រដ្ឋមន្ត្រីក្រសួងការពារជាតិកម្ពុជា លោក ទៀ សីហា អះអាងថា ទំនាក់ទំនងការទូតរវាងកម្ពុជា-ចិន គ្មានថ្ងៃថមថយដាច់ខាត គឺមានតែរីកចម្រើន និងរឹងមាំខ្លាំងជាងមុន ជាពិសេសគឺកិច្ចសហការរវាងកងទ័ព និងកងទ័ពនៃប្រទេសទាំងពីរ។
លោក ទៀ សីហា លើកឡើងនៅក្នុងពិធីបិទសមយុទ្ធនាគមាសឆ្នាំ២០២៥ រវាងកងទ័ពកម្ពុជា-ចិន ដែលបានធ្វើឡើងនៅភ្នំជុំសែនរីករាយ នៅថ្ងៃទី២៨ ខែឧសភា ឆ្នាំ២០២៥ នេះថា ទំនាក់ទំនងការទូតជាប្រវត្តិសាស្ត្ររវាងប្រទេសទាំងពីរមានភាពស្និទ្ធស្នាលយ៉ាងរឹងមាំ ដូច្នេះការវាយប្រហារដើម្បីបំបែកសាមគ្គីភាពរវាងកម្ពុជា និងចិន គឺមិនអាចជោគជ័យបានឡើយ។
លោក ទៀ សីហា បានច្រានចោលនូវការលើកឡើងដែលថា ទំនាក់ទំនងរវាងកម្ពុជា-ចិន មានការថយចុះក្រោមហេតុផលថា រដ្ឋាភិបាលដែលដឹកនាំដោយលោក ហ៊ុន ម៉ាណែត បានងាកទៅពឹងផ្អែកលើប្រទេសផ្សេងៗជំនួសឱ្យការពឹងផ្អែកចិន។
មន្ត្រីយោធាជាន់ខ្ពស់រូបនេះបញ្ជាក់ថា ផ្អែកតាមសមិទ្ធផល និងលំហូរពាណិជ្ជកម្ម រួមទាំងការឧបត្ថម្ភផ្នែកយោធាដែលកម្ពុជាទទួលបានពីមិត្តចិន និងដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោក ស៊ី ជីនពីង មកកម្ពុជាទៀតនោះ គឺរឹតតែបង្ហាញឱ្យឃើញពីភាពជិតស្និទ្ធ និងការពង្រឹងនូវសាមគ្គីភាពរវាងប្រទេសទាំងពីរកាន់តែឈានទៅមុខខ្ពស់ឡើងជាលំដាប់។
ប្រធានក្រុមប្រឹក្សាឃ្លាំមើលកម្ពុជាដែលមានមូលដ្ឋាននៅប្រទេសន័រវែស លោក ម៉ែន ណាត បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលថ្មីៗនេះ ដោយចាត់ទុកសម្ដីរបស់មន្ត្រីរដ្ឋាភិបាលដែលលើកឡើងអំពីការរឹតចំណងទំនាក់ទំនងកម្ពុជា-ចិន ថាជាការនិយាយត្រាប់តាមលោក ហ៊ុន សែន តែប៉ុណ្ណោះ។
លោក ម៉ែន ណាត អះអាងថា ពិតមែនតែមន្ត្រីទាំងនោះលើកឡើងពីភាពប្រសើរនៃការរឹតចំណងមិត្តភាពរវាងកម្ពុជា-ចិន ដោយមើលត្រឹមតែជំនួយចិន កម្ចីចិន ប៉ុន្តែទំនាក់ទំនងពាក់ព័ន្ធនឹងផលប្រយោជន៍ស៊ីជម្រៅរវាងលោក ហ៊ុន សែន និងមេដឹកនាំចិន បែបណានោះ ពួកគេប្រាកដជាមិនបានដឹងច្បាស់នោះទេ។
អ្នកឃ្លាំមើលសង្គមរូបនេះអះអាងថា គោលបំណងសំខាន់របស់លោក ហ៊ុន សែន ចំពោះទំនាក់ទំនងចិន ពិតប្រាកដ គឺដើម្បីតែពឹងចិន ឱ្យជួយការពារអំណាចត្រកូលហ៊ុនបន្តទៅកូនរបស់គាត់ និងពូជរបស់គាត់ទៅថ្ងៃមុខបន្តទៀតតែប៉ុណ្ណោះ មិនមែនដើម្បីភាពរុងរឿងរបស់កម្ពុជា ហើយក៏មិនមែនដើម្បីពលរដ្ឋខ្មែរនោះដែរ។
កាលពីអំឡុងឆ្នាំ២០២៤ លោក ហ៊ុន សែន បានអះអាងថា ទំនាក់ទំនងកម្ពុជា-ចិន ដែលជាទំនាក់ទំនងប្រវត្តិសាស្ត្រយូរអង្វែង បានរីកចម្រើនរហូតដល់កម្រិតដែលមិនអាចបំបែកបាន ទោះកម្ពុជាបានផ្លាស់ប្ដូរនាយករដ្ឋមន្ត្រីថ្មីក៏ដោយ៕
© 2025, ឌឹ ខេមបូឌា ដេលី. All rights reserved.