អគ្គនាយកក្រុមហ៊ុន Maritime Group អ្នកឧកញ៉ា ហេង សិទ្ធី បន្តស្នើឱ្យរដ្ឋមន្ត្រីក្រសួងមហាផ្ទៃ លោក ស សុខា ចាត់វិធានការច្បាប់លើបុរសជនជាតិសិង្ហបុរីសញ្ជាតិខ្មែរឈ្មោះ Phua Gek Seng ហៅ Tak និងមន្ត្រីនៃនាយកដ្ឋាននគរបាលព្រហ្មទណ្ឌដែលជាប់ពាក់ព័ន្ធនឹងអំពើបោកប្រាស់តាមអ៊ីនធឺណិត និងការលាងលុយកខ្វក់នៅប្រទេសកម្ពុជា។
អ្នកឧកញ៉ា ហេង សិទ្ធី សរសេរលើគណនីហ្វេសប៊ុករបស់ខ្លួនកាលពីថ្ងៃទី០៩ ខែធ្នូ ឆ្នាំ២០២៤ ថា ប្រជាពលរដ្ឋខ្មែរកំពុងរង់ចាំការសម្រេចចិត្តពីរដ្ឋមន្ត្រីក្រសួងមហាផ្ទៃ លោក ស សុខា ក្នុងការដាក់ទោសមេឧក្រិដ្ឋជនបោកប្រាស់តាមអ៊ីនធឺណិត និងលាងលុយកខ្វក់ ព្រមទាំងមន្ត្រីជាន់ខ្ពស់នៃនាយកដ្ឋាននគរបាលព្រហ្មទណ្ឌដែលបានជាប់ពាក់ព័ន្ធនឹងអំពើឧក្រិដ្ឋទាំងអស់នេះ។
អ្នកឧកញ៉ារូបនេះបញ្ជាក់ថា ការយឺតយ៉ាវក្នុងការអនុវត្តវិធានការច្បាប់ពីក្រសួងមហាផ្ទៃលើអ្នកពាក់ព័ន្ធនឹងអំពើល្មើសទាំងនេះ កំពុងបង្កការព្រួយបារម្ភយ៉ាងខ្លាំងដល់ប្រជាជនដែលកំពុងរងគ្រោះដោយសារអ្នកប្រព្រឹត្តអំពើបោកប្រាស់ទាំងអស់នេះ។
ការអះអាងនេះ ធ្វើឡើងបន្ទាប់ពីក្រសួងមហាផ្ទៃ នៅតែរក្សាភាពស្ងៀមស្ងាត់ក្នុងការអនុវត្តច្បាប់លើមេឧក្រិដ្ឋជននៃអំពើបោកប្រាស់តាមអ៊ីនធឺណិត និងលាងលុយកខ្វក់ដែលកំពុងដើរហើរសេរីក្រៅច្បាប់នៅប្រទេសកម្ពុជាសព្វថ្ងៃនេះ។
កាលពីថ្ងៃទី៤ ខែធ្នូ ឆ្នាំ២០២៤ អ្នកឧកញ៉ា ហេង សិទ្ធី ធ្លាប់បានទម្លាយម្តងរួចមកហើយពីបុរសជនជាតិសិង្ហបុរីសញ្ជាតិខ្មែរ ដែលលោកអះអាងថា បានប្រើប្រាស់ប្រទេសកម្ពុជា ដើម្បីប្រតិបត្តិការកាស៊ីណូអនឡាញ និងលាងលុយនោះ ប៉ុន្តែការអនុវត្តវិធានការច្បាប់លើមេឧក្រិដ្ឋជនរូបនេះនៅតែជាប់គាំងរហូតដល់ពេលនេះ។
អ្នកឧកញ៉ា ហេង សិទ្ធី ក៏បានបញ្ជាក់ដែរថា លោកឧត្ដមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិក្រសួងមហាផ្ទៃ គឺជាអ្នកបញ្ជាឲ្យលោកឧត្ដមសេនីយ៍ទោ ប៉ុល រតនា អនុប្រធាននាយកដ្ឋានព្រហ្មទណ្ឌក្រសួងមហាផ្ទៃ និងលោកវរសេនីយ៍ទោ វុធ ស៊ែល អនុប្រធាននាយកដ្ឋាននគរបាលព្រហ្មទណ្ឌ ជាអ្នកការពារជនជាតិសិង្ហបុរី ដែលកំពុងរកស៊ីឆបោកលុយតាមអនឡាញមានឈ្មោះហៅក្រៅថា Tak (តាក់) នេះរហូតមក។
ជុំវិញបញ្ហានេះ កាលពីថ្ងៃទី០៨ ខែធ្នូ ឆ្នាំ២០២៤ អតីតរដ្ឋមន្ត្រីក្រសួងមហាផ្ទៃ លោក ស ខេង បានលើកឡើងថា អំពើឆបោកតាមអនឡាញកាន់តែមានភាពស្មុគស្មាញ ដែលទាមទារឱ្យអាជ្ញាធរ ពលរដ្ឋ និងអ្នកពាក់ព័ន្ធបង្កើនការប្រុងប្រយ័ត្ន និងរួមគ្នាទប់ស្កាត់នូវបទល្មើសឆបោកដែលកំពុងតែកើតមាននៅកម្ពុជានាពេលនេះ។
ទាក់ទិននឹងបញ្ហានេះ គម្រោងរាយការណ៍អំពីឧក្រិដ្ឋកម្ម និងអំពើពុករលួយ (OCCRP) បានចេញផ្សាយសេចក្តីរាយការណ៍ស៊ើបអង្កេតមួយកាលពីថ្ងៃទី០៤ ខែតុលា ឆ្នាំ២០២៤ កន្លងទៅថា រាជរដ្ឋាភិបាលកម្ពុជាកំពុងលាក់បាំងព័ត៌មានពីការផ្តល់សញ្ជាតិឲ្យក្រុមឧក្រិដ្ឋជនបរទេសដែលជាប់ពាក់ព័ន្ធនឹងអំពើបោកប្រាស់តាមអ៊ីនធឺណិត និងការលាងលុយកខ្វក់៕
© 2024, ឌឹ ខេមបូឌា ដេលី. All rights reserved.