សហគមន៍ជនជាតិដើមភាគតិចកួយ ស្នើឱ្យរដ្ឋមន្ត្រីក្រសួងបរិស្ថាន លោក អ៊ាង សុផល្លែត ចុះពិនិត្យដែនជម្រកសត្វព្រៃព្រះរការ ដោយផ្ទាល់ ជាជាងចាំតែយករបាយការណ៍ពីមន្ត្រីថ្នាក់ក្រោមដែលក្លែងព័ត៌មានពិតពីការបំផ្លាញធនធានធម្មជាតិក្នុងដែនជម្រកសត្វព្រៃមួយនេះ។
សហគមន៍ជនជាតិដើមភាគតិចកួយ ភូមិប្រមេរ ឃុំប្រមេរ ស្រុកត្បែងមានជ័យ ខេត្តព្រះវិហារ ចេញសេចក្តីថ្លែងការណ៍នៅថ្ងៃទី១២ ឧសភា នេះថា សហគមន៍បាននាំគ្នាចុះប្រមូលព័ត៌មាន និងធ្វើបច្ចុប្បន្នភាពអំពីដែនជម្រកសត្វព្រៃព្រះរការ រយៈពេល ២ថ្ងៃ គឺចាប់ពីថ្ងៃទី៥ ដល់ថ្ងៃទី៧ ខែឧសភា ក្នុងនោះបានរកឃើញបទល្មើសកាប់បំផ្លាញព្រៃឈើជាង ៣០០ករណី (៣៣៤ករណី)។
ប្រភពដដែលលើកឡើងថា អ្នកចុះល្បាតបានរកឃើញទីកន្លែងបោះតង់អ្នកអារឈើ ឡាមម៉ាស៊ីនអារឈើ និងសម្ភារៈជួសជុលម៉ាស៊ីនមួយចំនួនផងដែរ ខណៈដើមឈើដែលត្រូវកាត់រំលំភាគច្រើននៅក្នុងចំណុចជាំទឹកខ្មៅ អូរស្កាច និងអូររំស៊ែ។
ប្រភពដដែលថា ឈើដែលត្រូវរងការកាប់បំផ្លាញមានមុខកាត់ចាប់ពី ២៥សង់ទីម៉ែត្រដល់ជាង ១ម៉ែត្រ (១៧៨សង់ទីម៉ែត្រ) ដែលមានប្រភេទឈើផ្ដៀក ឈើទាល ស្ទៀង ដើមរាំង ឈើក្រម ត្រសេក និងដើមគគីរ ផងដែរ។
សហគមន៍នេះអះអាងថា បទល្មើសព្រៃឈើទាំងនេះបានបង្កផលប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់ប្រជាពលរដ្ឋ បរិស្ថាន និងទំនៀមទម្លាប់របស់សហគមន៍ជនជាតិដើមភាគតិចកួយ ដែលអាស្រ័យផលលើអនុផលព្រៃឈើតាមរយៈនៃការប្រមូលជ័រទឹក បេះផ្លែឈើ ប្រមូលទឹកឃ្មុំ ដើម្បីប្រកបរបរចិញ្ចឹមជីវិតប្រចាំថ្ងៃ។
ប្រភពដដែលអំពាវនាវឱ្យអាជ្ញាធរមូលដ្ឋាន និងក្រសួងបរិស្ថាន បញ្ឈប់ការរារាំងសិទ្ធិសេរីភាពក្នុងការចូលរួមចំណែកការពារព្រៃឈើ ធនធានធម្មជាតិនៃប្រជាពលរដ្ឋមូលដ្ឋាន អង្គការសង្គមស៊ីវិល ដែលរួមចំណែកការពារព្រៃឈើ និងធនធានធម្មជាតិទាំងនេះ។
កាលពីថ្ងៃទី៩ ខែឧសភា ឆ្នាំ២០១៦ រាជរដ្ឋាភិបាលបានចេញអនុក្រឹត្យបង្កើតដែនជម្រកសត្វព្រៃព្រះរការ ដែលមានផ្ទៃដីទំហំជាង ៩ម៉ឺនហិកតា (៩០៣៦១ហិកតា) ស្ថិតស្រុកចំនួន៣ មានស្រុកជាំក្សាន្ត ស្រុកត្បែងមានជ័យ និងស្រុកឆែប ខេត្តព្រះវិហារ។
ទោះជាដូច្នោះក្តី កាលពីឆ្នាំ២០២២ អង្គការគំនិតផ្ដួចផ្ដើមសកលប្រឆាំងនឹងឧក្រិដ្ឋកម្មឆ្លងដែន (Global Initiative Against Transnational Organized Crime) បានចេញសេចក្តីរាយការណ៍ស្រាវជ្រាវមួយពីមែកធាងអំពើខុសច្បាប់នៃរចនាសម្ព័ន្ធកាប់ឈើខុសច្បាប់នៅកម្ពុជា (Branches of Cambodia’s Illegality Structures) ដោយបង្ហាញថា ប្រព័ន្ធការពារគ្នាទៅវិញទៅមកដែលបង្កើតឡើងដោយគ្រួសារអតីតនាយករដ្ឋមន្ត្រី លោក ហ៊ុន សែន ជាមួយក្រុមឧកញ៉ា និងកងកម្លាំងប្រដាប់អាវុធ ធ្វើឱ្យមានវិនាសកម្មព្រៃឈើនៅប្រទេសកម្ពុជាដ៏ធ្ងន់ធ្ងរ៕
© 2025, ឌឹ ខេមបូឌា ដេលី. All rights reserved.