តំណាងរាស្ត្រគណបក្សសង្គ្រោះជាតិ អះអាងថា ពលរដ្ឋខ្មែរដែលបាត់បង់សញ្ជាតិខ្មែរ នឹងត្រូវប្រគល់ទាំងដីធ្លី រួមទាំងសញ្ជាតិខ្មែរទៅឱ្យជនជាតិវៀតណាម ដែលរស់នៅខុសច្បាប់ បន្ទាប់ពីពួកគេត្រូវបានរដ្ឋាភិបាលកម្ពុជាធ្វើការបម្លាស់ទីពីការរស់នៅលើផ្ទះបណ្តែតទឹកក្នុងបឹងទន្លេសាប ឱ្យទៅរស់នៅលើដីគោកវិញ។
លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី១៤ កក្កដា នេះថា វិធានការបម្លាស់ទីជនជាតិវៀតណាម ដែលរស់នៅលើផ្ទះបណ្តែតទឹកខុសច្បាប់ ឱ្យមករស់នៅលើដីគោក និងផ្តល់ដីសម្បទានសង្គមកិច្ច ជាករណីដែលគួរឱ្យសង្ស័យបំផុត ព្រោះវិធានការនេះធ្វើឡើងស្របពេលដែលរដ្ឋសភាសម្រេចកែប្រែច្បាប់ដកសញ្ជាតិខ្មែរពីពលរដ្ឋខ្មែរនាពេលនេះ។
លោក អ៊ុំ សំអាន លើកឡើងថា ទង្វើរបស់រដ្ឋាភិបាលកម្ពុជាបែបនេះហាក់ដូចជាកំពុងតែកែច្បាប់ដកសញ្ជាតិខ្មែរពីកំណើត ដើម្បីដកហូតយកដីធ្លីពីពលរដ្ឋខ្មែរដែលបាត់បង់សញ្ជាតិខ្មែរ ទៅឱ្យជនជាតិវៀតណាម ទាំងនោះដូច្នោះដែរ ព្រោះថានៅពេលដែលពលរដ្ឋខ្មែរបាត់បង់សញ្ជាតិ ពួកគេនឹងលែងមានសិទ្ធិកាន់កាប់ដីធ្លីស្របច្បាប់បន្តទៀតហើយ។
កន្លងមក រដ្ឋាភិបាលកម្ពុជាធ្លាប់បានផ្តល់ដី ៤០ហិកតា និងសាងសង់ផ្ទះឱ្យជនជាតិវៀតណាម នៅខេត្តកំពង់ឆ្នាំង ម្តងរួចមកហើយ ប៉ុន្តែនៅពេលនេះ គេមិនទាន់ឃើញរដ្ឋាភិបាលផ្តល់ដីផ្សេងទៀតឲ្យជនជាតិវៀតណាមខុសច្បាប់សម្រាប់សាងសង់ផ្ទះបន្ថែមនៅឡើយទេ។
សេចក្តីសម្រេចដែលចុះហត្ថលេខាដោយនាយករដ្ឋមន្ត្រីខ្មែរ លោក ហ៊ុន ម៉ាណែត កាលពីថ្ងៃទី១០ ខែកក្កដា និងត្រូវបានផ្សព្វផ្សាយកាលពីថ្ងៃអាទិត្យ សម្រេចបង្កើតគណៈកម្មការចំពោះកិច្ច ដើម្បីដោះស្រាយបញ្ហាផ្ទះបណ្ដែតទឹក និងបែចិញ្ចឹមត្រី ស្ថិតក្នុងភូមិសាស្ត្រខេត្តចំនួន៥ ជុំវិញបឹងទន្លេសាប។
ប្រការ២ នៃសេចក្តីសម្រេចនេះ បានចែងពីគោលការណ៍ចំនួន ១៣ចំណុច ក្នុងនោះ ចំណុចទី១ គឺការរៀបចំផែនការយុទ្ធសាស្ត្ររយៈពេលមធ្យម និងវែង ដើម្បីបម្លាស់ទីផ្ទះបណ្តែតទឹកពីបឹងទន្លេសាប មកលើដីគោកវិញ។ ចំណែកចំណុចទី៦ បានចែងអំពីការផ្តល់ដីសម្បទានសង្គមកិច្ច និងរៀបចំហេដ្ឋារចនាសម្ព័ន្ធលើដីទាំងនោះថែមទៀត។ បន្ថែមពីនេះ ចំណុចទី៨ ក៏បានចែងអំពីការចាត់វិធានការចំពោះជនអន្តោប្រវេសន៍ខុសច្បាប់ដែលកំពុងរស់នៅលើទឹកទៅតាមច្បាប់អន្តោប្រវេសន៍របស់កម្ពុជាផងដែរ។
ជុំវិញបញ្ហានេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ក៏បានប្រាប់សារព័ត៌មាន The Cambodia Daily នៅថ្ងៃទី១៤ កក្កដា នេះដែរថា ការរៀបចំបម្លាស់ទីផ្ទះបណ្តែតទឹកដែលភាគច្រើនជាជនជាតិវៀតណាមខុសច្បាប់ ឲ្យទៅរស់នៅលើដីគោក និងផ្តល់ដីសម្បទានសង្គមកិច្ច គឺស្របគ្នាទៅនឹងគោលបំណងរបស់មេដឹកនាំវៀតណាម ដែលតែងតែស្នើសុំរដ្ឋាភិបាលកម្ពុជារហូតមក។
លោកបន្ថែមថា កន្លងមក មេដឹកនាំវៀតណាម តែងតែរំឭករដ្ឋាភិបាលកម្ពុជា ឲ្យពន្លឿនផ្តល់ភាពស្របច្បាប់ដល់ជនជាតិវៀតណាមខុសច្បាប់ និងជួយសម្រួលលក្ខខណ្ឌរស់នៅសមរម្យដល់ពលរដ្ឋវៀតណាមទាំងនោះជាបន្តបន្ទាប់។
ទាក់ទិននឹងបញ្ហានេះ កាលពីចុងឆ្នាំ២០១៩ លោក ហ៊ុន សែន ធ្លាប់រៀបចំផ្ទះសម្បែង និងផ្តល់ដីប្រមាណជា ៤០ហិកតា នៅខេត្តកំពង់ឆ្នាំង ឱ្យជនជាតិវៀតណាម ដែលរស់នៅលើផ្ទះបណ្តែតទឹកក្នុងបឹងទន្លេសាប ឲ្យទៅរស់នៅដីគោកផងដែរ ដែលមានជាង ៤ពាន់គ្រួសារ (៤៥៦៣គ្រួសារ) ក្នុងនោះ ជនអន្តោប្រវេសន៍វៀតណាម មានជាង ២ពាន់គ្រួសារ (២៣៧៩គ្រួសារ) ស្មើនឹងជាង ១ម៉ឺននាក់ (១០០៨៧នាក់)។ ក្រៅពីនេះ គឺជាពលរដ្ឋខ្មែរ និងខ្មែរឥស្លាម៕
© 2025, ឌឹ ខេមបូឌា ដេលី. All rights reserved.