សមាជិកសភាជប៉ុន ជំរុញឱ្យរដ្ឋាភិបាលជប៉ុន លើកឡើងអំពីបញ្ហារំលោភសិទ្ធិមនុស្សនៅប្រទេសកម្ពុជា ទៅកាន់លោក ហ៊ុន ម៉ាណែត ក្នុងដំណើរទស្សនកិច្ចបួនថ្ងៃនៅប្រទេសជប៉ុន នាខែឧសភា នេះ ដើម្បីជាលក្ខខណ្ឌសម្រាប់ការផ្តល់ជំនួយអភិវឌ្ឍន៍បន្តទៅទៀត។
តំណាងរាស្ត្របក្សប្រឆាំង លោក ណាតូ សាកាគូឈិ (Naoto Sakaguchi) បានលើកឡើងក្នុងកិច្ចប្រជុំសភាប្រទេសជប៉ុន កាលពីថ្ងៃទី២២ ខែឧសភា ឆ្នាំ២០២៥ ដោយសង្កត់ធ្ងន់លើបញ្ហាសិទ្ធិមនុស្ស និងប្រជាធិបតេយ្យនៅប្រទេសកម្ពុជា ជាពិសេសគឺជំរុញឱ្យរដ្ឋាភិបាលជប៉ុន សួរនាំលោក ហ៊ុន ម៉ាណែត ដោយចំមុខ ជុំវិញដំណើរទស្សនកិច្ចរបស់គាត់នាចុងខែនេះ។
លោក ណាតូ សាកាគូឈិ បានរិះគន់សកម្មភាពនានារបស់ឯកអគ្គរាជទូតខ្មែរប្រចាំប្រទេសជប៉ុន លោក ទុយ រី ចំពោះការឃ្លាំមើល និងដាក់សម្ពាធមកលើប្រជាជនខ្មែរដែលកំពុងរស់នៅក្នុងប្រទេសជប៉ុន សព្វថ្ងៃនេះផងដែរ។
ក្រៅពីនេះទៀត លោកក៏បានលើកឡើងពីការចាប់ខ្លួនអតីតប្រធានគណបក្សកម្លាំងជាតិ លោក ស៊ុន ចន្ធី និងការធ្វើទុក្ខបុកម្នេញលើសកម្មជននយោបាយដែលកំពុងស្វែងរកសិទ្ធិជ្រកកោននយោបាយក្នុងប្រទេសជប៉ុន ក្រោមកិច្ចអន្តរាគមន៍ពីឯកអគ្គរាជទូតខ្មែរប្រចាំប្រទេសជប៉ុន លោក ទុយ រី ថែមទៀត។
លោក ណាតូ សាកាគូឈិ បានជំរុញយ៉ាងខ្លាំងទៅរដ្ឋមន្ត្រីការបរទេសជប៉ុន លោក អ៊ិវ៉ាយ៉ា តាកិស៊ិ (IWAYA Takeshi) ឱ្យជំរុញលោក ហ៊ុន ម៉ាណែត កែលំអស្ថានភាពសិទ្ធិមនុស្សជាបន្ទាន់ ដើម្បីជាលក្ខខណ្ឌសម្រាប់ការផ្តល់ជំនួយអភិវឌ្ឍន៍ទៅដល់រដ្ឋាភិបាលកម្ពុជាបន្តទៀត។
យោងតាមក្រសួងការបរទេសជប៉ុន បានឱ្យដឹងថា កាលពីដើមសប្តាហ៍នេះ លោក ហ៊ុន ម៉ាណែត គ្រោងនឹងធ្វើដំណើរទស្សនកិច្ចផ្លូវការរយៈពេល ៤ថ្ងៃនៅប្រទេសជប៉ុន ដើម្បីចូលរួមកម្មវិធីសន្និសីទអន្តរជាតិលើកទី៣០ ស្ដីពី «អនាគតទ្វីបអាស៊ី» ដែលរៀបចំដោយក្រុមហ៊ុនសារព័ត៌មាន Nikkei Inc. ចាប់ពីថ្ងៃទី២៨ ដល់ថ្ងៃទី៣១ ខែឧសភា ឆ្នាំ២០២៥ ខាងមុខនេះ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី២៣ ឧសភា នេះថា ការព្រួយបារម្ភពីស្ថានភាពសិទ្ធិមនុស្ស និងប្រជាធិបតេយ្យនៅប្រទេសកម្ពុជា ជុំវិញការបិទសិទ្ធិមូលដ្ឋានរបស់ពលរដ្ឋ ការគំរាមកំហែងឆ្លងដែនពីសំណាក់សមាជិកសភាជប៉ុន គឺជារឿងត្រឹមត្រូវ ព្រោះរាជាណាចក្រកម្ពុជាពិតជាញាំញីទៅដោយការរំលោភបំពានសិទ្ធិពលរដ្ឋប្រាកដមែន។
លោក អ៊ុំ សំអាន លើកឡើងថា សិទ្ធិពលរដ្ឋគ្រប់បែបយ៉ាងនៅស្រុកខ្មែរ ត្រូវបានរាជរដ្ឋាភិបាលដែលដឹកនាំដោយត្រកូលហ៊ុន បិទខ្ទប់គ្រប់បែបយ៉ាង ដែលជាទង្វើផ្ទុយពីមាត្រាចែងក្នុងរដ្ឋធម្មនុញ្ញទាំងស្រុង ដែលជាកត្តាធ្វើឱ្យប្រទេសកម្ពុជាស្អុយឈ្មោះលើឆាកអន្តរជាតិ និងធ្វើឱ្យខូចទំនាក់ទំនងការទូតយ៉ាងធ្ងន់ធ្ងរជាមួយប្រទេសជាមិត្តដែលមានបំណងលើកស្ទួយការគោរពសិទ្ធិមនុស្ស និងប្រជាធិបតេយ្យ៕
© 2025, ឌឹ ខេមបូឌា ដេលី. All rights reserved.