទាំងបក្ខពួកដែលជាម្ចាស់ភាគហ៊ុនក្នុងក្រុមហ៊ុន ភូមិខ្មែរគ្រុប សងលុយពួកគេទាំងអស់វិញ៕
© 2024, ឌឹ ខេមបូឌា ដេលី. All rights reserved.