អាកាសយានដ្ឋានអន្តរជាតិតេជោ ស្ថាបនាដោយថវិកាចិន ពីគម្រោងផ្ដួចផ្ដើមខ្សែក្រវាត់ចំនួន ១៥០០លានដុល្លារ គ្រោងនឹងបើកដំណើរការហោះហើរចុះឡើងនៅថ្ងៃទី៩ ខែកញ្ញា ឆ្នាំ២០២៥។ នេះបើយោងតាមទីភ្នាក់ងារព័ត៌មានរដ្ឋចិន ស៊ីនហួរ នៅថ្ងៃសុក្រ ទី២៣ ខែឧសភា។
សង់ហើយ ចិននឹងគ្រប់គ្រង ចាត់ចែងរកចំណូលវិញក្នុងរយៈពេល ៥០ឆ្នាំ ទើបប្រគល់ឲ្យមកខាងខ្មែរវិញ។ វាលយន្តហោះដ៏ទំនើបនេះ សង់អស់ថវិកាជិត ១ពាន់លានដុល្លារហើយ ប៉ុន្តែទើបនឹងសង់បាន ៦៦% ប៉ុណ្ណោះ លើផ្ទៃដី ២៦០០ហិកតាក្នុងខេត្តកណ្តាល ចម្ងាយប្រមាណ ២០គីឡូម៉ែត្រពីរាជធានីភ្នំពេញ ហើយមានវិស្វករចំនួន ៣៥០០នាក់។
គេចាត់ទុកអាកាសយានដ្ឋានអន្តរជាតិតេជោ ថ្នាក់ 4F ដែលមានសមត្ថភាពឲ្យយន្តហោះដឹកអ្នកដំណើរ និងដឹកទំនិញប្រភេទ Boeing-747 Airbus-380 ចុះឡើងបាន ដោយថ្នល់ហោះហើរឡើងចុះប្រវែងយ៉ាងតិច ៣០០០ម៉ែត្រ ឬ ៣គីឡូម៉ែត្រ សម្រាប់យន្តហោះរត់ល្បឿនពី ២២៤គីឡូម៉ែត្រក្នុងមួយម៉ោងទៅ ២៦១គីឡូម៉ែត្រក្នុងមួយម៉ោង។
ប្រទេសចិន មានអាកាសយានដ្ឋានប្រភេទ 4F នេះចំនួន៩។ បន្ទាប់មក អាកាសយានដ្ឋានឆាងអ៊ី សិង្ហបុរី; ហាម៉ាដ នៅដូហា ប្រទេសកាតារ; ហានីដា នៅជប៉ុន និងតេជោ នៅរាជាណាចក្រកម្ពុជា។
មន្ត្រីអាកាសចរណ៍ស៊ីវិល អះអាងថា អាកាសយានដ្ឋានតេជោ នឹងទទួលរ៉ាប់រងបម្រើទេសចរ ១៣លាននាក់ ចាប់ពីឆ្នាំ២០២៥; ៣០លាននាក់នៅឆ្នាំ២០៣០ និង ៥០លាននាក់នៅឆ្នាំ២០៥០។
ទោះជាយ៉ាងណាក៏ដោយ មានបញ្ហាមួយចំនួនដោះស្រាយមិនទាន់បានជោគជ័យ ដែលអាចធ្វើឲ្យទេសចរបរទេសស្ទាក់ស្ទើរមិនហ៊ានមកលេងប្រទេសកម្ពុជា គឺប្រទេសបិទសិទ្ធិសេរីភាពពលរដ្ឋខ្លួន គ្រាន់តែមានរន្ទះបាញ់ក្នុងពិធីជំនឿមួយនៅលើប្រាង្គប្រាសាទអង្គរបណ្តាលឲ្យមនុស្សស្លាប់ និងរបួសប្រមាណជាង ១០នាក់កាលពីថ្ងៃសុក្រ ទី១៦ ឧសភា រដ្ឋមន្ត្រីក្រសួងទេសចរណ៍ ហួត ហាក់ បញ្ជាឲ្យពលរដ្ឋលុបរូបថត និងហាមមិនឲ្យបង្ហោះតាមហ្វេសប៊ុក យូធូប អំពីហេតុការណ៍នោះ ខ្លាចទេសចរលែងទៅទស្សនាអង្គរវត្ត។
លោកគួរតែហាមអ្នកកាន់ជំនឿ កុំឲ្យឡើងទៅទីខ្ពស់នារដូវវស្សា ខ្លាចរន្ទះបាញ់ ពីព្រោះប្រាសាទអង្គរវត្តពុំមានប្រព័ន្ធខ្សែបញ្ចៀសចរន្តអគ្គិសនីដូចអគារខ្ពស់ៗសម័យទំនើបនេះទេ៕
© 2025, ឌឹ ខេមបូឌា ដេលី. All rights reserved.