គណៈកម្មាធិការសិទ្ធិមនុស្សកម្ពុជា អះអាងថា បើថៃ មិនដោះស្រាយករណីរំលោភយុវតីខ្មែរ រួមទាំងអំពើព្រៃផ្សៃដទៃទៀតដែលបានប្រព្រឹត្តលើកម្ពុជា ដើម្បីផ្តល់យុត្តិធម៌ជូនជនរងគ្រោះទេ នោះថៃ នឹងជាប់ឈ្មោះជាប្រទេសគ្មានច្បាប់។
គណៈកម្មាធិការសិទ្ធិមនុស្សកម្ពុជា (គ.ស.ម.ក.) នៅថ្ងៃទី១៨ វិច្ឆិកា នេះ បានចេញសេចក្តីថ្លែងការណ៍ថ្កោលទោសដាច់អហង្ការចំពោះទាហានឈុតខ្មៅថៃ ៧នាក់ ដែលបានចាប់រំលោភបូកយ៉ាងព្រៃផ្សៃលើពលករចំណាកស្រុកជាស្ត្រីខ្មែរអាយុ ១៨ឆ្នាំម្នាក់ ព្រមទាំងអំពើអមនុស្សធម៌ជាច្រើនទៀតដែលទាហានថៃ បានប្រព្រឹត្តលើពលរដ្ឋកម្ពុជា ក្នុងរយៈពេលដែលប្រទេសទាំងពីរមានជម្លោះព្រំដែននាពេលកន្លងមកនោះ។
ប្រភពដដែលអះអាងថា ការរំលោភផ្លូវភេទ គឺជាបទឧក្រិដ្ឋ និងជាអំពើគួរឱ្យស្អប់ខ្ពើមបំផុត ហើយអំពើអមនុស្សធម៌ដ៏ព្រៃផ្សៃនេះ គឺជាការរំលោភលើសិទ្ធិមនុស្សយ៉ាងធ្ងន់ធ្ងរ ដែលត្រូវផ្ដន្ទាទោសលើជនល្មើសដោយគ្មានការលើកលែងឡើយ។ ចំណែកអំពើយង់ឃ្នងដែលកងទ័ពថៃ បានប្រព្រឹត្តជាច្រើនទៀត ដូចជា ការប្រើប្រាស់បន្លាលួសព័ទ្ធយកផ្ទះ ដី ស្រែចម្ការរបស់ពលរដ្ឋខ្មែរ និងការប្រើឧបករណ៍បំពងសំឡេងក្នុងបំណងធ្វើទុក្ខបុកម្នេញដែលនាំឱ្យមានការប៉ះពាល់យ៉ាងខ្លាំងដល់សុខភាពផ្លូវកាយ និងផ្លូវចិត្តពលរដ្ឋស៊ីវិលកម្ពុជា ជាពិសេសទៅលើស្ត្រី កុមារ ជនមានពិការភាព និងអ្នកជំងឺ ជាដើម ក៏ត្រូវរាប់បញ្ចូលក្នុងអំពើរំលោភច្បាប់មនុស្សធម៌អន្តរជាតិដែរ។
គណៈកម្មាធិការសិទ្ធិមនុស្សកម្ពុជា ស្នើឱ្យអាជ្ញាធរមានសមត្ថកិច្ចថៃ ចាត់វិធានការនាំខ្លួនឧក្រិដ្ឋជនមកផ្ដន្ទាទោសតាមច្បាប់ជាបន្ទាន់ ដើម្បីផ្តល់យុត្តិធម៌ និងសំណងផ្សេងៗដល់ជនរងគ្រោះ។
កាលពីថ្ងៃទី១៦ ខែវិច្ឆិកា ក្រសួងមហាផ្ទៃកម្ពុជា អះអាងថា កាលពីយប់ថ្ងៃអាទិត្យ កន្លងទៅ ពលករចំណាកស្រុកជាយុវតីខ្មែរអាយុ ១៨ឆ្នាំម្នាក់ត្រូវបានទាហានឈុតខ្មៅថៃ ៧នាក់ចាប់រំលោភបូកយ៉ាងព្រៃផ្សៃប្រាកដមែន នៅពេលដែលត្រឡប់ពីប្រទេសថៃ មកកម្ពុជា វិញ ជាមួយនឹងពលករដែលជាបុរសជាង ១០នាក់ផ្សេងទៀត។
ប្រភពដដែលអះអាងថា ក្នុងចំណោមពលករខ្មែរជាង ១០នាក់ដែលវិលត្រឡប់មកវិញនោះ គឺមានតែយុវតីរងគ្រោះតែម្នាក់ប៉ុណ្ណោះដែលជាស្ត្រី។ ក្នុងពេលឃាត់ខ្លួន ទាហានថៃ បានបំបែកពលករទាំងនេះជាពីរក្រុម គឺមួយក្រុមជាបុរស និងមួយក្រុមទៀតគឺជាស្ត្រី ប៉ុន្តែមួយក្រុមដែលជាស្ត្រីនោះ គឺមានតែយុវតីរងគ្រោះម្នាក់ឯងប៉ុណ្ណោះ។
ជុំវិញបញ្ហានេះ រដ្ឋមន្ត្រីក្រសួងមហាផ្ទៃ លោក ស សុខា បានអះអាងកាលពីថ្ងៃចន្ទថា អគ្គស្នងការដ្ឋាននគរបាលជាតិ កំពុងសហការជាមួយអ្នកពាក់ព័ន្ធ ដើម្បីប្រមូលព័ត៌មាន និងប្ដឹងទៅអន្តរជាតិឲ្យឃើញអំពីទង្វើដ៏ស្មោកគ្រោករបស់ក្រុមទាហានថៃ ដែលបានប្រព្រឹត្តមកលើនារីរងគ្រោះដែលជាជនជាតិខ្មែររូបនេះ។
យ៉ាងណាក៏ដោយ កាសែតថៃ ខៅស៊ុត (Khaosod) បានស្រង់សម្ដីកងទ័ពថៃ នៅថ្ងៃទី១៨ វិច្ឆិកា នេះ ដោយច្រានចោលនូវការចោទប្រកាន់ដែលថាទាហានថៃ បានវាយដំពលករខ្មែរ លួចទ្រព្យសម្បត្តិ និងរំលោភយុវតីខ្មែរអាយុ ១៨ឆ្នាំនោះ ថាជារឿងមិនពិត និងជាការប្រឌិតរបស់ភាគីកម្ពុជា។
បែបនេះក្តី ក្រសួងស្ថាប័នកម្ពុជាជាច្រើន រួមទាំងក្រសួងកិច្ចការនារីផង នៅថ្ងៃទី១៨ វិច្ឆិកា នេះ បាននាំគ្នាចេញសេចក្តីថ្លែងការណ៍ថ្កោលទោសដាច់អហង្ការព្រោងព្រាតចំពោះទង្វើដ៏សាហាវព្រៃផ្សៃឃោរឃៅ អមនុស្សធម៌របស់ក្រុមទាហានឈុតខ្មៅថៃ ដែលបានប្រើប្រាស់អំពើហិង្សា និងរំលោភលើយុវតីខ្មែរប្រៀបដូចជាសត្វធាតុនោះ៕
© 2025, ឌឹ ខេមបូឌា ដេលី. All rights reserved.