ប្រឈមមុខនឹងការរិះគន់ពីគ្រប់ជ្រុងជ្រោយចំពោះគោលនយោបាយដឹកនាំប្រទេសដែលបណ្តោយឲ្យមានរបរឆបោករីកស្គុះស្គាយលើទឹកដីខ្មែរជាច្រើនឆ្នាំ អ្នកតាមដានស្ថានការណ៍ស្រុកខ្មែរ ទាំងបរទេស ទាំងជាតិខ្មែរ មើលឃើញថា ការស្ទុះស្ទាតក់ក្រហល់បង្ក្រាប បោសសំអាតឧក្រិដ្ឋកម្មឆបោកតាមប្រព័ន្ធអន្តរបណ្ដាញ ហៅថា online scam ឬ cybercrime នៅខណៈនេះ សុទ្ធតែជាការសម្ដែងប៉ាហ៊ី ឬល្បែងថ្ពឹនឱ្យល្អភ្នែកដល់ពិភពលោក។ មេដឹកនាំចិន អស់សេចក្តីអំណត់អត់ធ្មត់នឹងអសមត្ថភាពខាងរាជរដ្ឋាភិបាលខ្មែរតទៅទៀត។
ទស្សនាវដី្ត The Diplomat នៅថ្ងៃទី១២ ខែកុម្ភៈ នេះ ផ្សាយអត្ថបទមួយនិយាយអំពីវាសនាប្រទេសកម្ពុជា ថារាជាណាចក្រនេះបោះជំហានធ្វើដំណើរប្រកបដោយប្រុងប្រយ័ត្នជាមួយសហរដ្ឋអាមេរិក ចិន និងប្រទេសថៃឡង់ដ៍ ខណៈបង្កើនសកម្មភាពបង្ក្រាបឧក្រិដ្ឋកម្មឆបោកក្នុងប្រទេស ហើយប្រទេសថៃ បោះឆ្នោតរើសយកបេក្ខជនអភិរក្សនិយម។
គេប្រមើលថា រាជរដ្ឋាភិបាលកំពុងដើរទៅមុខក្នុងមាគ៌ាប្រកបដោយឧបសគ្គ៖
- សេដ្ឋកិច្ចជាមួយប្រទេសថៃឡង់ដ៍ ទ្រឹងស្តូក
- ជំនួយពីប្រទេសចិន ដែលគេធ្លាប់ហៅថាមិត្តស្រោបដែក ឬដែកថែប ធ្លាក់មកតក់ៗដូចទឹកត្នោតស្រក់ចូលបំពង់
- ភក្ដីភាពជាមួយក្រុងវ៉ាស៊ីនតុន ក៏មិនទៀងទាត់។
រាជរដ្ឋាភិបាលបានធ្វើឲ្យចិន អន់ចិត្ត៖
- ទី១ រឿងមេដឹកនាំខ្មែរជួយការពារមេបនឧក្រិដ្ឋជនឆបោក ដែលធ្វើឲ្យដើមទុនចាកចេញពីប្រទេសចិន
- ទី២ ការអនុញ្ញាតឲ្យនាវាចម្បាំងសហរដ្ឋអាមេរិកចូលចតនៅកំពង់ផែចិន សង់ឲ្យ ដើម្បីបង្ហាញពិភពលោកថា ខ្លួនមិននៅក្រោមឥទ្ធិពលចិន ក៏ធ្វើឲ្យចិន មិនសប្បាយចិត្ត
- ទី៣ គាំទ្រគោលគំនិតប្រធានាធិបតី ដូណាល់ ត្រាំ (Donald Trump) បង្កើតក្រុមអភិបាលសន្តិភាព ដែលចិន ជំទាស់
- និងទី៤ រឿងចង់ដូរចិត្តករណីអនុវត្តច្បាប់សមុទ្រក្នុងលម្ហសមុទ្រចិនខាងត្បូង តាមគំនិតសហគមន៍អាស៊ាន ដែលក្រុងប៉េកាំង ចង់ឲ្យប្រទេសកម្ពុជា គាំទ្រសិទ្ធិចិន ដាច់មុខ។ រដ្ឋការក្រុងប៉េកាំង ចាត់ទុកតំបន់អាស៊ីអាគ្នេយ៍ជាទឹកដីក្រោយផ្ទះរបស់ខ្លួន។
ជាមួយគ្នានេះ សម្ព័ន្ធមិត្តបុរាណសហរដ្ឋអាមេរិក ដូចជា អូស្ត្រាលី អង់គ្លេស បារាំង អាល្លឺម៉ង់ ជាដើម កំពុងងាកទៅចងមិត្តដាក់ទុនធ្វើជំនួញជាមួយចិន ខណៈប្រទេសកម្ពុជា កំពុងត្រូវការជំនួយថវិកាជាអនេកនោះ។
ទស្សនាវដី្ត The Diplomat បានស្រង់ការអធិប្បាយពីសាស្ត្រាចារ្យ Bart Édes នៃសាកលវិទ្យាល័យ McGill ប្រទេសកាណាដា ដែលក្រុងប៉េកាំង អាចអធ្យាស្រ័យដល់ការអនុញ្ញាតឲ្យនាវាចម្បាំងសហរដ្ឋអាមេរិក ចូលចតនៅកំពង់ផែរាម បន្ទាប់ពីរាជរដ្ឋាភិបាលខ្មែរបានបំពេញបំណងចិន ដោយចាប់មេខ្លោងឆបោក ចេន ហ្ស៊ី ជាថ្នូរបញ្ជូនឲ្យអាជ្ញាធរចិន ផ្ដន្ទាទោស។
គេមើលឃើញថា ការលេងល្បិចបង្វិលបំភាន់ភ្នែកខាងកិច្ចការក្រៅប្រទេស គឺជាសិល្បៈនយោបាយអ្នកដឹកនាំខ្មែរជាមួយមហាអំណាចជាយូរមកហើយ ប៉ុន្តែជាញយៗ ច្រើនតែធ្វើឲ្យខូចការ ខាតបង់ប្រយោជន៍ជាតិទៅវិញ៕
© 2026, ឌឹ ខេមបូឌា ដេលី. All rights reserved.