យោងតាមការចេញផ្សាយនៅថ្ងៃទី១១ កញ្ញា នេះ ដោយបណ្ដាញផ្សាយព័ត៌មាន ABC News កងទ័ពនៃប្រទេសនេប៉ាល់ បានដណ្តើមកាន់កាប់រដ្ឋធានី Kathmandu មកវិញ បន្ទាប់ពីរដ្ឋធានីមួយនេះធ្លាក់ក្នុងអំពើកុបកម្មបង្កហិង្សាដ៏អាក្រក់បំផុតក្នុងរយៈពេលជាងពីរទសវត្សរ៍ បណ្ដាលឱ្យមនុស្ស ៣០នាក់ស្លាប់ ជាង ១ពាន់នាក់រងរបួស បង្ខំនាយករដ្ឋមន្ត្រីចុះចេញពីតំណែង និងអគារសំខាន់ៗរួមទាំងអគាររដ្ឋសភារបស់ប្រទេស ត្រូវបានដុតកម្ទេច។
នៅខណៈនេះ កងទ័ពបានកំពុងដើរល្បាតតាមដងផ្លូវនៃរដ្ឋធានី ដើម្បីគ្រប់គ្រងស្ថានការណ៍ និងតាមទប់ស្កាត់ក្រុមយុវជនមួយចំនួនដែលមិនព្រមបញ្ឈប់ហិង្សា។
ការតវ៉ាដ៏សាហាវនៅក្នុងសប្តាហ៍នេះ បើតាមប៉ូលិស បាននិយាយថា អ្នកទោសជាង ១៣៥០០នាក់បានរត់គេចពីពន្ធនាគារនៅទូទាំងប្រទេស។
ក្រសួងសុខាភិបាលរបស់ប្រទេសនេប៉ាល់ បានបញ្ជាក់កាលពីថ្ងៃពុធ ថា ក្រៅពីមនុស្ស ៣០នាក់ដែលត្រូវបានសម្លាប់នៅក្នុងភាពចលាចលនៅទូទាំងប្រទេស មនុស្ស ១០៣៣នាក់បានរងរបួស។
នៅរដ្ឋធានី Kathmandu រថយន្តយោធាបានឆ្លងកាត់ផ្លូវដ៏ស្ងប់ស្ងាត់ ដែលមានរថយន្ត និងអគារឆេះនៅតាមផ្លូវ ខណៈដែលមន្ត្រីប្រើឧបករណ៍សំឡេងអំពាវនាវឲ្យមានសន្តិភាពក្នុងអំឡុងពេលដែលមានវិបត្តិនយោបាយផ្ដួលរំលំរដ្ឋាភិបាល។
ការចរចាបានចាប់ផ្តើមរវាងមេដឹកនាំបាតុកម្ម និងកងទ័ព ប៉ុន្តែមិនមានកិច្ចព្រមព្រៀងណាមួយដែលបានសម្រេចនៅថ្ងៃពុធ នោះទេ។
អ្នកនាំពាក្យសម្រាប់កងទ័ព លោក Rajaram Basnet បាននិយាយថា អគ្គមេបញ្ជាការកងទ័ពនេប៉ាល់ លោក Ashok Raj Sigdel បានពិគ្រោះយោបល់ជាមួយអ្នកពាក់ព័ន្ធ និងបានជួបសមាជិកនៃក្រុមចលនា Gen Z ជាក្រុមវ័យក្មេងដែលចូលរួមបាតុកម្ម ប៉ុន្តែមិនបានផ្តល់ព័ត៌មានលម្អិតបន្ថែមទេ។
អ្នកស្រី Shushila Karki អាយុ ៧៣ឆ្នាំ អតីតប្រធានតុលាការកំពូលដ៏មានឥទ្ធិពលដែលបាតុករភាគច្រើនមើលឃើញថាអ្នកស្រីស័ក្តិសមជាមេដឹកនាំបណ្ដោះអាសន្ននៃរដ្ឋាភិបាលនេប៉ាល់ បាននិយាយថាការសន្ទនារវាងភាគីយោធា និងបាតុករនៅពេលនេះមានសារសំខាន់។ អ្នកស្រីបានប្រាប់ទីភ្នាក់ងារសារព័ត៌មាន AFP ថា អ្នកជំនាញត្រូវរួមគ្នាដើម្បីស្វែងរកផ្លូវឆ្ពោះទៅមុខ។
តែនៅខណៈនេះ កងទ័ពនៅបន្តដាក់ពង្រាយនៅម្ដុំរដ្ឋសភា ដែលត្រូវកុបករដុតកម្ទេច តែសមាជិកសភានេប៉ាល់ បានស្ដីបន្ទោសចំពោះកុបកម្មនេះ។
បាតុកម្មបានចាប់ផ្តើមកាលពីថ្ងៃចន្ទ នៅរាជធានី បានធ្វើឡើងដោយក្រុមយុវជនវ័យក្មេង Gen Z ក្នុងគោលបំណងប្រឆាំងនឹងការបិទប្រព័ន្ធផ្សព្វផ្សាយសង្គម និងការប្រឆាំងប្រព័ន្ធដឹកនាំរដ្ឋពោរពេញដោយអំពើពុករលួយ។
ក្រុមបាតុករចាប់ផ្តើមផ្ទុះកំហឹងនៅទូទាំងប្រទេស ដោយបានដុតបំផ្លាញអគាររដ្ឋាភិបាលឱ្យឆេះ បន្ទាប់ពីមានមនុស្សយ៉ាងតិច ១៩នាក់ស្លាប់ក្នុងការប៉ះទង្គិចយ៉ាងសាហាវជាមួយប៉ូលិសបង្ក្រាបកុបកម្ម។
ចលាចលដែលកើតឡើងយ៉ាងឆាប់រហ័ស បានធ្វើឱ្យពលរដ្ឋភ្ញាក់ផ្អើល ខណៈយោធានៃប្រទេសនេប៉ាល់ បានព្រមានប្រឆាំងនឹង «សកម្មភាពដែលអាចនាំឱ្យប្រទេសមានភាពចលាចល និងអស្ថិរភាព»។
អ្នកនាំពាក្យប៉ូលិសជាតិនេប៉ាល់ លោក Binod Ghimire បាននិយាយថា ប៉ូលិសពីរនាក់ត្រូវបានសម្លាប់កាលពីថ្ងៃអង្គារ អំឡុងបាតុករវាយបំបែកពន្ធនាគារធំមួយដើម្បីរំដោះអ្នកទោស។ នៅលើជញ្ជាំងនៃអគាររដ្ឋសភាឆេះខ្លោច ក្រុមបាតុកម្មបានសរសេរពាក្យប្រមាថទៅកាន់រដ្ឋាភិបាល ដែលបញ្ជាក់ថា ពួកគេបានជ្រើសរើសការធ្វើសកម្មភាពប្រឆាំងជាការចាំបាច់ ហើយឃើញមានការចុះហត្ថលេខាដោយក្រុមបាតុករវ័យក្មេង Gen Z។
ក្រុមយុវជនវ័យក្មេងនេប៉ាល់ Gen Z កាលពីថ្ងៃអង្គារ ទី៩ ខែកញ្ញា នេះ បានវាយប្រហារ និងដុតបំផ្លាញផ្ទះរបស់លោក KP Sharma Oli នាយករដ្ឋមន្ត្រីនេប៉ាល់ អាយុ ៧៣ឆ្នាំ ដែលជានាយករដ្ឋមន្ត្រីបួនសម័យកាល និងជាមេដឹកនាំបក្សកុម្មុយនីស្តម៉ៅនិយម។
ក្នុងស្ថានភាពទប់ជំហរការពារអំណាចរបស់ខ្លួនដែលកំពុងធ្លាក់ក្នុងស្ថានភាពអាសន្ន និងគ្រោះថ្នាក់ដល់ជីវិតលោក Sharma Oli បានលាលែងពីតំណែងនាយករដ្ឋមន្ត្រី ដោយបញ្ជូនលិខិតលាលែងទៅជូនប្រមុខរដ្ឋដែលគ្មានអំណាច។ ការណ៍នេះ បាននាំឱ្យមានការត្រួសត្រាយផ្លូវបោះជំហានឆ្ពោះទៅរកដំណោះស្រាយនយោបាយ។
តែយ៉ាងណា លោក Sharma Oli បានកំពុងលាក់ខ្លួនដែលមិនត្រូវបានគេស្គាល់ឡើយ តែប្រភពខ្លះថានាយករដ្ឋមន្ត្រីត្រូវបានទាញទម្លាក់ពីអំណាចរូបនេះ បានរត់ចេញពីប្រទេសនេប៉ាល់ បាត់ហើយ។
មន្ត្រីប៉ូលិសចូលនិវត្តន៍ Dev Kumar Khatiwada អាយុ ៦០ឆ្នាំ បាននិយាយថា រដ្ឋាភិបាលដែលត្រូវបានបណ្តេញចេញ សមតែទទួលការស្ដីបន្ទោស គឺជារឿងត្រឹមត្រូវ។ លោកបានបន្ថែមថា នេះជាលទ្ធផលសាងអំពើអាក្រក់របស់មេដឹកនាំម្នាក់នេះ។
តែយ៉ាងនេះក្ដី សំណួរនៅតែមានអំពីលទ្ធិប្រជាធិបតេយ្យនៅនេប៉ាល់ ក្រោយពីកុបករផ្ដួលរំលំរដ្ឋាភិបាល។
ក្រុមវិបត្តិអន្តរជាតិបានហៅវាថា ព្រឹត្តិការណ៍នៅនេប៉ាល់ ក្នុងសប្ដាហ៍ទី២ នៃខែកញ្ញា ឆ្នាំ២០២៥ នេះ គឺ «ចំណុចផ្លាស់ប្ដូរប្រវត្តិសាស្ត្រដ៏គំហុកនៃប្រព័ន្ធដឹកនាំរដ្ឋនៃអតីតរាជាណាចក្រនេប៉ាល់»។
ព្រឹត្តិការណ៍នេះ គឺជាបទពិសោធន៍មិនសប្បាយចិត្តចំពោះប្រទេសប្រជាធិបតេយ្យដែលគេស្អាតស្អំ ជាមួយនឹងប្រជាធិបតេយ្យនៅនេប៉ាល់ ដែលក្លាយជាឧបករណ៍កិបកេងធនធានរដ្ឋរបស់រដ្ឋាភិបាលត្រូវបានផ្ដួលរំលំ។
អ្នកនាំពាក្យអង្គការសហប្រជាជាតិ លោក Stephane Dujarric បាននិយាយថា លោកអគ្គលេខាធិការអង្គការសហប្រជាជាតិ Antonio Guterres បានអំពាវនាវឱ្យមាន «ការអត់ធ្មត់ ដើម្បីជៀសវាងការកើនឡើងនៃអំពើហិង្សាបន្ថែមទៀត»។
អ្នកច្បាប់ជំនាញរដ្ឋធម្មនុញ្ញ Dipendra Jha បាននិយាយថា មេដឹកនាំបាតុករ និងកងទ័ព គួរតែរួមគ្នាដើម្បីស្វែងរកផ្លូវសម្រាប់រដ្ឋាភិបាលបម្រុង។
អ្នកវិភាគក្រុមវិបត្តិអន្តរជាតិ លោក Ashish Pradhan បាននិយាយថា ការរៀបចំអន្តរកាលនេះ គួរត្រូវធ្វើឱ្យបានរហ័ស និងរួមបញ្ចូលសារព័ត៌មានដែលមានភាពជឿជាក់ជាមួយប្រជាជន និងយុវជនរបស់ប្រទេស។
យោងតាមធនាគារពិភពលោក ប្រហែលមួយភាគប្រាំនៃមនុស្សវ័យ ១៥ឆ្នាំទៅ ២៤ឆ្នាំនៅនេប៉ាល់ ភាគច្រើនគ្មានការងារធ្វើនោះទេ។ ផលិតផលក្នុងស្រុកសរុបសម្រាប់មនុស្សម្នាក់ៗនៃប្រទេសនេះ គឺប្រហែល ១៤៤៧ដុល្លារជាចំណូលប្រចាំឆ្នាំ៕
© 2025, ឌឹ ខេមបូឌា ដេលី. All rights reserved.