មន្ត្រីជាន់ខ្ពស់បក្សប្រឆាំង អំពាវនាវឱ្យដោះលែងប្រធានគណបក្សសង្គ្រោះជាតិ លោក កឹម សុខា និងអ្នកទោសមនសិការទាំងអស់ ប្រសិនបើរដ្ឋាភិបាលកម្ពុជា ពិតជាចង់តបស្នងសងគុណប្រធានាធិបតីអាមេរិក លោក ដូណាល់ ត្រាំ ដែលបានជួយកម្ពុជា បញ្ចប់សង្គ្រាមជាមួយថៃ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន សរសេរលើទំព័រហ្វេសប៊ុករបស់ខ្លួននៅថ្ងៃទី៨ សីហា នេះថា លិខិតរបស់លោក ហ៊ុន ម៉ាណែត ដែលបានផ្ញើទៅគណៈកម្មការពានរង្វាន់ណូបែលសន្តិភាព ដើម្បីគាំទ្របេក្ខភាពលោក ដូណាល់ ត្រាំ សម្រាប់ពានរង្វាន់ណូបែលសន្តិភាពគឺជារឿងល្អ ព្រោះលោក ដូណាល់ ត្រាំ បានស្វែងរកសន្តិភាពជូនប្រជាជនកម្ពុជា ពីការឈ្លានពានរបស់ថៃ។
លោក អ៊ុំ សំអាន អះអាងថា អ្វីដែលលោក ដូណាល់ ត្រាំ និងសហរដ្ឋអាមេរិក ចង់បានបំផុតនោះ គឺការដោះលែងលោក កឹម សុខា ដែលតុលាការបានចោទប្រកាន់ពីបទគប់គិតជាមួយអាមេរិក ក្នុងការផ្តួលរំលំរដ្ឋាភិបាលកម្ពុជា រួមទាំងការដោះលែងអ្នកទោសមនសិការ ស្ដារប្រជាធិបតេយ្យ គោរពសិទ្ធិមនុស្ស និងការរៀបចំការបោះឆ្នោតដោយសេរី និងយុត្តិធម៌ឡើងវិញ។
មន្ត្រីបក្សប្រឆាំងរូបនេះបញ្ជាក់ថា ប្រសិនបើរដ្ឋាភិបាលកម្ពុជា ពិតជាចង់តបស្នងសងគុណលោក ដូណាល់ ត្រាំ និងសហរដ្ឋអាមេរិក មែននោះ រដ្ឋាភិបាលគួរតែធ្វើទៅតាមបំណងប្រាថ្នារបស់អាមេរិក។
កាលពីថ្ងៃទី៧ ខែសីហា ឆ្នាំ២០២៥ នាយករដ្ឋមន្ត្រីកម្ពុជា លោក ហ៊ុន ម៉ាណែត បានផ្ញើលិខិតមួយច្បាប់ទៅកាន់គណៈកម្មការពានរង្វាន់ណូបែលសន្តិភាព ដើម្បីគាំទ្របេក្ខភាពប្រធានាធិបតីអាមេរិក លោក ដូណាល់ ត្រាំ សម្រាប់ពានរង្វាន់ណូបែលសន្តិភាព។
លោក ហ៊ុន ម៉ាណែត បញ្ជាក់ថា ការស្នើសុំពានរង្វាន់នេះ គឺស្របតាមសំណូមពររបស់ប្រជាពលរដ្ឋខ្មែរ ទាំងក្នុង និងក្រៅប្រទេស និងដើម្បីជាការថ្លែងអំណរគុណដល់លោក Donald Trump ដែលបានយកចិត្តទុកដាក់ដោយផ្ទាល់ក្នុងការផ្ដួចផ្ដើម និងជំរុញឲ្យមានបទឈប់បាញ់គ្នារវាងកងទ័ពកម្ពុជា និងកងទ័ពថៃ ក៏ដូចជាការបន្តតាមដានការអនុវត្តបទឈប់បាញ់រហូតដល់មានសន្តិភាពពេញលេញរវាងប្រទេសទាំងពីរ។
ជុំវិញបញ្ហានេះ អតីតនាយកខុទ្ទកាល័យប្រធានគណបក្សសង្គ្រោះជាតិ លោក មុត ចន្ថា បានលើកឡើងកាលពីថ្ងៃទី៧ សីហា ថា លោកគាំទ្ររាជរដ្ឋាភិបាលកម្ពុជាស្ដារទំនាក់ទំនងល្អជាមួយអាមេរិក ឱ្យបានល្អប្រសើរឡើងវិញ ប៉ុន្តែកម្ពុជា គួរតែលាងសម្អាតការចោទអាមេរិក ពីបទក្បត់ជាតិជាមួយលោក កឹម សុខា ឱ្យជ្រះស្រឡះជាមុនសិន ដើម្បីបង្ហាញពីសុឆន្ទៈសុចរិត និងការថ្លែងអំណរគុណអាមេរិកចេញពីបេះដូងបរិសុទ្ធ។
លោក កឹម សុខា ត្រូវបានសាលាដំបូងរាជធានីភ្នំពេញ ចោទប្រកាន់ពីបទ ក្បត់ជាតិ ដែលមានអាមេរិកនៅពីក្រោយក្នុងការផ្តួលរំលំរដ្ឋាភិបាលកម្ពុជា និងសម្រេចសម្រេចផ្ដន្ទាទោសឲ្យជាប់ពន្ធនាគាររយៈពេល ២៧ឆ្នាំ រួមទាំងត្រូវដកហូតសិទ្ធិមិនឲ្យធ្វើនយោបាយអស់មួយជីវិតថែមទៀតកាលពីថ្ងៃទី៣ ខែមីនា ឆ្នាំ២០២៣ កន្លងទៅ៕
© 2025, ឌឹ ខេមបូឌា ដេលី. All rights reserved.