មន្ត្រីជាន់ខ្ពស់នៃរាជបណ្ឌិត្យសភាកម្ពុជា លើកឡើងថា គម្រោងធ្វើសមយុទ្ធយោធារបស់ចិន ជាមួយថៃ មិនមែនជារឿងចម្លែកទេ ដោយសារតែមិត្តភាពដែកថែបរវាងកម្ពុជា និងចិន មិនមែនជាមិត្តចងដៃចងជើងគ្នាមិនឱ្យពង្រឹងទំនាក់ទំនងជាមួយប្រទេសដទៃនោះទេ ត្បិតទំនាក់ទំនងអន្តរជាតិគ្មានមិត្ត គ្មានសត្រូវឡើយ គឺមានតែផលប្រយោជន៍ប៉ុណ្ណោះ។
បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា សរសេរលើគណនីហ្វេសប៊ុករបស់លោកកាលពីថ្ងៃទី១៥ ខែកញ្ញា ថា កម្ពុជានិងចិន មិនមែនជាសម្ព័ន្ធមិត្តយោធាដែលចាំបាច់តម្រូវឱ្យប្រទេសនីមួយៗជួយច្បាំងគ្នាទៅវិញទៅមកដូចសម្ព័ន្ធមិត្តណាតូ ឬសម្ព័ន្ធមិត្តរវាងជប៉ុន និងកូរ៉េខាងត្បូង ជាមួយនឹងសហរដ្ឋអាម៉េរិក ឬរវាងសហរដ្ឋអាម៉េរិក និងប្រទេសលោកខាងលិចនោះទេ។
លោកបន្តថា ប្រទេសនីមួយៗតែងតែព្យាយាមពង្រីកទំនាក់ទំនងការទូតរបស់ខ្លួនជាមួយបណ្ដាប្រទេសនានាឱ្យបានច្រើនបំផុតតាមដែលអាចធ្វើបាន ដើម្បីធានាផលប្រយោជន៍យុទ្ធសាស្ត្ររបស់ខ្លួនលើវិស័យនយោបាយ ការទូត សន្តិសុខ យុទ្ធសាស្ត្រ សេដ្ឋកិច្ច និងសង្គម-វប្បធម៌ ជាដើម។
បណ្ឌិត គិន ភា លើកឡើងថា កម្ពុជាមិនត្រូវតូចចិត្តចំពោះចិន ដែលធ្វើសមយុទ្ធផ្លូវអាកាសជាមួយថៃ នោះឡើយ ព្រោះចិន មានផលប្រយោជន៍ជាមួយថៃ ច្រើនជាងកម្ពុជា ទាំងសេដ្ឋកិច្ច ពាណិជ្ជកម្ម វិនិយោគ ការទូត យុទ្ធសាស្ត្រ សន្តិសុខ ជាពិសេស ថៃដែលជាម៉ូយដ៏ធំមួយរបស់ចិន សម្រាប់លក់អាវុធផងដែរក្នុងពេលបច្ចុប្បន្ននេះ។
លោកបន្ថែមថា កម្ពុជាមិនអាចជួយច្បាំងចិន ហើយចិន ក៏មិនអាចជួយច្បាំងកម្ពុជា ដែរ តែអាចគាំទ្រគ្នាជានយោបាយ ការទូត ឬយោធា ដែលមិនប៉ះពាល់ដល់ផលប្រយោជន៍គ្នាទៅវិញទៅមក។
លោកបន្តទៀតថា កម្ពុជាត្រូវតែបន្តធ្វើទំនាក់ទំនងការទូតបន្ថែមទៀតជាមួយមហាអំណាច និងបណ្ដាប្រទេសនានាឱ្យបានកាន់តែច្រើនទៅតាមអ្វីដែលអាចធ្វើទៅបាន ដោយចៀសវាងងាប់ក្រឡាជាមួយតែមហាអំណាចណាមួយ មិនថាលើវិស័យសេដ្ឋកិច្ច នយោបាយ ការទូត និងសន្តិសុខនោះទេ។
បណ្ឌិត គិន ភា បញ្ជាក់ថា កាលណាមានសង្គ្រាមរវាងប្រទេសតូចៗ មហាអំណាចនឹងសប្បាយចិត្ត ព្រោះលុយនឹងហូរចូលទៅប្រទេសរបស់ពួកគេតាមរយៈនៃការលក់អាវុធ ព្រោះរាល់ពេលមានសង្គ្រាម គឺជាឱកាសដែលមហាអំណាចឈ្មួញអាវុធផ្សាយពាណិជ្ជកម្មអាវុធរបស់ខ្លួនផង និងជាឱកាសលក់អាវុធផងដែរ។
កាលពីថ្ងៃទី១៥ ខែកញ្ញា សារព័ត៌មានរដ្ឋចិន ស៊ិនហួ (Xinhua) បានដកស្រង់ព័ត៌មានពីគេហទំព័រក្រសួងការពារជាតិចិន ថា ចិននិងថៃ បានកំណត់ពេលធ្វើសមយុទ្ធហ្វឹកហ្វឺនកងទ័ពដែនអាកាសរួមគ្នាចាប់ពីពាក់កណ្តាលខែកញ្ញា ឆ្នាំ២០២៥ រហូតដល់ដំណាច់ខែនេះ ដែលធ្វើឡើងក្នុងប្រទេសថៃ ដោយដាក់ឈ្មោះថា Falcon Strike។
ក្រុមអ្នកសង្កេតការណ៍បានលើកឡើងថា ឆ្នាំ២០២៥ នេះ ថៃបានចំណាយថវិកាជាតិប្រមាណ ៨៥០០លានដុល្លារសម្រាប់ធ្វើទំនើបកម្មយោធាដើម្បីការពារជាតិ ហើយក្នុងរយៈពេលជាងមួយទសវត្សរ៍កន្លងមកនេះ ថៃក៏បានទិញឧបករណ៍យោធាពីចិន ប្រមាណជា ៣០ ទៅ ៤០%។ អាវុធទាំងនោះរួមមាន រថពាសដែក ប្រព័ន្ធកាំភ្លើងធំទំនើប រួមទាំងកាំភ្លើងធំធុន ១៥៥មិល្លីម៉ែត្រផងដែរ៕
© 2025, ឌឹ ខេមបូឌា ដេលី. All rights reserved.