ផ្ទៃដីព្រៃប្រមាណ ៣០ភាគរយនៃឧទ្យានរាជបណ្ឌិត្យសភាកម្ពុជាតេជោសែនឫស្សីត្រឹប ស្ថិតក្នុងស្រុកឆែប ខេត្តព្រះវិហារ ត្រូវបានភ្លើងឆេះ ដែលមានអ្នកអះអាងថាបណ្តាលមកពីសកម្មភាពប្រជាពលរដ្ឋរស់នៅជុំវិញតំបន់នោះដុតព្រៃដើម្បីបាញ់ ឬដាក់អន្ទាក់ចាប់សត្វ និងទន្ទ្រានយកដីព្រៃ។
ប្រធានរាជបណ្ឌិត្យសភាកម្ពុជា លោក សុខ ទូច បាបង្ហោះវីដេអូអំពីភ្លើងឆេះព្រៃ ដោយលោកបានលើកឡើងថា ការលួចដុតបានកើតឡើងរាល់ឆ្នាំ ទោះបីជាមានការប្តឹងទៅអាជ្ញាធរពាក់ព័ន្ធដើម្បីសុំអន្តរាគមន៍យ៉ាងណាក៏ដោយ។ លោកថា បើដាំកូនឈើ ក៏អត់រស់ដែរ។ លោកបន្តថា ពលរដ្ឋដុតព្រៃដើម្បីស្រួលដើរបាញ់សត្វ និងដាក់អន្ទាក់។
ប្រធានឧទ្យានរាជបណ្ឌិត្យសភាកម្ពុជាតេជោសែនឫស្សីត្រឹប លោក សូត្រ សំណាង បានឱ្យដឹងថា នៅក្នុងដើមរដូវប្រាំងឆ្នាំនេះ ដីព្រៃប្រមាណ ២០ ទៅ ៣០ភាគរយនៃឧទ្យានត្រូវបានភ្លើងឆេះ។ ការឆេះនេះ គឺបណ្តាលមកពីសកម្មភាពមនុស្សជាប្រជាពលរដ្ឋរស់នៅជុំវិញតំបន់នោះ។
លោកបានបន្តថា ជាទម្លាប់នៅក្នុងរដូវប្រាំង ពេលចូលទៅឃ្វាលគោ ឬរកអនុផលព្រៃឈើ អ្នកភូមិខ្លះបានដុតព្រៃដើម្បីចាប់ ឬបរបាញ់សត្វព្រៃ ដូចជាអណ្ដើក ត្រកួត អន្សង ទន្សាយ និងទន្ទ្រានយកដីព្រៃ ជាដើម។ លោកថា សហគមន៍ចំនួន ១៦ កំពុងតែរស់នៅជុំវិញឧទ្យាននេះ។
ប្រភពដដែលបានអះអាងថា លោកអំពាវនាវសូមឱ្យបញ្ឈប់សកម្មភាពនោះ ដើម្បីផលប្រយោជន៍កូនចៅជំនាន់ក្រោយ។ ប្រសិនបើអាចថែរក្សាព្រៃឈើ និងអនុផលព្រៃឈើបាន គឺក្នុងមួយឆ្នាំអាចប្រមូលផលមិនក្រោមពី ២០ ទៅ ៣០ម៉ឺនដុល្លារនោះទេ។
កន្លងមក ក្រសួងបរិស្ថាន ក៏បានចេញសេចក្តីណែនាំអំពីបញ្ហាភ្លើងឆេះព្រៃ ហើយថែមទាំងបានព្រមានចាត់វិធានការតាមផ្លូវច្បាប់ចំពោះជនណាដែលបានកាប់រុករាន ដុតព្រៃ និងកាន់កាប់ដីព្រៃឈើដែលឆេះដោយអនាធិបតេយ្យ ដែលផ្ទុយនឹងច្បាប់ និងបទបញ្ជានានារបស់រដ្ឋាភិបាល។
ក្រសួងបរិស្ថាន បានជូនដំណឹង និងស្នើសុំឱ្យអ្នកពាក់ព័ន្ធទាំងអស់ ជាពិសេសអាជ្ញាធរថ្នាក់ក្រោមជាតិ ក៏ដូចជាអាជ្ញាធរមូលដ្ឋាន រួមទាំងសហគមន៍ ប្រជាពលរដ្ឋ ចូលរួមអនុវត្តវិធានការអប់រំ ផ្សព្វផ្សាយ ណែនាំដល់ប្រជាពលរដ្ឋ។ ជាមួយគ្នានេះ ទប់ស្កាត់ការកាប់ឆ្ការ ទន្ទ្រាន ឈូសឆាយ ដុតព្រៃឈើ និងព្រៃលិចទឹក ដើម្បីយកដីខុសច្បាប់ ឬក្នុងគោលបំណងផ្សេងៗទៀត ដែលជាសកម្មភាពល្មើសច្បាប់ និងបង្កឱ្យមានភ្លើងឆេះព្រៃ និងរាលដាលរហូតដល់ភូមិកររបស់ប្រជាពលរដ្ឋ តំបន់រដ្ឋបាលសាធារណៈ ហេដ្ឋារចនាសម្ព័ន្ធ រូបវន្តនានា។
ជំពូក៣ មាត្រា៨៤៩ ត្រង់ចំណុច (ខ) នៃក្រមបរិស្ថាន និងធនធានធម្មជាតិ បានចែងថា ក្នុងការធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចបង្កឱ្យមានភ្លើងឆេះព្រៃ ត្រូវផ្ដន្ទាទោសដាក់ពន្ធនាគារពី ១ខែទៅ ១ឆ្នាំ និងពិន័យជាប្រាក់ពី ១០លានរៀលទៅ ១០០លានរៀល៕
© 2025, ឌឹ ខេមបូឌា ដេលី. All rights reserved.